Salmo 97:1-12
97 ¡Nataãxẽ, Pa Nhama i Naanex! Rü Pa Muxü̃ i Capaxũgüx ¡rü petaãxẽgü! Erü nüma ya Cori ya Tupana nixĩ i guxü̃arü ãẽ̱xgacü yixĩxü̃.
2 Rü pamüemaxü̃ i caixanexü̃maxã ínaxümaeguãchi. Rü nüma nixĩ i ãẽ̱xgacü i aixcuma mea nangugüxü̃ i wüxichigü i duü̃xü̃güarü maxü̃. Rü aixcuma nawe̱xgu i ngẽma namaxã naxueguxü̃ i wüxichigü.
3 Rü wüxi i üxüema rü nape̱xegu nixũ, rü ngẽmamaxã ínanagu i norü uanügü i nacüwawa ngẽxmagüxü̃.
4 Rü yimá norü ãẽmacü rü nhama i naanewa nanguema. Rü nüma i nhama i naane rü nidu̱xru̱x i ngẽxguma nüxna nanguemagu.
5 Rü nape̱xewa ya Cori ya nhama i naanearü yora ixĩcü rü yima ma̱xpǘnegü rü inadexgü nhama werarüxü̃.
6 Rü guxü̃ma i ngẽma dauxü̃wa nüxü̃ idauxü̃ rü tüxü̃ nüxü̃ nacua̱xẽxẽ nax nüma ya Tupana rü ãẽ̱xgacü ya mecü yixĩxü̃. Rü guxü̃ma i duü̃xü̃gü i nhama i naanecüã̱x rü nüxü̃ nadaugü nax nhuxãcü naxüünexü̃ i nümax.
7 Rü Tupanape̱xewa inarümaxãchitanü i ngẽma duü̃xü̃gü i namaxã taãxẽgüxü̃ i tupananetachicüna̱xãgü rü nüxü̃ icua̱xüü̃güxü̃. Erü guxü̃ma i ngẽma duü̃xü̃gü i namaxã tupanaã̱xgüxü̃ rü Cori ya Tupanape̱xegu inarümaxãchitanü.
8 Pa Corix, yima ĩane ya Yerucharéü̃ rü guxü̃ma ya yima Yudáanearü ĩanegü rü nataãxẽgü namaxã i curü mugü.
9 Erü cumax, Pa Cori ya Guxãétüwa Ngẽxmaxex, rü namaxã icucua̱x i guxü̃ma i nhaa naane. Rü cuma rü guxü̃ma i ngẽma tupananetagüétüwa cungexma.
10 Rü nüma ya Cori ya Tupana rü tüxü̃ nangechaü̃ ya yíxema nüxü̃ oxe i ngẽma chixexü̃. Rü tüxna nadau ya yíxema aixcuma naga ĩnüexe rü tüxü̃ ínapoxü̃ naxme̱xwa i ngẽma chixri maxẽxü̃ i duü̃xü̃gü.
11 Rü ngẽma duü̃xü̃gü i mea maxẽxü̃ca̱x nixĩ i yangunexü̃xü̃. Rü ngẽma taãxẽ i aixcuma ixĩxü̃ rü ngẽma duü̃xü̃gü i tama chixexü̃ ügüxü̃ca̱x nixĩ.
12 Pa Duü̃xü̃gü i Mea Maxẽxü̃x ¡rü namaxã petaãxẽgü ya Cori, rü nüxü̃ pecua̱xüxü̃gü! Erü naxüüne.
