Salmo 99:1-9
99 Nüma ya Cori rü ãẽ̱xgacü nixĩ. Rü norü tochicaxü̃ rü ngẽma taxre i dauxü̃cüã̱xchicüna̱xãgü i ixãxpe̱xátüxü̃arü ngãxü̃wa nangexma. Rü nape̱xewa rü norü muü̃maxã nidu̱xrue i guxü̃ma i nachixü̃anecüã̱xgü rü woo i nhama i naane rü nidu̱xru̱x.
2 Rü nüma ya Cori ya ma̱xpǘne ya Chiã́ũgu ãchiü̃cü rü guxü̃étüwa nangexma. Rü nüma nixĩ i guxü̃ma i nachixü̃anecüã̱x i duü̃xü̃gümaxã inacuáxü̃.
3 Rü name nixĩ i nüxü̃ ticua̱xüü̃güxü̃ ya yimá Cori ya guxãmaxã icuácü rü ãũcümacü erü nüma rü naxüüne.
4 Rü cumax, Pa Corix, rü ãẽ̱xgacü ya poraxüchicü quixĩ rü curü me nixĩ nax meama guxü̃ma i duü̃xü̃gümaxã icucuáxü̃. Rü cumatama nixĩ i nüxü̃ quixuxü̃ nax cupe̱xewa rü nawüxiguxü̃ i guxü̃ma i duü̃xü̃gü. Rü toma nax Iraéutanüxü̃gü tixĩgüxü̃ rü cuma rü aixcuma meama tomaxã icucua̱x rü ngẽma mugü ga toxna cuxãxü̃ rü meama niwe̱x.
5 ¡Rü nüxü̃ pecua̱xüxü̃gü ya yimá Cori ya tórü Tupana ixĩcü! ¡Rü nape̱xegu pecaxã́pü̱xügü! Erü nüma rü naxüüne.
6 Rü gumá Moiché rü Aróũ nixĩ ga Tupanape̱xewa tórü o̱xigüétüwa íchogügüxü̃. Rü nüma ga Chamué ga Tupanaarü orearü uruxü̃ rü norü yumüxẽwa Tupanaarü ngü̃xẽẽca̱x ínaca. Rü nüma ga Cori ya Tupana rü nanangãxü̃ga ga norü yumüxẽ.
7 Rü nüma ga Tupana rü yema caixanexü̃wa Moichémaxã rü Aróũmaxã nidexa rü nümagü rü meama nayanguxẽxẽ ga norü mugü ga nüxna naxãxü̃.
8 Rü cumax, Pa Cori Pa Torü Tupanax, rü cunangãxü̃güxü̃. Rü cuma rü yema torü o̱xigüxü̃ cupoxcue ga yexguma chixexü̃ naxügügu, notürü nüxü̃́ nüxü̃ icurüngüma ga norü chixexü̃ ga yexguma Moiché rü Aróũ naétüwa chogügügu.
9 ¡Rü nüxü̃ pecua̱xüxü̃gü ya yimá Cori ya tórü Tupana ixĩcü! ¡Rü yima napata ya norü ma̱xpǘne ya üünenewa ngexmanepe̱xegu pecaxã́pü̱xügü! Erü nüma ya Cori ya tórü Tupana rü naxüüne.
