Tiago 2:1-26
2 Pa Chaueneẽgüx, pema rü nüxü̃́ pejaxõgü ja tórü Cori ja Ngechuchu ja Cristu ja mexẽchicü. Rü ngẽmaca̱x tama name na chixriãcü penajaxuxü̃ i nhuxre i duü̃xü̃gü rü meã penajaxuxü̃ i togü.
2 Rü ngẽxguma chi perü ngutaque̱xegu naxücuxgu i wüxi i jatü i uirumaã aneraã́xü̃ rü mexchiruxü̃, rü ngẽxgumarüü̃ chi ta ngẽxma naxücuxgu i wüxi i jatü i ngearü dĩẽruã́xü̃ rü w̱exachiruxü̃, rü name nixĩ i guxü̃xü̃ma wüxigu meã pejaxu.
3 Notürü tama name ega meã penajau̱xgu i ngẽma mexchiruxü̃ rü:
“¡Nuã mexü̃ i naxma̱xwe̱xewa rüto!” nhapegüxü̃ nüxü̃, notürü ngẽma w̱exachiruxü̃xü̃ rü:
“¡Cuma rü ngẽxmatama nachi, rü e̱xna jea nhatüanewa rüto!” nhapegüxü̃ nüxü̃.
4 Rü ngẽxguma tama wüxigu meã penajau̱xgu i ngẽma taxre, rü pewatama nango̱x na tama aixcuma guxãxü̃ pengechaü̃güxü̃ rü chixexü̃ i duü̃xü̃gü peixĩgüxü̃ ega ngẽmaãcü chixri penajau̱xgu i duü̃xü̃gü.
5 Pa Chaueneẽgü ja Pexü̃ Changechaü̃güxex, ¡Iperüxĩnüẽ i nhaã ore! Tupana tüxü̃ nidexechi ja jíxema ngearü dĩẽruã̱xgüxe i nhama i naãnewa na meã nüxü̃́ tajaxõgüxü̃ca̱x. Erü nanaxwa̱xe i tanajauxgü i ngẽma maxü̃ i taguma gúxü̃ i tümamaã inaxunetaxü̃ ja jíxema nüxü̃ ngechaü̃güxe.
6 Notürü pema rü chixri penajaxu i ngẽma duü̃xü̃gü i ngearü dĩẽruã̱xgüxü̃ rü meã penajaxu i ngẽma duü̃xü̃gü i dĩẽruã̱xgüxü̃. ¿Taux e̱xna ngẽma dĩẽruã̱xgüxü̃ jiĩxü̃ i ngẽma chixri pemaã maxẽxü̃ rü ãẽ̱xgacügüxü̃tawa pexü̃ íjaxuaxü̃güxü̃?
7 Rü ngẽma dĩẽruã̱xgüxü̃ nixĩ i chixexü̃ namaã ixugüexü̃ ja Cristu ja perü Cori ja mexẽchicü.
8 Tupanaãrü orewa nangẽxma i norü mu i guxü̃ i mugüarü jexeraxü̃ i nhaxü̃:“¡Nüxü̃ nangechaü̃ i cumücü ngẽma na cugütama cungechaü̃xü̃rüü̃!”
nhaxü̃. Rü ngẽxguma aixcuma naga pexĩnüẽgu i ngẽma mu, rü mexü̃ pexü.
9 Notürü ngẽxguma meã penajau̱xgu i wüxi i jatü i mexchiruxü̃ rü chixri penajau̱xgu i ngẽma w̱exachiruxü̃, rü pecadu pexü. Rü Tupanape̱xewa pechixexü̃gu erü tama naga pexĩnüẽ i ngẽma pexü̃ namuxü̃.
10 Erü ngẽxguma chi texé naga ĩnügu i guxü̃ma i Tupanaãrü mugü notürü chi wüxiwatama ítatüxgu na tama naga taxĩnüxü̃, rü chi nhama guxü̃ma i Tupanaãrü mugüga tama taxĩnüxü̃rüü̃ tachixexü̃gu.
11 Erü nümatama ja Tupana ga nhacü:“¡Tãũxü̃táma naĩ i nge i ãtecümaã cungẽãẽ!” nhacü,
rü nhanagürü ta:“¡Tãũxü̃táma cumáẽta!”
nhanagürü. Rü ngẽxguma chi tama naĩ i nge i ãtecümaã cungeãẽ̱xgu, notürü cumáẽtagu, rü tama aixcuma meã naga cuxĩnü i ngẽma Tupana tüxü̃ muxü̃.
12 Rü ngẽmaca̱x name nixĩ na meã peidexagüxü̃ rü meã pemaxẽxü̃. Erü Tupana tá pexna naca i perü maxü̃chiga ngoxi Cristu pexü̃ muxü̃ãcüma pemaxẽ rü e̱xna tama. Rü ngẽma Cristu tüxü̃ muxü̃ nixĩ na jigü ingechaü̃güxü̃.
13 Erü guxãma ja jíxema tama tümamücügü tüxü̃́ ngechaü̃tümüü̃güxe, rü Tupana rü tãũxü̃táma nüxü̃́ tangechaü̃tümüü̃güãcüma tüxna naca i tümaãrü maxü̃chiga. Notürü jíxema tümamücügü tüxü̃́ ngechaü̃tümüü̃güxe, rü tãũxü̃táma tamuü̃ẽ i ngẽxguma Tupana tüxna caxgu, erü nüxü̃́ tangechaü̃tümüü̃güãcüma tá tüxna naca.
Ega aixcuma jaxõgügu, rü tanaxwa̱xe i mexü̃ taxügü rü nüxü̃ tarüngü̃xẽẽ i togü
14 Pa Chaueneẽgüx, ¿Ṯacüwa namexü̃ ega wüxie:
“Chama rü Tupanaãxü̃́ chajaxõ”, nhagügu, notürü tama mexü̃ taxü̱xgu? ¿Pexca̱x rü Tupana tá tüxü̃ maxẽẽxü̃ ega ngẽmaãcü tajaxõ̱xgux?
15 2:15-16 Rü ngẽxguma chi wüxi i taeneẽ rü e̱xna taeja̱x i jaxõxü̃ rü nangexchirugu rü nangewemügu, rü chi wüxie i pema rü nhapegügu:“¡Mexü̃ cuxü̃ üpetü, rü icu̱xcuchi na tama cuxü̃ nadejuxü̃ca̱x, rü meã nachibü!” nhagügu, rü ¿ṯacüwa name i ngẽma ega tama nüxna tanaxãxgu i ngẽma nüxü̃́ taxuxü̃?
16 Nüü̃ nadau 2:15
17 Rü ngẽxguma jaxõmaregu notürü tama mexü̃ ixü̱xgu, rü tama togüxü̃ rüngü̃xẽẽgu, rü ¿ṯacüwa namexü̃ i ngẽmaãcü na jaxõxü̃?
18 Erü ngẽxguma cujaxõmaregu notürü tama mexü̃ cuxü̱xgu, rü ngürüãchi tá wüxie nhatarügü cuxü̃:
“Cuma rü cujaxõmare notürü chama rü chajaxõ rü nhu̱xmachi mexü̃ chaxü ta. Rü ¿nhuxãcü tá nüxü̃ chacuáxü̃ na cujaxõxü̃ ega tama mexü̃ cuxü̱xgux? Notürü chama rü chorü ü i mexü̃maã tá cuxü̃ nüxü̃ chadauxẽẽ na aixcuma chajaxõxü̃”, nhatarügü tá cuxü̃.
19 Cuma cujaxõ na nangẽxmaxü̃ ja wüxitama ja Tupana. Marü name. Notürü ṉg̱oxogü rü ta ngẽmaãcü najaxõgü, rü poraãcü nidu̱xru̱xe erü Tupanaxü̃ namuü̃ẽ.
20 Pa Jatü ja tama Meã Nagu Rüxĩnücüx, cuma rü tama nüxü̃ cucua̱x i ngẽxguma cujaxõmaregu rü tama mexü̃ cuxü̱xgu, rü taxuwama name i ngẽmaãcü na cujaxõxü̃.
21 Tupana nüxü̃ ixuxgu rü nuxcümaxü̃cü ga tórü o̱xi ga Abrã́ũ rü wüxi ga jatü ga mecü nixĩ. Jerü mexü̃ naxü rü Tupanaga naxĩnü ga jexguma namaã nüxü̃ jaxuxgu na naxca̱x jamáãxü̃ca̱x ga nane ga Isaqui.
22 Rü ngẽmawa nüxü̃ tacua̱x rü tama najaxõmare ga Abrã́ũ, notürü mexü̃ naxü ta. Rü jema naxüxü̃wa tüxü̃ nüxü̃ nacua̱xẽẽ na aixcuma Tupanaãxü̃́ jaxõõxü̃.
23 Rü jemaãcü ningu ga jema ore ga ümatüxü̃ ga nhaxü̃:“Abrã́ũ rü Tupanaãxü̃́ najaxõ rü jemaca̱x Tupana nüxü̃ nixu na mecü jiĩxü̃ jerü nüxü̃́ najaxõ. Rü nüxü̃ nixu ta na namücü jiĩxü̃ ga Abrã́ũ”.
24 Rü ngẽmawa nüxü̃ tadau na Tupana namaã taãẽxü̃ ja jima jatü ja mexü̃ ücü rü tama jaxõmarecü.
25 Rü jemaãcü ta ngĩmaã nangupetü ga nuxcüma ga Raábe. Rü Tupana ngĩmaã nataãẽ jerü mexü̃ ixü ga jexguma meã najauxãgu ga ngĩpatawa ga jema orearü ngeruü̃gü ga Judéugü. Rü ngĩgagu namaxẽ ga jema orearü ngeruü̃gü jerü to ga namagu ijamugü ga jexguma norü uwanügü nadaixchaü̃gu. Rü woo ga ngĩma rü chixri na namaxü̃xü̃ ga noxrix, notürü mexü̃ ixü jerü ijaxõ, rü jemaca̱x Tupana ngĩmaã nataãẽ.
26 Rü wüxi i naxü̃ne rü taxuwama name rü najumare ega natau̱xguma i naãẽ. Rü ngẽxgumarüü̃ ta nixĩ na taxuwama namexü̃ na jaxõmarexü̃ ega taxuü̃ma i mexü̃ ixü̱xgux.
