Tiago 4:1-17
4 ¿Tü̱xcüü̃ pegümaã penuẽ rü pegü pedai? Pegümaã penuẽ erü pexü̃́ nangẽxma i ngẽma perü ngúchaü̃gü i chixexü̃gü.
2 Pema pexü̃́ nangúchaü̃ i ngẽma pexü̃́ taxuxü̃ notürü taxuacüma pexü̃ nanguxü̃, rü ngẽmaca̱x pejama̱x i togü. Rü norü ngẽmaxü̃ca̱x peixauxãchie notürü taxuacüma pexü̃ nanguxü̃ẽ́ga, rü ngẽmaca̱x pegümaã penuẽ, rü pegü pedai. Rü tama penajauxgü i ngẽma penaxwa̱xexü̃ erü tama Tupanana naxca̱x peca.
3 Rü ngẽxguma naxca̱x ípecaxgu, rü tama penajaxu, erü naxca̱x ípeca i ngẽma tama Tupana pexü̃́ naxwa̱xexü̃. Rü ngẽma pematama penaxwa̱xexü̃ nixĩ i naxca̱x ípec̱axü̃ na namaã pegütama petaãẽxẽẽmarexü̃ca̱x.
4 Pa Duü̃xü̃gü i Chixri Maxẽxü̃x, ¿Tama e̱xna nüxü̃ pecua̱x rü ngẽxguma nhama i naãnexü̃ pengechaü̃gu rü Tupanamaã perüxuwanüxü̃? Erü texé ja nhama i naãnexü̃ ngechaü̃xẽ rü Tupanamaã tarüxuwanü.
5 Rü tama notüca̱xma nixĩ i ngẽma Tupanaãrü ore i nhaxü̃:“Ngẽma Naãẽ i Üünexü̃ i Tupana tüxna muxü̃ rü tüxü̃ ninuxü̃ erü noxrü tixĩ rü tüxü̃ nangechaü̃”,
nhaxü̃.
6 Notürü Tupana rü tüxü̃ narüngü̃xẽẽ na namaã iporaexü̃ca̱x i guxü̃ma i nhama i naãneãrü ngúchaü̃ i chixexü̃. Rü ngẽmaca̱x norü orewa rü nhanagürü:“Tupana rü tümamaã nanu ja jíxema tügü írütagüxe, notürü tüxü̃ narüngü̃xẽẽ ja jíxema tügü írüxíragüxe”,
nhanagürü.
7 Pa Chaueneẽgüx, ¡Meã Tupanaga pexĩnüẽ! ¡Rü nüxü̃ pexoó i ṉg̱oxo i Chataná! Rü nüma rü tá pexna ninha.
8 ¡Tupanana pengaicamagü! Rü nüma rü tá ta pexna nangaicama. Rü pemax, Pa Pecaduã̱xgüxü̃x, ¡nüxü̃ perüxoe i pecüma i chixexü̃! Rü pemax, i Tupanawe rüxĩxchaü̃xẽ notürü nhama i naãnewe rü ta rüxĩxchaü̃xẽ, ¡penamexẽẽ̱x i perü maxü̃ na Tupanaca̱xicatama pemaxẽxü̃ca̱x!
9 ¡Pegümaã pengechaü̃gü rü pexauxe erü pepecaduã̱x! Rü texé ja nhama i naãneãrü taãẽwa cugüxe, rü name nixĩ i tügümaã taxauxe. Rü texé ja tümacüma i chixexü̃maã taãxẽ́xẽ, rü name nixĩ i Tupanape̱xewa tügümaã tangechaü̃.
10 Rü name nixĩ i Cori ja Tupanape̱xegu pecaxãpü̱xügü rü namaã nüxü̃ peixu na taxuwama pemexü̃. Rü ngẽxguma i nüma rü tá pexü̃ nicua̱xüü̃ rü pexü̃ nataxẽẽ.
Tama name i chixexü̃gu cueneẽmaã curüxĩnü
11 Pa Chaueneẽgüx, ¡Tãṹ i chixexü̃maã pegü peixugüxü̃! Erü jíxema chixexü̃maã tümaẽneẽchigagu idexáxe rü e̱xna chixexü̃maã nüxü̃ dawenüxẽ, rü chixe nüxü̃ tawogü ta i Tupanaãrü ore. Rü ngẽxguma chixexü̃gu Tupanaãrü oremaã curüxĩnügu, rü Tupanaãrü orearü jexera cugü cuixĩxẽẽchaü̃ erü tama aixcuma naga cuxĩnü.
12 Tupanaxĩcatama nixĩ ja tüxna naxãcü i norü mugü rü nhu̱xmachi tá tüxna c̱acü rü ngoxi naga ixĩnüẽ i ngẽma norü ore. Rü nümatama nixĩ i nüxü̃́ nangẽxmaxü̃ i pora na tüxü̃ namaxẽxẽẽxü̃ rü e̱xna tüxü̃ najuexẽẽxü̃. ¿Notürü texé cuiĩxü̃ i cumax rü ngẽmaca̱x cunangugüxü̃ na nhuxãcü namaxü̃xü̃ i cumücü?
Taxúema nüxü̃ tacua̱x na ṯacü tá tüxü̃ ngupetüxü̃ i moxü̃ãrü ngunexü̃gu
13 ¡Choxü̃́ iperüxĩnüẽ i pema na nhapegügüxü̃:
“Nhu̱xma rü e̱xna moxü̃ tá náĩ ja ĩãnewa taxĩ, rü wüxi ja taunecü tá ngẽxma tajajaxu, rü tá ngẽ́ma tataxegü na mucü i dĩẽru ngĩxü̃ ijaxuxü̃ca̱x”, nhaperügügü!
14 Pema rü tama nüxü̃ pecua̱x na ṯacü tá pexü̃ üpetüxü̃ i moxü̃. ¿Ṯacü nixĩ i perü maxü̃? Perü maxü̃ rü nhama wüxi i cherena i paxaãchi nüxü̃ idauxü̃ rü ngẽxgumatama ngupetüxü̃rüü̃ tá inajarüxo.
15 Rü narümemaẽ nixĩ na nhapegüxü̃:
“Ngẽxguma chi nanaxwa̱xegu ja Cori ja Tupana na imaxẽxü̃, rü chi tanaxü i nhaã puracü i nagu rüxĩnüẽxü̃”, nhapegüxü̃.
16 Notürü i pema rü pegü peicua̱xüü̃güchaü̃. Rü guxü̃ma i ngẽma rü tama name.
17 Jíxema nüxü̃ cuáxe na nhuxãcü Tupanape̱xewa meã tamaxü̃xü̃, notürü tama naxǘxe, rü pecadu taxü.
