Tiagu 1:1-27
1 Pa Chautanüxü̃gü i Judéugü i Ngechuchuaxü̃́ Jaxõgüxü̃ i Guxü̃ i Naãnewa Ngẽxmagüxü̃x, chama i Tiagu pexü̃ charümoxẽ. Rü chama nixĩ i Tanatü ja Tupana rü tórü Cori ja Ngechuchu ja Cristuaxü̃́ chapuracüxü̃.
Ngẽma cua̱x i aixcuma Tupanawa ne ũxü̃chiga
2 Pa Chaueneẽgü i Jaxõgüxü̃x, name nixĩ na petaãẽgüxü̃ i ngẽxguma nagúxü̃raü̃xü̃ i guxchaxü̃gü pexca̱x ínguxgu.
3 Erü pema nüxü̃ pecua̱x rü ngẽxguma meã pejaxõgüamagu ega woo ṯacü rü guxchaxü̃ pexü̃ üpetügu rü wüxi i mexü̃ nixĩ i ngẽma. Erü ngẽmaãcü nixĩ ja Tupana i pexü̃ naporaexẽẽxü̃ na jexeraãcü meã nüxü̃́ pejaxõgüxü̃ca̱x.
4 Rü name nixĩ na peporaexü̃ na aixcuma Tupanape̱xewa pemexü̃ca̱x, rü naxca̱xicatama pemaxẽxü̃ca̱x, rü taxuwama nachixexü̃ca̱x i perü maxü̃.
5 Ngẽxguma chi wüxie i petanüwa tama meã nüxü̃ cua̱xgu na ṯacü tüxü̃́ nanaxwa̱xexü̃ ja Tupana, rü name nixĩ i nüxna naxca̱x taca i cua̱x, rü nüma tá guxü̃ma i norü ngúchaü̃maã tüxna nanaxã. Erü Tupana meãma guxü̃ i duü̃xü̃güna nanaxã i cua̱x, rü tama najanuxü̃, rü taxúexü̃ma nanga.
6 Notürü ngẽxguma naxca̱x ítacaxgu rü tanaxwa̱xe na aixcuma tajaxõxü̃ rü tá na tanajaxuxü̃ i ngẽma naxca̱x ítac̱axü̃. Rü tama name na nagu tarüxĩnüxü̃ rü tãũxü̃táma tanajaxuxü̃. Erü jíxema tama meã jaxṍxẽ, rü nhama taxtüarü juãpe i buanecümaã guxü̃wama c̱uexü̃rüü̃ tixĩ i tümaãrü maxü̃wa.
7 1:7-8 Rü jíxema duü̃xẽ ja nhu̱xma meã jaxṍxẽ rü moxü̃ rü tama meã jaxṍxẽ, rü taxucürüwama nagu tarüxĩnü na ṯacü Tupanaxü̃tawa tajaxuxü̃. Erü jíxema duü̃xẽ ja ngẽmaãcü jaxṍxẽ, rü tümaãrü maxü̃wa rü tama aixcuma wüxigutama tarüxĩnü.
8 Nüü̃ nadau 1:7
9 Rü jíxema jaxṍxẽ ja tama muãrü dĩẽruã́xẽ, rü name nixĩ i tataãẽ erü Tupanaxãcü tixĩ rü tümamaã nataãẽ.
10 Rü jíxema jaxṍxẽ ja muãrü dĩẽruã́xẽ rü name nixĩ i tataãẽãma ega woo wüxi i ngunexü̃ düxwa tüxü̃́ natau̱xgu i tümaãrü dĩẽru. Erü ngẽma dĩẽruã́xü̃ i duü̃xü̃gü, rü nhama putürachacurüü̃ tama natai.
11 Rü ngẽxguma nangunagügu ja üa̱xcü rü poraãcü nangu̱xetügu, rü narüṉẖexẽ i ngẽma putüra rü narüngu i nachacu, rü ngẽxma nagu̱x na namexü̃. Rü ngẽxgumarüü̃ tá ta naju i ngẽma dĩẽruã̱xü̃chixü̃ rü ngẽxma tá najarüxo i norü guxü̃ma.
Tupana tüxü̃ naxü, notürü tama chixexü̃maã tüxna naxĩnü
12 Rü nataãẽ ja jima jatü ja meãma jaxõõmacü i ngẽxguma Tupana nüxü̃ ü̱xgu. Erü ngẽxguma ngẽmaãcü jaxna namaã naxĩnüãmagu, rü Tupana tá namaã nataãẽ rü tá nüxna nanaxã i norü ãmare i mexü̃ i taguma gúxü̃. Rü ngẽma nixĩ i ãmare i Tupana tümamaã ixunetaxü̃ ja jíxema nüxü̃ ngechaü̃güxe.
13 Notürü ngẽxguma ṯacü nüxna ĩnügu ja wüxi ja jatü na chixexü̃ naxüxü̃ca̱x rü tama name na:
“Tupana choxna naxĩnü”, nhaxü̃. Erü Tupana rü taguma nagu narüxĩnü na chixexü̃ naxüxü̃ rü taxúenama naxĩnü na chixexü̃ taxüxü̃ca̱x.
14 Notürü ngẽma chixexü̃ i tümatama nagu tarüxĩnüxü̃ nixĩ i tüxna ĩnüxü̃ rü chixexü̃gu tüxü̃ nguxẽẽxü̃.
15 Rü ngẽma chixexü̃ i tümatama nagu tarüxĩnüxü̃ nixĩ i tüxü̃ pecaduã̱xẽẽxü̃. Rü ngẽma pecadugagu nixĩ i düxwa itajarütaxuxü̃.
16 Pa Chaueneẽgü ja Pexü̃ Changechaü̃güxex, tama name i pegütama pewomüxẽẽgü.
17 Erü guxü̃ma i ngẽma aixcuma mexü̃ i tüxü̃́ ngẽxmaxü̃, rü naxü̃tawa ne naxũ ja Tupana ja dauxü̃gucü ga naxücü ga üa̱xcü rü tawemacü rü woramacurigü rü ẽxtagü. Rü nüma rü guxü̃guma nanaxa̱i̱xrügumaraxü̃ rü taguma naxüchicüü.
18 Rü nüma nixĩ ga tüxna naxããxü̃ ga norü ore i aixcuma ixĩxü̃ na ngẽmaãcü tüxü̃́ nangẽxmaxü̃ca̱x i maxü̃ i taguma gúxü̃. Rü jemaãcü nanaxü jerü nanaxwa̱xe na jixira nüxü̃́ na jaxõgüxü̃, rü jixcama i togü.
Nhuxãcü aixcuma Tupanaãxü̃́ tajaxõ
19 Pa Chaueneẽgü ja Pexü̃ Changechaü̃güxex, rü ngẽxguma texé pemaã nüxü̃ ixuxgu i Tupanaãrü ore, rü name nixĩ i meã iperüxĩnüẽ. Rü tama name i tüxü̃ pechoxü̃gagü.
20 Erü ngẽxguma nanuxgu i wüxi i duü̃xü̃, rü tama Tupanaãrü ngúchaü̃ naxü.
21 Rü ngẽmaca̱x name nixĩ i nüxü̃ perüxoe i guxü̃ma i ngẽma chixexü̃gü i guxü̃wama ngẽxmagüxü̃. ¡Rü meã penajaxu i ngẽma ore i Tupana pexna ãxü̃! Erü ngẽmawa pexü̃́ nangẽxma i maxü̃ i taguma gúxü̃.
22 Rü tama name i iperüxĩnüẽmare i ngẽma ore, notürü name nixĩ i penaxü i ngẽma pemaã nüxü̃ jaxuxü̃. Erü ngẽxguma iperüxĩnüẽmaregu rü tama penaxü̱xgu, rü pegütama pewomüxẽẽgümare.
23 Erü jíxema irüxĩnümarexe i Tupanaãrü ore notürü tama naxǘxe i ngẽma nüxü̃ jaxuxü̃, rü wüxi i jatü i woruawa nügü dauchametüxü̃rüü̃ tixĩ.
24 Erü nügü nadauchametü, notürü ngẽxguma jaxũgachigu rü marü nüxü̃ inajarüngüma na nanhuxchametüraü̃xü̃ i noxrix.
25 Notürü jíxema guxü̃guma meã nüxü̃ daumatüxe rü naga ĩnüxẽ i ngẽma ore i aixcuma ixĩxü̃ i pecaduwa tüxü̃ ínguxuchixẽẽxü̃, rü Tupana rü tá aixcuma guxü̃wama tüxü̃ narüngü̃xẽẽ. Erü tama ngẽma orexü̃ taxĩnümare, notürü tanaxü i ngẽma tümamaã nüxü̃ jaxuxü̃.
26 Rü ngẽxguma chi wüxie nagu rüxĩnügu na meãma Tupanaxü̃ tacuáxü̃ notürü tama nüxna tada̱xgu ja tümaãrü conü i tümaãrü orewa, rü tügütama tawomüxẽẽ, rü tama aixcuma Tupanaãxü̃́ tajaxõ.
27 Notürü ngẽma nacüma i Tanatü ja Tupanape̱xewa aixcuma üünexü̃, rü ngẽma nixĩ na nüxü̃ tarüngü̃xẽẽxü̃ i tacutagü rü jutegüxü̃ rü tügüna tadauxü̃ na tama nhama i naãneãrü chixexü̃gu taxücuxü̃.
