Tiagu 3:1-18
3 Pa Chaueneẽgüx, tama name i muxẽma i pema rü ngu̱xẽẽtaexü̃gü pegü peixĩgüxẽẽchaü̃. Erü pema nüxü̃ pecua̱x na jixema i ngu̱xẽẽtaexü̃gü na ixĩgüxü̃, rü guxü̃ i duü̃xü̃güarü jexera tá tüxna naca ja Tupana tórü maxü̃chiga rü tórü puracüchiga.
2 Guxãma i jixema rü muẽ̱xpü̱xcüna chixexü̃ taxüe. Jima jatü ja taguma chixexü̃xü̃ ixucü rü aixcuma mecü nixĩ, erü nüxü̃ nacua̱x na nhuxãcü guxü̃wama nügüna nadauxü̃ na tama chixexü̃ naxüxü̃ca̱x.
3 Rü ngẽma na taga naxĩnüxü̃ca̱x i wüxi i cowaru, rü tanaxwa̱xe na naxütü̱xünáguxü̃ na ngẽmaãcü jixema inaxwa̱xexü̃ãcüma meã ijaxũxü̃ca̱x.
4 ¡Dücax nagu perüxĩnüẽ ja wapurugü ja buanecüarü poramaã ixũxü̃ne! Rü woo nitaxüchi rü buanecü ja taxüchicümaã inicuegü, notürü íraxü̃ i toxchinüxü̃maã nanatoxchinü i norü toxpe̱xeruü̃, rü ngextá nüma ínanaxwa̱xexü̃wa nanaxũxẽẽ.
5 3:5-6 Rü ngẽxgumarüü̃ ta nixĩ ja tórü conü rü woo na naxírachiréxü̃, notürü namuxũchi i norü ore. Rü wüxitama i üxüarü j̱auraxü̃ i íraxü̃wa inaxügü na jaxaxü̃ i taxü̃ma i naãne. Rü tórü conü rü nhama wüxi ja üxürüü̃ nixĩ. Rü taxünewa rü wüxi i taxü̃ i chixexü̃ nixĩ ja jima tórü conü erü nanachixexẽẽ i guxü̃ma i tórü maxü̃. Rü ngẽma Tupana ṉg̱oxogüxü̃ ípocuexü̃gune ja üxüemawa ne naxũ i ngẽma chixexü̃ i namaã jadexaxü̃ ja tórü conü. Rü ngẽma chixexü̃maã nanachixexẽẽ i guxü̃ma i tórü maxü̃.
6 Nüü̃ nadau 3:5
7 Duü̃xü̃gü rü nüxü̃ nacua̱x na íjapuxẽẽãxü̃ rü nüxna nachogüxü̃ i nagúxü̃raü̃xü̃ i naẽxü̃gü i idüraexü̃, rü werigü, rü ãxtapegü, rü choxnigü.
8 Notürü taxúema nüxü̃ tacua̱x na nüxna tachogüxü̃ ja tümaãrü conü. Erü wüxi i chixexü̃ i taxü̃ i taxucürüwama texé ijarüxoxẽẽxü̃ nixĩ. Rü ngẽma norü dexa rü ü̃ü̃rüü̃ tüxü̃ najuxẽẽ.
9 Rü jima tórü conümaã nüxü̃ ticua̱xüü̃ ja Tanatü ja Tupana, rü jimamaãtama chixexü̃ namaã tixugüe ta i duü̃xü̃gü i Tupana nügüãcü üxü̃.
10 Rü ngẽma taa̱xmaã, rü meã duü̃xü̃güchiga tidexagü, notürü ngẽmatama taa̱xmaã rü namaã taguxchigagü ta. Pa Chaueneẽgüx, tama name na ngẽmaãcü jiĩxü̃.
11 Wüxi i dexáarü chuxchuxü̃watama rü taxuacüma ínaxũxũ i dexá i mexü̃ rü dexá i chixexü̃.
12 Pa Chaueneẽgüx, wüxi i figuera rü taxuacüma oriwaarü omaã naxo, rü wüxi i uwa rü taxuacüma figueraarü omaã naxo. Rü ngẽxgumarüü̃ ta wüxi i dexáarü chuxchuxü̃ i jucürachiüxü̃wa, rü taxuacüma ínaxũxũ i dexá i mexü̃.
Ngẽma cua̱x i aixcuma ixĩxü̃
13 Ngẽxguma chi petanüwa nangẽxmagu i wüxi i duü̃xü̃ i nüxü̃ cuáxü̃ rü meã naãẽxü̃ cuáxü̃, rü name nixĩ na meã namaxü̃xü̃ rü mexü̃ na naxüxü̃ rü tama nügü jacua̱xüü̃xü̃ na ngẽmaãcü pexü̃ nüxü̃ nadauxẽẽxü̃ca̱x na aixcuma wüxi i duü̃xü̃ i nüxü̃ cuáxü̃ jiĩxü̃.
14 Notürü ngẽxguma chi peixauxãchiwa̱xegügu rü togüchi pexaiegu rü norü jexera pegü peixĩxẽẽchaü̃gu, rü taxuacüma pegügu perüxĩnüẽ na mexü̃gü rü nüxü̃ cua̱xgüxü̃ peixĩgüxü̃. Rü wüxi i dora i taxü̃ nixĩ i ngẽma ega ngẽmaãcü peixĩgügu.
15 Erü ngẽma na ixauxãchiwa̱xegüxü̃ rü duü̃xü̃güchi na ixaiexü̃ rü norü jexera jigü na ixĩgüxẽẽchaü̃xü̃, rü tama Tupanawa ne naxũ, notürü nhama i naãnecü̱̃ã̱xwa rü ṉg̱oxo i Chatanáwa nixĩ i ne naxũxü̃.
16 Erü ngextá auxãchi ítaxü̃wa rü duü̃xü̃gü nügü írüjexeraxẽẽchaü̃xü̃wa, rü ngẽ́ma rü taxuü̃ma meã inixũ rü nagúxü̃raü̃xü̃ i chixexü̃ nangẽxma.
17 Notürü guxãma ja jíxema aixcuma tüxü̃́ nangẽxmaxẽ i ngẽma cua̱x i Tupanawa ne ũxü̃, rü aixcuma meã tamaxẽ rü guxãmaã tamecümagü, rü meã duü̃xẽxü̃ tajauxgü i tümapatawa, rü meã itarüxĩnüẽ i tümamücüarü ucu̱xẽ, rü guxü̃ i duü̃xü̃gü tüxü̃́ nangechaü̃tümüü̃gü, rü guxãmaãma tügü tawüxiguxẽẽgü, rü tixaixcumagü, rü mexü̃ taxügü.
18 Rü jíxema naxca̱x daugüxe na duü̃xü̃gü nügümaã irüngüxmüẽxü̃, rü wüxi i mexü̃ taxügü. Erü ngẽmawa tá nüxü̃ tadaugü na aixcuma meã Tupanaca̱x namaxẽxü̃ i ngẽma duü̃xü̃gü.
