Tiagu 5:1-20
5 Pa Duü̃xü̃gü i Dĩẽruã̱xgüxü̃x, ¡Iperüxĩnüẽ i nhaã ore! ¡Pexauxe rü aita pexüe erü chixexü̃ tá pexü̃ naxüpetü!
2 Perü ngẽmaxü̃gü rü marü nangaue, rü ngẽma pexchiru i mexẽchixü̃ rü nawe nanangṍmü.
3 Perü uiru rü perü dĩẽru rü ngẽxma naxãü̃tanü rü ngẽxma nangaue. Rü ngẽma norü ãü̃tanü rü wüxi i perü cua̱xruü̃ tá nixĩ na pema rü tá ta ipejarütauxexü̃ nhama ṯacü üxüwa ixaxü̃rüü̃. Tupana ngĩxü̃ nadau i perü dĩẽru i ngĩmaã penguü̃xcü, rü ngẽmaca̱x tá pexü̃ napocu i naãneãrü gu̱xgu.
4 Rü jema perü puracütanüxü̃ ga tama meã nüxü̃́ penaxütanüxü̃, rü nhu̱xma rü ngĩxca̱x nidexagü ga jema dĩẽru ga tama nüxna ngĩxü̃ pexãcü. Rü Tupana ja guxããrü Cori rü ngẽma duü̃xü̃güxü̃ naxĩnü na ngĩxca̱x jadexagüxü̃ ga jema dĩẽru ga nüxü̃́ ngĩxü̃ pengetanücü ga peanewa na napuracüexü̃ca̱x.
5 Rü nhama i naãnewa rü pegü penga̱xãẽgü rü pemepata rü pemuãrü ngẽmaxü̃ã̱xgü rü petaãẽgü rü meã pechibüe. Notürü nawa tá nangu na ngẽmaca̱x Tupana tá pexü̃ pocuexü̃.
6 Rü pema penapocue rü penadai i ngẽma duü̃xü̃gü i taxuü̃ma i chixexü̃ pemaã üchiréxü̃. Rü nümagü rü pexü̃ narüturamaẽgü, rü taxuacüma nügü ínapoxü̃gü.
Tanaxwa̱xe i tajumuxẽ rü meã ítanaṉg̱uxẽẽ ja Cori ja Tupana
7 Rü nhu̱xma Pa Chaueneẽgüx, rü name nixĩ i meã ípenaṉg̱uxẽẽ nhu̱xmatata ínangu ja Cori ja Tupana. Rü dücax, jíxema naãnewa puracüxe rü meã ítanaṉg̱uxẽẽ ja pucü na naxügüxü̃ca̱x i tümanetü. Rü nhu̱xmachi nhuxre ja tawemacü ítanaṉg̱uxẽẽ na najaxü̃ i tümanetüarü o, rü ngẽxguma rü tá tajabuxgü.
8 Rü pema rü ta penaxwa̱xe na meã ípenaṉg̱uxẽẽxü̃ na ínanguxü̃ ja Cori ja Tupana. ¡Rü petaãẽgü, rü tãṹ i nüxü̃ perüc̱ẖauexü̃ na ípenaṉg̱uxẽẽxü̃! Erü marü ningaica na ínanguxü̃ ja tórü Cori.
9 Pa Chaueneẽgüx, name nixĩ i nüxü̃ perüxoe na pegüchigaxü̃ peixuechaü̃ na tama ngẽmaca̱x pexna nac̱axü̃ca̱x ja Tupana. Erü marü ningaica na ínanguxü̃ na duü̃xü̃güxü̃ jacagüxü̃ca̱x i norü maxü̃chiga.
10 Pa Chaueneẽgüx, name nixĩ i nüxna pecua̱xãchie ga jema nuxcümaü̃güxü̃ ga Tupanaãrü orearü uruü̃gü ga na nhuxãcü jaxna namaã naxĩnüẽxü̃ ga jexguma ngúxü̃ jangegügu. Rü name nixĩ i pema rü ta ngẽxgumarüü̃ jaxna namaã pexĩnüẽãma rü Tupanaca̱x pemaxẽãma ega ngúxü̃ peingegügu.
11 Rü jixema nüxü̃ tacua̱x na nataãẽgüxü̃ ga jema duü̃xü̃gü ga meã Tupanaca̱x maxẽãmaxü̃ ga jexguma ngúxü̃ nüxü̃ üpetügu. Rü pema nüxü̃ pecua̱x ga nhuxãcü meã namaxama ga guma Jo ga jexguma ngúxü̃ nüxü̃ üpetügu. Rü nüxü̃ pecua̱x ga jixcama ga na nhuxãcü tórü Cori ja Tupana poraãcü nüxü̃ rüngü̃xẽẽxü̃. Erü nüma ja tórü Cori ja Tupana rü namecümaxü̃chi rü poraãcü nüxü̃́ tangechaü̃tümüü̃gü.
12 Rü guxü̃ãrü jexera, Pa Chaueneẽgüx, rü ngẽxguma ṯacüca̱x ipexunetagu, rü tama name i Tupanaẽ́gagu ipexuneta, rü e̱xna nhama i naãneẽ́gagu ipexuneta, rü e̱xna ṯacü i to i naẽ́gagu ipexuneta. Notürü ngẽxguma aixcuma jixĩgu i wüxi i ore ¡rü noxtacüma: “Ngü̃” nhapegü! Rü ngẽxguma tama aixcuma jixĩgu i wüxi i ore ¡rü noxtacüma: “Tama” nhapegü! Rü ngẽxguma ja Tupana rü tãũxü̃táma pexü̃ napocue naxca̱x i ngẽma perü uneta.
13 Rü ngẽxguma wüxie i petanüwa naxi̱xãchiãẽgu, rü name nixĩ na tajumuxẽxü̃. Rü ngẽxguma wüxie taãẽgu, rü name nixĩ na tawijaexü̃ rü Tupanaxü̃ ticua̱xüü̃xü̃.
14 Rü ngẽxguma wüxie i petanüwa iḏaawexgu, rü name nixĩ i naxca̱x pejaca i jaxõgüxü̃ãrü ãẽ̱xgacügü na tümaca̱x najumuxẽgüxü̃ca̱x rü Cori ja Tupanaẽ́gagu chixü̃maã tüxü̃ jangõgügüxü̃ca̱x.
15 Rü ngẽxguma aixcuma Tupanaãxü̃́ jaxõgüãcüma najumuxẽgügu, rü tá tümaca̱x nitaane, rü nüma ja Cori ja Tupana tá tüxü̃ ínarüdaxẽẽ nawa i tümaãrü ḏaawe. Rü ngẽxguma chi ṯacü rü pecadu taxü̱xgu, rü Tupana tá tüxü̃́ nüxü̃ nangechaü̃.
16 Rü ngẽmaca̱x name nixĩ i pegümaã nüxü̃ peixu i perü pecadugü rü pegüca̱x pejumuxẽgü i wüxiechigü na pexca̱x jataanegüxü̃ca̱x. Rü jima mecü ja jatüarü jumuxẽ rü aixcuma napora erü Tupana nanangãxü̃.
17 Tupanaãrü orearü uruü̃ ga Ería nixĩ ga wüxi ga jatü ga taxrüü̃ ixĩcü. Notürü jexguma nüma guxü̃ ga norü ngúchaü̃maã najumuxẽgu na tama napuxü̃ca̱x, rü tamaẽ̱xpü̱x ga taunecüarü ngãxü̃gu rü tama napu ga jema naãnewa.
18 Notürü jemawena rü wenaxãrü najumuxẽ ga Ería rü pucüca̱x ínaca. Rü wenaxãrü napu. Rü narüxü ga guxü̃ma ga nanetügü.
19 Pa Chaueneẽgüx, ngẽxguma chi texé petanüwa Tupanana ixũgachigu, rü tangẽxmagu ja wüxie ja tüxü̃ taeguxẽẽ́xẽ na wenaxãrü Tupanawe tarüxũxü̃ca̱x, rü mexü̃ taxü.
20 Erü ngẽxguma texé Tupanaca̱x nataeguxẽẽgu i wüxi i duü̃xü̃ nüxna i norü chixexü̃, rü tümagagu Tupana tá nanamaxẽẽ i ngẽma duü̃xü̃, rü tá nüxü̃́ nüxü̃ nangechaü̃ i norü pecadugü.
Rü nuãma pexna,
Tiagu
