Tito 1:1-16
1 1:1-2 Pa Titux, chama i Pauru i Tupanaãrü puracütanüxü̃ nixĩ i cuxca̱x chanaxümatüxü̃ i nhaã popera. Rü Ngechuchu ja Cristu nixĩ ga choxü̃ mucü na ngẽma duü̃xü̃gü i Tupana idexechixü̃maã nüxü̃ chixuxü̃ca̱x i norü ore na Tupanaãxü̃́ jaxõgüãxü̃ca̱x rü nüxü̃ nacua̱xgüxü̃ca̱x i ngẽma norü ore i aixcuma ixĩxü̃ i tüxü̃ rüngü̃xẽẽxü̃ na naxca̱x imaxẽxü̃ca̱x. Rü ngẽmaãcü Tupanaãxü̃́ tajaxõgü rü naxca̱x tamaxẽchaü̃ erü tanajauxgüchaü̃ i ngẽma maxü̃ i taguma gúxü̃. Rü ngẽma maxü̃ i taguma gúxü̃ nixĩ ga nuxcümaxü̃chima ga jexguma taũta naãne ü̱xgu Tupana ja taguma idoracü nüxü̃ ixuxü̃.
2 Nüü̃ nadau 1:1
3 Rü nhu̱xma rü marü nawa nangu na Tupana tüxü̃ nüxü̃ cua̱xẽẽxü̃ i ngẽma norü ore i mexü̃ i tüxü̃ maxẽxẽẽxü̃. Rü ngẽmaca̱x nümatama ja Tupana ja tórü maxẽxẽẽruü̃ choxü̃ namu na nüxü̃ chixuxü̃ca̱x i ngẽma norü ore.
4 Pa Titux, cuma rü Tupanaãrü orewa rü chaune cuixĩ jerü chauxü̃tawa cunajaxu ga Tupanaãrü ore ga noxri rü nhu̱xma rü chauxrüü̃ cujaxõ. Rü chanaxwa̱xe i Tanatü ja Tupana rü Ngechuchu ja Cristu ja tórü maxẽxẽẽruü̃ na cuxü̃ rüngü̃xẽẽgüxü̃ rü cuxü̃ nataãẽxẽẽgüxü̃.
Tituarü puracü ga Cretawa
5 Rü jexguma Cretaarü capaxũgu cuxü̃ chamu̱xgux, rü cumaã nüxü̃ chixu na jema jaxõgüxü̃tanüwa cujanguxẽẽxü̃ca̱x ga jema puracü ga tama chagu̱xẽẽxü̃ ga jexguma cuxna jéma chataegugu. Rü jemaca̱x cumaã nüxü̃ chixu na wüxichigü ja ĩãnewa nüxü̃ cuixunetachigüxü̃ca̱x i tupaucaarü ãẽ̱xgacügü na jema jaxõgüxü̃maã inacua̱xgüxü̃ca̱x, jema cuxna na chaxãgaxü̃rüü̃.
6 Rü wüxi i ãẽ̱xgacü i jaxõgüxü̃ãrü, rü nanaxwa̱xe i meã namaxü̃ na taxúema chixri nachiga idexagüxü̃ca̱x. Rü nanaxwa̱xe i wüxitama tixĩ ja nama̱x. Rü nanaxwa̱xe i naxãcügü rü jaxõgüxü̃ na jixĩgüxü̃ rü meã na namaxẽxü̃ na taxúema nüxü̃ ixuxü̃ca̱x na chixri namaxẽxü̃ rü e̱xna chixri nanatüga naxĩnüẽxü̃.
7 Erü jíxema jaxõgüxü̃ãrü ãẽ̱xgacü ixĩxẽ, rü Tupanaãrü puracü nixĩ i taxüxü̃. Rü ngẽmaca̱x tanaxwa̱xe i aixcuma meã tamaxü̃. Rü tama name i wüxi i jatü i chixecümaxü̃ tixĩ rü chixexü̃gu rüxĩnüxü̃ tixĩ. Rü tama name na tangãxü̃xü̃, rü nuca̱x tadauxü̃, rü togü i duü̃xü̃güxü̃ tawomüxẽẽxü̃ i norü dĩẽruca̱x.
8 Notürü tanaxwa̱xe i guxü̃guma meã duü̃xü̃güxü̃ tajaxu i tümapatawa, rü aixcuma nüxü̃ tangechaü̃ i ngẽma duü̃xü̃gü i meã maxẽxü̃. Rü tanaxwa̱xe i wüxi i jatü i aixcuma tümaãẽxü̃ cuáxe tixĩ, rü guxü̃guma duü̃xü̃gümaã mecümaxẽ tixĩ, rü aixcuma Tupanaca̱x maxü̃xẽ tixĩ, rü guxü̃guma meã tügümaã icuáxe tixĩ.
9 Rü jíxema jaxõgüxü̃ãrü ãẽ̱xgacü ixĩxẽ rü tanaxwa̱xe i meãma nagu tixũ i ngẽma ore i aixcuma ixĩxü̃ ga tüxü̃ ingu̱xẽẽxü̃, na tüma rü ta togüxü̃ tangúexẽẽxü̃ca̱x i ngẽma ore i mexü̃, na ngẽmaãcü nüxü̃́ tanangúchaü̃xẽẽxü̃ca̱x rü nüxü̃ tajaxõgüxẽẽxü̃ca̱x i ngẽma duü̃xü̃gü i noxri tama jaxõgüchaü̃xü̃.
10 Erü nangẽxma i muxü̃ma i jaxõgüchiréxü̃ i tama aixcuma irüxĩnüẽchaü̃xü̃. Rü ngẽma guxü̃ãrü jexera tama irüxĩnüẽchaü̃xü̃ nixĩ i ngẽma Judéugü i jaxõgüchiréxü̃ i naxwa̱xegüxü̃ na nuxcümaxü̃güxü̃ i nacümawe naxĩxü̃ i ngẽma jaxõgüxü̃. Rü nümagü rü ore i taxuwama mexü̃xü̃ nixugügü, rü ngẽmaãcü duü̃xü̃güxü̃ nawomüxẽẽgü.
11 Notürü ngẽma duü̃xü̃gü i ngẽmaãcü chixri ngu̱xẽẽtaegüxü̃, rü chanaxwa̱xe i noxtacüma icujanangea̱xgüxẽẽ. Erü muxü̃ma i duü̃xü̃güxü̃ nichixexẽẽgü rü nhu̱xmata nhuxre ja ĩpatawachigü rü nanachixexẽẽ i guxü̃ma i duü̃xü̃gü na tama aixcuma Tupanaãxü̃́ jaxõgüãxü̃ca̱x. Rü ngẽma ore i taxuwama mexü̃maã duü̃xü̃güxü̃ nangúexẽẽ na ngẽmaãcü nawomüxẽẽgüãcüma ngĩxü̃ najauxgüxü̃ca̱x i norü dĩẽru.
12 Rü wüxi ga jematama capaxũcü̱̃ã̱x ga norü tupanaãrü orearü uruü̃ nixĩ ga natanüxü̃xü̃tama ixuxü̃ rü nhaxü̃:
“Rü nhaã Cretacü̱̃ã̱x i duü̃xü̃gü rü guxü̃guma dorata̱a̱xgüxü̃ nixĩgü, rü nhama naẽxü̃gürüü̃ nidürae, rü nitaanü, rü nixoxochi”, nhaxü̃.
13 1:13-14 Rü aixcuma nixĩ ga jema ore ga nüxü̃ jaxuxü̃ ga jema jatü. Rü ngẽmaca̱x chanaxwa̱xe i poraãcü cujaxucu̱xẽgü i ngẽma jaxõgüxü̃ na aixcuma meã jaxõgüãxü̃ca̱x, rü tama nagu naxĩxü̃ca̱x i ngẽma Judéugücüma. Rü chanaxwa̱xe i namaã nüxü̃ cuixu na tama naga naxĩnüẽxü̃ca̱x ega ṯacü namuãxgu i ngẽma duü̃xü̃gü i tama nüxü̃ cua̱xgüchaü̃xü̃ i ore i aixcuma ixĩxü̃.
14 Nüü̃ nadau 1:13
15 Rü jíxema aixcuma Tupanape̱xewa mexẽ rü guxü̃wama tame. Notürü jíxema tama aixcuma Tupanape̱xewa mexẽ, rü taxucürüwa ṯacü rü nacüma i nagu tixũxü̃maã tügü tamexẽẽ. Rü woo tümaãẽwa nagu tarüxĩnüxü̃wa rü tachixe erü ngẽma nacüma i nagu tixũxü̃maã Tupanape̱xewa tügü tamexẽẽchaü̃.
16 Rü ngẽma duü̃xü̃gü i ngẽmagu rüxĩnüẽxü̃ rü nügü jaxugügügu rü Tupanaxü̃ nacua̱x, notürü ngẽma nümagü naxügüxü̃wa nüxü̃ tacua̱x na tama aixcuma jiĩxü̃ na Tupanaxü̃ nacua̱xgüxü̃. Rü nümagü rü Tupanape̱xewa nichixe, rü tama naga naxĩnüẽ, rü taxuwama nime na ṯacü rü mexü̃ naxügüxü̃.
