Tito 2:1-15
2 Notürü i cuma, Pa Titux, rü cunaxwa̱xe i guxü̃gutáma ngẽma mexü̃ i ngu̱xẽẽtaemaã cunangúexẽẽ rü taguma nüxna cuixũgachi.
2 ¡Rü meã jaxucu̱xẽgü i ngẽma jatügü i jaguã̱xgü na aixcuma meã naãẽxü̃ nacuáãcüma namaxẽxü̃ca̱x, rü taguma nadauxcüraxü̃wa̱xegüxü̃ca̱x, rü guxü̃guma meã nagu na naxĩnüẽxü̃ca̱x! ¡Rü nangúexẽẽ na aixcuma meã Tupanaãxü̃́ jaxõgüãxü̃ca̱x, rü guxü̃ i duü̃xü̃güxü̃ nangechaü̃güxü̃ca̱x, rü jaxna namaã naxĩnüẽxü̃ca̱x ega woo ṯacü rü guxchaxü̃ nüxü̃ üpetügux!
3 Rü ngẽxgumarüü̃ ta chanaxwa̱xe i meã cujaxucu̱xẽgü i ngẽma ngexü̃gü i jaguã̱xgü na meã Tupanape̱xewa namaxẽxü̃ca̱x. Rü tama name na jaxoregüta̱a̱xgüxü̃, rü nangãxẽwa̱xegüxü̃. Rü name nixĩ i guxü̃ i duü̃xü̃güpe̱xewa rü meã namaxẽ.
4 2:4-5 Rü ngẽma ngexü̃gü i jaguã̱xgü rü name nixĩ i meã na nangúexẽẽãxü̃ i ngẽma ngexü̃gü i paxü̃gü na aixcuma natexü̃ rü naxãcügüxü̃ nangechaü̃güxü̃ca̱x, rü meã naãẽxü̃ nacua̱xgüxü̃ca̱x, rü mexü̃guxicatama na naxĩnüẽxü̃ca̱x, rü meã napatana nadaugüxü̃ca̱x, rü guxü̃ i duü̃xü̃gümaã namecümagüxü̃ca̱x, rü aixcuma natega naxĩnüẽxü̃ca̱x na taxúema chixri Tupanaãrü orechigagu idexagüxü̃ca̱x.
5 Nüü̃ nadau 2:4
6 ¡Rü ngẽxgumarüü̃ ta meãma jaxucu̱xẽgü i ngẽma ngextü̱xücügü na aixcuma meã naãẽxü̃ nacuáãcüma namaxẽxü̃ca̱x rü tama nadauxcüraxü̃wa̱xegüxü̃ca̱x!
7 ¡Rü cumatama rü name nixĩ i meã nape̱xewa cumaxü̃ i guxü̃wama na ngẽmaãcü wüxi i norü cua̱xruü̃ i mexü̃ cuiĩxü̃ca̱x! Rü ngẽxguma cunangúexẽẽgu, rü cunaxwa̱xe i mexü̃gu curüxĩnüãcüma cunangúexẽẽ rü tama ixãẽwa̱xeãcüma namaã nüxü̃ cuixu i ngẽma ore.
8 Rü ngẽxguma ngẽmaãcü meã cunangúexẽẽgu i ngẽma ore i mexü̃, rü taxúetáma texé chixri nachiga tidexa. Rü ngẽmaãcü ja jíxema chixri tachiga idexagüchaü̃xẽ rü tá taxãneẽ erü taxucürüwa ṯacü rü chixexü̃xü̃ tixugü i tachiga.
9 ¡Rü meãma jaxucu̱xẽgü i ngẽma duü̃xü̃gü i coriã̱xgüxü̃! ¡Rü namaã nüxü̃ ixu na guxü̃guma meã norü coriga naxĩnüẽxü̃ca̱x, rü norü corimaã namecümagüxü̃ca̱x, rü taguma norü corixü̃ nachoxü̃gagüxü̃ca̱x!
10 Rü tama name i norü coriaxü̃́ nangĩ̱xgü, notürü nanaxwa̱xe i aixcuma meãma norü corimaã namaxẽ rü taguma nanawomüxẽẽgü. Rü ngẽxguma ngẽmaãcü namaxẽgu, rü guxü̃ma i togü i duü̃xü̃gü tá nüxü̃ nadaugü na nhuxãcü aixcuma namexẽchixü̃ i ngẽma ore i duü̃xü̃güxü̃ namaã ingúexẽẽxü̃ nachiga ja Tupana ja tórü maxẽxẽẽruü̃.
11 Tupana rü poraãcüxü̃chima tamaã namecüma, rü jemaca̱x núma nanamu ga Nane na guxü̃ma i duü̃xü̃güaxü̃́ nangẽxmaxü̃ca̱x i maxü̃ i taguma gúxü̃ ega nüxü̃́ jaxõgüãgu.
12 Rü ngẽma na Tupana tamaã mecümaxü̃wa nüxü̃ tacua̱x na namexü̃ na nüxü̃ rüxoexü̃ i nhama i naãnecü̱̃ã̱xãrü ngúchaü̃gü rü guxü̃ma i to i chixexü̃gü i nape̱xewa ixüxü̃. Rü ngẽma Tupana taxca̱x üxü̃ tüxü̃ nangu̱xẽẽ na meã jigümaã icua̱xgüãcüma togü i duü̃xü̃güpe̱xewa rü Tupanape̱xewa meã imaxẽxü̃ i nhama i naãnewa.
13 Rü tüxü̃ nangu̱xẽẽ ta na guxü̃guma meã ínaṉg̱uxẽẽgüxü̃ca̱x na nataeguxü̃ ja Ngechuchu ja Cristu ja tórü maxẽxẽẽruü̃ ja tórü Tupana ja tacü ixĩcü. Erü Tanatü ja Tupana rü tamaã inaxuneta na wena tá nataeguxü̃ ja Ngechuchu, rü wüxi i taãẽ tá nixĩ i ngẽxguma ínanguxgu.
14 Rü nüma ga Ngechuchu rü taxca̱x naju na tüxü̃ ínanguxü̃xẽẽxü̃ca̱x nawa i guxü̃ma i chixexü̃, rü tüxü̃ jamexẽẽgüxü̃ca̱x na aixcuma norü duü̃xü̃gü i mexü̃ ixĩgüxü̃ca̱x rü aixcuma naxca̱x idaugüxü̃ca̱x na guxü̃guma mexü̃ ixügüxü̃ca̱x.
15 Rü ngẽma ore tá nixĩ i duü̃xü̃güxü̃ namaã cungúexẽẽxü̃ rü nüxü̃́ cunangúchaü̃xẽẽxü̃ na Tupanaca̱x namaxẽxü̃ca̱x. Rü ngẽma oremaã tá aixcuma cujaxucu̱xẽgü i duü̃xü̃gü erü Tupanatama nixĩ ja cuxü̃ mucü na ngẽmaãcü cunaxüxü̃. Rü tama name na texé cuxü̃ oxü̃.
