Tito 3:1-15
3 Rü ngẽma jaxõgüxü̃ i duü̃xü̃gü rü name nixĩ i nüxna nüxü̃ cucua̱xãchixẽẽ na meã naga naxĩnüẽxü̃ca̱x i nachiü̃ãneãrü ãẽ̱xgacügü rü guxü̃ma i togü i ãẽ̱xgacügü. ¡Rü jaxucu̱xẽgü na ínamemaregüxü̃ca̱x na naxügüãxü̃ca̱x i guxü̃ma i mexü̃ i puracügü!
2 Rü tama name i texéchiga chixri nidexagü rü texémaã nanuẽ. Notürü name nixĩ i guxü̃ i duü̃xü̃gümaã namecümagü rü aixcuma guxü̃ i duü̃xü̃güxü̃ nangechaü̃gü rü tama nügü ínarütagü.
3 Rü name nixĩ i jaxna namaã taxĩnüẽ i ngẽma tama jaxõgüxü̃, jerü jixema rü ta ga ü̃pa rü chixri tamaxẽ, rü tama Tupanaga taxĩnüẽ. Rü itajarütauxe rü tórü ngúchaü̃ tüxü̃ napora. Rü chixexü̃gu rüxĩnüẽãcüma tamaxẽ rü taxauxãchiwa̱xegü. Rü togü i duü̃xü̃gü tachi naxaie, rü jixema rü ta rü jigüchi taxaie ga wüxichigü.
4 Notürü ga Tupana ja tórü maxẽxẽẽruü̃ rü tüxü̃ nüxü̃ nadauxẽẽ ga nhuxãcü tamaã na namecümaxü̃ rü nhuxãcü guxü̃ i duü̃xü̃güxü̃ nangechaü̃xü̃.
5 Rü jexguma nixĩ ga tüxü̃ namaxẽxẽẽxü̃. Rü tama ṯacü rü mexü̃ na ixügüxü̃gagu nixĩ ga tüxü̃ namaxẽxẽẽxü̃, notürü tüxü̃ namaxẽxẽẽ jerü nüxü̃́ tangechaü̃tümüü̃gü. Rü Naãẽ i Üünexü̃ i tüxü̃ ngexwacaxü̃xẽẽxü̃ãrü poramaã Tupana tüxü̃́ inajanaxoxẽẽ ga tórü pecadu na ngexwacaxü̃xü̃ i duü̃xü̃gü ixĩgüxü̃ca̱x.
6 Rü Ngechuchu ja Cristu ja tórü Maxẽxẽẽruü̃gagu nixĩ ga Tupana ga guxü̃ma ga norü ngúchaü̃maã tüxna namuãxü̃ ga Naãẽ i Üünexü̃.
7 Rü jemaãcü tamaã namecüma rü tüxü̃ narüngü̃xẽẽ ga Tupana na aixcuma imexü̃ca̱x i nape̱xewa, rü na najauxgüxü̃ca̱x i ngẽma maxü̃ i taguma gúxü̃ i írüṉg̱uxẽẽgüxü̃.
8 Rü guxü̃ma i ngẽma marü cumaã nüxü̃ chixuxü̃ rü aixcuma nixĩ. Rü ngẽmaca̱x chanaxwa̱xe i guxü̃guma nüxü̃ cuixu i ngẽma ore na aixcuma mexü̃ naxügüxü̃ca̱x i ngẽma duü̃xü̃gü i Tupanaãxü̃́ jaxõgüxü̃. Erü ngẽma ore rü guxü̃wama name i guxãca̱x.
9 ¡Notürü nüxna ixũgachi i ngẽma dexagü i taxuwama mexü̃ i duü̃xü̃gü nawa nügü choxü̃gagüxü̃ rü ngẽma oregü i nuxcümaxü̃güxü̃ i duü̃xü̃güchigamare ixĩgüxü̃! ¡Rü nüxna ixũgachi i ngẽma nügü ngaexü̃! ¡Rü tama name na natanügu cuxãxü̃ i ngẽma duü̃xü̃gü i nügümaã nüxü̃ rünuẽtanücüüxü̃ nachiga i ngẽma mugü ga Muĩsé ümatüxü̃! Erü guxü̃ma i ngẽma na nüxü̃ rünuẽtanücüüxü̃ rü taxuwama name, rü notüca̱xmamare nixĩ.
10 Rü ngẽxguma chi wüxie i petanüwa rü chixexü̃ i ngu̱xẽẽtaemaã ngẽma jaxõgüxü̃xü̃ titojegu, rü name nixĩ i tümamaã nüxü̃ cuixu na tama ngexü̃ tawagüxü̃ca̱x. Rü ngẽxguma tanaxüamagu, rü name nixĩ na wena tümamaã nüxü̃ cuixuxü̃. Rü ngẽxguma tama cuga taxĩnüchaü̃gu rü tanaxüamagu i ngẽma chixexü̃ rü name nixĩ i noxtacüma tüxü̃ ícumuxũchi natanüwa i ngẽma jaxõgüxü̃.
11 Erü ngẽma chixri na tamaxü̃xü̃wa rü tá nüxü̃ cucua̱x na tachixeãẽxü̃ ja jíxema duü̃xẽ rü tümaãrü pecadugagu tá nixĩ na tapocuxü̃.
Tituxü̃ naxucu̱xẽ ga Pauru
12 Rü ngẽxguma cuxü̃tawa chanamu̱xgu i Artema rü e̱xna Tíquicu, rü chanaxwa̱xe i paxa Nicaporíchiuwa cuxũ na choxü̃ ícujadauxü̃ca̱x. Erü ngẽ́ma tá nixĩ i chanangupetüxẽẽxü̃ ja jima tawemacügü ja nagu nagáuanecü.
13 Rü guxü̃ma i cuxü̃́ tauxchaxü̃maã chanaxwa̱xe i nüxü̃ curüngü̃xẽẽ i ãẽ̱xgacü i Chena i Romacü̱̃ã̱xgüarü mugüxü̃ cuáxü̃ rü Aporu na paxa núma naxĩxü̃ca̱x. Rü chanaxwa̱xe i nüxna cunaxã i ngẽma nanaxwa̱xexü̃ i norü namawaü̃ na taxuü̃ma nüxü̃́ taxuxü̃ca̱x.
14 Rü ngẽma taeneẽgü i jaxõgüxü̃, rü name nixĩ i nüxü̃ nacua̱xgü na mexü̃ naxügüxü̃ rü togüxü̃ nangü̃xẽẽgüxü̃ ega ṯacü nüxü̃́ tau̱xgux. Rü ngẽmaãcü i ngẽma taeneẽgü i jaxõgüxü̃ rü aixcuma guxü̃wama tá name i norü maxü̃.
Pauru rü wenaxãrü Tituxü̃ narümoxẽ rü naxca̱x ínaca na Tupana nüxü̃ rüngü̃xẽẽxü̃ca̱x
15 Rü guxü̃ma i taeneẽgü i nuã chauxü̃tawa ngẽxmagüxü̃ rü cuxü̃ narümoxẽgü. Rü ngẽxgumarüü̃ ta i chama rü chanaxwa̱xe i nüxü̃ curümoxẽ i taeneẽgü i jaxõgüxü̃ i cuxü̃tawa ngẽxmagüxü̃. Rü chanaxwa̱xe i Tupana pexü̃ narüngü̃xẽẽ i guxãma i pemax.
Rü nuãma cuxna,
Pauru
