Zacarias 4:1-14
4 Rü yema dauxü̃cüã̱x rü wena cha̱u̱xca̱x natáegu, rü choxü̃ ínaba̱i̱xgü nhama pewa iba̱i̱xãchigurüxü̃.
2 Rü choxna naca rü nhanagürü: “¿Ta̱xacüxü̃ cudauxü̃?” nhanagürü. Rü chama rü chanangãxü̃ga rü nhachagürü: “Chama rü nüxü̃ chadau i wüxi i omü i úirunaxca̱x. Rü norü queruyínupáü̃wa ne nadagü i 7 i naxchiraxü̃.
3 Rü ngẽma omüxü̃tawa narüxügü i taxre i oríwa rü wüxi i norü tügünecüwawa rü to i norü to̱xwecüwawa”, nhachagürü.
4 Rü yexguma ga chama rü nüxna chaca ga yema dauxü̃cüã̱x ga chamaxã idexaxü̃ rü nhachagürü: “Pa Chorü Corix ¿ta̱xacüchiga nixĩ i ngẽma?” nhachagürü.
5 Rü nüma ga dauxü̃cüã̱x rü choxü̃ nangãxü̃ga rü nhanagürü. “¿Tama ẽ̱xna i nüxü̃ cucuáxü̃ nax ta̱xacüchiga yixĩxü̃?” nhanagürü. Rü chama chanangãxü̃ga rü nhachagürü: “Tama nüxü̃ chacua̱x, Pa Corix”, nhachagürü.
6 Rü nüma ga dauxü̃cüã̱x rü nayadaxẽxẽ ga nax yadexaxü̃ rü nhanagürü: “Nhaa nixĩ i Cori ya Tupanaarü ore i Chorobabéca̱x ixĩxü̃ i nhaxü̃: ‘Tama churaragüarü poramaxã rü bai i ta̱xacü rü to i poramaxã, notürü Chauãxẽarü poramaxã tá ningu i ngẽma chanaxwa̱xexü̃’, nhanagürü ya Cori ya Tupana ya guxãétüwa ngẽxmacü.
7 Rü woo nhama taxüne ya ma̱xpǘnerüxü̃ yixĩxgu i guxchaxü̃gü nax tama naxügüãxü̃ca̱x ya yima Tupanapata, notürü Chorobabépe̱xewa rü tá inayarüxo i ngẽma guxchaxü̃gü nhama wüxi ya ma̱xpǘne rüdõxõchixẽẽxü̃rüxü̃. Rü nümatama ya Chorobabé rü tá nayaxǘcuchi ya yimá nuta ya nawa inaxügücü nax yanguxü̃ca̱x ya yima Tupanapata. Rü ngẽxguma yanguxgu rü nüma i duü̃xü̃gü rü tagaãcü nhanagürügü tá: ‘¡Namexechi, namexechi ya yima Tupanapata!’ nhanagürügü tá.”
8 Rü yemawena ga nüma ga yema dauxü̃cüã̱x rü chamaxã nüxü̃ nixu ga to ga ore ga Tupanawa ne ũxü̃ ga nhaxü̃:
9 “Rü Chorobabé nixĩ ga inanucü ga gumá nuta ga naxtapü̱xarü ügü ya daa Tupanapata rü nüma tátama nixĩ i yanguxẽẽãxü̃. Rü ngẽmawa tá nüxü̃ pecua̱x i pemax nax Cori ya Tupana ya guxãétüwa ngẽxmacü yixĩxü̃ ya yimá núma choxü̃ mucü.
10 Rü yema tama aixcuma yaxõgücüraxü̃xü̃ ga yexguma noxri inaxügügu ga yema puracü, rü nhu̱xmax nax nüxü̃ nadaugüxü̃ i Chorobabé nax yanguxẽẽxü̃ i nhaa puracü, rü tá nataãxẽgü”, nhanagürü. Rü yemawena ga yema dauxü̃cüã̱x rü nhanagürü ta: “Rü nhaa 7 i omügü rü Cori ya Tupanaxetügüchiga nixĩ i guxü̃ i nhaa naanegu rüdaunüne”, nhanagürü.
11 Rü chama rü nüxna chaca rü nhachagürü: “¿Ta̱xacüchiga nixĩ i nhaa taxre ya oríwane i nhaa omücüwawa ngẽxmagüxü̃?” nhachagürü.
12 --
13 --
14 Rü nüma ga yema dauxü̃cüã̱x rü choxü̃ nangãxü̃ga rü nhanagürü: “Yima taxre ya oríwane rü nachiga nixĩ i ngẽma taxre i duü̃xü̃gü i marü chíxü̃maxã ibáeruxü̃ nax naxügüãxü̃ca̱x i norü puracü ya Tupana ya yimá nhama i naanearü yora ixĩcü”, nhanagürü.
