Éxodo 10:1-29
10 Rü Cori ya Tupana rü Moichéxü̃ ñanagürü: —¡Faraóü̃xü̃tawa naxũ! Erü choma rü tá íchayataiãchiarü maxü̃xã̱xẽxẽ i Faraóü̃ namaxã i guxü̃ma i norü ngü̃xẽẽruü̃gü nax nüxü̃ chanawéxü̃ca̱x i ngẽma cua̱xruü̃gü i ãũcümaxü̃ i chorü poramaxã chaxüxü̃.
2 Rü ngẽmaãcü i cuma rü tá cunegümaxã rü cutaagümaxã nüxü̃ quixu nax ñuxãcü nüxü̃ chacugüxü̃ ga Equítuanecüã̱xgü rü ñuxãcü taxü̃ ga guxchaxü̃gü naxca̱x íchanguxẽẽxü̃. Rü ngẽmawa tá nüxna pecua̱xãchie nax choma chixĩxü̃ ya Cori ya Tupana —ñanagürü.
3 Rü Moiché rü Aróü̃ rü Faraóü̃xü̃tawa naxĩ, rü ñanagürügü nüxü̃: —Cori ya Iraétanüxü̃arü Tupana rü cuxca̱x nua namuga rü ñanagürü cuxü̃: “¿Ñuxguratáta i nüxü̃ curüxoxü̃ nax choxna cugü quinuxuxü̃? ¡Rü yange̱xgü i chorü duü̃xü̃gü nax choxü̃ yanacua̱xüü̃güxü̃ca̱x!
4 Erü ngẽxguma taxũtáma nüxü̃ quinge̱xgu i ngẽma Iraétanüxü̃ rü moxü̃ tá munü curü naaneca̱x íchangugüxẽxẽ.
5 Rü ngẽma munügü rü guxü̃ma i naane tá namaxã nayapa. Rü tá namuxũchi rü taxũtáma waixü̃müanexü̃ tadau. Rü nayawa tá i ngẽma noxretama i nanetügü ga íyaxügüxü̃ nawena ga yema gáuxü̃ ga ixãpǘtaxü̃ ga rüyixixü̃. Rü ngẽxgumarüxü̃ tá ta nayawa i guxü̃ma i ngẽma naigü i ori̱xgü i peanewa ngẽxmagüxü̃.
6 Rü ngẽma munügü rü tá cupata namaxã nanapá. Rü ngẽxgumarüxü̃ ta i ngẽma curü ngü̃xẽẽruü̃güpatagü rü tá munümaxã nanapágü, rü guxü̃ma i Equítuanecüã̱xpatagü rü tá namaxã nanapágü. Rü ngẽma guxchaxü̃ i ñu̱xma tá nüxü̃ cudauxü̃ rü cunatü rü curü o̱xigü rü taguma nüxü̃ tadaugü rü ñu̱xmata ñoma i ngunexü̃wa nangu” —ñanagürügü. Rü yema ñaxguwena rü nüma ga Moiché rü nadaueguãchi rü Faraóü̃patawa ínaxũxü̃.
7 Rü yexguma ga Faraóü̃arü ngü̃xẽẽruü̃gü rü ñanagürügü nüxü̃: —Pa Ãẽ̱xgacüx ¿nidaamatama nax guxchaxü̃ nua tüxna naxãxü̃ i ngẽma yatü i Moiché? ¡Yange̱xgü i ngẽma duü̃xü̃gü nax norü Cori ya Tupanaxü̃ yanacua̱xüü̃güxü̃ca̱x! ¿Ẽ̱xna, tama nüxü̃ cudau, Pa Ãẽ̱xgacüx, nax ñaa Equítuane rü guxü̃wama marü nachixexü̃? —ñanagürügü.
8 Rü yexguma ga nüma ga Faraóü̃ rü wenaxarü Moichéca̱x rü Aróü̃ca̱x nangema. Rü ñanagürü nüxü̃: —Marü name i perü Cori ya Tupanaxü̃ peyarücua̱xüü̃gü. Natürü chanaxwa̱xe i chomaxã nüxü̃ pixu nax texégü tá tixĩxü̃ ya yíxema ngéma ĩxẽ —ñanagürü.
9 Rü yexguma ga Moiché rü nanangãxü̃ rü ñanagürü: —Rü ngéma tá taxĩ namaxã i guxü̃ma i torü buxü̃gü, rü torü yaxguã̱xgü, rü tonegü rü toxocügü rü torü carnérugü rü torü wocagü. Erü ngẽma tá taxüxü̃, rü wüxi i taxü̃ma i tórü Coriarü cua̱xüxü̃chiga nixĩ —ñanagürü.
10 Natürü ga nüma ga Faraóü̃ rü ñanagürü nüxü̃: —Rü nango̱xochiama i ngẽma chixexü̃ i nagu perüxĩnüexü̃. ¿Ẽ̱xna pema nagu perüxĩnüegu rü perü Cori ya Tupana rü tá pexü̃ íyaxümücüxü̃? ¿Rü ẽ̱xna nagu perüxĩnüegu rü choma rü tá pexü̃ chinge̱xgüxü̃ nax perü buxü̃gümaxã ngéma pexĩxü̃ca̱x?
11 Rü dücax, rü taxũtáma ngẽmaãcü nixĩ. ¡Ẽcü, ngéma pexĩ ya guxãma i yatüxe i yáxe, rü perü Cori ya Tupanaxü̃ peyarücua̱xüü̃gü! Erü ngẽma nixĩ i penaxwa̱xexü̃ —ñanagürü. Rü yexguma ga nüma ga Faraóü̃ rü norü duü̃xü̃güxü̃ namu nax nape̱xewa tüxü̃ ínawoxü̃xü̃ca̱x.
12 Natürü nüma ga Cori ya Tupana rü Moichéxü̃ ñanagürü: —¡Equítuaneétügu nawéxme̱x nax ngẽmaãcü nua naxĩxü̃ca̱x i munügü! Rü ngẽma munügü rü tá nayawa i guxü̃ma i nanetü i ñaa nachixü̃anewa íyaxügüxü̃ nawena ga yema gáuxü̃pütagü ga dauxü̃wa rüyixixü̃ —ñanagürü.
13 Rü yexguma ga Moiché rü Equítuaneétügu nanawe̱x ga norü naixmena̱xã. Rü nüma ga Cori ya Tupana rü nanamu ga wüxi ga buanecü ga éstewaama ne ũcü ga guxü̃ ga chütaxü̃ rü ngunexü̃ yema nachixü̃aneétügu icuecü. Rü moxü̃ãcü rü gumá buanecü ga éstewaama ne ũemacügu ínangugü ga munügü.
14 Rü yema munügü rü yema ngunexü̃gu guxü̃wama nanapáxẽxẽ ga yema nachixü̃ane. Rü nũxcüma rü taguma yemaacü namuxũchi ga munü, rü tagutáma wena ngẽxgumarüxü̃ ta nixĩ.
15 Rü ga ñaxtüane rü munümaxã nanapá, rü marü taxucürüwa ñaxtüanegu tadau, yerü namuxũchi. Rü nayawa ga guxü̃ma ga nanetü rü norü o ga íyaxügüxü̃ nawena ga yema gáuxü̃pütagü ga dauxü̃wa rüyixixü̃. Rü nataxuma ga nanetü ga ngextá ãátüxü̃ ga guxü̃ma ga Equítuanewa, rü bai ga naanewa rü bai ga naixnecüwa.
16 Rü nüma ga Faraóü̃ rü yexgumatama norü duü̃xü̃güxü̃ namu nax Moichéca̱x rü Aróü̃ca̱x yacagüxü̃ca̱x. Rü yexguma naxü̃tawa nagagügu, rü ñanagürü nüxü̃: —Cori ya Tupanape̱xewa rü pepe̱xewa chixexü̃ chaxü.
17 Rü ngẽmaca̱x pexna naxca̱x chaca nax ñu̱xmaica choxü̃́ nüxü̃ perüngümaxü̃ca̱x i chorü chixexü̃ rü ñu̱xũchi cha̱u̱xca̱x peyumüxẽgüxü̃ nax Cori ya perü Tupana choxna yaxũgachixẽẽxü̃ca̱x i ñaa guxchaxü̃ i yuwa tüxü̃ gaxü̃ —ñanagürü.
18 Rü yexguma ãẽ̱xgacüpatawa ínaxũxũxgu ga Moiché rü Cori ya Tupanamaxã nidexa.
19 Rü yexguma ga Cori ya Tupana rü poracü ga buanecü ga oéstewaama ne ũcü ínanangu̱xẽxẽ nax guxü̃ma ga munügü naemagu ibugüxü̃ca̱x. Rü Már i Dauchíüxü̃wa nayawogü. Rü yemaacü taxuxü̃ma ga munü Equítuanewa nayaxǘ, rü bai ga wüxi.
20 Natürü nüma ga Cori ya Tupana rü tama nüxna nayanuxũ ga Faraóü̃ nax nügütama nataiãchiarü maxü̃ã̱xẽẽxü̃ca̱x nax yemaacü tama yangéãxü̃ca̱x ga yema Iraétanüxü̃.
Tupana rü Faraóü̃ca̱x waanexü̃ ínangu̱xẽxẽ
21 Rü yexguma ga Cori ya Tupana rü Moichéxü̃ ñanagürü: —¡Nawe̱xnagüchacüxü nax guxü̃ma i Equítuanewa nawaanexü̃ca̱x! —ñanagürü.
22 Rü nüma ga Moiché rü nawe̱xnagüchacüxü rü poraãcü nawaane ga guxü̃ma ga Equítuanewa.
23 Rü tomaepü̱x ga ngunexü̃ rü taxúema tümamücüxü̃ tadau, rü taxúema tümachicawa tixũgachi. Natürü yema Iraétanüxü̃patagüwa rü guxü̃wama nangóone.
24 Rü nüma ga Faraóü̃ rü norü duü̃xü̃güxü̃ namu nax Moichéca̱x yacagüxü̃ca̱x, rü ñanagürü: —¡Ẽcü Cori ya Tupanaxü̃ peyarücua̱xüü̃gü, rü ípeyagagü ta i pexacügü! ¡Natürü i ngẽma perü carnérugü rü perü wocagü rü nua penawogü! —ñanagürü.
25 Natürü nüma ga Moiché nanangãxü̃ rü ñanagürü nüxü̃: —Natürü nüma ya Cori ya Tupana nanaxwa̱xe nax toxü̃ cuyagagüxẽẽxü̃ i ngẽma toxü̃na nax ngẽmatanüwa timáxü̃ca̱x rü tayaguxü̃ca̱x rü ngẽmamaxã nüxü̃ ticua̱xüü̃güxü̃ca̱x.
26 Rü ngẽmaca̱x i ngẽma toxü̃nagü rü tá ítayagagü. Rü bai i wüxi i toxü̃na tá nua nayaxǘ, erü ngẽmatanüwa tá tayadexechi i ñuxre nax ngẽmamaxã nüxü̃ ticua̱xüü̃güxü̃ca̱x ya torü Cori ya Tupana. Rü ñu̱xma nax taxũta ngẽma ínachianexü̃wa tangugüxü̃, rü tama nüxü̃ tacua̱x nax ngexü̃rüüxü̃maxã tá nüxü̃ ticua̱xüü̃güxü̃ ya torü Cori ya Tupana —ñanagürü.
27 Natürü nüma ga Cori ya Tupana rü tama nüxna nayanuxũ ga Faraóü̃ nax nügütama nataiãchiarü maxü̃ã̱xẽẽü̃ca̱x nax yemaacü tama yange̱xgüãxü̃ca̱x ga yema Iraétanüxü̃.
28 Rü yemaétüwa ga Faraóü̃, rü Moichéxü̃ ñanagürü: —¡Ínaxũxũ i nua, rü mea cugüna nadau nax tama wena nua chauxü̃tawa cuxũxü̃ca̱x! Erü ngẽxguma wena chauxü̃tawa cuxũxgu rü tá cuyu —ñanagürü.
29 Rü nüma ga Moiché nanangãxü̃ rü ñanagürü: —Marü mea nüxü̃ quixu. Rü aixcüma tagutáma wena nua cuxü̃tawa íchayadau —ñanagürü.
