Éxodo 11:1-10
11 Rü Cori ya Tupana rü Moichéxü̃ ñanagürü: —Wüxi i to i guxchaxü̃ tá Faraóü̃ca̱x rü Equítuanecüã̱xgüca̱x íchanguxẽxẽ. Rü ngẽmawena i Faraóü̃ rü taxũtáma mea pexü̃ ínamuxü̃mare, natürü nümatátama noxtacüma pexü̃ ínawoxü̃xü̃chi i ñaa nachixü̃anewa.
2 ¡Natürü i ñu̱xma rü ngẽma Iraétanüxü̃ i yatüxü̃maxã rü ñu̱xũchi ingexü̃maxã nüxü̃ ixu nax ngẽma norü ngaicamagu ãchiü̃güxü̃ i Equítucüã̱xgüxü̃tawa naxca̱x ínaca i norü ngẽmaxü̃gü i úirunaxca̱x rü diẽrumünaxca̱x! —ñanagürü.
3 Rü nüma ga Cori ya Tupana rü Equítuanecüã̱xgüxü̃ yema Iraétanüxü̃maxã namecümagüxẽxẽ. Rü yexgumarüxü̃ ta ga yema Faraóü̃arü ngü̃xẽẽruü̃gü rü wüxi ga yatü ga nüxü̃ cuácüãcü Moichéxü̃ nadaugü. Rü yemagutama narüxĩnüe ga guxü̃ma ga Equítuanecüã̱xgü.
4 Rü nüma ga Moiché rü Faraóü̃xü̃ ñanagürü: —Cori ya Tupana rü ñanagürü: “Yixcü ngãxü̃cüxü rü guxü̃táma i Equítuanewa tá chaxüpetü.
5 Rü ngẽxguma rü tá nayu i nane i nüxíraxü̃xü̃ i wüxichigü i Equítucüã̱xpatawa. Rü Faraóü̃ nane ya nüxíraxü̃cüwa tá inaxügü rü ñu̱xmatáta nawa nangu ya yima ngĩne ya nüxíraü̃cü i ngẽma nge i camütaewa puracücü. Rü ngẽxgumarüxü̃ tá ta nayue i guxü̃ma i naxü̃naxacügü i yatüxü̃ i nüxíraxü̃güxü̃.
6 Rü guxü̃ma i Equítuanewa i duü̃xü̃gü rü tá naxauxe erü ngúxü̃ ningegü. Rü nũxcüma rü taguma yemaacü ngúxü̃ ningegü ga duü̃xü̃gü, rü tagutáma wenaxarü ñuxgu nangẽxma”, ñanagürü ga Cori ya Tupana.
7 Natürü ngẽma Iraétanüxü̃ nawa ngẽxmagüxü̃ i naane rü taxũtáma ngẽma poxcu nawa nangu. Rü natanüwa rü tá nachianemare, rü woo i airugü rü taxuxü̃táma narüngúxtanüxü̃. Rü ngẽmaãcü, Pa Faraóü̃x, rü tá nüxü̃ pecua̱x nax yimá Cori ya Tupana nüxü̃ naxunetaxü̃ i ngẽma Iraétanüxü̃ rü tama i pexü̃.
8 Rü ñu̱xũchi guxü̃ma i ñaa curü ngü̃xẽẽruü̃gü rü chauxü̃tawa tá naxĩ. Rü chopexegu nacaxã́pü̱xügüãcüma tá choxna nacagü, rü ñanagürügü tá: “¡Ípechoxü̃ i nua namaxã i guxü̃ma i cutanüxü̃!” ñanagürügü tá. Rü ngẽmawena rü tá íchaxũxũ —ñanagürü ga Moiché. Rü yexguma nüma ga Moiché rü nanuãcüma Faraóü̃pe̱xewa ínaxũxũ.
9 Rü yemawena ga Cori ya Tupana rü Moichéxü̃ ñanagürü: —Nüma i Faraóü̃ rü taxũtáma pega naxĩnü, rü ngẽmaca̱x i nua Equítuanewa rü yexeraãcü tá chanaxü i ta̱xacü i taguma nüxü̃ idauxü̃ —ñanagürü.
10 Moiché rü Aróü̃ rü Faraóü̃pe̱xewa inanawe̱xgü ga yema poxcugü ga Tupana norü poramaxã üxü̃. Natürü ga Faraóü̃ nax Cori ya Tupana iyataiãchiarü maxü̃ã̱xẽẽxü̃, rü tama Equítuanewa Iraétanüxü̃xü̃ ínamuxü̃chaü̃.
