Éxodo 12:1-51
12 Rü nüma ga Cori ya Tupana rü Moichémaxã rü Aróü̃maxã nidexa ga Equítuanewa, rü ñanagürü:
2 —Daa tauemacü ya taunecü namaxã ixügücü, rü yimá rü guxcüma ya tauemacüarü yexera tá nixĩ nax nagu choxü̃ picua̱xüü̃güxü̃.
3 ¡Rü guxü̃ma i Iraétanüxü̃maxã nüxü̃ pixu, rü ñapegürü tá nüxü̃: “Doma tauemacügu rü norü 10 i ngunexü̃gu, rü Tupana nanaxwa̱xe i wüxíechigü i pema rü peyama̱x i wüxi i carnéru rüe̱xna wüxi i chíbuxacü i wüxichigü ya ĩpatawa!
4 Rü ngẽxguma wüxi ya ĩpatacüã̱x i duü̃xü̃gü rü noxretama yixĩxgu rü nagu naxĩnügu nax tama nüxü̃́ nagúxü̃ i ngẽma carnéru, rü name nixĩ i nüxna naxu i namücü i norü ngaicamagu ãpataxü̃ nax ngẽmamaxã wüxigu nangõ̱xgüãxü̃ca̱x. Rü name nixĩ i nae̱xpü̱xgu inanachexü̃gü nax wüxichigü mea nüxü̃́ yanguxü̃ca̱x i guxü̃ma i ngẽma nüxna naxuxü̃.
5 Natürü ngẽma naxü̃na rü chanaxwa̱xe nax nayatüxü̃ rü wüxi ya taunecü nüxü̃́ ngẽxmaxü̃ rü taxuwama nachixexü̃. Rü name nax wüxi i carnéruxacü rüe̱xna wüxi i chíbuxacü nax yixĩxü̃.
6 Rü tá mea nüxna pedau ñu̱xmatáta doma ya tauemacüarü 14 i ngunexü̃wa nangu. Rü ngẽma ngunexü̃arü yáuanecü rü guxãma i pemax i Iraétanüxü̃ rü tá peyama̱x i ngẽma pexü̃na.
7 Rü tá penayaxu ya nagü. Rü yimá nagümaxã tá ípenachaegu i perü ĩã̱xcüwawa i wüxichigü ya yima ĩ ya nawa penangṍxü̃ i ngẽma naxü̃na.
8 Rü ngẽma chütaxü̃gu tá penangõ̱xgü i namachi i iguxü̃ ya maxẽ ya üxücümaxã ãéü̃xü̃. Rü namaxã tá penaxüxbüxü̃ i paũ i ngearü pu̱xẽẽruü̃ã́xü̃.
9 Rü bai i íxraxü̃ i ngẽma namachi i pengṍxü̃ rü tá nangáxüra rüe̱xna namuxra. Rü guxü̃ma i namachi rü naeru rü naparagü rü naü̃nütagü, rü tá penanagü.
10 ¡Rü taxuxü̃táma ípeyaxüxẽxẽ i perü moxü̃ãcüruxü̃! Rü ngẽxguma chi íyaxüxgu i ngẽma namachi rü name i noxtacüma peyagu.
11 Rü ngẽxguma penangõ̱xgu rü tá peyange ya perü naixmena̱xã, rü meama penga̱xãẽgüãcüma rü pechapatuã̱xgüãcüma tá pepaxaãxẽ nax penangõ̱xgüxü̃ i ngẽma namachi. Rü ngẽma chütaxü̃ rü Coriarü Üpetüchiga tá nixĩ i naéga.
12 Erü choma rü ngẽma chütaxü̃ rü nua Equítuanewa tá chaxüpetü. Rü wüxichigü ya Equítuanecüã̱xarü ĩpatawa tá chayama̱x ya yimá nüxíraü̃cü ya nanegü rü nüxíraxü̃xü̃ i naxü̃naxacügü i yatüxü̃. Rü tá ngẽma Equítuanecüã̱xgüxü̃ nüxü̃ chadauxẽxẽ nax ngẽma namaxã natupanaã̱xgüxü̃ rü yangearü poraáxü̃ nax naétüwa nachogüxü̃. Erü chomatama ya Tupana nixĩ i chanaxueguxü̃ i ngẽma chaxüxü̃.
13 Rü yimá nagü rü wüxi i cua̱xruxü̃ tá nixĩ nawa ya yima pepata i nawa pengẽxmagüxü̃. Rü ngẽxguma nüxü̃ chada̱u̱xgu ya yimá nagü i perü ĩã̱xwa, rü tá nüxü̃ chaxüpetümare rü petanüwa rü taxúetama tayu i ngẽxguma yumaxã chanapoxcuegu i ngẽma Equítuanecüã̱x i duü̃xü̃gü.
14 Rü pema rü guxcüma ya taunecügu tá Cori ya Tupanaca̱x penaxüchiga i ñaa ngunexü̃ nax ngẽmaãcü pema rü petaagü nüxna pecua̱xãchiexü̃ca̱x i ngẽma tá pexca̱x chaxüxü̃.
15 Rü ngẽma Üpetüchiga rü 7 i ngunexü̃ tá penaxüchiga. Rü guxü̃ma i ngẽma 7 i ngunexü̃gu rü paũ i ngearü pu̱xẽẽruü̃ã́xü̃xicatama tá pengõ̱xgü. Rü ngẽmaca̱x i guxü̃ma i ngẽma 7 i ngunexü̃gu rü tama penaxwa̱xe nax pepatawa pexü̃́ nangẽxmaxü̃ i ngẽma paũarü pu̱xẽẽruxü̃. Rü yíxema paũ i pu̱xẽẽruü̃ã́xü̃ ngṍxe i ngẽma 7 i ngunexü̃gu rü yíxema rü tá Iraétanüwa tüxü̃ ípeta̱xüchi.
16 Rü ngẽma ngunexü̃ i nagu inaxügüxü̃gu i Üpetüchiga rü tá penaxü i wüxi i ngutaque̱xe i üünexü̃. Rü ngẽxgumarüxü̃ tá ta i norü 7 i ngunexü̃gu rü tá penaxü i to i ngutaque̱xe i üünexü̃. Rü guxü̃ma i ngẽma 7 i ngunexü̃gügu rü taxúetama ta̱xacürü puracü taxü. Rü ngẽma perü õna i pengṍxchaü̃xü̃xica tátama nixĩ i pexüxü̃.
17 Rü guxcüma ya taunecügu tá penaxüchiga i ngẽma ngunexü̃ i nagu penangṍxü̃ i paũ i ngearü pu̱xẽẽruü̃ã́xü̃. Erü ngẽma ngunexü̃ nixĩ i nagu pexü̃ íchagaxü̃xü̃ i Equítuanewa i guxãma i pema. Rü ngẽma ngunexü̃ rü guxü̃gutáma penaxüchiga i pema rü petaagü.
18 Rü yima nüxíraü̃cü ya tauemacüarü 14 arü yáuanexü̃gu rü tá ipenaxügü nax penangṍxü̃ i paũ i ngearü pu̱xẽẽruü̃ã́xü̃ ñu̱xmatáta yimatama ya tauemacüarü 21 arü yáuanexü̃wa nangu.
19 Rü 7 i ngunexü̃ tá nixĩ i taxũtáma pepatawa pexü̃́ nangẽxma i paũarü pu̱xẽẽruxü̃. Rü texé ya yíxema nangṍxẽ i paũ i pu̱xẽẽruü̃ã́xü̃ rü tá petanüwa ítata̱xüchi woo Iraétanüxü̃ tixĩxgu rüe̱xna to i nachixü̃anecüã̱x tixĩxgu.
20 Rü ngẽmaca̱x tama name i penangõ̱x i paũ i pu̱xẽẽruü̃ã́xü̃. Rü ngẽma paũ i ngearü pu̱xẽẽruü̃ã́xü̃xica tátama nixĩ i mexü̃ nax penangṍxü̃ i ngextá pema ípemaxẽxü̃wa” —ñanagürü ga Tupana.
21 Rü yexguma ga Moiché rü naxca̱x nangema ga guxü̃ma ga yema Iraétanüxü̃arü ãẽ̱xgacügü, rü ñanagürü nüxü̃: —¡Ípixĩ rü peyayaxu i wüxi i carnéruxacü rüe̱xna wüxi i chíbuxacü naxca̱x i pepatagücüã̱x! ¡Rü peyamá nax ngẽmaãcü penaxüchigaxü̃ca̱x i Üpetüchiga!
22 ¡Rü yimá nagü rü wüxi ya bachíagu penaba! ¡Rü yimá nagümaxã peyawaixẽxẽ i wüxi i maxcuruxü̃ i natüane i ichópuchacüxünaxca̱x! ¡Rü yimá nagümaxã penamaxcu i nacüwawa i perü ĩã̱x! ¡Rü ngẽmawena rü naxü̃pa nax yangunexü̃ rü taxúetama ítaxũxũ i pepatagüwa!
23 Rü ngẽmaãcü ngẽxguma Cori ya Tupana ngéma üpetügu nax nadaiaxü̃ca̱x i ngẽma nüxíra buexü̃ i Equítuanecüã̱x nanegü rü tá nüxü̃ naxüpetümare ya yima pepatagü ega perü ĩã̱xgüwa nüxü̃ nada̱u̱xgu nax yimá nagümaxã ínachaeguxü̃. Rü ngẽmaãcü ya Cori ya Tupana rü taxũtáma pepatagu nanaxücuxẽxẽ i ngẽma dauxü̃cüã̱x i ma̱xruxü̃ ixĩxü̃.
24 Rü ñu̱xmax i pemax rü ngẽma petaagü rü guxü̃gutáma naga pexĩnüe i ngẽma mu ya Tupana pexna ãxü̃.
25 Rü ngẽxguma nawa pengugügu i ngẽma naane i Cori ya Tupana pexna ãxchaü̃xü̃ ga yema pemaxã inaxunetaxü̃rüxü̃, rü pema rü tá guxcüma ya taunecügu penaxüchiga i ngẽma Üpetüchiga.
26 12:26-27 Rü ngẽxguma pexacügü tá pexna caxgux rü ta̱xacüchiga nax yixĩxü̃ i ngẽma pexüchigaxü̃, rü pema rü tá penangãxü̃, rü ñaperügügü tá: “Ñaa naxü̃na rü tayama̱x naxca̱x i Cori ya Tupanaarü Üpetüchiga nax ngẽmaãcü nüxü̃ icua̱xüü̃güxü̃ca̱x. Rü yexguma nadaiãgu ga Equítuanecüã̱x nanegü ga nüxíraxü̃güxü̃, rü nüxü̃ naxüpetümare ga yema Iraétanüxü̃ nanegü ga Equítuanewa yexmagüxü̃, rü taxuxü̃ma nima̱x. Rü yemaacü ga tatanüxü̃ rü taxúema tayu” —ñanagürü ga Moiché. Rü yexguma ga yema Iraétanüxü̃arü ãẽ̱xgacügü rü ñaxtüanegu nanangücuchigü, rü Cori ya Tupanaxü̃ nicua̱xüü̃gü.
27 Nüü̃ nadau 12:26
28 Rü ñu̱xũchi ínixĩ, rü nanaxü ga yema Cori ya Tupana Moichémaxã rü Aróü̃maxã nüxü̃ ixuxü̃rüxü̃.
Nayue ga Equítuanecüã̱x nanegü ga nüxíraxü̃güxü̃
29 Rü meama ngãxü̃cüxü, rü nüma ga Cori ya Tupana rü norü orearü ngeruü̃xü̃ namu nax wüxichigü ga Equítuanecüã̱xgüpatawa nadaiaxü̃ca̱x ga nanegü ga nüxíraxü̃güxü̃. Rü yexgumarüxü̃ ta ga Equítuanecüã̱xarü ãẽ̱xgacü ga Faraóü̃ nane ga nüxíraü̃cü rü nayama̱x, rü woo naxü̃naxacügü ga iyatüxü̃ ga nüxíraxü̃xü̃, rü nanadai.
30 Rü nüma ga Faraóü̃ rü norü ngü̃xẽẽruü̃gü rü guxü̃ma ga Equítuanecüã̱xgü rü ínarüdagü ga yema chütaxü̃gu. Rü poraãcü aita naxüe rü naxauxe ga guxü̃ma ga Equítuanewa, yerü guxü̃nema ga Equítuanecüã̱xpatawa rü nayu ga wüxi.
31 Rü yematama chütaxü̃gu rü nüma ga Faraóü̃ rü Moichéca̱x rü Aróü̃ca̱x nangema, rü ñanagürü nüxü̃: —¡Ípechoxü̃ i pema rü ngẽma Iraétanüxü̃ i nua natanüwa i ñaa chorü duü̃xü̃gü! ¡Rü nüxü̃ peyarücua̱xüü̃gü ya yimá perü Cori ya Tupana, ngẽma pema nagu perüxĩnüexü̃rüxü̃!
32 ¡Rü ẽcü peyagagü i perü carnérugü rü perü wocagü ngẽma penaxwa̱xerüxü̃! ¡Rü ípechoxü̃ i nua! ¡Rü perü Tupanana cha̱u̱xca̱x pecagüe! —ñanagürü.
33 Rü nüma ga Equítuanecüã̱xgü rü Iraétanüxü̃xü̃ nipaxagü nax Equítuanewa ínachoxü̃xü̃ca̱x, yerü nagu narüxĩnüe nax guxü̃táma yuexü̃.
34 Rü nümagü ga yema Iraétanüxü̃ rü nanayauxcharagü ga yema paũchara ga ngearü pu̱xẽẽruü̃ã́xü̃. Rü guxü̃ne ga norü ta̱u̱xtamaxã naxchirugu nananuquegü rü nügüãtügu nayangẽgü.
35 Rü ñu̱xũchi yema Equítuanecüã̱xgüxü̃tawa naxca̱x ínacagü ga naxchirugü rü norü ngã̱xãẽruü̃gü ga úirunaxca̱x rü diẽrumünaxca̱x.
36 Rü nüma ga Cori ya Tupana rü yema Equítuanecüã̱xgüaxü̃́ nanatauxchaxẽxẽ nax norü ngúchaü̃maxã yema Iraétanüxü̃na naxãgüãxü̃ca̱x ga yema nüxna naxca̱x nacagüxü̃. Rü yemaacü ga yema Iraétanüxü̃ rü nayana ga yema Equítuanecüã̱xarü yemaxü̃gü.
Equítuanewa ínachoxü̃ ga Iraétanüxü̃
37 Rü Ramchéwa ínachoxü̃ ga yema Iraétanüxü̃, rü Chucóxwa naxĩ. Rü 600,000 ga yatügü ga churarawa imexü̃ nayexmagü. Rü naétü nayexma ga ngexü̃gü rü buxü̃gü ga tama ixugüxü̃.
38 Rü nawe narüxĩ ga muxü̃ma ga togü ga duü̃xü̃gü, rü nayagagü ta ga norü carnérugü rü wocagü.
39 Rü yema nax nangechicagüxü̃gagu rü taxucürüwama norü õnata namexẽẽgü, yerü ga Equítuanecüã̱xgü rü nachixü̃anewa ínanawoxü̃. Rü yemaca̱x paũ ga ngearü pu̱xẽẽruü̃ã́xü̃ naxügü nawa ga norü paũchara ga ngearü pu̱xẽẽruü̃ã́xü̃ ga Equítuanewa yangegüxü̃.
40 Rü 430 ga taunecü nixĩ ga Equítuanewa nayexmagüxü̃ ga Iraétanüxü̃.
41 Rü yematama ngunexü̃ ga nagu 430 ga taunecüwa nax nanguxü̃gu nixĩ ga yema nachixü̃anewa ínachoxü̃xü̃ ga guxü̃ma ga Cori ya Tupanaarü duü̃xü̃gü ga Iraétanüxü̃.
42 Rü nüma ga Cori ya Tupana rü yema chütaxü̃xü̃ naxuneta nax ínamuxü̃ãxü̃ca̱x ga norü duü̃xü̃gü ga Equítuanewa. Rü yemaca̱x nanaxwa̱xe nax gucü ya taunecügu naxüchigagüãxü̃ca̱x i petaagü i ngẽxguma nawa nanguuxü̃gu i ngẽma ngunexü̃, nax ngẽmaãcü petaagü nüxna nacua̱xãchiexü̃ca̱x ga ñuxãcü Cori ya Tupana pexü̃ ínanguxü̃xẽẽxü̃ ga Equítuanewa.
Ñuxãcü tá nanaxüchiga i Üpetüchiga
43 Rü nüma ga Cori ya Tupana rü Moichémaxã rü Aróü̃maxã nidexa rü ñanagürü: —Ñu̱xma rü tá pemaxã nüxü̃ chixu i ñuxãcü tá penaxüchiga i Üpetüchiga. Rü tama name i ngẽma duü̃xü̃gü i tama Iraétanüxü̃ ixĩgüxü̃ rü nax nangṍoxü̃ i ngẽma naxü̃na i cha̱u̱xca̱x imáxü̃.
44 Natürü ngẽma perü duü̃xü̃ i diẽrumaxã naxca̱x petaxexü̃ rü ñu̱xũchi marü íwiecha̱xmüü̃pe̱xechiraü̃xü̃, rü marü name i nanangõ̱x i ngẽma naxü̃na.
45 Natürü ngẽma to i nachixü̃anecüã̱x i duü̃xü̃ i petanügu naxũanexü̃ rüe̱xna ngẽma duü̃xü̃ i diẽruca̱x petanüwa puracüxü̃, rü taxuacüma nanangõ̱x i ngẽma naxü̃na i cha̱u̱xca̱x pimáxü̃.
46 Rü ngẽma naxü̃na i cha̱u̱xca̱x pimáxü̃ rü penaxwa̱xe i pepatawachigütama penangõ̱x. ¡Rü taxũtáma ĩpatawa ípenangexechi i namachi rü bai i íxraxü̃, rü taxũtáma peyapuxẽxẽ ya naxchina̱xãgü!
47 Rü ngẽmaãcü tá penaxüchiga i guxü̃ma i pema ya Iraétanüxü̃.
48 Rü ngẽxguma nangẽxmagu i to i nachixü̃anecüã̱x i duü̃xü̃ i petanüwa maxü̃xü̃ rü ngẽxguma naxüchigachaü̃ãxgu i ngẽma chorü Üpetüchiga rü nanaxwa̱xe nax guxü̃ma i napatacüã̱x i iyatüxü̃ rü nügü ínawiü̃cha̱xmüü̃pe̱xechiraü̃güxü̃. Rü ngẽxguma ngẽma yanguxẽẽgu rü marü ñoma Iraétanüxü̃ yaxĩgüxü̃rüü̃tama nixĩgü. Natürü ngẽma tama íwíecha̱xmüü̃pe̱xechiraü̃xü̃ rü taxucürüwa nanangõ̱x i ngẽma naxü̃na.
49 Rü ngẽmatama mu tá nixĩ i nagu naxĩxü̃ i Iraétanüxü̃ rü ngẽxgumarüxü̃ ta i ngẽma duü̃xü̃gü i to i nachixü̃anecüã̱xgü i petanüwa maxẽxü̃ —ñanagürü ga Tupana.
50 Rü yexguma nüma ga Iraétanüxü̃ rü guxü̃ma ga yema Cori ya Tupana Moichémaxã, rü Aróü̃maxã nüxü̃ ixuxü̃ãcüma nanaxügü.
51 Rü yematama ngunexü̃gu rü nüma ga Cori ya Tupana rü nügütanüxü̃maxãchigü Equítuanewa ínanamuxü̃ ga Iraétanüxü̃.
