Éxodo 13:1-22
13 13:1-2 Rü nüma ga Cori ya Tupana rü Moichémaxã nidexa rü ñanagürü: —¡Choxna naxuaxü̃ i guxü̃ma i penegü i nüxíra buexü̃! Erü guxü̃ma i Iraétanüxü̃ i iyatüxü̃ i nüxíra buexü̃ rü choxrügü nixĩ. Rü ngẽxgumarüxü̃ ta i guxü̃ma i ngẽma naxü̃nagüxacü i iyatüxü̃ i nüxíra buexü̃ rü choxrügü nixĩ —ñanagürü.
2 Nüü̃ nadau 13:1
3 Rü nüma ga Moiché rü Iraétanüxü̃xü̃ ñanagürü: —¡Nüxna tá pecua̱xãchie i ñaa ngunexü̃ i nagu Cori ya Tupana taxü̃ i norü poramaxã pexü̃ ímuxü̃xü̃ ga Equítuanewa i ngexta chixri pemaxã inacua̱xgüxü̃wa rü norü puracütanüxü̃xü̃ pexü̃ yaxĩgüxẽẽxü̃wa! Rü ngẽmaca̱x i ngẽxguma penaxüchigagügu i ñaa ngunexü̃ rü taxũtáma paũ i pu̱xẽẽruü̃ã́xü̃ pengõ̱xgü.
4 13:4-5 Rü ñu̱xma rü daa tauemacü ya Abíxgu tá ípechoxü̃ i nua Equítuanewa. Rü Cori ya Tupana rü tá nawa pexü̃ nagagü ga yema naane ga perü o̱xigümaxã naxueguxü̃ nax perü yixĩxü̃ca̱x. Rü ngẽma naanewa nangẽxma ya lechi rü ira ñoma wüxi i natüarü dexárüxü̃ ixĩxü̃ne. Rü ngẽma naanegu naxãchiü̃gü i duü̃xü̃gü i Canaáü̃tanüxü̃ rü Itítanüxü̃ rü Amoréutanüxü̃ rü Ebéutanüxü̃ rü Yebuchéutanüxü̃. Rü ngẽxguma marü ngéma pengẽxmagügu rü daatama tauemacügu tá penaxü i Üpetüchiga.
5 Nüü̃ nadau 13:4
6 Rü 7 i ngunexü̃ tá paũ i ngearü pu̱xẽẽruü̃ã́xü̃ pengõ̱xgü. Rü ngẽxguma nawa yacuáxü̃ i ngunexü̃wa nanguxgu rü Cori ya Tupanaca̱x tá penaxü i wüxi i ngutaque̱xe i nagu nüxü̃ picua̱xüü̃güxü̃.
7 Rü ngẽma 7 i ngunexü̃ rü tá paũ i ngearü pu̱xẽẽruü̃ã́xü̃maxã pengõ̱x. Rü guxü̃ma i ngẽma perü naanewa rü taxũtáma nangẽxma i paũarü pu̱xẽẽruxü̃ rü paũ i pu̱xẽẽruü̃ã́xü̃.
8 Rü ngẽma ngunexü̃gu rü penegümaxã tá nüxü̃ pixu rü ñapegürü: “Rü ñaa taxü erü nüxna nacua̱xãchie ga yema mexü̃ ga norü poramaxã toxca̱x naxüxü̃ ga Cori ya Tupana ga yexguma Equítuanewa ítachoxü̃gu”, ñapegürü.
9 Rü ngẽma nax penaxüchigaxü̃ i ngẽma Üpetüchiga rü ñoma wüxi i perü cua̱xruxü̃ i pechacüxüwa rüe̱xna pecatüwa ngẽxmaxü̃ tá pexna nüxü̃ nacuã̱xãchixẽxẽ nax guxũgutáma Cori ya Tupanaarü ucu̱xẽxü̃ pixuxü̃, erü nüma nixĩ ga norü poramaxã Equítuanewa pexü̃ ínanguxü̃xẽẽxü̃.
10 Rü ngẽmaca̱x i ñaa Üpetüchiga rü guxcüma ya taunecügu tá penaxüchiga i ngẽxguma nawa nanguxgu i norü ngunexü̃.
11 13:11-12 Rü ngẽxguma Cori ya Tupana nawa pexü̃ gagügu rü pexna naxããgu i ngẽma Canaáü̃cü̃ã̱xgüarü naane ga yema pemaxã rü perü o̱xigümaxã naxueguxü̃, rü tá Tupanana penamugü ya penegü ya nüxíraxü̃gücü, rü ñu̱xũchi ngẽma nüxíraxü̃güxü̃ i pexü̃naxacügü i iyatüxü̃, erü noxrü nixĩ ya Cori ya Tupana.
12 Nüü̃ nadau 13:11
13 Rü ngẽxguma wüxi i búruxacü i iyatüxü̃ i nüxíraxü̃ buxgu, rü penaxwa̱xe nax nachicüxü wüxi i carnéruxacü rüe̱xna wüxi i chíbuxacü Tupanana pemu. Rü ngẽxguma taxũtáma carnéru pemuxgu rü tá penapogünaxã i perü búru. Rü yima pene ya nüxíraxü̃cüca̱x rü tá ta Tupanana penaxãmare i wüxi i carnéruxacü.
14 Rü ngẽxguma tá penegü pexna cagügu rü ñaxgu: “¿Ta̱xacüchiga nixĩ i ñaa pexüxü̃?” ñaxgu, rü pema rü ñaãcü tá penegüxü̃ pengãxü̃: “Yexguma Equítuanewa tayexmagügu, rü nüma ga Cori ya Tupana rü norü poramaxã toxü̃ ínanguxü̃xẽxẽ. Yerü ga Equítuanecüã̱xgü rü ngúxü̃ toxü̃ ningexẽẽgü rü poraãcü puracü toétü nanugü.
15 Rü yexguma nüma ga Faraóü̃ nügü nataixarü maxü̃neã̱xẽẽgu rü tama toxü̃ ínamuxü̃chaü̃gu ga Equítuanewa rü Cori ya Tupana rü tanapoxcue ga Equítuanecüã̱xgü ga duü̃xü̃gü. Rü nanadai ga nanegü ga nüxíra buexü̃ ga wüxichigü ga ĩpatawa, rü ñu̱xũchi naxü̃naxacügü ga iyatüxü̃ ga nüxíra buexü̃. Rü ngẽmaca̱x nixĩ i ñu̱xma i toma rü guxü̃ma i naxü̃naxacügü i iyatüxü̃ i nüxíra buexü̃ rü Cori ya Tupanaca̱x tanada̱i̱xü̃ nax ngẽmaãcü Tupanana tanaxãmarexü̃ca̱x nachicüxü ya tone ya nüxíraü̃cü.
16 Rü ngẽma nax tanaxüchigaxü̃ i ngẽma Üpetüchiga rü ñoma wüxi i perü cua̱xruxü̃ i pechacüxüwa rüe̱xna pecatüwa ngẽxmaxü̃ tá pexna nüxü̃ nacuã̱xãchixẽxẽ nax ñuxãcü Cori ya Tupana norü poramaxã Equítuanewa toxü̃ ínguxü̃xẽẽxü̃” —ñanagürü ga Moiché.
Tupana rü wüxi ga caixanexü̃gu rü üxüemagu ínayaxümücü ga Iraétanüxü̃
17 Rü yexguma Faraóü̃ yema Iraétanüxü̃xü̃ inge̱xgu, rü Tupana rü tama yema nama ga Firitéutanüxü̃arü naanewa daxü̃gu nayagagü, woo yema nax yixĩxü̃ ga nama ga we̱xwa Canaáü̃anewa daxü̃. Yerü nüma ga Tupana rü nagu narüxĩnü ga yema Iraétanüxü̃ rü chi yema Firitéutanüxü̃maxã nügü nadaixgu, rü yemaca̱x ngürüãchi Equítuaneca̱x nawoegu.
18 Rü yemaca̱x ga Tupana rü yema nama ga Már ga Dauchíüxü̃anacügu idaxü̃guama namaxã ínayaxüegu ñu̱xmata yema ínachianexü̃wa nachopetü. Rü nüma ga Iraétanüxü̃ rü ñoma churaragürüxü̃ meama nichima ga yexguma Equítuanewa ínachoxü̃xgu.
19 Rü nüma ga Moiché rü nayana ga Yúchechina̱xãgü, yerü Yúche rü naenexẽgüna naxãga ga nax yanaxãxü̃ca̱x ga naxchina̱xãgü ga yexguma tá Equítuanewa ínachoxü̃xgu. Yerü nüma ga Yúche rü nayaxõ nax Tupana rü aixcüma tá ínanguxü̃xẽẽxü̃ ga yema Iraétanüxü̃ ga Equítuanewa.
20 Rü nüma ga Iraétanüxü̃ rü Chucóxwa inaxĩãchi, rü Etáü̃gu nayapexgü ga ngextá yema chianexü̃ íxügüxü̃wa.
21 Rü ngunecü rü nüma ga Tupana rü wüxi ga caixanexü̃gu yema Iraétanüxü̃xü̃ ínixümücü rü nape̱xegu nixũema ga nüxü̃ nax nacua̱xgüxü̃ca̱x ga ngextá tá nax naxĩxü̃. Rü chütacü rü Tupana rü wüxi ga üxüemagu nayaxümücü nax nangóonexü̃ca̱x rü yemaacü nüxü̃́ natauxchaxü̃ca̱x ga ngunecü rü chütacü nax inaxĩxü̃.
22 Rü yema caixanexü̃ rü nape̱xegu nixũema ga ngunecü. Rü yema üxüema rü nayabáixmaü̃ ga chütacü.
