Éxodo 14:1-31
14 14:1-2 Rü nüma ga Cori ya Tupana rü Moichéxü̃ ñanagürü: —¡Iraétanüxü̃maxã nüxü̃ ixu nax nawoeguxü̃ca̱x nax Pi-airóxarü to̱xma̱xtawa paxaãchi nangẽxmagüxü̃ i Midóx rü márcutüarü ngãxü̃wa i Baá-chepóü̃arü to̱xma̱xtawa! ¡Rü namaxã nüxü̃ ixu nax ngẽma nachicaarü to̱xma̱xtagu i márpechinüwa paxaxãchi nax nangẽxmagüxü̃ca̱x!
2 Nüü̃ nadau 14:1
3 Rü ngẽmaãcü i nüma i Faraóü̃ rü tá nagu narüxĩnü nax pema i Iraétanüxü̃ tama nüxü̃ pecuáxü̃ nax ngextá pexĩxü̃ rü ngẽmaca̱x ngẽma ínachianexü̃gu ípetüexü̃.
4 Natürü i choma rü tá Faraóü̃xü̃ íchanataiãchiarü maxü̃ã̱xẽxẽ rü nüma rü tá pewe nangẽ. Rü ngẽxguma i choma rü Faraóü̃pe̱xewa rü guxü̃ma i norü churaragüpe̱xewa tá ichanawe̱x i chorü pora nax ngẽmaãcü nüxü̃ yacua̱xãchitanüxü̃ca̱x i ngẽma Equítuanecüã̱xgü nax choma rü aixcüma Cori ya Tupana chixĩxü̃ —ñanagürü.
5 Rü nüma ga Equítuanearü ãẽ̱xgacü rü nüxü̃ naxĩnüchiga nax yema Iraétanüxü̃ rü marü naxĩgüxü̃. Rü yemaca̱x ga nüma ga Faraóü̃ rü norü ngü̃xẽẽruü̃gü rü naxüchicüxüarü ĩnüã̱xgü, rü ñanagürügü nügümaxã: —¿Tü̱xcüü̃ nüxü̃ inge̱xgüxü̃ i ngẽma Iraétanüxü̃ nax ngẽmaãcü taxúema tüxü̃́ puracüexü̃ca̱x i ñu̱xmax? —ñanagürügü.
6 Rü yemaca̱x ga Faraóü̃ rü yexgumatama norü duü̃xü̃güxü̃ namu nax namexẽẽxãxü̃ca̱x ga naweü̃ ga daiwa namaxã naxũxü̃ne. Rü ínayagagü ga guxü̃ma ga norü churaragü.
7 Rü nanamexẽxẽ ta ga 600 ga norü carugü ga churaragüweü̃ ga daiwa mexü̃ne. Rü naétü nayexma ga norü churaragüarü ãẽ̱xgacügüweü̃ ga guxü̃ma ga Equítuanewa ne ĩxü̃ne.
8 Rü nüma ga Tupana rü Faraóü̃xü̃ ínanataiãchiarü maxü̃ã̱xẽxẽ, rü yemaca̱x tama inaxĩnüchaü̃ rü Iraétanüxü̃we nangeama woo nüma ga Faraóü̃ nüxü̃ nax nadauxü̃ ga ñuxãcü Tupanaarü poramaxã ínachoxü̃xü̃ ga Iraétanüxü̃.
9 Rü nümagü ga Equítuanecüã̱xgü rü guxü̃ma ga norü churaragümaxã rü naweü̃gümaxã rü norü cowarugümaxã inaxĩãchi nax nawe nangegüxü̃ ga yema Iraétanüxü̃. Rü Már ga Dauchíüxü̃cutügu nüxü̃ inayangaugü ga yema íyapegüxü̃wa ga Pi-airóxarü ngaicamana ga Baá-chepóü̃arü to̱xma̱xtawa.
10 Rü yexguma yema Iraétanüxü̃ rü yáxü̃gu nüxü̃ nadaugügu ga Faraóü̃ rü norü churaragü, rü norü cowarugü ga yéma ne naxĩxü̃, rü poraãcü namuü̃e. Rü Cori ya Tupanana nacagü nax nüxü̃ nangü̃xẽẽxü̃ca̱x.
11 Rü yexguma ga yema duü̃xü̃gü rü Moichéxü̃ ñanagürügü: —¿Tü̱xcüü̃ nua ínachianexü̃wa toxü̃ cugagü nax nuxã tayuexü̃ca̱x? ¿Ẽ̱xna cuxca̱x rü Equítuanewa rü tama ningu i tauque nax ngexta tata̱xgüxü̃ca̱x? ¿Rü tü̱xcüü̃ ngexü̃ tomaxã cuwagü? ¿Rü tü̱xcüü̃ Equítuanewa toxü̃ ícugaxü̃?
12 Rü yema nixĩ ga cumaxã nüxü̃ tixugüexü̃ ga Equítuanewa ga yexguma ñatagügu: “Rü nüetama ega Equítuanecüã̱xaxü̃́ tapuracüegu. Rü narümemae toxü̃́ nax norü puracütanüxü̃ nax tixĩgüxü̃ rü tama nuxã ínachianexü̃gu nax tayuemarexü̃”, cumaxã nüxü̃ tixugüexü̃ —ñanagürügü.
13 Rü yexguma ga Moiché rü nanangãxü̃ rü ñanagürü nüxü̃: —¡Taxuca̱xma pemuü̃e! ¡Rü mea iperüchomare rü naxca̱x perüdaunü nax ñuxãcü pexü̃ tá nax ínapoxü̃xü̃ ya Cori ya Tupana! Erü ngẽma Equítuanecüã̱xgü i ñu̱xma nüxü̃ pedauxü̃, rü tagutáma wena nüxü̃ pedaugü.
14 Rü pema rü taxuca̱xma pexoegaãẽgü. Erü nüma ya Cori ya Tupana rü tá pexü̃ ínapoxü̃ —ñanagürü.
15 Rü yexguma ga Cori ya Tupana rü Moichéxü̃ ñanagürü: —¿Tü̱xcüü̃ chorü ngü̃xẽẽca̱x ícuca? ¡Rü marütama nax cuyumüxẽxü̃! ¡Rü namu i ngẽma Iraétanüxü̃ rü inaxĩãma!
16 ¡Rü cuma rü nayaxu ya curü naixmena̱xã, rü márchíüétügu nawe̱x! Rü ngẽma márchiü rü tá nügüna nixĩgachichíxü nax ngẽmaãcü ngẽma Iraétanüxü̃ rü paanexü̃wa nax yachoü̃xü̃ca̱x.
17 Rü choma rü tá Faraóü̃xü̃ íchanataiãchiarü maxü̃ã̱xẽxẽ nax tama pega naxĩnüexü̃ca̱x i ngẽma Equítuanecüã̱xgü rü pewe yangexü̃tanüxü̃ca̱x. Rü ngẽmaãcü tá chanango̱xẽxẽ i chorü pora. Rü pema tá nüxü̃ pedau i ngẽma namaxã ngupetüxü̃ i Faraóü̃, rü guxü̃ma i norü churaragü i nacutügu ĩmarexü̃, rü ngẽma norü churaragü i cowaruétügu ĩxü̃, rü ngẽma norü churaragü i cowaru itúgüxü̃ i carugu ĩxü̃.
18 Rü ngẽxguma Faraóü̃pe̱xewa rü guxü̃ma i ngẽma norü churaragüpe̱xewa chaugü chawe̱xgu nax ñuxãcü chaporaxü̃, rü nüma i Equítuanecüã̱xgü rü tá nüxü̃ nicua̱xãchitanü nax aixcüma Cori ya Tupana chixĩxü̃ —ñanagürü.
19 Rü yexgumatama ga yema Tupanaarü duü̃xü̃ ga daxũcüã̱x rü yema caixanexü̃ ga noxri Iraétanüxü̃pe̱xegu ĩchiréxü̃ rü wixweama naxĩ.
20 Rü yemaacü ga yema caixanexü̃ rü Equítuanecüã̱xgü rü Iraétanüxü̃arü ngaxü̃wa nixüãchi. Rü yema Equítuanecüã̱xgüca̱x rü nanaxẽanexẽxẽ natürü Iraétanüxü̃ca̱x rü nanangóonexẽxẽ. Rü yemaca̱x nixĩ ga Equítuanecüã̱xgü ga taxucürüwama Iraétanüxü̃xü̃ iyangaugüxü̃ ga yema chütaxü̃gu.
21 Rü yexguma ga Moiché rü márétügu nawe̱xchacüxü. Rü nüma ga Cori ya Tupana rü yema chütaxü̃gu rü inanaxǘxẽxẽ ga wüxi ga poracü ga buanecü ga éstewaama ne ũcü ñu̱xmata yangunexü̃mare. Rü yemaacü ga yema már rü taxregu niyauxyexü̃chiü. Rü yemaacü nixĩ ga Cori ya Tupana ga yapayechitamaxẽẽãxü̃ ga már.
22 Rü yemaacü paanexü̃wa nichoü̃ ga Iraétanüxü̃, yerü taxregu niyauxyexü̃chiü ga dexá. Rü norü ngãxü̃wa nichoü̃, rü ñoma wüxi i ta̱xacü i ãxtapǘxü̃rüxü̃ nixĩgü ga norü tügünecüwawa rü norü to̱xwecüwawa ga dexá.
23 Rü guxü̃ma ga churaragü ga icowaruã́xü̃ rü yema churaragü ga cowaru itúgüxü̃ i carugu ĩxü̃ rü Iraétanüxü̃we nangẽgü ñu̱xmata yema már arü ngãxü̃tüwa nangugü.
24 Natürü yexguma marü ngunetüxü̃wa nanguxgu, rü nüma ga Cori ya Tupana rü yema caixanexü̃ ga üxüemarüxü̃ ixĩxü̃wa Equítuanecüã̱xgüarü churaragüxü̃ nadawenü. Rü nanaxĩ̱xãchiãẽgüxẽxẽ. Rü yemaca̱x nügümaxãtama nanue.
25 Rü yema norü carugü ga cowaru itúgüxü̃ rü ínayichícugü, rü ngechicuãcü ñaxtüanegu nitúgümare. Rü yemaca̱x ñanagürügü: —¡Ngĩxã tibuxmü i nua! Erü nüma ya Cori ya Tupana rü ngẽma Iraétanüxü̃xü̃ ínapoxü̃, rü yixema rü tamaxã nanu —ñanagürügü.
26 Rü yexguma marü guxü̃ma ga Iraétanüxü̃ inguü̃gu, rü Tupana rü Moichéxü̃ ñanagürü: —¡Ẽcü ngẽma már arü dexáétügu nawe̱xchacüxü nax ngẽma dexá rü nügüna wena naxũxü̃chiuxü̃ca̱x rü ngẽmaãcü ngẽxma nayi̱xixü̃ca̱x i ngẽma Equítuanecüã̱xgü namaxã i norü carugü rü norü cowarugü! —ñanagürü.
27 Rü nüma ga Moiché rü yema Tupana namaxã nüxü̃ ixuxü̃ãcüma nanaxü. Rü már arü dexáétügu naxuchacüxü rü yemaca̱x ga moxü̃ãcü nax yangunexü̃ rü nügüna naxũxü̃chíxü ga dexá. Rü yemacha̱xwa nügü ínibuxmüchaü̃ ga Equítuanecüã̱xgü. Natürü yexguma nügü íyabuxmügu, rü már arü dexámaxã narübuxmüama, rü yexma nayi. Rü yemaacü Tupana yexma márgu nanayixẽxẽ ga yema Equítuanecüã̱xgü.
28 Rü yexma nayi ta ga norü carugü, rü norü churaragü ga icowaruã́xü̃, rü guxü̃ma ga yema churaragü ga ichoü̃xü̃ ga yema márwa nax Iraétanüxü̃we nangegüxü̃ca̱x. Rü guxü̃ma ga yemagü rü yexma nayue rü taxuxü̃ma ínayaxü ga yexguma nügüna naxĩxgu ga yema márchiü.
29 Natürü ga yema Iraétanüxü̃ rü paanexü̃wa nichoü̃, yerü taxregu niyauxyexü̃chiü ga dexá. Rü norü ngãxü̃wa nichoxü̃, yerü ñoma wüxi i ta̱xacü i ãxtapǘxü̃rüxü̃ nixĩgü ga norü tügünecüwawa rü norü to̱xwecüwawa.
30 Rü yemaacü nixĩ ga yema ngunexü̃gu ga Cori ya Tupana ga ínapoxü̃xü̃ ga yema Iraétanüxü̃ naxme̱xwa ga yema Equítuanecüã̱xgü. Rü yema Iraétanüxü̃ rü nüxü̃ nadaugü ga naxü̃negü ga yema Equítucüã̱xgü ga márpechinügu íyachaxãchitanüxü̃.
31 Rü nüma ga Iraétanüxü̃ rü yexguma nüxü̃ nadaugügu ga yema Cori ya Tupana norü poramaxã Equítuanecüã̱xgümaxã naxüxü̃, rü Cori ya Tupanaxü̃ nicua̱xüü̃gü rü aixcüma nüxü̃́ nayaxõgü. Rü yexgumarüxü̃ ta nüxü̃́ nayaxõgü ga guma Moiché ga Tupanaarü duü̃ ixĩcü.
