Éxodo 16:1-36
16 Rü guxü̃ma ga Iraétanüxü̃ rü inaxĩãchi ga Eríü̃wa. Rü yema chianexü̃ ga Chíü̃gu ãégaxü̃wa nangugü. Rü ngẽma chianexü̃ i Chíü̃, rü Eríü̃arü rü Chinaíarü ngãxü̃wa nangẽxma. Rü yexguma yéma nangugügu rü marü wüxi ya tauemacüarü ngãxü̃ ningegü ga Equítuanewa nax ínachoxü̃xü̃.
2 Rü yema nachica ga chianexü̃ ga Chíü̃wa nixĩ ga guxü̃ma ga yema duü̃xü̃gü rü Moichémaxã rü Aróü̃maxã wena nanuexü̃.
3 Rü ñanagürügü nüxü̃: —Narümemae chi nixĩ ga Cori ya Tupana rü noxtacüma Equítuanegu toxü̃ nada̱i̱xü̃. Yéma rü buetaregü ga namachimaxã ixããcugücütanüwa tarütogü rü meama tachibüe, natürü pema rü nua ínachianexü̃wa toxü̃ pegagü nax taiyamaxã nuxã toxü̃ peda̱i̱xü̃ca̱x —ñanagürügü.
4 Rü yexguma ga Cori ya Tupana rü Moichéxü̃ ñanagürü: —Ñu̱xma rü tá chanaxü nax õna naxca̱x charüyi̱xẽẽxü̃ i daxũguxü̃ i naanewa. Rü nüma i duü̃xü̃gü rü wüxichigü i ngunexü̃gu rü tá nawa naxĩĩxü̃ nax nayauxgüãxü̃ca̱x i ngẽma wüxi i ngunexü̃ca̱x inguxü̃. Rü ngẽmawa tá nüxü̃ chaxü i ngẽma duü̃xü̃gü rü chauga naxĩnüe rüe̱xna tama.
5 Rü ngẽxguma tá norü 6 i ngunexü̃wa nanguxgu nax norü dewa pexĩxü̃ i ngẽma õna nax pepatawa penanaxü̃ca̱x, rü tá penayaxu i taxre i ngunexü̃ nagúxü̃ca̱x —ñanagürü ga Tupana.
6 Rü yexguma ga Moiché rü Aróü̃ rü Iraétanüxü̃maxã ñanagürügü: —Ñaa yáuanexü̃ tá nüxü̃ pecua̱x nax Cori ya Tupana yixĩxü̃ ga Equítuanewa pexü̃ ígaxü̃xü̃.
7 Rü moxü̃ pa̱xmama tá nüxü̃ pedau i Cori ya Tupanaarü pora i tá pexü̃ nawéxü̃, erü nüma rü nüxü̃ naxĩnü nax chixri nüxü̃ pixugüechaü̃. ¿Ta̱xacüca̱x tomaxã chixri pidexagü? Erü tomagü rü taxuxü̃ma tixĩgü —ñanagürügü.
8 Rü yexguma ga nüma ga Moiché rü yema duü̃xü̃gümaxã nidexa rü ñanagürü nüxü̃: —Rü yixcüra yáuanecü rü Cori ya Tupana tá pexna nanaxã i namachi nax penangṍxü̃ca̱x, rü pa̱xmama rü tá pexna nanaxã i muxü̃tama i paũ. Erü nüma ya Tupana rü pexü̃ naxĩnü nax nachigagu chixri pidexagüxü̃. ¿Rü texégü tixĩgü i tomax? Pema rü tama tochiga nixĩ i chixri pidexagüxü̃, natürü Cori ya Tupanachiga nixĩ —ñanagürü.
9 Rü yemawena ga Moiché rü Aróü̃xü̃ ñanagürü: —¡Rü guxü̃ma i Iraétanüxü̃maxã nüxü̃ ixu rü Cori ya Tupanape̱xewa naxĩ, erü nüma rü nüxü̃ naxĩnü nax chixri nachiga yadexagüxü̃! —ñanagürü.
10 Rü yexguma Aróü̃ namaxã idexayane rü nüma ga Iraétanüxü̃ rü yema chianexü̃guama narüdaunü. Rü nüxü̃ nadaugü ga Cori ya Tupanaarü üüne ga wüxi ga caixanexü̃wa ngóxü̃.
11 Rü Cori ya Tupana rü Moichéxü̃ ñanagürü:
12 —Choma rü nüxü̃ chaxĩnü i ngẽma Iraétanüxü̃ nax chixri yadexagüxü̃. ¡Rü namaxã idexa i ngẽma duü̃xü̃gü rü ñacurügü tá nüxü̃: “Rü yixcama yáuanecü rü tá namachimaxã pixãwemügü. Rü moxü̃ pa̱xmama rü tá paũ pingõ̱x ñu̱xmatáta mea namaxã pingãxpütüwegü. Rü ngẽxguma tá nüxü̃ picuã̱xãchitanü nax choma yixĩxü̃ ya Cori ya perü Tupana” —ñanagürü.
13 Rü yematama yáuanexü̃gu ínangugü ga muxü̃ma ga topatawa, rü yema ínapegüxü̃wa namaxã nanapa. Rü moxü̃ãcü pa̱xmama ga norü ínapegüxü̃ã̱xtüwa cherenamaxã naxãane ga guxü̃wama.
14 Rü nawena nax iyachü̱xüxãchiemaxü̃ ga cherena rü waixü̃müanewa napuxane ga wüxi ga nagáuxü̃pü̱xügüraü̃xü̃.
15 Rü nüma ga duü̃xü̃gü ga Iraétanüxü̃ rü tama nüxü̃ nacua̱xgü nax ta̱xacü yixĩxü̃ ga yema. Rü yemaca̱x ga yexguma yemaxü̃ nadaugügu rü nügüna nacagü rü nügümaxã ñanagürügü: —¿Ta̱xacü nixĩ i ñaagü? —ñanagürügü. Rü nüma ga Moiché rü ñanagürü nüxü̃: —Ñaa nixĩ i ngẽma paũ i Cori ya Tupana pexna ãxü̃ nax namaxã pixãwemügüxü̃ca̱x.
16 Rü ñaa nixĩ i Cori ya Tupanaarü mu: “Rü wüxíechigü i pema rü tá penayaxu i ngẽma penaxwa̱xexü̃ nax penangṍxü̃. Rü naxẽ̱xpü̱x i ngẽma duü̃xü̃gü i pepatawa ngẽxmagüxü̃ rü wüxíechigüca̱x tá penayaxu i taxre i litru nagúxü̃” —ñanagürü ga Moiché.
17 Rü yema duü̃xü̃gü ga Iraétanüxü̃ rü nanaxügü ga yema Cori ya Tupana namaxã nüxü̃ ixuxü̃ãcü. Rü nümaxü̃ ga duü̃xü̃gü rü yexera nade yerü naxacügüe̱xpü̱x nade. Rü togü rü noxretama nade, yerü tama namu ga napatacüã̱x.
18 Rü yema duü̃xü̃gü ga rümumaexü̃ degüxü̃ rü taxuxü̃ma nüxü̃́ ínayaxü. Rü yema noxretama dexü̃ rü tama nüxü̃́ inayataxu. Rü wüxichigü ga yema duü̃xü̃ rü nanayaxu ga yema nangṍxchaü̃güxü̃xicatama.
19 Rü yemawena ga Moiché rü duü̃xü̃gümaxã ñanagürü: —¡Taxúetama namaxã tanguxü̃ tümaarü moxü̃ãcüruxü̃! —ñanagürü.
20 Natürü nümaxü̃ ga duü̃xü̃ rü tama Moichéga naxĩnüe rü ínayaxüxẽẽgüama norü moxü̃ãcüruxü̃. Natürü ga yema duü̃xü̃gü ga norü õna íyaxüxẽẽgüxü̃ norü moxü̃ãcüruxü̃, rü nüxü̃́ nixõxmiã̱x rü niyixi. Rü yexguma ga Moiché rü yema duü̃xü̃gümaxã nanu.
21 Rü wüxichigü ga duü̃xü̃ rü moxü̃ãcü pa̱xmama nanayaxu ga õna ga yema ngunexü̃gu nangṍxchaü̃xü̃xicatama, yerü üa̱xcüarü ngu̱xemamaxã nichaxichigü.
22 Natürü yexguma norü 6 ga ngunexü̃wa nanguxgu rü taxree̱xpü̱xcüna nanayauxgü ga yema a̱i̱xrüguma nayaxuxü̃ẽ̱xpü̱x ga õna. Rü 4 litru naguchigüxü̃ nixĩ ga wüxichigü ga duü̃xü̃ca̱x. Rü nüma ga yema ãẽ̱xgacügü ga natanüxü̃maxã icua̱xgüxü̃ rü Moichémaxã nüxü̃ nayarüxugüe.
23 Rü nüma ga Moiché rü namaxã nüxü̃ nixu rü ñanagürü: —Ngẽma nixĩ i Cori ya Tupana tamaxã nüxü̃ ixuxü̃. Erü moxü̃arü ngunexü̃ rü ngü̃chigaarü ngunexü̃ nixĩ rü ngẽmaca̱x tá Cori ya Tupanaca̱x itarüngügü. Rü ngẽmaca̱x name nixĩ i ñu̱xma penaxü i ngẽma pewemü i pexüxchaü̃xü̃ rü penamuxra i ngẽma perü õna i pemuxrachaü̃xü̃, rü namaxã penguxü̃gü i guxü̃ma i ngẽma pexü̃́ íyaxüxü̃ perü moxü̃ãcüruxü̃ —ñanagürü.
24 Rü yema Moiché namaxã nüxü̃ ixuxü̃rüü̃ãcü nanaxügü. Rü namaxã nanguxü̃gü ga yema norü õna ga íyaxügüxü̃ norü moxü̃ãcüruxü̃. Rü yemaacü tama nüxü̃́ niyixe rü tama nüxü̃́ nixõxmiã̱x ga yema norü õnagü.
25 Rü yexguma ga Moiché rü Iraétanüxü̃maxã ñanagürü: —¡Penangõ̱x i ñu̱xma i ngẽma perü õna! Erü ñaa ngunexü̃ rü ngü̃chigaarü ngunexü̃ i üünexü̃ i Cori ya Tupanaca̱x íxüxüchixü̃ nixĩ, rü taxuxü̃táma nango̱x i õna i ñu̱xma —ñanagürü.
26 Rü ngẽma 6 i ngunexü̃gu rü tá penanutaque̱xe i perü õna, natürü ngẽxguma norü 7 i ngunexü̃wa nanguxgu i ngü̃chigaarü ngunexü̃, rü taxuxü̃táma nangẽxma.
27 Natürü nümaxü̃ ga duü̃xü̃gü rü yexguma norü 7 ga ngunexü̃ ga ngü̃chigaarü ngunexü̃wa nanguxgu rü norü õnata nadaugü, natürü taxuxü̃ma ga õnaxü̃ nayangaugü.
28 Rü yemaca̱x ga Cori ya Tupana rü Moichéxü̃ ñanagürü: —¿Ñuxguxüratáta nixĩ i tama naga pexĩnüexü̃ i chorü mugü rü chorü ngu̱xẽẽtaegü?
29 Dücax, choma i Cori ya Tupana rü marü pexca̱x nüxü̃ chaxuneta i wüxi i ngunexü̃ nax nagu perüngü̃ẽxü̃ca̱x. Rü ngẽmaca̱x nixĩ i ngẽxguma norü 6 i ngunexü̃wa nanguxgu rü taxre i ngunexü̃ nagúxü̃ i õna pexna chaxãxü̃. Rü ngẽxguma norü 7 i ngunexü̃wa nanguxgu rü wüxíechigü tá tümapatawatama tangexma rü taxuwama taxũ —ñanagürü.
30 Rü yemaca̱x ga yema duü̃xü̃gü rü norü 7 ga ngunexü̃gu narüngü̃e.
31 Rü nüma ga Iraétanüxü̃ rü manámaxã nanaxugü ga yema õna ga nadexü̃. Rü yema maná rü ñoma chicurichirerüxü̃ nixĩ. Rü nacho̱x, rü ñoma gayeta i beruremaxã ããcaxü̃rüxü̃ nixĩ.
32 Rü yemawena ga Moiché rü ñanagürü: —Ñaa nixĩ i Cori ya Tupanaarü ore: “¡Taxre i litru naguxü̃ i maná penutaque̱xe rü ñu̱xũchi namaxã penguxü̃ nax ngẽmaãcü petaagü nüxü̃ daugüxü̃ca̱x ga yema õna ga chianexü̃wa pexna chaxãxü̃ ga yexguma Equítuanewa pexü̃ íchagaxü̃gu!” —ñanagürü.
33 Rü Moiché rü Aróü̃maxã nüxü̃ nixu rü ñanagürü: —¡Wüxi i pexchica̱x nadau, rü taxre ya litruãcu i maná nagu naxǘ! ¡Rü ñu̱xũchi Cori ya Tupanape̱xegu yaxǘ nax ngẽxma petaagüca̱x namaxã penguxü̃xü̃ca̱x! —ñanagürü.
34 Rü nüma ga Aróü̃ rü yema Cori ya Tupana Moichémaxã nüxü̃ ixuxü̃ãcü nanaxü. Rü gumá pexchi ga maná nawa yexmacü rü Tupanaarü mugüchixü̃pe̱xegu nayaxǘ nax yexma namaxã nanguü̃xü̃ca̱x.
35 Rü 40 ga taunecü nixĩ ga Iraétanüxü̃ ga manámaxã naxãwemügüxü̃ ñu̱xmata yema naane ga togü ga duü̃xü̃gü nawa yexmagüxü̃wa nangugü. Rü yemaacü manámaxã naxãwemügüxü̃ ñu̱xmata yema Canaáü̃anearü üyewa nangugü.
36 Rü taxre ga litruãcu naguxü̃ nixĩ ga wüxi ga gomé. Rü 10 ga goméacu naguxü̃ nixĩ ga wüxi ga epá.
