Éxodo 17:1-16
17 Rü guxü̃ma ga Iraétanüxü̃ rü ínachoxü̃ nawa ga yema chianexü̃ ga Chíü̃gu ãégaxü̃. Rü meama inaxĩ yema Cori ya Tupana namaxã nüxü̃ ixuxü̃rüxü̃. Rü yemawena rü wüxi ga nachica ga Refidíü̃wa nangugü rü yexma nayapexgü. Natürü yéma rü nataxuma ga dexá nax duü̃xü̃gü nawa axegüxü̃ca̱x.
2 Rü yemaca̱x Moichémaxã narüxutagagü rü ñanagürügü: —¡Ẽcü toxü̃ ixaxegüxẽxẽ i ñu̱xmax! —ñanagürügü. Rü yexguma ga Moiché rü nanangãxü̃ rü ñanagürü: —¿Tü̱xcüü̃ chomaxã perüxutagagü? ¿Rü tü̱xcüü̃ Tupanaxü̃ pexügü? —ñanagürü.
3 Natürü nüma ga duü̃xü̃gü rü nita̱xawae rü yemaca̱x Moichémaxã narüxutagagüama rü ñanagürügü: —¿Tü̱xcüü̃ ga toxü̃ ícugaxü̃xü̃ ga Equítuanewa? ¿Ẽ̱xna ta̱xawamaxã toxü̃ cudaixchaü̃ wüxigu tümamaxã ya toxocügü rü toxü̃nagü? —ñanagürügü.
4 Rü yexguma ga Moiché rü nayumüxẽ rü Tupanaxü̃ ñanagürü: —¿Ta̱xacü tá chaxüxü̃ namaxã i ñaa duü̃xü̃gü? Erü marü íxraxü̃ nataxu nax nutamaxã choxü̃ yama̱xgüxü̃ —ñanagürü.
5 Rü nüma ga Cori ya Tupana rü nanangãxü̃ rü ñanagürü: —¡Ẽcü inachi rü duü̃xü̃güpe̱xegu ixũ namaxã i ñuxre i ngẽma Iraétanüxü̃arü ãẽ̱xgacügü! ¡Rü yange ta ya yima curü naixmena̱xã ga namaxã márchiüwa cunacua̱i̱xcane, rü inaxũãchi!
6 Rü choma rü tá yima ma̱xpǘne ya Oréxwa tá cuxü̃ chananguxẽxẽ yima ma̱xpǘnetapü̱xwa. Rü yima ma̱xpǘnetapü̱xwa tá cunacua̱i̱xca rü ngéma tá nanagoxü̃chiü i dexá nax duü̃xü̃gü nawa axegüxü̃ca̱x —ñanagürü. Rü nüma ga Moiché rü yema Tupana nüxü̃ ixuxü̃ãcü nanaxü nape̱xewa ga yema Iraétanüxü̃arü ãẽ̱xgacügü.
7 Rü yema nachica rü Meribágu nanaxüéga, yerü ga Iraétanüxü̃ rü yema nachicawa Moichémaxã narüxutagagü. Rü to ga naéga ga nagu naxüégagüãxü̃ nixĩ ga Machá, yerü yéma nixĩ ga Tupanaxü̃ naxügüxü̃ ga yexguma ñagügu: —¿Ẽ̱xna nanuxmaxü̃ yixĩxü̃ ya Tupana rüe̱xna taxucüma i nua tatanüwa? —ñagügu.
Amaréxtanüxü̃maxã nügü nadai ga Iraétanüxü̃
8 Rü yema Amaréxtanüxü̃ rü yema nachica ga Refidíü̃gu ãégaxü̃wa naxĩ nax Iraétanüxü̃maxã nügü nada̱i̱xü̃ca̱x.
9 Rü yemaca̱x nüma ga Moiché rü Yochuéxü̃ ñanagürü: —¡Yadexechi i ñuxre i yatügü rü ñu̱xũchi inaxũãchi nax namaxã pegü peda̱i̱xü̃ca̱x i ngẽma Amaréxtanüxü̃! Rü chomax i moxü̃ rü tá ma̱xpǘnetape̱xewa changexma namaxã ya yima naixmena̱xã ya Tupanaarü pora nawa ngẽxmane —ñanagürü.
10 Rü nüma ga Yochué rü nanaxü ga yema Moiché namaxã nüxü̃ ixuxü̃. Rü inaxũãchi nax nügü namaxã nada̱i̱xü̃ca̱x ga yema Amaréxtanüxü̃. Rü yoxni ga Moiché rü Aróü̃ rü Úru rü ma̱xpǘnetape̱xegu naxĩgü.
11 Rü yexguma Moiché unagüchacüügu rü Iraétanüxü̃ nixĩ ga rüporamaegüxü̃ ga daiwa, natürü yexguma naxuechacüügu rü Amaréxtanüxü̃ nixĩ ga rüporamaegüxü̃.
12 Natürü nüma ga Moiché rü nipachacüxü rü yemaca̱x wüxi ga nuta nanayauxgü nax gumawa natoxü̃ca̱x. Rü ñu̱xũchi ga Aróü̃ rü Úru rü nanangenagüchacüügü rü wüxichacüüwa naxǘ ga wüxi rü norü naichacüüwa naxǘ ga to. Rü yemaacü ga Moiché rü taguma narüxuechacüxü ñu̱xmata yanaxücumare ga üa̱xcü.
13 Rü nüma ga Yochué rü Amaréxtanüxü̃arü churaragüxü̃ narüporamae, rü taramaxã nanadai.
14 Rü yemawena ga Cori ya Tupana rü ñanagürü Moichéxü̃: —Chanaxwa̱xe i wüxi i poperagu cunaxümatü i ñaa daichiga nax guxü̃guma ngẽmawa duü̃xü̃gü nüxna cua̱xãchiexü̃ca̱x. ¡Rü namaxã nüxü̃ ixu ya Yochué nax choma rü tá ichayanaxoxẽẽxü̃ i ngẽma Amaréxtanüxü̃! —ñanagürü.
15 Rü nüma ga Moiché rü yexma nanaxü ga wüxi ga ãmarearü guruxü̃ rü “Cori ya Tupana rü chorü cua̱xruxü̃ nixĩ”, ñaxü̃gu nanaxüéga.
16 Rü ñu̱xũchi ñanagürü: —Ngẽma Cori ya Tupanaarü wonera rü cho̱xme̱xwa nangẽxma. Rü nüma ya Cori ya Tupana rü guxü̃gutáma Amaréxtanüxü̃maxã rü nataagümaxã nügü nadai —ñanagürü.
