Éxodo 19:1-25
19 19:1-2 Rü yema Iraétanüxü̃ rü yexguma Equítuanewa ínachoxü̃gu rü Refidíü̃wa nangugü rü yexma nayapexgü. Rü yéma inaxĩãchi rü Chinaíarü chianexü̃wa nangugü. Rü yexguma rü marü tomaepü̱x ga tauemacü ningegü nax Equítuanewa ínachoxü̃xü̃. Rü Chinaí ya ma̱xpǘnearü to̱xma̱xtawa nangugü rü yéma nayexmagü.
2 Nüü̃ nadau 19:1
3 Rü guma ma̱xpǘnegu naxĩnagü ga Moiché nax yexma Tupanamaxã nügü nanga̱xauxü̃ca̱x. Rü guma ma̱xpǘnewa nixĩ ga Moichémaxã yadexaxü̃ ga Cori ya Tupana. Rü ñanagürü nüxü̃: —¡Rü ñaatama orexü̃ namaxã ixu i ngẽma Acóbutaagü i Iraétanüxü̃!:
4 “Rü pema rü marü nüxü̃ pedau ga yema Equítuanecüã̱xgümaxã chaxüxü̃ rü ñuxãcü i choma rü nua íchangexmaxü̃wa pexü̃ chagagüxü̃ ñoma wüxi i ĩyüpe̱xatügu pexü̃ igaxü̃rüxü̃.
5 Rü ngẽxguma aixcüma guxü̃wama chauga pexĩnüegu rü peyanguxẽẽ̱xgu i ngẽma pemaxã ichaxügaxü̃, rü guxü̃ma i nachixü̃anegütanüwa rü tá pexü̃ nixĩ icharüngü̃xẽẽxü̃, erü guxü̃ma i ñoma i naane rü choxrü nixĩ.
6 Rü pema tá nixĩ i wüxi i duü̃xü̃gü i üünegüxü̃ i chomatama pexü̃ chadexü̃ nax choxrüxüchi pixĩgüxü̃ca̱x”. Rü guxü̃ma i ngẽma cumaxã nüxü̃ chixuxü̃ rü ¡namaxã nüxü̃ ixu i ngẽma Iraétanüxü̃! —ñanagürü.
7 Rü nüma ga Moiché rü ínarüxĩ nawa ga guma ma̱xpǘne rü nanangutaque̱xexẽxẽ ga yema Iraétanüxü̃arü ãẽ̱xgacügü. Rü namaxã nüxü̃ nixu ga guxü̃ma ga yema ore ga Tupana namaxã nüxü̃ ixuxü̃.
8 Rü yexguma ga yema Iraétanüxü̃ rü wüxigu Moichéxü̃ nangãxü̃gü rü ñanagürügü: —Toma rü tá tayanguxẽxẽ i guxü̃ma i ngẽma Cori ya Tupana toxü̃ muxü̃ —ñanagürügü. Rü nüma ga Moiché rü Tupanamaxã nüxü̃ nayarüxu ga yema Iraétanüxü̃arü ore.
9 Rü nüma ga Cori ya Tupana rü ñanagürü Moichéxü̃: —Dücax, cumaxã nüxü̃ chixu, rü wüxi i caixanexü̃ i pamüemaxü̃wa tá chaugü cuxü̃ chawe̱x nax ngẽmaãcü i ngẽma duü̃xü̃gü rü choxü̃ nax naxĩnüexü̃ca̱x nax cumaxã chidexaxü̃ rü ngẽmaãcü guxü̃guma cuxü̃́ yaxõgüãxü̃ca̱x —ñanagürü. Rü yemawena rü nüma ga Moiché rü wenaxarü Cori ya Tupanamaxã nüxü̃ nixu ga yema duü̃xü̃güarü ore.
10 19:10-11 Rü nüma ga Cori ya Tupana rü ñanagürü Moichéxü̃: —¡Ẽcü, namaxã nüxü̃ yarüxu i ngẽma duü̃xü̃gü nax nügü yamexẽẽgüxü̃ca̱x i ñu̱xmax rü moxü̃ nax ngẽmaãcü choxü̃ yacua̱xüü̃güxü̃ca̱x! Rü name i nügü niyauxgüchirugü rü nügü namexẽẽgü naxca̱x i pa̱xmaacüarü ngunexü̃. Erü ngẽma ngunexü̃gu tá nixĩ i ícharüxĩxü̃ nagu ya yima ma̱xpǘne ya Chinaí nape̱xewa i guxü̃ma i ngẽma duü̃xü̃gü.
11 Nüü̃ nadau 19:10
12 ¡Rü inaxǘ i cua̱xruü̃gü i norü guxü̃cüwawa ya yima ma̱xpǘne nax tama nachopetüxü̃ca̱x i duü̃xü̃gü! ¡Rü namaxã nüxü̃ ixu nax tama nagu naxĩgüxü̃ ya yima ma̱xpǘne, rü bai tá ta nüxna nangaicamagüxü̃! Erü guxãma ya yíxema nüxna ngaicamaxe rü tá tayu.
13 Rü yíxema ma̱xpǘnegu ĩnagüamáxe rü taxúetama tüxü̃ pingógü, natürü nutagümaxã rü würagümaxã tá nixĩ i tüxü̃ pima̱xgüxü̃. Rü nüetama nixĩ ega wüxi i duü̃xü̃ yixĩxgu rüe̱xna wüxi i naxü̃na yixĩxgu, rü taxũtáma penamaxẽxẽ. Natürü nüma i duü̃xü̃gü rü ngẽxguma marü nüxü̃ naxĩnüegu nax yacueãxü̃ i carnéruchatacu̱xre, rü marü name nax yima ma̱xpǘneca̱x naxĩxü̃ —ñanagürü.
14 Rü nüma ga Moiché rü ínarüxĩ nawa ga guma ma̱xpǘne nax duü̃xü̃güxü̃ yaxucu̱xẽgüxü̃ca̱x nax ñuxãcü Tupanaxü̃ yacua̱xüü̃güxü̃ca̱x. Rü nüma ga duü̃xü̃gü rü nügü niyauxchirugü.
15 Rü nüma ga Moiché rü ñanagürü nüxü̃: —¡Pegü pimexẽxẽgü naxca̱x i pa̱xmaacüarü ngunexü̃! ¡Rü naxü̃pa i ngẽma rü taxũtáma pexma̱xmaxã pemaxẽ! —ñanagürü.
16 Rü yexguma noxri yangunegu ga pa̱xmaacüarü ngunexü̃gu rü naxãẽmacüane rü nidu̱xruane. Rü wüxi ga caixanexü̃ ga pamüemaxü̃ guma ma̱xpǘneétügu ínarüxĩ. Rü wüxi ga tagaxü̃ ga nacornétagaraü̃xü̃ yéma inanaxũ. Rü yexguma yemaxü̃ naxĩnüegu ga duü̃xü̃gü rü muü̃maxã nidu̱xrue.
17 Rü yemawena rü nüma ga Moiché rü yéma ínapegüxü̃wa duü̃xü̃gümaxã ínaxũxũ nax Tupanaxü̃ íyadaugüxü̃ca̱x. Rü guma ma̱xpǘnepechinüwa nayachaxãchitanü.
18 Rü guxü̃wama ga guma ma̱xpǘne ga Chinaí rü narücaxi yerü Tupana rü üxüemamaxã yexma ínarüxĩ. Rü yema caxixü̃ rü ñoma wüxi ga üxüemarüxü̃ nixĩ. Rü yexgumatama ga guma ma̱xpǘne rü poraãcü nixĩã̱xcüxü.
19 Rü yema naga ga nacornétagaraü̃xü̃ rü yexeraãcü nitagachigü. Rü nüma ga Moiché rü Tupanamaxã nidexa, rü nüma ga Tupana rü nanangãxü̃. Rü yema naga ga Tupana rü ñoma duruanexü̃rüxü̃ nixĩ.
20 Rü nüma ga Cori ya Tupana rü yexeraãcü ma̱xpǘne ga Chinaítape̱xegu nixĩ ga ínaxĩxü̃, rü yéma Moichéca̱x naca nax naxü̃tagu naxĩnagüxü̃ca̱x. Rü nüma ga Moiché rü yexma naxĩnagü.
21 Rü Cori ya Tupana rü ñanagürü nüxü̃: —¡Ẽcü írüxĩ rü namaxã nüxü̃ ixu i duü̃xü̃gü nax tama nawa nachopetüxü̃ca̱x i ngẽma cua̱xruxü̃ i pexüxü̃! Rü tama chanaxwa̱xe nax nagu naxĩnüexü̃ nax choxü̃ nadaugüxü̃, erü ngẽxguma choxü̃ nadaugügu rü tá nayue.
22 Rü woo i ngẽma chacherdótegü i chope̱xewa duü̃xü̃güétüwa chogügüxü̃ rü nanaxwa̱xegü i nügü namexẽẽgü nax tama natanüwa rü ta chanadaixü̃ca̱x —ñanagürü.
23 Rü nüma ga Moiché rü Cori ya Tupanaxü̃ nangãxü̃ rü ñanagürü: —Ngẽma duü̃xü̃gü rü taxũtáma nagu naxĩgüama ya daa ma̱xpǘne ya Chinaí. Erü cuma toxü̃ cumu nax tayapoxyeanexü̃ nax tama nachopetüxü̃ca̱x i duü̃xü̃gü. Rü ñu̱xũchi tomaxã nüxü̃ quixu rü daa ma̱xpǘne nax naxüünexü̃ —ñanagürü.
24 Natürü nüma ga Cori ya Tupana rü ñanagürü: —¡Ẽcü írüxĩ rü ñu̱xũchi Aróü̃maxã naxĩnagü! Natürü ngẽma chacherdótegü rü ngẽma duü̃xü̃gü rü tama chanaxwa̱xe i nüxü̃ nachopetü i ngẽma cua̱xruü̃gü nax chauxü̃tawa naxĩxü̃ca̱x, erü tá ngürüãchi natanüwa rü tá chanadai —ñanagürü.
25 Rü nüma ga Moiché rü ínarüxĩ rü yema Iraétanüxü̃maxã nüxü̃ nixu ga yema Tupana namaxã nüxü̃ ixuxü̃.
