Éxodo 20:1-26
20 Nüma ga Tupana rü nidexa rü nüxü̃ nixu ga guxü̃ma ga ñaa mugü rü ñanagürü:
2 —Choma nixĩ i curü Tupana ga Equítuanewa cuxü̃ íchanguxuchixẽẽxü̃ naxme̱xwa ga Equítuanecüã̱xgü ga puracü cuétü nugüxü̃.
3 Rü ñu̱xma nax curü Tupana chixĩxü̃, rü tama chanaxwa̱xe i chope̱xewa ta̱xacürü uxcaxü̃maxã cutupanaã̱x.
4 ¡Rü taxuxü̃táma ta̱xacümare cugüca̱x cuxüxchicüna̱xã nax ngẽmamaxã cutupanaã́xü̃ca̱x, rü bai i ta̱xacü i daxũguxü̃ i naanewa nüxü̃ cudauxü̃, rü bai i ta̱xacü i ñoma i naanewa ngẽxmaxü̃, rü bai i ta̱xacü i márwa ngẽxmaxü̃ tá cuxüxchicüna̱xã nax ngẽmamaxã cutupanaã́xü̃ca̱x!
5 ¡Rü taxũtáma ta̱xacürü naxchicüna̱xãpe̱xegu cucaxã́pü̱xü rü nüxü̃ quicua̱xüxü̃! Erü choma ya curü Cori ya Tupana ya poracü rü poraãcü cuxü̃ chinuxü̃, rü ngẽmaca̱x tümaarü chixexü̃ca̱x tá tüxü̃ chapoxcu ya yíxema chauxchi aixe, rü ñu̱xmata tümaxacügüwa, rü tümataagüwa chananguxẽxẽ i ngẽma poxcu.
6 Natürü ya yíxema choxü̃ ngechaü̃güxe rü naga ĩnüexe i ngẽma chorü mugü, rü tüxü̃ changechaü̃. Rü tá nüxü̃ changechaü̃ i tümataagü ega woo 1,000 wa nanguxgu nax yamuxü̃.
7 ¡Rü taxũtáma chauéga cunaxuxuchi ega ta̱xacürü chixexü̃ cuxü̱xgux! Erü choma ya curü Cori ya Tupana rü taxũtáma tüxü̃ chaxüpetümare nax tüxü̃ chapoxcuxü̃ ya yíxema chauégamaxã tügü ípoxü̃netaxe ega ta̱xacürü chixexü̃ taxü̱xgu.
8 ¡Rü nüxna nacua̱xãchi i ngẽma ngü̃chigaarü ngunexü̃ nax cha̱u̱xca̱xicatama ícunaxüxüchixü̃ca̱x!
9 Rü 6 i ngunexü̃gu tá nixĩ i cunaxüxü̃ i guxü̃ma i curü puracü i cuxüxchaü̃xü̃.
10 Natürü ngẽma norü 7 i ngunexü̃gu rü tá icurüngü̃ rü nagu tá choxü̃ quicua̱xüxü̃. ¡Rü taxuxü̃táma ta̱xacürü puracü nagu cuxü i ngẽma ngunexü̃, rü woo cunegü, rü woo cuxacügü, rü woo curü puracütanüxü̃, rü woo cuxü̃taxü̃gü, rü woo cuxü̃nagü rü woo i ngẽma duü̃xü̃ i to i nachixü̃anecüã̱x i cuxü̃tawa ngẽxmaxü̃!
11 Yerü choma i Cori ya Tupana rü 6 ga ngunexü̃gu nixĩ ga chanaxüxü̃ ga daxũguxü̃ ga naane, rü ñoma ga naane rü taxü̃ ga már rü guxü̃ma i ta̱xacü i nawa ngẽxmagüxü̃. Rü ñu̱xũchi icharüngü̃ ga norü 7 ga ngunexü̃gu. Rü yemaca̱x mexü̃ namaxã chaxuegu ga yema ngunexü̃ rü nüxü̃ chixu nax ngẽma ngunexü̃ i üünexü̃gu choxü̃ quicua̱xüxü̃xü̃ca̱x.
12 ¡Rü tüxü̃ nangechaü̃ ya cunatü rü cué nax ngẽmaãcü namáxü̃ca̱x i curü maxü̃ i ñaa naane i choma i Cori ya Tupana cuxna chaxãxü̃wa!
13 ¡Rü taxũtáma cumáeta!
14 ¡Rü cuma nax cuxãxmagüxü̃ rü cuxãtegüxü̃ rü taxũtáma cugüechita nai i nge rüe̱xna nai ya yatümaxã cumaxü̃!
15 ¡Rü taxũtáma cungĩ́ta̱a̱x!
16 ¡Rü taxũtáma doraxü̃ quixu i cumücüchiga!
17 ¡Rü taxũtáma cugüxü̃́ cunangúchaü̃xẽxẽ ya cumücüpata, rüe̱xna naxma̱x, rüe̱xna norü puracütanüxü̃, rüe̱xna naxü̃taxü̃, rüe̱xna norü wocagü, rüe̱xna norü búrugü, rü bai i ta̱xacü i noxrü ixĩxü̃! —ñanagürü ga Tupana.
Nüma ga Iraétanüxü̃ rü Tupanaxü̃ namuü̃e
18 Rü guxü̃ma ga yema Iraétanüxü̃ rü nüxü̃ naxĩnüe ga yema duruanexü̃ rü guma cornétagüga. Rü nüxü̃ nadaugü ga yema ãẽmacü rü guma ma̱xpǘne ga caixanexü̃ nagu nguxü̃ne. Rü yexguma yemaxü̃ naxĩnüegu rü nüxü̃ nadaugügux, rü namuü̃e rü nüxna nayáxü̃gugü ga guma ma̱xpǘne.
19 Rü yemaca̱x Moichéxü̃ ñanagürügü: —Tama tanaxwa̱xe ya Tupana tomaxã nidexa erü ngürüãchi tá tayue. Rü narümemae nixĩ nax cumatama tomaxã nüxü̃ quixuxü̃ i ngẽma Tupana cumaxã nüxü̃ ixuxü̃ rü toma rü tá naga taxĩnüe —ñanagürügü.
20 Rü nüma ga Moiché rü nanangãxü̃ rü ñanagürü nüxü̃: —¡Taxṹ i peba̱i̱xãchiexü̃! Erü nüma ya Tupana rü núma naxũ nax pexü̃ nawéaxü̃ca̱x i norü pora nax nüxü̃ pemuü̃exü̃ca̱x rü guxü̃guma naga pexĩnüexü̃ca̱x rü tama chixexü̃ pexügüxü̃ca̱x —ñanagürü.
21 Rü yexguma yema Iraétanüxü̃ rü guma ma̱xpǘnearü yáxü̃wa yachaxãchitanüyane, rü yoxni ga nüma ga Moiché rü yema waemaxü̃ ga caixanexü̃ca̱x nixũ ga Tupana nawa yexmaxü̃.
Mugü i ãmarearü guruü̃ca̱x ixĩxü̃
22 Rü Cori ya Tupana rü Moichéxü̃ ñanagürü: —Iraétanüxü̃maxã nüxü̃ ixu i ñaa ore: “Pemax rü marü choxü̃ pedau nax daxũguxü̃ i naanewa nax pemaxã chidexaxü̃.
23 Rü tama name nax ta̱xacürü naxchicüna̱xã i úirunaxca̱x rüe̱xna diẽrumünaxca̱x pegüca̱x pexüxü̃ nax nüxü̃ picua̱xüü̃güxü̃ca̱x ñoma choxü̃ picua̱xüü̃güxü̃rüxü̃.
24 Rü ngẽma ãmarearü guruxü̃ i cha̱u̱xca̱x pexüxü̃ rü chanaxwa̱xe nax waixü̃münaxca̱x nax yixĩxü̃. Rü ngẽmawa tá nixĩ i penaguxü̃ i ngẽma pexü̃nagü i perü ãmare i cha̱u̱xca̱x pedaixü̃ nax pexü̃́ nüxü̃ charüngümaxü̃ca̱x i perü chixexü̃gü. Rü ngẽma wüxichigü i nachica i marü pexca̱x nüxü̃ ichaxunetaxü̃wa rü chanaxwa̱xe i choxna picua̱xãchie. Rü choma rü tá ngéma chaxũ rü tá pexü̃ charüngü̃xẽẽxü̃.
25 Rü ngẽxguma wüxi i ãmarearü guruxü̃ i nutanaxca̱x cha̱u̱xca̱x pexü̱xgu rü tama name i nutagü ya mea imexẽẽcüwawa penaxü. Erü ngẽxguma nutagü i meama imexẽẽcüwawa penaxü̱xgu rü taxũtáma chorü ãmarearü guruü̃wa name.
26 Rü ngẽma chorü ãmarearü guruxü̃ rü tama chanaxwa̱xe nax natoxṍneã́xü̃ nax tama texé nüxü̃ dauxü̃ca̱x i pexene i ngẽxguma nagu pexĩnagügu” —ñanagürü ga Tupana.
