Éxodo 22:1-31
22 Rü ngẽxguma chi texé naxca̱x ngĩ̱xgu i wüxi i woca rüe̱xna wüxi i carnéru, rü namaxã tataxegu rüe̱xna tayama̱xgu i ngẽma naxü̃na, rü name nax 5 i wocamaxã tanaxütanüxü̃ i ngẽma woca i naxca̱x tangĩ́xü̃. Rü ngẽxguma carnéru yixĩxgu i ngẽma naxca̱x tangĩ́xü̃ rü name nax 4 i carnérumaxã tanaxütanüxü̃.
2 Rü ngẽxguma wüxi i ngĩ́xta̱xaxü̃ ínangĩ̱xyane texé íyanguéxü̃gügu rü yapi̱xẽẽgüãgu rü nayu̱xgu i ngẽma ngĩ́xta̱xaxü̃ rü taxũtáma yíxema yamáxegagu nixĩ.
3 Natürü ngẽxguma ngunecü ítayanguéxü̃gu nax nangíxü̃ rü tayama̱xgu i ngẽma ngĩ́xta̱xaxü̃ rü tümawa nangẽxma i ngẽma guxcha naxca̱x i ngẽma nax tamáetaxü̃. Rü yíxema ngĩ́xe rü tanaxwa̱xe nax tanaxütanüxü̃ i ngẽma naxca̱x tangĩ́xü̃. Natürü ngẽxguma tangearü diẽruã̱xgu rü name nax tümamaxã itaxexü̃ nax ngẽmaãcü tanaxütanüxü̃ca̱x i ngẽma naxca̱x tangĩ́xü̃.
4 Rü ngẽxguma tümaxü̃tawatama nangẽxmagu rü tama tayama̱xgu i ngẽma naxü̃na i naxca̱x tangĩ́xü̃ rü tanaxwa̱xe nax taxre i tümaxü̃namaxã tanaxütanüxü̃ i ngẽma woca rüe̱xna búru rüe̱xna carnéru i naxca̱x tangĩ́xü̃.
5 Rü ngẽxguma chi texé tümaxü̃nagü ngürüanegumare mugügu nax ngextámare nachibüexü̃ca̱x rü ngẽmagagu toguxearü naanewa yachibüegu, rü yíxema norü yora i ngẽma naxü̃nagü, rü tanaxwa̱xe i ngẽma guxchaxü̃ca̱x ngẽma naanearü yoraáxü̃ tanaxütanüxü̃ namaxã i tümanetüarü o i rümemaexü̃ i tümaanewa rüe̱xna tümaarü úbanecüwa ngẽxmaxü̃.
6 Rü ngẽxgumachi texé wüxi i ta̱xacüwa nangixichigu rü togueanewa nanáiegu rü ngẽxma yaxaegu i tümaarü nanetügü i marü idauxü̃, rüe̱xna ngexwaca rüxügüxü̃, rü yíxema yaguanexe rü tanaxwa̱xe nax norü yoraaxṹ tanaxütanüxü̃ naxca̱x i ngẽma tümanetügü ítaguxcüraxü̃xü̃.
7 Rü ngẽxguma texé to i duü̃xü̃xü̃tagu namaxã nguxü̃gu i tümaarü diẽru rüe̱xna to i ngẽmaxü̃gü i tatanüxü̃, rü ngẽma duü̃xü̃patawa wüxi i ngĩ́xta̱xaxü̃ naxca̱x ngĩ̱xgu i ngẽma tümaarü ngẽmaxü̃gü, rü ngẽxguma nüxü̃ yangaugügu rü yayauxgüãgu i ngẽma ngĩ́ta̱xã́xü̃, rü name i nüma taxree̱xpü̱xcüna naxütanüãxü̃ i ngẽma naxca̱x nangĩ́xü̃.
8 Natürü ngẽxguma tama nüxü̃ iyangaugügu i ngẽma ngĩ́xta̱xaxü̃, rü yíxema ĩpataarü yora rü tanaxwa̱xe nax Tupanape̱xewa nüxü̃ tixuxü̃ nax tama tümatama naxca̱x tangĩ́xü̃ i ngẽma tüxna nüxü̃ nadauxẽẽxü̃
9 Rü ngẽxguma nataxuxgu i wüxi i woca rüe̱xna wüxi i búru rüe̱xna wüxi i carnéru rüe̱xna wüxi i naxchiru rüe̱xna to i ngẽmaxü̃, rü taxre i duü̃xü̃gü nügüna naxugügu nax norü yixĩxü̃, rü name i ãẽ̱xgacügüxü̃tawa naxĩxü̃ i ngẽma taxre nax ngẽmaãcü nüxü̃ nacuáxü̃ca̱x nax texe tixĩxü̃ ya aixcüma norü yora ixĩxẽ. Rü yíxema tama norü yora ixĩxẽ rü tanaxwa̱xe nax taxree̱xpü̱xcüna norü yoraaxü̃́ tanaxütanüxü̃.
10 Rü ngẽxguma texé to i duü̃xü̃xü̃tagu tanamu̱xgu i tümaarü woca, rüe̱xna tümaarü búru, rüe̱xna tümaarü carnéru, rüe̱xna ta̱xacürü to i naxü̃na nax ngéma nüxna nadaugüxü̃ca̱x, rü ngẽxguma nayu̱xgu rüe̱xna napi̱xgu rüe̱xna taxúema nüxü̃ dauyane naxca̱x nangĩ̱xgügu, rü tama ngẽma duü̃xü̃ i naxü̃tagu tanamuxü̃arü guxcha nixĩ.
11 Natürü name nax Tupanaégagu norü yoramaxã nüxü̃ tixuxü̃ nax tama tüma naxca̱x tangĩ́xü̃ i ngẽma naxü̃na. Rü yíxema norü yora ixĩxẽ i ngẽma naxü̃na, rü name nax tayaxõxü̃ i ngẽma dexa. Rü ngẽmaãcü ya yíxema nüxna dauxe rü taxuxü̃táma tanaxütanü.
12 Natürü ngẽxguma chi nüxü̃ tadauchire̱xgu naxca̱x nangĩ̱xgu i ngẽma naxü̃na, rü name nax norü yoraaxü̃́ tanaxütanüxü̃.
13 Rü ngẽxguma wüxi i ai yayaxu̱xgu i ngẽma naxü̃na rü yíxema norü dauruxü̃ ixĩxẽ rü name nax ítayangexü̃ i ngẽma ai íyaxüxẽẽxü̃ nax ngẽmaãcü norü yoraxü̃ tanawéxü̃ca̱x rü tama tanaxütanüxü̃ca̱x.
14 Rü ngẽxguma texé toguxearü naxü̃na paxaãchi naxca̱x ícaxgu, rü ngẽxguma natauxyane i norü yora tümaxü̃tagu nayu̱xgu rüe̱xna napi̱xgu i ngẽma naxü̃na, rü name nax norü yoraaxü̃́ tanaxütanüxü̃.
15 Natürü ngẽxguma nangẽxmayane i norü yora napi̱xgu rüe̱xna nayu̱xgu, rü taxuxü̃táma taxütanü. Natürü ngẽxguma naxãtanüãcü paxaãchica̱x naxca̱x ítacaxgu, rü ngẽma natanüxica tátama nixĩ i ngẽma taxütanüxü̃.
Mugü i duü̃xü̃güarü maxü̃chiga
16 Rü ngẽxguma texé wüxi i pacü i taguma yatüxü̃ cua̱xcüxü̃ ucu̱xẽgu rü tá ngĩmaxã naxãxma̱xü̃ rü ngẽmaca̱x düxwa nanaãẽraxü̃gu nax ngĩmaxã namaxü̃xü̃ca̱x, rü name i wüxicana ngĩmaxã naxãxma̱xü̃chi rü ngĩnatüaxü̃́ nanaxütanü i ngẽma natanü i woetama marü ueguxü̃.
17 Rü woo ngẽxguma ngĩnatü tama naxwa̱xegu nax ngĩmaxã naxãmaxü̃, rü nüma ya yima yatü rü tá ngĩnatüaxü̃́ nanaxütanüamatama i ngẽma natanü i woetama marü ueguxü̃.
18 ¡Rü ngẽma ngexü̃ i yuüexü̃ rü tá peyama̱x!
19 Rü texé ya yíxema ta̱xacürü naéü̃maxã maxü̃́xẽ rü name nax yu namaxã pexueguxü̃.
20 Rü texé ya yíxema tupananetagüca̱xmare ínaguxe i tümaarü ãmaregü rü tama Cori ya Tupanaca̱xicatama ínaguxe, rü name nax yu namaxã pexueguxü̃.
21 Rü taxũtáma chixeãcü namaxã icucua̱x i ngẽma to i nachixü̃anecüã̱x i duü̃xü̃. Yerü pema rü ta rü Equítuanewa to i nachixü̃anecüã̱xgü pixĩgü.
22 Rü tama name i chixri ngĩmaxã icucua̱x i ngẽma yutegücü rü bai ya taxcutagü.
23 Erü ngẽxguma chixri tümamaxã icucua̱xgu, rü tümagü rü ngü̃xẽẽca̱x tá choxna tacagüe, rü choma rü tá ngéma chaxũ nax tüxü̃ charüngü̃xẽẽxü̃ca̱x.
24 Rü tá poraãcü chanu rü taramaxã tá pexü̃ chadai. Rü ngẽxguma rü pexma̱xgü tá tixĩ ya yutegüxe rü ngẽma pexacügü tá nixĩ i ta̱xcuexü̃.
25 Rü ngẽxguma chi wüxi i chorü duü̃xü̃ i cumücü i ngearü diẽruã́xü̃ cuxna caxgu nax paxaãchi nüxna ngĩxü̃ cuxãxü̃ca̱x i diẽru, rü taxũtá cunaxwa̱xe nax üétüãcü cuxü̃́ ngĩxü̃ natáeguẽẽxü̃. Rü tama name i nagu quixũ i nacüma i ngẽma diẽruã̱xgüxü̃ i üétüãcüma paxaãchi diẽru ngĩxü̃ ãgüxü̃.
26 Rü ngẽxguma yíxema duü̃xẽ rü tümachiru cuxna ãxgu nax ngẽmawa nüxü̃ cucuáxü̃ca̱x nax cuxü̃́ tá tanatáeguxẽẽxü̃ i ngẽma curü diẽru, rü naxü̃pa nax yanaxücuxü̃ ya üa̱xcü rü name i tüxü̃́ cunatáeguxẽxẽ i ngẽma tümachiru.
27 Erü ngexicatama nixĩ i tümachiru i namaxã tidüxüxü̃ ega nagáuanegu. Rü ngẽxguma tama tüxü̃́ cunatáeguxẽẽgu ¿rü ta̱xacümaxã tá tidüxü? Rü ngẽxguma tüma rü ngü̃xẽẽca̱x choxna caxgux rü choma rü tá tüxü̃ charüngü̃xẽxẽ erü choxü̃́ tangechaxü̃tümüxü̃.
28 Rü choma ya Cori ya Tupana rü tama chanaxwa̱xe i chixri chauchiga quidexa, rü tama name i ta̱xacü namaxã quixugü i ngẽma perü ãẽ̱xgacü.
29 Rü ngẽma penetügüarü o i choxna üxü̃, rü name nixĩ i paxa choxna penaxã. Rü ngẽxgumarüxü̃ ta i perü úbachiüwa rü chanaxwa̱xe i paxa choxna penaxã i ngẽma choxna üxü̃. Rü yimá nüxíraü̃cü ya pene ya woetama choxna ücü, rü name nixĩ i chopatawa naxca̱x penaxütanü i ngẽma choma nagu chaxunetaxü̃.
30 Rü ngẽma nüxíraxü̃xü̃ i perü wocaxacügü rü perü carnéruxacügü rü 7 i ngunexü̃ tá naémaxã nangẽxmagü, natürü ngẽxguma norü 8 i ngunexü̃wa nanguxgu rü tá choxna penamu.
31 Rü pema rü name nixĩ i guxü̃guma chauga pexĩnüe. Rü tama name nax penangṍxü̃ i ngẽma namachi i ai íyaxüxẽẽxü̃. Rü name nixĩ i airugüna penaxã i ngẽma namachi.
