Éxodo 23:1-33
23 Rü tama name i doramaxã ícunapoxü̃ i ngẽma duü̃xü̃ i chixexü̃arü üruxü̃ i ngẽxguma ãẽ̱xgacü norü chixexü̃ca̱x nüxna caxgux.
2 Rü tama name i natanügu cuxã i ngẽma rümumaexü̃ i duü̃xü̃gü i chixexü̃ ügüxü̃. Rü ngẽxguma ãẽ̱xgacü cuxna caxgux nax nüxü̃ quixuxü̃ca̱x i ngẽma guxchaxü̃ i ngupetüxü̃, rü tama name i naga cuxĩnü i ngẽma rümumaexü̃ i chixri nüxü̃ ixugüxü̃ i ngẽma guxchaxü̃ i ngupetüxü̃.
3 Rü bai tá naétüwa quidexa i ngẽma duü̃xü̃ i ngearü diẽruã́xü̃ i ngẽxguma womüxẽẽãcü ãẽ̱xgacüxü̃tawa ta̱xacüca̱x ínaca̱xgu.
4 Ngẽxguma nüxü̃ icuyangauxgu i curü uanüarü woca rüe̱xna norü búru i yarütaxuxü̃, rü name nixĩ i nüxü̃́ cunatáeguxẽxẽ.
5 Rü tama name i nüxü̃ cuxo nax nüxü̃ curüngü̃xẽẽxü̃ i ngẽma cuxchi aixü̃. Rü ngẽxguma chi nüxü̃ cuda̱u̱xgu i norü búru nax naxwetaarü yamaxã ngẽxma yanguxü̃ ¡rü nüxü̃ rüngü̃xẽxẽ nax ícunanugüxü̃ i ngẽma naxweta i naétüwa ngẽxmaxü̃!
6 Rü ngẽxguma wüxi i duü̃xü̃ i ngearü diẽruã́xü̃ ãẽ̱xgacüpe̱xewa guxchaxü̃ cumaxã mexẽẽgu, rü tama name i cunangexrü i ngẽma guxchaxü̃.
7 ¡Rü nüxü̃ rüxo nax doramaxã ícunaxuãxü̃xü̃ i wüxi i duü̃xü̃! Rü tama name i yu namaxã cunaxuegu i wüxi i duü̃xü̃ i taxuxü̃ma i chixexü̃ üxü̃. Erü choma rü taxũtáma nüxü̃ chaxüpetümare i ngẽma duü̃xü̃ i nagagu íyixĩxü̃ nax tayuxü̃.
8 Rü cuma nax ãẽ̱xgacü quixĩxü̃, rü tama name i wüxiaxü̃́ cunayauxtanü, nax naétüwaama cuxüxü̃ca̱x ega ta̱xacürü guxchaxü̃ cuxü̃tawa yamexẽẽgügu. Erü ngẽma ãẽ̱xgacü i nayauxtanüxü̃, rü inayacu̱x i ngẽma aixcüma ixĩxü̃, nax tama nüxü̃ nacuáxü̃ca̱x i duü̃xü̃gü, rü ngẽmaãcü ya yíxema duü̃xẽ ya taxuxü̃ma i chixexü̃ üchiréxe, rü nitümaguãchi i ngẽma chixexü̃.
9 Rü taxũtáma chixri namaxã icucua̱x i ngẽma to i nachixü̃anecüã̱x i duü̃xü̃. Yerü pema rü Equítuanewa rü to ga nachixü̃anecüã̱xgü pixĩgü, rü meama nüxü̃ picua̱x nax ñuxãcü yixĩxü̃ ga yexguma to ga nachixü̃anewa peyexmagügu.
Mugü i naanearü ngü̃chiga
10 Rü 6 ya taunecü tá cuanewa cupuracü rü ñu̱xũchi yabuxgü i norü o i cunetü.
11 Natürü yimá norü 7 ya tauenecügu rü marü taxũtáma nawa cupuracü i ngẽma naane. Rü name i cunangü̃xẽxẽ i ngẽma naane nax ngẽmaãcü i ngẽma duü̃xü̃gü i ingearü diẽruã̱xgüxü̃ cuanewa yayauxbügüxü̃ca̱x nax ngẽmamaxã naxãwemügüxü̃ca̱x, rü ñu̱xũchi ngẽma íyaxüxü̃ ngẽma naeü̃gü i naixnecücüã̱x namaxã ãwemügüxü̃ca̱x. Rü name i ngẽma curü úbanecü rü oribunecü rü ngẽmatama namaxã cuxü.
Mugü i ngü̃chigaarü ngunexü̃chiga
12 Rü 6 i ngunexü̃ tá nixĩ i cunaxüxü̃ i curü puracü i cuxüxchaü̃xü̃. Natürü ngẽxguma norü 7 i ngunexü̃wa nanguxgu rü tá curüngü̃ nax ngẽmaãcü nangü̃ẽxü̃ca̱x i curü wocagü rü búrugü rü ngẽmaãcü naporaexü̃ca̱x i curü puracütanüxü̃ rü ngẽma to i nachixü̃anecüã̱x i duü̃xü̃ i cuxü̃tawa ngẽxmaxü̃.
13 ¡Rü peyangu̱xẽxẽ i guxü̃ma i ngẽma pemaxã nüxü̃ chixuxü̃! Rü tama chanaxwa̱xe nax ñuxgu tá pea̱xwa nüxü̃ chaxĩnüxü̃ i ta̱xacürü tupananetagüéga.
Tomaepü̱x i peta i Tupana ueguxü̃
14 Wüxichigü ya taunecügu rü tomaepü̱x i peta tá nixĩ i cha̱u̱xca̱x pexüchigaxü̃.
15 ¡Naxüchiga i Üpetüchigaarü peta i nagu paũ i ngearü pu̱xẽẽruxü̃ã́xü̃ pengõ̱xgüxü̃! Rü ngẽma cumaxã nüxü̃ chixuxü̃ãcü tá nixĩ i cunaxüxü̃. Rü ngẽxguma cunaxüchigagu rü 7 i ngunexü̃ tá nixĩ i paũ i ngearü pu̱xẽẽruxü̃ã́xü̃ pengṍxü̃. Rü ngẽma ngunexü̃ i nagu tá cunaxüxü̃ i ngẽma peta rü meatáma tauemacü ya Abígu tá nixĩ, yerü guma tauemacügu nixĩ ga ípenguxü̃xü̃ ga Equítuanewa. Rü ngẽma ngunexü̃gu rü taxúetama ngeãcume̱xẽx nua choxü̃ tayarücua̱xüxü̃.
16 ¡Rü naxüchiga i norü buxgü i ngẽma nüxíraxü̃xü̃ i norü o i cunetü i cuanegu cutoxü̃! ¡Rü ngẽxgumarüxü̃ ta taunecüarü gu̱xgu naxüchiga i norü buxgü i ngẽma nawa iyacuáxü̃ i norü o i cunetü i cuanegu cutoxü̃!
17 Rü ngẽmaãcü guxü̃ma i duü̃xü̃gü i iyatüxü̃ rü tomaepü̱xcüna tá Cori ya Tupanape̱xewa naxĩ nax nüxü̃ yacua̱xüü̃güxü̃ca̱x.
18 Rü ngẽxguma naxü̃nagü cha̱u̱xca̱x cudaixgu, rü tama chanaxwa̱xe ya yimá nagü rü paũ i pu̱xẽẽruxü̃ã́xü̃maxã wüxigu choxna cunaxã. Rü ngẽma naxü̃na i cha̱u̱xca̱x cuda̱i̱xü̃ rü tama name nax norü chíxü̃maxã penguxü̃xü̃ perü moxü̃ãcüruxü̃.
Nüxíraxü̃xü̃ i norü o i nanetügüarüchiga
19 Rü ngẽma nüxíraxü̃xü̃ i norü o i ngẽma cunetügüwa quibuxgüxü̃, rü name nixĩ i Tupanapatawa cunana i ngẽma rümemaegüxü̃. ¡Rü taxũtáma naégünenixü̃wa cunamuxra i ngẽma chíbuxacügü!
Daxũcüã̱x i Cori ya Tupanaarü orearü ngeruxü̃
20 Rü dücax, choma rü tá cupe̱xegu chayamu i chorü orearü ngeruxü̃ i daxũcüã̱x nax cuxna nadauxü̃ca̱x i ngẽma nama i nagu quixũxü̃wa rü nawa cuxü̃ nagaxü̃ca̱x i ngẽma nachica i cuxca̱x chamexẽẽxü̃.
21 Rü tama chanaxwa̱xe nax nüxna cuyáxü̃xü̃. Rü name nixĩ i naga cuxĩnü. Rü tama name i namaxã cunuama erü nüma rü chauchicüüxü̃ nixĩ i ngẽxma chanamuxü̃, rü nüma rü taxũtáma pexü̃́ nüxü̃ inayarüngüma i perü chixexü̃gü.
22 Rü ngẽxguma tá aixcüma naga cuxĩnügu rü cuyanguxẽẽgu i guxü̃ma i ngẽma choma chanamuxü̃, rü choma rü tá curü uanügümaxã charüxuanüã̱x, rü tá chayaxĩ̱xãchiãẽxẽxẽgü i ngẽma cuxü̃ yaxĩ̱xãchiãẽxẽẽgüxü̃.
23 Rü chorü orearü ngeruxü̃ rü tá cupe̱xegu nixũ. Rü nawa tá cuxü̃ naga i ngẽma Amoréutanüxü̃arü naane, rü Itítanüxü̃arü naane, rü Ferechéutanüxü̃arü naane, rü Canaáü̃tanüxü̃arü naane, rü Ebéutanüxü̃arü naane, rü Yebuchéutanüxü̃arü naane. Rü choma rü tá chanadaixichi i ngẽma duü̃xü̃gü nax yanaxoxochixü̃ca̱x.
24 ¡Rü taxũtáma nagu quixũ i nacüma i chixexü̃ i nagu namaxẽxü̃ i ngẽma nachixü̃anecüã̱xgü! ¡Rü taxũtáma nape̱xegu cucaxã́pü̱xü rü nüxü̃ quicua̱xüxü̃ i norü tupananetagü! Rü name nax nagu quipogügüxü̃ i norü tupananetachicüna̱xãgü rü norü nutagü ga namaxã natupanaã̱xgücü.
25 23:25-26 ¡Rü nüxü̃ icua̱xüxü̃ ya Cori ya curü Tupana, erü nüma tá cuxü̃ narüngü̃xẽxẽ namaxã i curü õnagü rü dexá. Rü choma rü tá cuxna chanayáxü̃guxẽxẽ i ngẽma da̱xaweane. Rü taxúetama tayu naxü̃pa nax mea o̱xiwa tangux. Rü cuchixü̃anewa rü nataxutama i ngecü i yuxacücü rü ñu̱xũchi ngexacüechacü.
26 Nüü̃ nadau 23:25
27 Rü ngẽma nachixü̃anegü i nawa pechopetüetanüxü̃ rü choma rü tá muü̃ natanüwa íchanguxẽxẽ nax pexü̃ namuü̃exü̃ca̱x rü pexcha̱xwa yabuxmüxü̃ca̱x.
28 Rü ngextá íquixüpetüchigüxü̃wa rü tá ichayadaxẽxẽ nax pexü̃ namuü̃exü̃. Rü ngẽmaca̱x tá cuxcha̱xwa nibuxmü i ngẽma Ebéutanüxü̃, rü Itítanüxü̃, rü Canaáü̃tanüxü̃.
29 Natürü ngẽma nax íchanawoxü̃xü̃ cupe̱xewa rü taxũtáma paxa noxtacüma wüxi ya taunecügu chanaxü, erü ngẽxguma ngẽmaãcü chanaxüxgu rü ngẽma naane rü tá nangeãcuanemare, rü naeü̃gü i düraexü̃ rü tá nawa nimu rü chixexü̃ tá cumaxã naxügü.
30 Rü ngẽma duü̃xü̃gü rü tá chayawüxi nax íchanamuxü̃xü̃ i ngẽma naanewa ñu̱xmatáta namu i cunegü nax ngẽmaãcü mea pegü nagu pinuxü̃ca̱x i ngẽma naane.
31 Rü ngẽma curü üyeane i choma ichaxüxü̃ rü Már i Dauchíüxü̃wa inaxügü rü ñu̱xmata Firitéutanüxü̃arü márcutügu yacuáx. Rü ngẽma chianexü̃wa inaxügü rü ñu̱xmata taxtü i Eufrátewa nangu. Rü choma rü marü cuxme̱xwa tá chanangexmagüxẽxẽ i guxü̃ma i ngẽma duü̃xü̃gü i ngẽma nachixü̃anecüã̱xgü. Rü cuma tá nixĩ i ícunawoxü̃xü̃ i ngẽma naanewa.
32 23:32-33 ¡Rü taxũtáma namaxã cuxüga nax nüxü̃ perüngü̃xẽẽgüxü̃ca̱x, rü bai i norü tupananetagüxü̃ picua̱xüü̃gü! ¡Rü taxũtáma cunaxwa̱xe nax ngẽma naanewa cunangẽxmagüxẽxẽxü̃ i ngẽma duü̃xü̃gü nax tama chope̱xewa pecadu cuxü̃ naxüxẽẽgüxü̃ca̱x! Erü ngẽxguma ngéma cunangexmagüxẽẽgu rü tá norü tupananetagüxü̃ quicua̱xüxü̃ rü cugütátama icuyarütauxẽxẽ —ñanagürü ga Tupana.
33 Nüü̃ nadau 23:32
