Éxodo 26:1-37
26 Rü nüma ga Cori ya Tupana rü Moichémaxã nidexaama rü ñanagürü nüxü̃: —¡Ẽcü naxü ya chopata nawa i 10 i ãtachinüxü̃ i mexẽchine ya línuarü tüwa rü carnéruta̱xaarü tüwa üxü̃! Rü waxratachinüxü̃ rü yáuxratachinüxü̃ rü dautáchinüxü̃ tá nixĩ. Rü ngẽma ãtachinüxü̃ rü tá cunanga̱xãxẽ namaxã i taxre i daxũcüã̱xchicüna̱xãgü i ixãxpe̱xatüxü̃.
2 Rü guxü̃ma i ngẽma ãtachinüxü̃ rü wüxigu tá nixügü. Rü norü ma̱xtachinü rü 12 metruarü ngãxü̃ tá nixĩ rü norü tatachinü rü taxre i metru tá nixĩ.
3 26:3-4 ¡Rü ngẽma ixãtachinüxü̃ rü nape̱xewa nügüna nanga̱i̱xcu i 5 tachinü, rü ngẽxgumarüxü̃ ta i ngẽma to i 5 tachinü rü nügüna nanga̱i̱xcu! ¡Rü ngẽma 5 tachinü i nüxíra nügüna cunga̱i̱xcuxü̃pechinüwa rü nanga̱i̱xcu ya naxmachinügü i morádu! ¡Rü ngẽxgumarüxü̃ ta i ngẽma to i 5 tachinü i nügüna cunga̱i̱xcuxü̃pechinüwa rü nanga̱i̱xcu ya naxmachinügü!
4 Nüü̃ nadau 26:3
5 ¡Rü ngẽma nüxíraxü̃xü̃ i 5 tachinüpechinüwa nanga̱i̱xcu ya 50 ya naxmachinügü! ¡Rü ngẽxgumarüxü̃ ta i ngẽma to i 5 tachinüpechinüwa nanga̱i̱xcu ya 50 ya naxmachinügü! Rü ngẽmaãcü nügüarü to̱xma̱xtawa tá ningáitachigü ya yima naxmachinügü.
6 ¡Rü ínaxüxü̃ ta i 50 i norü choruxü̃gü i úirunaxca̱x nax nügüwa nachocuxü̃ca̱x i ngẽma taxretachinü nax ngẽmaãcü ñoma wüxitachinürüxü̃ yixĩxü̃ca̱x i ngẽma naxtapü̱x ya yima chopata!
7 ¡Rü cabrata̱xawa naxü i 11 i ãtachinüxü̃ nax chopata namaxã cutüétüxü̃ca̱x!
8 Rü guxü̃ma i ngẽma tüétüruü̃güarü ma̱x rü 13 metruarü ngãxü̃ tá nixĩ, rü ngẽma norü tatachinü rü taxre ya metru tá nixĩ. Rü ngẽmaãcü i ngẽma ãtachinüxü̃ rü tá nawüxigu.
9 ¡Rü ngẽma 5 tachinü i tüétüruxü̃ rü nügüna nanga̱i̱xcu nax wüxi i tüétüruxü̃ i tatachinüxü̃ yixĩxü̃ca̱x! ¡Rü ngẽma to i 6 tachinü, rü ngẽxgumarüxü̃ ta nügüna nanga̱i̱xcu! ¡Rü ngẽma norü 6 tachinü i tüétüruxü̃ rü Tupanapatape̱xegu napoe!
10 ¡Rü ngẽma nuxíraxü̃xü̃ i 5 tachinüpechinüwa nanga̱i̱xcu ya 50 ya naxmachinügü! ¡Rü ngẽxgumarüxü̃ ta i ngẽma to i 6 tachinüpechinüwa nanga̱i̱xcu ya 50 ya naxmachinügü!
11 ¡Rü naxü ta i 50 i norü choruxü̃gü i bróũchenaxca̱x! ¡Rü ñu̱xũchi naxmachinüwa nachocu nax ngẽmaãcü i ngẽma norü tüétüruxü̃ rü wüxitachinütama i taxü̃ nax yixĩxü̃ca̱x!
12 Rü ngẽma nax namáxü̃ i ngẽma norü tüétüruxü̃ ya Tupanapata, rü wüxicharaarü ngãxü̃ ínayacua̱xüchi. Rü ngẽma rü tá naweama cunatucharaxẽxẽ.
13 Rü ngẽmaãcü ya yima chopataarü tüétüruxü̃ rü ngẽma íyacua̱xüchicharaxü̃maxã tá meama nidüxü. Rü ngẽma íyacua̱xüchixü̃ i nacüwawaama rütucharaxü̃ rü 45 chentímetru tá nixĩ, rü ngẽma norü tocüwawa rütucharaxü̃ rü tá ta 45 chentímetru nixĩ.
14 Rü ngẽma to i norü tüétüxü̃ ya yima chopata rü carnérucha̱xmüxü̃ i dauxü̃maxã ichagüxü̃ tá nixĩ. Rü ngẽmaétüwaama üxü̃ rü naeü̃cha̱xmüü̃ i mexü̃ tá nixĩ.
15 Rü chopataparaca̱x nade i mürapewa i acáchianaxca̱x. Rü ngẽma rü tá mea niwe̱xgu.
16 Rü wüxichigü i ngẽma mürapewa rü 4 metruarü ngãxü̃ tá nixĩ i norü ma̱x, rü norü tatachinü rü 65 chentímetru tá nixĩ.
17 Rü wüxichigü i ngẽma mürapewa rü tá nüxü̃́ nangẽxma i taxre i namagu i nacüwagüwa nax ngẽmaãcü nügüna yaxũxgüxü̃ca̱x. ¡Rü ngẽmaãcü ínaxüxü̃ i guxü̃ma i ngẽma mürapewa i chopataparagü!
18 26:18-19 Rü ngẽxguma ícunaxüxü̃gu, ¡rü naxü i 20 i mürapewagü naxca̱x i nacüwa i súrwaama üxü̃! ¡Rü wüxichigü i ngẽma mürapewaarü ñaxtüpe̱xeca̱x naxü i taxre i nachipatügü i diẽrumünaxca̱x nax ngẽmawa nanguxcuxü̃ca̱x i namagupe̱xe!
19 Nüü̃ nadau 26:18
20 26:20-21 Rü ngẽxgumarüxü̃ ta i ngẽma nacüwa i nórtewaama üxü̃ca̱x rü 20 i mürapewa tá cuxü. ¡Rü ñu̱xũchi naxü i 40 i nachipatügü i diẽrumünaxca̱x nax ngẽmaãcü wüxichigü i ngẽma mürapewatüü̃pe̱xewa nangẽxmaxü̃ca̱x i taxre i nachipatügü!
21 Nüü̃ nadau 26:20
22 Rü ngẽma naxtacu̱xrüxüwaama ya yima chopata i oéstewaama üxü̃ca̱x rü 6 tachinü i mürapewa tá ícuxüxü̃.
23 ¡Natürü ngẽma naxtacu̱xrüxü ínapoxü̃waca̱x rü naétü tá taxre i mürapewa cuxü i wüxichigü i nacüwaarü poxõchixü̃wa ügüxü̃ruxü̃!
24 Rü ngẽma mürapewagü i ínapoõchixü̃wa ügüxü̃ rü tá wüxitama i nachipatüwa cunangucu. Rü norü dauxü̃pe̱xewa rü wüxi i bochicuxü̃maxã tá nügüwa cuyachotagü. Rü ngẽmaãcü tá nixĩ i cunaxüxü̃ i ngẽma taxre i norü põõchiwa.
25 Rü ngẽmaãcü naxtacu̱xrüxüwaama ya yima chopata rü tá nangẽxma i 8 i mürapewagü rü ñu̱xũchi 16 i nachipatügü i diẽrumünaxca̱x. Rü ngẽmaãcü i wüxichigü i mürapewa rü tá nüxü̃́ nangẽxma i taxrechigü ya nachipatügü.
26 ¡Rü yima chopataarü wüxicüwawa naxü ya 5 ya naixmena̱xã ya acáchianaxca̱x i norü mürapewagüarü taixẽxẽruxü̃gü!
27 ¡Rü yima chopataarü tocüwawa nai ya 5 ya naixmena̱xãgü naxü! ¡Rü ngẽxgumarüxü̃ ta nai ya 5 ya naixmena̱xã naxǘ naxca̱x i naxtapü̱x i oéstewaama üxü̃!
28 Rü yima naixmena̱xã ya ngẽma mürapewatáchinügüarü ngãxü̃wa itoxpetüne, rü chanaxwa̱xe nax norü tocüwawa nanguxü̃.
29 Rü ngẽmawena i ngẽma mürapewagü rü úirumümaxã tá cuyatütáchinügü. ¡Rü úirumaxã yaxüxmachinü i ngẽma mürapewagü nax ngẽmawa nawe̱xpetüxü̃ca̱x ya yima naxpawerugü ya úirumaxã tümena̱xã́ne!
30 Rü yema ĩpatachicüna̱xã ga ma̱xpǘnewa cuxü̃ chawéxü̃xãcü tá cunaxü ya yima chopata.
31 ¡Naxü ya chopataarü tüyemachiãruxü̃ nawa i mexẽchine ya línuarü tü rü carnéruta̱xaarü tü i waxranütane rü yáuxranütane rü daunütane! Rü ngẽma rü tá cunanga̱xãxẽ namaxã i taxre i dauxü̃cüã̱xchicüna̱xãgü i ixãxpe̱xatüxü̃.
32 Rü ñu̱xũchi choruxü̃gü i úirunaxca̱xmaxã nachogü i ngẽma tüyemachiãruxü̃ nagu ya yima ãgümücü ya caxta ya acáchianaxca̱x ya úirumaxã itümena̱xãgüne rü diẽrumümaxã ãchipátüne.
33 ¡Rü ngẽma tüyemachiü̃ruxü̃ rü ngẽma norü choruxü̃gu nacho! Rü ngẽma norü tüyemachixü̃ruxü̃ tá nixĩ i yayauxyexü̃ i naxmachiã i Üünexü̃ nüxna i Naxmachixü̃ i Üünexüchixü̃. Rü ngẽma Naxmachixü̃ i Üünexü̃chixü̃gu tá nixĩ i cuyaxǘcuchixü̃ i ngẽma baú i nagu nanuxü̃ i ngẽma nutatachinügü i chorü mugü nagu ümatüxü̃.
34 ¡Rü ñu̱xũchi nangataxü̃ i ngẽma baú i naxmachixü̃ i Üünexü̃chixü̃wa ngẽxmaxü̃!
35 ¡Rü ngẽma mecha i paũ i üünexü̃ nagu nuxü̃, rü ngẽma tüyemachixü̃ruxü̃arü düxétüguama naxǘ norü nórtecüwawa ya yima chopata! ¡Rü ngẽma omüpaweru rü ngẽma mechaarü to̱xma̱xtagu naxǘ yima chopataarü súrcüwawaama!
36 ¡Rü yima chopataarü ĩã̱xca̱x naxü ya norü tüxã̱xruxü̃ nawa i mexẽchine ya línuarü tü rü carnéruta̱xaarü tü i waxranütane rü yáuxranütane rü daunütane! Rü ngẽma rü tá mea cunanga̱xãxẽ.
37 ¡Rü ñu̱xũchi ngẽma tüxã̱xruxü̃ naxü ya 5 ya caxta ya acáchianaxca̱x ya úirumaxã itümenaxãgüne! ¡Rü naxü ta i norü choruxü̃gü i úirunaxca̱x! ¡Rü ngẽma 5 i nachipatüca̱x nadexẽxẽ i bróũche!
