Éxodo 27:1-21
27 ¡Rü naxü i wüxi i ãmarearü guruxü̃ i norü guxü̃cüwawa wüxigumarexü̃! Rü taxre ya metru rü 25 chentímetru tá nixĩ i wüxichigü i nacüwawa. Rü mürapewa i acáchianaxca̱x tá nixĩ. Rü ngẽma norü máchane rü wüxi ya metru rü 25 chentímetru tá nixĩ.
2 Rü ngẽma ãmarearü guruxü̃, rü guxü̃ma i norü ãgümücüpe̱xewa rü tá cunacuipe̱xegüxẽxẽ, rü ngẽma rü tá naxü̃newatama cunaxüxüchi. Rü bróũchemaxã tá cunatüxüne i guxü̃wama.
3 Rü guxü̃ma i norü ngẽmaxü̃gü i ngẽma ãmarearü guruxü̃ rü tá bróũchenaxca̱x nixĩgü. Rü ngẽma norü tanimacapáü̃gü rü ngẽma norü paragü, rü norü nagüpáü̃gü, rü ngẽma namachiarü choxruü̃gü, rü ngẽma Ãxwepáü̃gü rü bróũchenaxca̱x tá nixĩgü.
4 ¡Rü ñu̱xũchi naxü ta i wüxi ya naxta̱xmüxü̃ ya bróũchenaxca̱x! ¡Rü yima naxta̱xmüxü̃pe̱xewa nanucu ya ãgümücü ya naxmachinügü ya bróũchenaxca̱x!
5 ¡Rü ñu̱xũchi ngẽma ãmarearü guruü̃arü ma̱xü̃maarü ngãxü̃gu yaxǘcuchi ya yima naxta̱xmüxü̃!
6 ¡Rü ñu̱xũchi ngẽma ãmarearü guruü̃ca̱x naxü ya taxre ya naxpaweru i acáchianaxca̱x! ¡Rü bróũchemaxã yatügümena̱xã!
7 ¡Rü ngẽma ãmarearü guruü̃arü taxrecüwawa ngẽxmagüxü̃ i naxmachinüwa yawe̱xgü ya yima naxpawerugü nax yimamaxã tóxnamana nangegüãxü̃ca̱x!
8 Rü ngẽma ãmarearü guruxü̃ i mürapewanaxca̱x rü nanaxwa̱xe nax yango̱xpetümarexü̃, yema ma̱xpǘnewa cuxü̃ chawéxü̃rüxü̃.
Tupanapataarü ĩã̱xtüchiga
9 Rü yima chopata rü tá cunaxüã̱xtü. Rü ngẽma norü súrcüwawaama rü tá línuarü tü ya mutáchinünemaxã ícunapoxegu. Rü ngẽma norü ma̱x i ngẽma ícupoxeguxü̃ rü 45 ya metru tá nixĩ.
10 Rü 20 tá nixĩ i norü caxtagü rü 20 i nachipatügü. Rü guxü̃ma i ngẽma rü bróũchenaxca̱x tá nixĩgü. Rü ngẽma norü caxtatape̱xewa ngucuxü̃ i norü choruü̃gü rü diẽrumünaxca̱x tá nixĩgü.
11 Rü ngẽma norü nórtecüwawaama rü tá línuarü tü i mutáchinüxü̃maxã ícunapoxegu. Rü ngẽma ícupoxeguxü̃ rü 45 ya metru tá nixĩ. Rü yima 20 ya norü caxtagü rü ngẽma 20 i nachipatügü rü bróũchenaxca̱x tá nixĩ. Rü yima norü caxtatape̱xewa ngucuxü̃ i norü choruü̃gü rü diẽrumünaxca̱x tá nixĩgü.
12 Rü ngẽma naã̱xtüarü tatachinü i éstecüwawaama üxü̃ rü 22 ya metruarü ngãxü̃ tá nixĩ i ícunapoxeguxü̃ namaxã i línuarü tüwa imutáchinüxü̃. Rü 10 tá nixĩ ya norü caxtagü rü nachipatügü.
13 Rü ngẽma naã̱xtüarü tatachinü i éstewaama üxü̃ rü ngẽxgumarüxü̃ ta 22 ya metruarü ngãxü̃ tá nixĩ i ícupoxeguxü̃ namaxã i línuarü tüwa imutáchinüxü̃.
14 Rü ngẽma naã̱xtüpe̱xewa i norü ücuchicawaama üxü̃ rü ngẽma norü ücuchicaarü wüxicüwawa rü 7 ya metru tá nixĩ i ícupoxeguxü̃ namaxã i línuarü tüwa imutáchinüxü̃. Rü tomaepü̱x tá nixĩ ya norü caxtagü rü nachipatügü.
15 Rü ngẽma ücuchicaarü tocüwawa rü ngẽxgumarüxü̃ ta rü 7 ya metru tá nixĩ i ícupoxeguxü̃ namaxã i línuarü tüwa imutáchinüxü̃. Rü tomaepü̱x tá ta nixĩ ya norü caxtagü rü nachipatügü.
16 Rü ngẽma tüxã̱xruxü̃ i naã̱xtüarü ĩã̱x rü 9 metrugu tá nixü. Rü línuarü tüwa rü carnéruta̱xaarü tü ya waxranütane rü yáuxranütane rü daunütanewa mutáchinüxü̃ tá nixĩ. Rü ngẽma rü tá mea cunanga̱xãẽchara. Rü ãgümücü tá nixĩ ya norü caxtagü rü nachipatügü i ngẽma tüxã̱xruxü̃.
17 Rü guxü̃ma i naã̱xtüarü caxtagü rü nachipatügü rü bróũchenaxca̱x tá nixĩgü. Rü ngẽma norü caxtatape̱xewa ngucuxü̃ i norü choruü̃gü rü diẽrumünaxca̱x tá nixĩgü.
18 Rü ngẽma naa̱xtü rü 45 ya metru tá nixĩ i norü ma̱x rü 22 ya metruarü ngãxü̃ tá nixĩ i norü tatachinü. Rü norü poxeguxü̃ rü taxre ya metru rü 25 chentímetru tá nixĩ i norü máchane. Rü línuarü tüwa imutáchinüxü̃ tá nixĩ i ngẽma norü poxeguxü̃. Rü yima norü caxtagüarü nachipatügü rü bróũchenaxca̱x tá nixĩgü.
19 Rü guxü̃ma i chopataarü ngẽmaxü̃gü rü bróũchenaxca̱x tá nixĩgü. Rü ngẽma norü poxeguxü̃tüxü̃ nagu ngagüxü̃, rü naã̱xtüarü poxeguxü̃tüxü̃ nagu ngagüxü̃ rü tá ta bróũchenaxca̱x nixĩgü.
Omügüarü chíxü̃
20 ¡Rü namaxã nüxü̃ ixu i Iraétanüxü̃ nax cuxü̃tawa nangegüãxü̃ca̱x i oribuarü chíxü̃ nax ngẽmaãcü guxü̃guma yana̱i̱xgüxü̃ca̱x i chopataarü omügü!
21 Rü nüma ya Aróü̃ rü nanegü tá nixĩ i nüxna daugüxü̃ i ngẽma omügü nax ngẽmaãcü guxü̃ma i chütaxü̃ chope̱xewa nanaigüechaxü̃ca̱x nawa ya yima chopata. Rü ngẽma baú i mugüchixü̃arü tüyepe̱xewaama tá nixĩ i inanaigüechaxü̃ i ngẽma omügü. Rü ñaa mu rü chanaxwa̱xe i guxü̃gutáma ngẽma Iraétanüxü̃ rü nataagü nagu naxĩ.
