Éxodo 28:1-43
28 ¡Rü chorü puracüca̱x nüxü̃ naxuneta ya cuenexẽ ya Aróü̃ rü nanegü ya Nadáx, rü Abiú, rü Ereachá, rü Itamá! Rü nümagü tá nixĩ i chorü chacherdótegü.
2 ¡Rü cuenexẽ ya Aróü̃axü̃́ naxü i naxchiru i taxuechirumaxã wüxiguxü̃! Rü ngẽma naxchiruwa tá nixĩ i duü̃xü̃gü nüxü̃ nacua̱xgüxü̃ nax chomatama nüxü̃ chaxunetaxü̃ naxca̱x i chorü puracü i üünexü̃.
3 ¡Rü namaxã idexa i guxü̃ma i ngẽma duü̃xü̃gü i naxchiruarü üwa cua̱x nüxna chaxãxü̃ nax ngẽma naxügüxü̃ca̱x i naxchiru ya Aróü̃ rü ngẽmaãcü chorü chacherdóte nax yaxĩxü̃ca̱x!
4 Rü ngẽma naxchirugü i Aróü̃axü̃́ tá naxügüxü̃ rü ñaagü tá nixĩ: Norü türemüxü̃, rü norü efóx, rü naxchiru i mámüxü̃ i ãmatüxü̃, rü naxchiru i rüma̱xmaexü̃, rü napate̱xe i ipuxü̃ i línuarü tüwa üxü̃, rü norü goyexü̃. Rü ngẽmaãcü tá nanaxügü i naxchirugü i taxuechirumaxã wüxiguxü̃ naxca̱x ya cuenexẽ ya Aróü̃ rü nanegü nax ngẽmaãcü chorü chacherdótegü yaxĩgüxü̃ca̱x.
5 Rü ngẽma ngaixchirutanüxü̃ rü úiruwa rü carnéruta̱xa ya waxranütanewa, rü yauxnütanewa, rü daunütanewa, rü línuarü tü i mexẽchixü̃wa tá nanaxügü.
6 28:6-7 Rü ngẽma efóx rü úiruwa rü carnéruta̱xa ya waxranütanewa, rü yauxnütanewa, rü daunütanewa, rü línuarü tü i mexẽchixü̃wa tá nanaxügü. Rü úirumaxã tá nananga̱xãẽpechinügü. Rü tá nüxü̃́ nangẽxma i taxre i natü̱xügü nax naatüwa nachopetüxü̃ca̱x.
7 Nüü̃ nadau 28:6
8 Rü ngẽma norü goyexü̃ i norü tairuxü̃ i ngẽma efóx rü nawatama ne daxü̃ nixĩ. Rü úiruwa rü carnéruta̱xa ya waxranütanewa, rü yauxnütanewa, rü daunütanewa, rü línuarü tü i mexẽchixü̃wa tá nanaxügü
9 ¡Rü nayaxu ya taxre ya nutagü ya cornalina, rü yima nutagügu naxümatü i naégagü i ngẽma 12 i Iraé nanegü!
10 Rü wüxi ya nutagu tá cunaxümatü i naégagü i ngẽma 6 i nanegü i nüxíra buexü̃. Rü nai ya nutagu tá cunaxümatü i naégagü i ngẽma togü i 6 i nanegü i wixweama buexü̃.
11 Rü ngẽma ngã̱xãẽruü̃güarü üwa puracüxü̃ tá nixĩ i yima nutaxacügügu naxümatüxü̃ i ngẽma Iraé nanegüéga ñoma wüxi i cua̱xruxü̃gu naxümatüxü̃rüxü̃. ¡Rü ñu̱xũchi yima taxre ya nutagü rü taxre i tairuü̃gü i úirunaxca̱xwa nanuxcu nax ngẽmaãcü ngẽma efóxtü̱xüatüwa nangẽxmagüxü̃ca̱x!
12 Rü yima nutagüwa tá nixĩ i ngẽma Iraétanüxü̃ i nüxna nacua̱xãchiexü̃ ga yema 12 ga Iraé nanegü. Rü ngẽmaãcü i Aróü̃ rü naxchirutü̱xügu tá nayange i ngẽma naégagü nax ngẽmawa ngẽma Iraétanüxü̃ chope̱xewa nüxna nacua̱xãchiexü̃ca̱x ga yema 12 ga Iraé nanegü.
13 Rü yima nutagüarü tairuü̃gü rü úirunaxca̱x tá nixĩgü.
14 ¡Rü ñu̱xũchi naxü i taxre i cadénaxacügü nawa i úiruarü munütaxü̃, rü ngẽma efóxtü̱xüwa ngẽxmagüxü̃ i tairuü̃güwa nachocu!
15 Rü ngẽma norü türemüxü̃ i nawa nangẽxmagüxü̃ ya yima taxre ya nutagü ya nawa tá nüxü̃ pecuácü i ngẽma choma chanaxwa̱xexü̃, rü ngẽma efóxrüxü̃ tá cunanga̱xãxẽ namaxã i úiru rü carnéruta̱xa ya waxranütane, rü yauxnütane, rü daunütane, rü línuarü tü i mexẽchine.
16 Rü tá ínayapoxõchi, rü ngẽma ãgümücü i nacüwawa rü tá nawüxigumarexü̃. Rü wüxicüwawachigü rü 22 chentímetru tá nixĩ.
17 Rü ngẽma türemüxü̃ rü nutaxacügü ya ngã̱xãẽruü̃gümaxã tá cunangã̱xãxẽ. Rü ãgümücüchimüxü̃ tá nixĩ. Rü ngẽma nüxírachimüxü̃ rü nutaxacügü i rubí rü crichólitu rü esmeráda tá nixĩ.
18 Rü ngẽma norü taxrechimüü̃ rü nutaxacügü ya granate rü zafíru rü yáde tá nixĩ.
19 Rü ngẽma norü tomaepü̱xchimüü̃ rü nutaxacügü ya yachĩ́tu rü ágata rü amatísta tá nixĩ.
20 Rü ngẽma norü ãgümücüchimüxü̃ rü nutaxacügü ya topáchiu rü cornalina rü yáspe tá nixĩ. Rü norü tairuü̃gü ya yimá nutaxacügü rü úirunaxca̱x tá nixĩ.
21 Rü yimá nutaxacügü rü 12 tá nixĩ erü 12 nixĩ ga naégagü ga yema Iraé nanegü. Rü chanaxwa̱xe nax yima wüxichigü ya nutaxacügu ñoma wüxi i cua̱xruxü̃gu naxümatüxü̃rüxü̃ naxümatüxü̃ i wüxichigü i naéga i ngẽma 12 tücumü i Iraétanüxü̃.
22 ¡Rü ngẽma türemüxü̃ca̱x naxü ta i taxre i cadénagü i munütaxü̃ i úirunaxca̱x!
23 ¡Rü ngẽxgumarüxü̃ ta naxü i taxre i naxmachinügü i úirunaxca̱x! ¡Rü ngẽma naxmachinügü rü ngẽma türemüxü̃pe̱xewa nanucu!
24 ¡Rü yimá cadénagü i úirunaxca̱x rü nanucu nawa i ngẽma naxmachinügü i ngẽma türemüxü̃arü dauxü̃pe̱xewa ngẽxmagüxü̃!
25 Rü ngẽma norü tope̱xe ya yimá taxre ya cadénagü rü tá cuyanachotagü nawa i ngẽma chacherdótearü efóxtü̱xü i nape̱xewaama üxü̃ nax ngẽxma nataixü̃ca̱x.
26 ¡Rü ngẽxgumarüxü̃ ta naxü i to i taxre i naxmachinügü i úirunaxca̱x! ¡Rü ngẽma rü nanucu i türemüxü̃arü ñaxtüpe̱xewaama i efóxna íyaxũxü̃wa!
27 ¡Rü naxü ta i to i taxre i naxmachinügü ga úirunaxca̱x! ¡Rü ngẽma rü nanucu i ngẽma efóxtü̱xüpe̱xegü ínga̱i̱xcuchigüxü̃arü ñaxtüwaama! Rü ngẽmaãcü ngẽma efóxarü goyexü̃étüwaxüra tá nangẽxma i ngẽma naxmachinügü.
28 Rü ngẽmaãcü i ngẽma türemüxü̃arü naxmachinügü rü wüxi i nacuna i waxranütaxü̃maxã tá nügüna nayaxũxgü namaxã i ngẽma efóxarü naxmachinügü. Rü ngẽmaãcü i ngẽma türemüxü̃ rü ngẽma efóxarü goyexü̃arü dauxü̃waüra tá nangẽxma, rü nügüna tá nayaxũxgü.
29 Rü ngẽxguma chopatagu naxücugu i Aróü̃ rü tá nayanga̱xcuchi i ngẽma türemüxü̃ i nawa nangẽxmagüxü̃ ya yima taxre ya nutagü ya nawa nüxü̃ pecuácü i ngẽma choma chanaxwa̱xexü̃, rü ngẽmaãcü tá naremügu chope̱xewa nanange i naégagü i ngẽma 12 i Iraé nanegü nax ngẽmaãcü guxü̃gutáma choma i Cori nüxna chacua̱xãchixü̃ca̱x.
30 ¡Rü yima taxre ya nutaxacügü ya Uríü̃ rü Tumíü̃ ya nawa nüxü̃ pecuácü i ngẽma choma chanaxwa̱xexü̃, rü ngẽma türemüxü̃gu nanuxcu nax Aróü̃ naremügu yangewetaxü̃xü̃ca̱x i ngẽxguma chope̱xewa naxũxgu! Rü ngẽmaãcü i nüma i Aróü̃ rü guxü̃gutáma ngẽxguma chope̱xewa naxũũxgu rü naremügu nayangexwetaxü̃ ya yimá nutagü ya nawa nüxü̃ pecuácü i ngẽma choma chanaxwa̱xexü̃.
31 Rü ngẽma naxchiru i mámüxü̃ i efóxarü aixepewa üxü̃ rü chanaxwa̱xe nax naxpü i waxracharaxü̃wa naxüxü̃.
32 Rü ngẽma naxchiru i máxmüxü̃arü ngãxü̃wa rü tá nangẽxma i wüxi i naeruchica. Rü ngẽma naeruchica rü tá mea napéxe i nanaxãpechinü ñoma chalecurüxü̃ nax tama nagáuxü̃ca̱x.
33 Rü ngẽma naxchiru i mámüxü̃ rü guxü̃ma i napechinüwa tá ibopüxüxü̃maxã cunanga̱xãẽpechinü. Rü ngẽma ibopüxüxü̃gü rü tá naxpü i waxracharaxü̃wa, rü yáuxcharaxü̃wa, rü daucharaxü̃wa cunaxü. Rü guxü̃ma i napechinüwa rü tá cunaxümücü i ngẽma ibopüxüxü̃gü namaxã ya campanaxacügü ya úirunaxca̱x.
34 Rü wüxichigü i ngẽma ibopüxüxü̃xü̃tawa tá cuyaxǘcuchi i wüxichigü ya campanaxacü ya úirunaxca̱x. Rü ngẽmaãcü ibopüxüxü̃maxã rü campanaxacügümaxã tá ínanguegupechinü i ngẽma naxchiru.
35 Rü ngẽmaãcü i Aróü̃ rü ngẽxguma tá chopatawa naxũxgu nax naxüaxü̃ca̱x i chacherdótearü puracü rü tá nagu nicu̱x i ngẽma naxchiru i mámüxü̃. Rü ngẽmaãcü i ngẽxguma chopatagu naxücugu nax chope̱xewa nangẽxmaxü̃ca̱x rüe̱xna ngẽxguma ínaxũxũxgu rü tá naxãgatanü ya yima campanaxacügü rü taxũtáma nayu i nüma.
36 ¡Rü ngẽxgumarüxü̃ ta naxü i wüxi i ãtachinüxü̃ i úiruxicanaxca̱x! ¡Rü ngẽmagu ñoma wüxi i cua̱xruxü̃gu naxümatüxü̃rüxü̃ naxümatü i ore i ñaxü̃: “Tupana nüxü̃ unetacü”, ñaxü̃!
37 ¡Rü ngẽma úirutachinü rü wüxi i nacuna i waxaranütaxü̃maxã tá Aróü̃catüpate̱xewa nina̱i̱xcuchi!
38 Rü ngẽmaãcü guxü̃gutáma Aróü̃catüwa nangẽxma. Rü Aróü̃ tá nayange i ngẽma Iraétanüxü̃arü pecadugü i chope̱xewa naxügüxü̃. Natürü ngẽxguma Iraétanüxü̃arü pecadugüca̱x ãmaregü choxna naxãxgu i Aróü̃, rü choma rü tá nüxü̃ chadau i ngẽma úirutachinü rü tá chanayaxu i norü ãmaregü rü tá nüxü̃ icharüngüma i norü pecadugü.
39 Rü ngẽma naxchiru i mámüxü̃ i nga̱xãẽpechinüxü̃ i düxétüwa üxü̃ rü línuarü tüwa tá cunaxü. Rü ngẽxgumarüxü̃ ta i ngẽma napate̱xe i ipuxü̃ rü línuarü tüwa tá cunaxü. Rü ngẽma norü goyexü̃ rü tá mea cunaxümatü.
40 Rü ngẽxgumarüxü̃ ta i Aróü̃ nanegüca̱x tá cunaxü i mexẽchixü̃ i napate̱xegü, rü norü chacherdótechirugü, rü norü goyexü̃gü. Rü ngẽxguma ngẽma naxchirugu yacu̱xgügu ya yimá nanegü, rü duü̃xü̃gü rü tá nüxü̃ nangechaxü̃gü rü naga naxĩnüe.
41 Rü ngẽma naxchirugü tá nixĩ i nagu cuyacu̱xẽxẽgüxü̃ i cuenexẽ i Aróü̃ rü yima nanegü. Rü ñu̱xũchi tá chíxü̃maxã cuyabaerugüxü̃ nax ngẽmaãcü chorü chacherdótegü yaxĩgüxü̃ca̱x, rü choxü̃́ napuracüexü̃ca̱x.
42 ¡Rü ngẽxgumarüxü̃ ta Aróü̃ca̱x rü nanegüca̱x naxü i natüü̃chiruparagü i imáxü̃ i naxü̃́taparagu yacua̱xgüxü̃! Rü línuarü tünaxca̱x tá nixĩ.
43 Rü ngẽxguma chopatagu nachocuxgu rüe̱xna chorü ãmarearü guruü̃na nangaicamagügu nax naxügüã̱xü̃ca̱x i chorü puracü, rü ngẽma natüü̃chiruparagu tá nixĩ i yacu̱xgüxü̃ i nüma i Aróü̃ rü nanegü. Rü ngẽxguma chi tama ngẽma natüü̃chiruparagu yacu̱xgüãcü chopatagu nachocugu, rü tá nayue. Rü ngẽma tá nixĩ i wüxi i mu i guxü̃gutáma yanguxẽẽgüxü̃ i Aróü̃ rü nanegü rü nataagü —ñanagürü ga Tupana.
