Éxodo 29:1-46
29 Cori ya Tupana rü Moichéxü̃ ñanagürü: —Rü ngẽxguma cuyabaerugu ya Aróü̃ rü nanegü nax chorü chacherdótegü yixĩgüxü̃ca̱x rü chanaxwa̱xe i cuyayaxu i wüxi i wocaxacü i yatüxü̃ rü taxre i carnérugü i iyatüxü̃ i taxuwama chixexü̃.
2 ¡Rü ngẽma rümemaexü̃ i trigute̱xewa naxü i paũ rü ñu̱xũchi paũ i maixcuraxü̃ i ngearü pu̱xẽẽruü̃ã́xü̃ i meama chíxü̃maxã ñucharaxü̃! ¡Rü ngẽxgumarüxü̃ ta naxü i paũ i ãtachinüxü̃ i ngearü pu̱xẽẽruü̃ã́xü̃ i chíxü̃maxã ñucharaxü̃!
3 Rü ngẽxguma marü pexü̃́ namexgu rü wüxi ya pexchigu tá penanucu, rü ñu̱xũchi ngẽma woca i yatüxü̃ rü ngẽma taxre i carnérugü i yatüxü̃maxã wüxigu chopatawa tá penana.
4 Rü ñu̱xũchi chopataarü ĩã̱xpe̱xewa tá cunaga ya Aróü̃xü̃ wüxigu nanegümaxã. ¡Rü namu nax naxaiyagüxü̃ca̱x!
5 ¡Rü marü naxaiyagüwena rü nade i ngẽma naxchiru i woetama chacherdótegüca̱x ixĩxü̃! ¡Rü Aróü̃xü̃ icu̱xcuchi i naxchiru i máxpaxü̃, rü ngẽma naxchiru i efóxtüxü̃wa ngẽxmaxü̃, rü nüma i efóx namaxã i ngẽma türemüxü̃! ¡Rü nüxü̃ yagota i norü goyexü̃ i efóxarü taixẽxẽruxü̃!
6 ¡Rü naeruwa yanga̱xcuchi i napate̱xe i ipuxü̃, rü ngẽmacatüwa yanga̱xcuchi i ngẽma úirutachinü i nawa nangóxü̃ nax choma nüxü̃ chaxunetaxü̃ nax chorü chacherdóte yixĩxü̃!
7 ¡Rü nayaxu i ngẽma chíxü̃ i baeruruxü̃ rü namaxã nabaeru ya Aróü̃ nax ngẽmaãcü chorü chacherdóte yixĩxü̃ca̱x!
8 ¡Rü naxca̱x naca i Aróü̃ nanegü nax cuxü̃tawa naxĩxü̃ca̱x, rü ñu̱xũchi nacu̱xcu i ngẽma naxchiru i máxpaxü̃!
9 ¡Rü nüma ya Aróü̃ rü nanegü mea íyagotagü i norü goyexü̃gü rü mea nanga̱xcu i napate̱xegü! Rü ngẽmaãcü tá nüxü̃ cuxuneta nax chorü chacherdótegü yixĩgüxü̃ca̱x. Rü chanaxuegu nax guxü̃gutáma chorü chacherdótegü yixĩgüxü̃ i Aróü̃ nataagü.
10 ¡Rü ngẽmawena i ngẽma wocaxacü i iyatüxü̃ rü chopatawa naga nax Aróü̃ rü nanegü naerugu nuxme̱xgüxü̃ca̱x!
11 ¡Rü nawena nax naerugu nanuxme̱xgüxü̃, rü chopataarü ĩã̱x i nawa ixücuxü̃wa naga i ngẽma woca i yatüxü̃ rü ngẽxma chopexegu yama̱x!
12 ¡Rü cuxme̱xmaxã nawa naxue ya nagü, rü ãmarearü guruü̃pe̱xegügu yapiichi! ¡Rü ñu̱xũchi yimá nagü ya íyaxücü rü ãmarearü guruü̃cüwagu ínabaegu.
13 ¡Rü nade i ngẽma naü̃nütaarü chíxü̃, rü nacaarü chíxü̃, rü norü ñuxmigüarü chíxü̃! ¡Rü ñu̱xũchi ãmarearü guruü̃wa ínagu!
14 Natürü ngẽma namachi, rü naxcha̱xmüxü̃, rü naü̃ i ngẽma woca rü ĩpemawa tá peyanagu nax ngẽmaãcü penaxütanüxü̃ca̱x i ngẽma perü chixexü̃ i pexüxü̃.
15 ¡Rü ngẽma taxre i carnéruwa rü yayaxu i wüxi! ¡Rü ñu̱xũchi Aróü̃ca̱x rü nanegüca̱x naca nax wüxigu naerugu nanuméxü̃ca̱x!
16 ¡Rü ngẽmawena rü yama̱x! ¡Rü yimá nagü rü ngẽma ãmarearü guruxü̃ namaxã ínayamáxegu!
17 ¡Rü ngẽma namachi rü nadacu! ¡Rü ngẽma naü̃nüta, rü naparagü rü yayauxgü! ¡Rü ñu̱xũchi wüxigu nanu namaxã i ngẽma namachi i dacuxü̃ rü ngẽma naeru!
18 ¡Rü ngẽma carnéru rü ãmarearü guruü̃wa cha̱u̱xca̱x yagu! Rü ngẽma naema i ngẽma ãmare rü choma rü tá poraãcü namaxã chataãẽxü̃chi.
19 ¡Rü yayaxu i ngẽma to i carnéru! Rü ñu̱xũchi nüma ya Aróü̃ rü nanegü rü tá naerugu nanuxme̱xgü.
20 ¡Rü ngẽmawena rü yama̱x i ngẽma carnéru! ¡Rü íxracü ya nagü nayaxu rü Aróü̃xü̃ rü nanegüxü̃ norü tügünepachinüarü ñaxtüwa namaxã nacha! ¡Rü ñu̱xũchi norü tügüneme̱xẽarü tatarenewa namaxã nacha rü ngẽxgumarüxü̃ ta norü tügünecutüarü tatarenewa namaxã nacha! ¡Rü yimá nagü ya íyaxücü rü ngẽma ãmarearü guruxü̃ namaxã íyamaxegu i nacüwa!
21 ¡Rü yimá nagü ya ãmarearü guruü̃wa ngẽxmacümaxã naxüexü̃ i ngẽma chíxü̃ i baeruruxü̃! ¡Rü íxracü nayaxu rü Aróü̃xü̃ namaxã namaxcuétü rü naxchiru rü ta namaxcuchara! ¡Rü nanegüxü̃ rü ta namaxcuétü rü naxchirugü rü ta namaxcuchara! Rü ngẽmaãcü i Aróü̃ rü nanegü rü naxchirugü rü choxrügü tá nixĩgü.
22 ¡Rü ñu̱xũchi nayaxu ya yima narexü̃arü chíxü̃ rü naü̃nütagüarü chíxü̃ rü nacaarü chíxü̃ rü yima taxre ya ñuxmigü rü norü chíxü̃ rü yima norü tügüneperema! Erü ngẽma nixĩ i carnéru i chacherdótegüarü baeruca̱x imáxü̃.
23 Rü ngẽma paũgü i ngearü pu̱xẽẽruü̃ã̱xgüxü̃ i chope̱xegu pexchigu nuxü̃tanüwa ¡rü nayaxu i wüxi i paũ i botachinüxü̃, rü wüxi i paũ i chíxü̃maxã üxü̃, rü ñu̱xũchi wüxi i gayeta!
24 ¡Rü guxü̃ma i ngẽma rü Aróü̃me̱xẽgu, rü nanegüme̱xẽgu nanu! Rü ngẽmagü nixĩ i ãmare i cha̱u̱xca̱x ixĩxü̃.
25 ¡Rü ngẽmawena rü nüxna nade i naxme̱xwa, rü ãmarearü guruü̃wa ínagu wüxigu namaxã i ngẽma naxü̃na i quimáxü̃! Rü ngẽma naema i ngẽma ãmare rü choma rü tá poraãcü namaxã chataãẽxü̃chi. Erü ngẽma nixĩ i ãmare i cha̱u̱xca̱x quiguxü̃.
26 ¡Rü ngẽxguma tá cunabaerugu ya Aróü̃ nax chorü chacherdóte yixĩxü̃ca̱x rü nayaxu i naremümachi i ngẽma carnéru rü chope̱xewa tá cuyachü̱xacüüxẽxẽ! Rü ngẽma naremümachi rü tá cuxrü nixĩ.
27 Rü nüxrüguma tá cunanu i ngẽma naremümachi rü yima norü tügüneperema i ngẽma carnéru i namaxã tá choxna cunamugüxü̃ i Aróü̃ rü nanegü. Erü ngẽma carnérumachi i naremüwa üxü̃ rü yima norü tügüneperema rü Aróü̃arü rü nanegüarü tá nixĩ.
28 Rü ngẽma namachi tá nixĩ i Aróü̃na rü nanegüna naxãgüxü̃ i Iraétanüxü̃ i ngẽxguma naxü̃na cha̱u̱xca̱x tá inamugügu nax nüxü̃́ nüxü̃ icharüngümaxü̃ca̱x i norü pecadugü. Rü ngẽma nixĩ i wüxi i mu i guxü̃gutáma Iraétanüxü̃ca̱x ixĩxü̃.
29 Rü ngẽma Aróü̃chiru i chorü puracüca̱x ixĩxü̃, rü Aróü̃wena rü nane rü nataagüarü tá nixĩ i ngẽxguma marü chíxü̃maxã yabaerugügu nax chorü chacherdótegü yixĩgüxü̃ca̱x.
30 Rü ngẽma Aróü̃ nane rü nataagü i nawena chacherdótegüarü ãẽ̱xgacü ixĩxü̃, rü naxü̃pa nax chopatagu naxücuxü̃ nax naxüaxü̃ca̱x i chorü puracü rü tá 7 i ngunexü̃ nagu nicu̱x i ngẽma naxchiru.
31 Rü ñu̱xũchi i cumax, Pa Moichéx, rü tá cunayaxu i ngẽma namachi i ngẽma carnéru i quimáxü̃ i ngẽxguma choxna cunamugügu i Aróü̃ rü nanegü, rü tá cunamuxra wüxi i nachica i üünexü̃wa.
32 Rü ngẽma carnérumachiarü muxraxü̃, rü ñu̱xũchi ngẽma paũ i pexchigu nuxü̃ rü Aróü̃ rü nanegü tá nanangõ̱xgü i chopataã̱xtüarü ücuwa.
33 Rü Aróü̃ rü nanegü tá nanangõ̱xgü i ngẽma carnérumachi rü paũ, erü ngẽma nixĩ i ãmare ga choxna naxãgüxü̃ ga yexguma chorü chacherdótegüxü̃ chanadexgu. Rü nüxicatama tá nanangõ̱xgü rü taxúetama ya togue tanangõ̱x, erü naxüüne.
34 Rü ngẽxguma chi moxü̃ãcü pa̱xmama íxraxü̃ i namachi rüe̱xna paũ íyaxüxgu, ¡rü ínagu i ngẽma íyaxüxü̃ nax taxúema nangṍxü̃ca̱x! Erü ngẽma rü naxüüne.
35 Rü guxü̃ma i ngẽma rü tá Aróü̃ rü nanegümaxã cunaxü ngẽma choma cumaxã nüxü̃ chixuxü̃ãcü. ¡Rü 7 i ngunexü̃ naxca̱x ínaxüxüchi nax cunaxüxü̃ca̱x i Aróü̃ rü nanegüarü ngucuchichiga nawa i chorü puracü!
36 Rü wüxichigü i ngunexü̃gu rü wüxi i wocaxacü tá cha̱u̱xca̱x quima̱x rü quigu nax ngẽmaãcü Aróü̃axü̃́ rü nanegüaxü̃́ nüxü̃ icharüngümaxü̃ca̱x i norü pecadugü. ¡Rü ngẽma ãmarearü guruü̃wa rü pecadugüarü ütanüca̱x yagu i wüxi i naxü̃na rü ñu̱xũchi chíxü̃ nagu naba nax ngẽmaãcü naxüünexü̃ca̱x i ngẽma ãmarearü guruxü̃!
37 Rü guxü̃ma i ngẽma 7 i ngunexü̃ rü ãmarearü guruü̃wa ãmare tá quigu perü chixexü̃arü ütanüca̱x. Rü ngẽmaãcü i ngẽma ãmarearü guruxü̃ rü tá naxüünexü̃chi. Rü ta̱xacü i namaxã yarüñaxü̃ rü tá naxüüne.
Ãmaregü i wüxichigü i ngunexü̃gu ixãxü̃
38 Rü wüxichigü i ngunexü̃gu rü tá cha̱u̱xca̱x cunadai i taxre i carnéruxacügü i wüxi ya taunecü nüxü̃́ ngẽxmaxü̃. Rü ngẽma ãmarearü guruü̃wa tá ícunagu.
39 Rü wüxi tá nixĩ i pa̱xmama quiguxü̃ rü to rü tá yáuanecü cuyagu.
40 Rü ngẽma nüxíra quiguxü̃ i carnéru rü taxre i quíru i arína i mexẽchixü̃ i oribuarü chíxü̃maxã ãéü̃xü̃maxã tá cuyagu. Rü naétü wüxi ya litru ya bínu tá nagu cuba.
41 Rü ngẽmaãcü tátama cunaxü namaxã i ngẽma to i carnéru i yáuanecü quiguxü̃ nax arínamaxã rü oribuarü chíxü̃maxã rü bínumaxã cuyaguxü̃. Rü ngẽmaãcü tá chauãẽgu nayatãũxü̃ i ngẽma naema.
42 Rü ñaa ãmaregü i ñu̱xma cha̱u̱xca̱x pigugüxü̃rüxü̃ tá nixĩ i guxü̃gutáma cha̱u̱xca̱x naxügüãxü̃ i pexacügü rü petaagü i chopataarü ĩã̱xpe̱xewa. Rü choma rü ngéma tá changexma nax cumaxã chidexaxü̃ca̱x.
43 Rü ngẽxma tá nixĩ i choxü̃ iyangaugüxü̃ i ngẽma Iraétanüxü̃. Rü ngẽma nachica rü tá naxüüne erü ngéma tá changexma.
44 Rü yima chopata rü ngẽma ãmarearü guruxü̃ rü tá chanaxüünexẽxẽ. Rü ngẽxgumarüxü̃ tá ta i nüma ya Aróü̃ rü nanegü rü tá chanaxüünexẽxẽ nax naxügüã̱xü̃ca̱x i chorü puracü.
45 Rü choma rü tá natanüwa chamaxü̃ i ngẽma Iraétanüxü̃, rü norü Tupana tá chixĩ.
46 Rü ngẽmaãcü tá nixĩ i nüxü̃ nacua̱xgüxü̃ nax choma chixĩxü̃ i norü Cori ya Tupana ga Equítuanewa íchanguxü̃xẽxẽxü̃ nax natanüwa chamaxü̃xü̃ca̱x. Rü choma nixĩ i norü Cori ya Tupana —ñanagürü.
