Éxodo 3:1-22
3 Rü nüma ga Moiché, rü na̱xtü ga Yetrúarü carnérugüarü daruxü̃ nixĩ. Rü guma na̱xtü ga Yetrú ga Reuégu ãégacü rü chacherdóte nixĩ ga Madiáü̃anewa. Rü wüxi ga ngunexü̃ ga yexguma maxẽ ga mexü̃ca̱x namaxã nada̱u̱xgu ga na̱xtüarü carnérugü, rü ínachianexü̃arü tocüwawa nangu ga Tupanaarü ma̱xpǘne ga Oréxgu ãéganearü ngaicamana.
2 Rü yéma rü wüxi ga chuchuxü̃eta ga iya̱u̱xraxü̃wa nixĩ ga Moichéca̱x nangóxü̃ ga Cori ya Tupanaarü orearü ngeruxü̃ ga daxũcüã̱x. Rü nüma ga Moiché rü mea nüxü̃ nadawenü rü nüxü̃ nicua̱xãchi ga yema chuchuxü̃eta ga nax yayauraxü̃, natürü tama nixa.
3 Rü yemaca̱x ñaxü̃gu narüxĩnü rü: —¿Ta̱xacü nangupetü? Rü tá íchayadau rü ta̱xacüca̱x tama nixaeta i ngẽma chuchuxü̃ —ñaxü̃gu narüxĩnü.
4 Rü yexguma Cori ya Tupana nüxü̃ da̱u̱xgu ga yema chuchuxü̃eta ga iya̱u̱xraxü̃ca̱x nax yaxũxü̃ ga Moiché, rü nüma ga Cori ya Tupana rü yema chuchuxü̃etawa Moichéna naca, rü ñanagürü: —Pa Moichéx, Pa Moichéx —ñanagürü. Rü nüma ga Moiché rü nanangãxü̃, rü: —Daxe chixĩ —ñanagürü.
5 Rü yexguma ga Tupana rü ñanagürü nüxü̃: —¡Taxṹ i nüxna cungaicamaxü̃! ¡Rü ínacua̱xichi i curü chapatu! Erü ñaa nachica i nawa cungexmaxü̃ rü naxüüne —ñanagürü.
6 Rü ñanagürü ta: —Rü choma nixĩ i curü o̱xigüarü Tupana chixĩxü̃. Rü choma nixĩ ga Abraáü̃arü rü Ichaáarü rü Acóbuarü Tupana chixĩxü̃ —ñanagürü. Rü yexguma ga Moiché rü nügü nidüxchiwe, yerü namuü̃ nax Tupanaxü̃ nadawenüxü̃.
7 Natürü nüma ga Cori ya Tupana rü ñanagürüama nüxü̃: —Meaxü̃chima nüxü̃ chadau nax ñuxãcü ngúxü̃ yangegüxü̃ i ngẽma chorü duü̃xü̃gü i Equítuanewa ngẽxmagüxü̃. Rü norü yumüxẽwa nüxü̃ chaxĩnü nax ñuxãcü norü dauruü̃güxü̃ nax ínaxuaxü̃güxü̃. Rü ngẽmaãcü meama nüxü̃ chacua̱x nax ñuxãcü ngúxü̃ yangegüxü̃.
8 Rü ngẽmaca̱x nixĩ i ñu̱xma ícharüxĩxü̃ nax Equítuanecüã̱xme̱xẽwa íchananguxü̃xẽẽxü̃ca̱x i ngẽma chorü duü̃xü̃gü. Rü ngẽma naane i nawa tá chanagagüxü̃, rü wüxi i naane i taxü̃ rü mexü̃ nixĩ. Rü ngéma rü meama narüxügü i naguxü̃raü̃xü̃ i nanetügü. Rü õna taguma nataxu. Rü ngẽma naanegu nixĩ i naxãchiü̃güxü̃ i Canaáü̃tanüxü̃ rü Itítanüxü̃, rü Amoréutanüxü̃, rü Ferechéutanüxü̃, rü Ebéutanüxü̃ rü Yebuchéutanüxü̃.
9 Rü dücax, rü marü nüxü̃ chaxĩnü nax ñuxãcü ngẽma Equítuanecüã̱xgüxü̃ ínaxuaxü̃güxü̃ i ngẽma Iraétanüxü̃, rü nüxü̃ chadau nax ñuxãcü poraãcü chixri namaxã nachopetüxü̃.
10 Rü ngẽmaca̱x ¡rü paxa cugü namexẽxẽ! Erü Faraóü̃pe̱xewa tá cuxü̃ chamu nax Equítuanewa ícunamuxü̃xü̃ca̱x i ngẽma chorü duü̃xü̃gü i Iraétanüxü̃ —ñanagürü.
11 Rü yexguma ga Moiché rü Tupanaxü̃ nangãxü̃ rü ñanagürü: —¿Ẽ̱xna ta̱xacüwa chame i chomax i Faraóü̃pe̱xewa chaxũxü̃ nax Equítuanewa íchanguxü̃xẽẽxü̃ca̱x i ngẽma Iraétanüxü̃? —ñanagürü.
12 Rü nüma ga Tupana rü nanangãxü̃, rü ñanagürü: —Choma rü tá chacuxü̃tagu. Rü ñaa tá nixĩ i cua̱xruxü̃ nax chomatama cuxü̃ ngéma chamuxü̃. Rü ngẽxguma tá Equítuanewa marü ícunanguxü̃ẽẽgu i chorü duü̃xü̃gü, rü guxãma i pema rü daa ma̱xpǘnewa tá choxü̃ peyarücua̱xüü̃gü —ñanagürü.
13 Natürü nüma ga Moiché rü Tupanaxü̃ nangãxü̃ rü ñanagürü: —Natürü ngẽxguma chi ngẽma Iraétanüwa chaxũxgu rü ñachagu namaxã: “Yimá perü o̱xigüarü Tupana nua petanüwa choxü̃ namu”, ñachagu namaxã, rü nümagü rü tá choxna nacagü rü: “¿Ta̱xacü nixĩ i naéga ya yimá Tupana ya tomaxã nüxü̃ quixucü?” ñanagürügü tá choxü̃. ¿Rü ta̱xacümaxã tá chanangãxü̃xü̃ i ngẽxguma? —ñanagürü ga Moiché.
14 Rü nüma ga Tupana rü nanangãxü̃ rü ñanagürü: —Chomatama nixĩ i Tupana Chixĩxü̃. ¡Rü ngẽmamaxã tá cunangãxü̃ i ngẽma Iraétanüxü̃ rü ñacurügü tá: “Yima Chomatama nixĩ i Tupana Chixĩxü̃ ñacü nixĩ ya petanüwa choxü̃ mucü”, ñacugürü tá nüxü̃! —ñanagürü ga Tupana.
15 Rü ñanagürü ta ga Tupana Moichéxü̃: —¡Rü namaxã nüxü̃ ixu i ngẽma Iraétanüxü̃, rü ñacugürü tá: “Nüma ya Cori ya Tupana ya perü o̱xigüarü Tupana ya Abraáü̃arü rü Ichaáarü rü Acóbuarü Tupana, rü guma nixĩ ga petanüwa choxü̃ mucü”, ñacugürü tá nüxü̃! Rü Cori ya Tupana nixĩ i chauéga i tagutáma iyagúxü̃. Rü ngẽma chauégamaxã tá nixĩ i guxü̃gutáma duü̃xü̃gü choxü̃ cuáxü̃.
16 ¡Rü ngéma naxũ rü nangutaque̱xexẽxẽ i guxü̃ma i Iraétanüxü̃arü ãẽ̱xgacügü, rü namaxã nüxü̃ ixu rü ñacugürü nüxü̃!: “Nüma ya Cori ya Tupana ya perü o̱xigüarü Tupana ya Abraáü̃arü rü Ichaáarü rü Acóbuarü Tupana, rü gumá nixĩ ga cha̱u̱xca̱x ngócü. Rü gumátama nixĩ ga chomaxã nüxü̃ ixucü nax pegu naxĩnüxü̃ rü nüxü̃ nacuáxü̃ nax ñuxãcü chixri pemaxã nachopetüxü̃ i ngẽma Equítuanecüã̱xgü.
17 Rü yimá Tupana nixĩ ya chomaxã nüxü̃ ixucü rü tá pexü̃ ínanguxü̃xẽxẽ nawa i perü guxchaxü̃gü i Equítuanewa pingegüxü̃. Rü Canaáü̃arü naanewa tá pexü̃ nagagü i ngexta ínaxãchiü̃güxü̃gu i Canaáü̃tanüxü̃, rü Itítanüxü̃, rü Amoréutanüxü̃, rü Ferechéutanüxü̃, rü Ebéutanüxü̃ rü Yebuchéutanüxü̃. Rü ngẽmaãcü ngẽma naane i ngextá mexü̃ i õna rü lechi rü ira taguma ítaxuxü̃wa tá pexü̃ chagagü”, ñanagürü ya Tupana.
18 Rü nümagü i ngẽma Iraétanüxü̃arü ãẽ̱xgacügü rü tá cuga naxĩnüe. Rü ngẽxguma i cuma rü tá Equítuanearü ãẽ̱xgacüxü̃tawa namaxã cuxũ. Rü ñacurügü tá nüxü̃: “Torü Tupana rü toxca̱x nango̱x. Rü ngẽmaca̱x tanaxwa̱xe nax toxü̃ ícumuxü̃ nax tomaepü̱x i ngunexü̃ itaxĩxgu nawa tangugüxü̃ i ngẽma nachica i ínachianexü̃ nax ngéma nüxü̃ ticua̱xüü̃güxü̃ca̱x, rü torü ãmaregü naxca̱x ítaguxü̃ca̱x ya tórü Cori ya Tupana”, ñacurügü tá nüxü̃.
19 Natürü i choma rü meama nüxü̃ chacua̱x i ngẽma Equítuanearü ãẽ̱xgacü, rü taxũtáma pexü̃ ínamuxü̃ ega tama guxchaxü̃ naxca̱x íchanguxẽẽgu.
20 Rü ngẽmaca̱x tá ichanawe̱x i chorü pora nüxü̃ i Equítuanecüã̱xgü. Rü tá naxca̱x íchananguxẽxẽ i naguxü̃raü̃xü̃ i guxchaxü̃gü i taxü̃ i taguma nüxü̃ idauxü̃. Rü ngẽmawena tá nixĩ i pexü̃ ínamuxü̃xü̃ i Equítuanearü ãẽ̱xgacü.
21 Rü ñu̱xũchi i choma rü tá Iraétanüxü̃maxã chayamecümaxẽxẽ i Equítuanecüã̱xgü nax ngẽmaãcü Iraétanüxü̃na naxãgüãxü̃ca̱x i norü ngẽmaxü̃gü.
22 Rü wüxichigü i nge i Iraétanüxü̃ rü ngĩrü ngaicamagu ãchiü̃cü i Equítuanecüã̱x rüe̱xna ngẽma ngĩxü̃tawa ngẽxmacü, rü ngẽmagüxü̃tawa tá naxca̱x ípeca i ngĩrü ngẽmaxü̃gü i diẽrumünaxca̱x, rü úirunaxca̱x rü naxchirugü nax ngẽmamaxã peyaxüxchiruxü̃ca̱x i penegü rü pexacügü. Rü ngẽmaãcü tá nüxna penapuxü̃ i norü ngẽmaxü̃gü i Equítuanecüã̱xgü —ñanagürü ga Tupana.
