Éxodo 31:1-18
31 Rü nüma ga Cori ya Tupana rü Moichémaxã nidexa rü ñanagürü nüxü̃:
2 —Dücax, rü Yudátanüxü̃tanüwa rü chanayaxu ya Becharé ya Urí nane ya Úrutaxa ixĩcü.
3 31:3-5 Rü marü nüxna chanamu i Chauãxẽ i Üünexü̃, rü nüxna chanaxã i cua̱x nax paxãma nüxü̃ nacuáxü̃ca̱x i ta̱xacüarü ü, rü nüxü̃́ natauxchaxü̃ca̱x nax guxü̃raxü̃xü̃ i meruü̃gü naxüxü̃ i úiruwa, rü diẽrumüwa, rü bróũchewa, rü naiwa. Rü nüxna chanaxã i cua̱x nax nüxü̃ nacuáxü̃ca̱x nax nuta ya nga̱xãẽruxü̃ namexẽẽãxü̃ rü nangoraxẽẽxü̃ rü chacherdótegüchiruwa nañaxcuãxü̃ rü naguxü̃raü̃xü̃ i meruü̃gü naxüxü̃ca̱x.
4 Nüü̃ nadau 31:3
5 Nüü̃ nadau 31:3
6 Rü ngẽxgumarüxü̃ ta nüxü̃ chaxuneta ya Becharéarü ngü̃xẽẽruxü̃ ya Aoriáx ya Aichamá nane ya Dáü̃tanüxü̃ ixĩcü. Rü guxü̃ma i ngẽma yatügü i nüxü̃ icua̱xüchigüxü̃ rü yexeraãcü cua̱x nüxna chaxã nax naxügüã̱xü̃ca̱x i guxü̃ma i ngẽma cuxü̃ chamuxü̃ nax cunaxüxü̃.
7 Rü ñaagü tá nixĩ i ngẽma naxügüxü̃: Yima chopata ya nawa cumaxã chidexaxü̃ne, rü ngẽma baú i chorü mugüchixü̃, rü ngẽma naxã́taxü̃, rü guxü̃ma i ngẽma chopataarü ngẽmaxü̃gü,
8 rü ngẽma mecha namaxã i norü ngẽmaxü̃gü, rü ngẽma omüpaweru i úirunaxca̱x namaxã i norü ngẽmaxü̃gü, rü ngẽma pumarate̱xearü guruxü̃,
9 rü ngẽma ãmaregüarü guruxü̃ namaxã i norü ngẽmaxü̃gü, rü yimá bachía ya ya̱u̱xme̱xü̃páxü̃ namaxã i norü ünagüchicaxü̃,
10 rü ngẽma naxchiru i mexẽchixü̃ i chacherdóte i Aróü̃chiru, rü ngẽma nanegüchiru nax ngẽmagu yacu̱xgüxü̃ca̱x i ngẽxguma naxügüã̱xgu i chacherdótegüarü puracü,
11 rü ngẽma chíxü̃ i baeruruxü̃, rü ngẽma pumarate̱xe i yixichixü̃ i chopataca̱x ixĩxü̃. Rü guxü̃ma i ngẽma rü ngẽma cumaxã nüxü̃ chixuxü̃ãcü tá nixĩ i naxügüãxü̃ —ñanagürü ga Tupana.
Ngü̃chigaarü ngunexü̃
12 Rü yexguma ga nüma ga Cori ya Tupana rü nayadaxẽxẽ ga Moichémaxã nax yadexaxü̃, rü ñanagürü nüxü̃:
13 —¡Namaxã idexa i ngẽma Iraétanüxü̃ rü ñacurügü tá nüxü̃!: “Rü name nixĩ i perüngü̃gü nagu i ngẽma ngunexü̃ i choxrü ixĩxü̃. Erü ngẽma nixĩ i cua̱xruxü̃ i guxü̃gutáma yigümaxã ixüxü̃ nax ngẽmaãcü guxãma i pema nüxü̃ pecuáxü̃ca̱x nax choma yixĩxü̃ i pexü̃ chadexü̃.
14 Rü ngẽma ngü̃chigaarü ngunexü̃gu rü nachu̱xu nax pepuracüexü̃, rü ngẽmaca̱x penaxwa̱xe i mea penaxaure. Rü yíxema tama naxaurexe i ngẽma ngunexü̃ rü tá tayu. Rü yíxema ngü̃chigaarü ngunexü̃gu puracüxe rü name nixĩ noxtacüma petanüwa tüxü̃ ípemuxũchixü̃.
15 Rü marü name i 6 i ngunexü̃ pepuracüe, natürü ngẽma norü 7 i ngunexü̃ rü cha̱u̱xca̱x tá ípenaxüxüchi rü nagu tá perüngü̃gü. Rü texé ngẽma ngunexü̃gu puracüxe rü tá tayu.
16 Rü ngẽmaca̱x i pema i Iraétanüxü̃ rü name nax perüngü̃güxü̃ i ngẽma ngü̃chigaarü ngunexü̃gu erü ngẽma ngunexü̃ nixĩ i yigümaxã naxca̱x ixügaxü̃ nax guxü̃gutáma penaxaurexü̃.
17 Rü ngẽma ngunexü̃ nixĩ i guxü̃gutáma tórü cua̱xruxü̃ i yigümaxã ixüxü̃ i pema i Iraétanüxü̃ rü chomax. Yerü choma ya perü Cori ya Tupana rü 6 ga ngunexü̃gu chayanguxẽxẽ ga nax chanaxüxü̃ ga daxũguxü̃ i naane rü ñoma i naane. Rü yema norü 7 ga ngunexü̃gu rü nüxü̃ charüchau ga nax chapuracüxü̃, rü icharüngü̃” —ñanagürü ga Tupana.
Nutatachinügü i Tupanaarü mugü nagu ümatüxü̃chiga
18 Rü yexguma Cori ya Tupana nüxü̃ rüchauxgu ga Moichémaxã nax yadexaxü̃ ga ma̱xpǘne ga Chinaíwa, rü nüxna nanaxã ga taxre ga nutatachinügü ga nümatama ga Tupana naxme̱xmaxã norü mugü nagu naxümatüxü̃.
