Éxodo 35:1-35
35 35:1-2 Moiché rü guxü̃ma ga duü̃xü̃gü ga Iraétanüxü̃maxã wüxigu nangutaque̱xe. Rü namaxã nidexa rü ñanagürü: —Cori ya Tupana rü choxü̃ namu nax pemaxã nüxü̃ chixuxü̃ i ñaa mu: “Rü name nax 6 i ngunexü̃xicatama nax pepuracüexü̃. Natürü ngẽxguma marü norü 7 i ngunexü̃wa nanguxgu rü tá iperüngügü, erü ngẽma ngunexü̃ rü wüxi i ngunexü̃ i üünexü̃ nixĩ i pexca̱x. Rü ngẽmaca̱x i ngẽma ngunexü̃ rü tá Cori ya Tupanaca̱x ípenaxüxüchi nax nagu nüxü̃ picua̱xüü̃güxü̃ca̱x. Rü texé ya yíxema ngẽma ngunexü̃gu puracüamáxẽ rü tá tayu.
2 Nüü̃ nadau 35:1
3 Rü ngẽxguma woo ngexü̃rüüxü̃mare i nachica i nagu pixãpataxü̃wa pingexmagügu ngẽxguma ngü̃xchigaarü ngunexü̃wa nanguxgu, rü bai tá peyanaixẽxẽ ya perü üxü” —ñanagürü.
Ãmaregü i Tupanapataca̱x ixĩxü̃
4 Rü nüma ga Moiché rü guxü̃ma ga Iraétanüxü̃maxã nüxü̃ nixu rü ñanagürü: —Ñaa nixĩ i ngẽma Tupana tüxü̃ muxü̃ nax naxüxü̃ca̱x:
5 ¡Rü ẽcü pegütanüwa penade i ãmaregü i Cori ya Tupanaca̱x ixĩxü̃! Rü guxãma ya yíxema inaxãgüxe rü name nixĩ i tümaarü ngúchaü̃maxã itanaxãgü. ¡Rü nua penana i úiru, rü diẽrumü rü bróũche,
6 rü naxpü i waxracharaxü̃ rü naxpü i yáuxcharaxü̃ rü naxpü i daucharaxü̃, rü naxpü i línuchi i mexẽchixü̃wa üxü̃, rü naxpü i cabrata̱xawa üxü̃,
7 rü carnérucha̱xmüxü̃gü i dauxü̃maxã ichagüxü̃, rü togü i naxcha̱xmüxü̃ i mexẽchixü̃, rü mürapewagü i acáchianaxca̱x,
8 rü chíxü̃ i omüxü̃́xü̃, rü pumara i chíxü̃éü̃ i baeruwa mexü̃, rü pumarate̱xe i paacaxü̃ i guwa mexü̃,
9 rü nutaxacügü ya cornalina, rü naigü ya nutaxacügü ya nga̱xãẽruxü̃ nax chacherdótegüarü ãẽ̱xgacüarü efóxwa rü norü türemüxü̃wa nanuxcuxü̃ca̱x!
Tupanapataarü ngẽmaxü̃güchiga
10 Rü guxü̃ma i pema i Iraétanüxü̃ i ngẽmaxü̃güarü üxü̃ cua̱xgüxe rü name nax nua pexĩxü̃ nax penaxüxü̃ca̱x i ngẽma Cori ya Tupana tüxü̃ muxü̃.
11 Rü ngẽma Cori ya Tupana tüxü̃ muxü̃ nixĩ nax naxüxü̃ ya napata namaxã i guxü̃ma i norü tüétüruxü̃, rü norü poxeguxü̃arü chogüruü̃gü, rü norü mürapewagü, rü norü mürapewapawerugü rü caxtagü, rü nachipatügü,
12 rü ngẽma baú i Tupanaarü mugüchixü̃ namaxã ya naxpawerugü, rü naxã́taxü̃, rü norü tüétüruxü̃,
13 rü ngẽma mecha namaxã ya naxpawerugü, rü guxü̃ma i norü ngẽmaxü̃gü, rü ngẽma paũ i Cori ya Tupanaca̱x ixĩxü̃,
14 rü ngẽma omüpaweru i nangóonexẽẽruxü̃ namaxã i norü ngẽmaxü̃gü, rü norü omügü, rü norü chíxü̃,
15 rü ngẽma pumarate̱xearü guruxü̃ namaxã ya naxpawerugü, rü ngẽma chíxü̃ i baeruruxü̃, rü ngẽma pumarate̱xe i paacaxüchixü̃, rü ngẽma Tupanapataarü ĩã̱xarü türuxü̃,
16 rü ngẽma ãmarearü guruxü̃ namaxã i norü ünagüchicaxü̃ i bróũchenaxca̱x, rü naxpawerugü, rü guxü̃ma i norü ngẽmaxü̃gü, rü yimá bachía namaxã i norü ünagüchicaxü̃,
17 rü naxpü i Tupanapataarü ĩã̱xtüarü poxeguxü̃ruxü̃, rü norü caxtagü namaxã ya nachipatügü, rü ngẽma naxpü i naa̱xtü namaxã tüã́xü̃,
18 rü ngẽma Tupanapataarü poxeguü̃cunaarü tairuü̃gü,
19 rü chacherdótechirugü i namaxã Tupanapatawa napuracüexü̃, rü chacherdóte ya Aróü̃chiru i üünexü̃, rü ñu̱xũchi nanegü i chacherdótegüchiru rü ta —ñanagürü ga Moiché.
Iraétanüxü̃ inanaxãgü i norü ãmaregü
20 Rü guxü̃ma ga Iraétanüxü̃ rü Moichéxü̃ narümoxẽgü rü nüxna nawoegu.
21 Rü guxü̃ma ga yema duü̃xü̃gü ga norü maxü̃wa ínanguxü̃ nax aixcüma norü ngúchaü̃ãcü Cori ya Tupanana naxãgüãxü̃ i norü ngẽmaxü̃gü, rü norü ãmaremaxã Moichéca̱x nawoegu. Rü Cori ya Tupanana nayaxãgü ga norü ãmaregü nax yemamaxã naxügüã̱xü̃ca̱x ga Tupanapata rü guxü̃ma ga norü yemaxü̃gü rü yema chacherdótechirugü rü ta.
22 Rü norü ãmaregümaxã yéma nangugü ga yatüxü̃gü, rü ngexü̃gü. Rü guxü̃ma ga yema duü̃xü̃gü rü norü ngúchaü̃maxã inanaãgü ga ngã̱xãẽruü̃gü rü ãneragü rü naxmachinügü rü nga̱xcuchacüüruü̃gü ga úirunaxca̱x rü ñu̱xũchi naguxü̃raü̃xü̃ ga togü ga meruü̃gü ga úirunaxca̱x ixĩgüxü̃. Rü wüxichigü ga nümagü rü yéma nanana ga norü ãmaregü ga úirunaxca̱x ga Cori ya Tupanana naxãgüxü̃.
23 Rü nüma ga Iraétanüxü̃ rü yéma nanana ga nüxü̃́ nayexmaxü̃ ga naxpü ga waxracharaxü̃ rü naxpü ga yáuxcharaxü̃ rü naxpü ga daucharaxü̃, rü naxpü ga línuchinaxca̱x, rü naxpü ga cabrata̱xanaxca̱x, rü carnérucha̱xmüxü̃gü ga dauxü̃maxã ichagüxü̃ rü togü ga naxcha̱xmüxü̃ ga imexẽchixü̃.
24 Rü yema duü̃xü̃gü ga nüxü̃́ yexmaxü̃ ga diẽrumü rüe̱xna bróũche rü Cori ya Tupanana nayaxãgü. Rü yema nüxü̃́ yexmaxü̃ ga mürapewa ga acáchianaxca̱x rü yéma nanana nax yemawa naxügüã̱xü̃ca̱x ga yema naxügüchaü̃xü̃.
25 Rü yema ngexü̃gü ga naxpüarü muxü̃ cua̱xgüxü̃ rü Tupanapatawa nanana ga naxpü ga waxracharaxü̃ rü naxpü ga yáuxcharaxü̃ rü naxpü ga daucharaxü̃, rü naxpü ga línuchinaxca̱x.
26 Rü yema ngexü̃gü ga cabrata̱xaarü ãxnütaxü̃ cua̱xgüxü̃ rü cabrata̱xaarü ãxnütaxü̃wa napuracüe.
27 Rü yema ãẽ̱xgacügü rü yéma nanana ga nutaxacügü ga ngã̱xãẽruü̃gü ga cornalina rü naigüamachigü ga nutaxacügü ga ngã̱xãẽruü̃gü, nax chacherdótegüarü ãẽ̱xgacüarü efóxwa rü norü türemüxü̃wa nanucuxü̃ca̱x.
28 Rü to ga yema inaxãgüxü̃ ga yema ãẽ̱xgacügü nixĩ ga pumaragü, rü chíxü̃ ga omüruxü̃, rü chíxü̃ ga baeruruxü̃, rü chíxü̃ ga pumarate̱xe i paacaxü̃arü üexü̃rüxü̃.
29 Rü guxü̃ma ga yema yatüxü̃gü rü ngexü̃gü ga Iraétanüxü̃ ga norü ngúchaü̃maxã inaxãgüchaü̃xü̃, rü Cori ya Tupanaca̱x inanaxãgü ga norü ãmaregü naxca̱x ga yema puracü ga Cori ya Tupana Moichémaxã nüxü̃ ixuxü̃.
Tupanapataarü üruü̃gü ga Becharé rü Aoriáx
30 Rü Moiché rü Iraétanüxü̃maxã nidexa rü ñanagürü: —¡Dücax! Cori ya Tupana rü Yudátanüxü̃tanüwa nüxü̃ naxuneta ya Becharé ya Urí nane ya Úru nataxa.
31 35:31-32 Rü Naãxẽ ya Üünexü̃ nüxna namu, rü cua̱x nüxna naxã rü nüxü̃́ nanatauxchaxẽxẽ nax naxüaxü̃ca̱x i meruxü̃gü i úiruwa rü diẽrumüwa rü bróũchewa.
32 Nüü̃ nadau 35:31
33 Rü nüxü̃́ nanatauxchaxẽxẽ nax meama yamexẽẽgüãxü̃ca̱x rü yaba̱i̱xpütagüxẽẽãxü̃ca̱x rü nanucuãxü̃ca̱x ya nutaxacügü ya ngã̱xãẽruü̃gü. Rü ngẽxgumarüxü̃ ta nüxna nanaxã i cua̱x nax naxüaxü̃ca̱x i meruü̃gü i nainaxca̱x rü guxü̃ma i togüamachigü i ngẽmaxü̃gü i mexẽchixü̃.
34 Rü Cori ya Tupana rü Becharéna rü Aoriáx ya Aichamá nane ya Dáü̃tanüxü̃na nanaxã i cua̱x nax togüxü̃ nangúexẽẽxü̃ca̱x.
35 Rü yemaacü ga Cori ya Tupana rü yema taxrena nanaxã ga cua̱x nax naxügüã̱xü̃ca̱x i naguxü̃raü̃xü̃ i meruxü̃gü rü nax naxümatügüãxü̃ca̱x i naxpü i waxracharaxü̃ rü naxpü i yáuxcharaxü̃ rü naxpü i daucharaxü̃, rü naxpü i línuchinaxca̱x. Rü Tupana nüxna nanaxã ta i cua̱x nax naxümatügüãxü̃ca̱x i naguxü̃raü̃xü̃ i naxchicüna̱xãgü i mexẽchixü̃ —ñanagürü ga Moiché.
