Éxodo 37:1-29
37 Rü nüma ga Becharé rü mürapewa ga acáchianaxca̱x nanaxü ga yema baú ga Tupanaarü mugü nagu nuxü̃. Rü wüxi ga metru rü naétü 10 chentímetru nixĩ ga norü ma̱x. Rü 65 chentímetru nixĩ ga norü tatachinü, rü 65 chentímetru ta nixĩ ga norü máchane.
2 Rü naxü̃mawa rü düxétüxü̃newa úirumaxã nanatü. Rü norü guxü̃cüwawa úirumaxã nanaxübera.
3 Rü yexgumarüxü̃ ta nanaxü ga ãgümücü ga naxmachinügü ga úirunaxca̱x. Rü guma ãgümücü ga naparawa nananucu. Rü wüxicüwawa nananucu ga taxre, rü taxre ta ga norü tocüwawa.
4 37:4-5 Rü acáchianaxca̱x nanaxü ta ga taxre ga naxpawerugü norü ngetaxü̃ruxü̃. Rü guma naxpawerugü rü úirumaxã nayatümena̱xãgü. Rü ñu̱xũchi yema naxmachinügü ga yema baúcüwawa nucuxü̃wa nayawe̱xgü ga guma naxpawerugü nax yemaacü yangetaü̃güãxü̃ca̱x.
5 Nüü̃ nadau 37:4
6 Rü yexgumarüxü̃ ta nanaxü ga yema baúátaü̃ ga úiruxica. Rü wüxi ga metru rü naétü 10 chentímetru nixĩ ga norü ma̱x. Rü 65 chentímetru nixĩ ga norü tatachinü.
7 Rü yema baúátaü̃arü wüxipe̱xewachigü nanapoxochi ga taxre ga dauxü̃cüã̱xchicüna̱xãgü ga ixãxpe̱xatüxü̃.
8 Rü yema taxre ga dauxü̃cüã̱xchicüna̱xãgü ga ixãxpe̱xatüxü̃ rü yema naxátaü̃watama nanaxüxüchi. Rü wüxi ga yema dauxü̃cüã̱xchicüna̱xãgü rü norü wüxipe̱xewa nayexma rü yema to rü norü tope̱xewa nayexma.
9 Rü yema naxchicüna̱xãgü rü nügüarü to̱xma̱xtawa nayexmagü, natürü ga nachametü rü yema naxátaü̃étüguama narüma̱xnü. Rü guma naxpe̱xatügümaxã nayadüxgü ga yema baúátaü̃.
Nanaxügü ga yema mecha ga paũ ga üünexü̃ nagu nuxü̃ruxü̃
10 Rü nüma ga Becharé rü mürapewa ga acáchianaxca̱x nanaxü ta ga wüxi ga mecha. Rü 90 chentímetru nixĩ ga norü ma̱x. Rü 45 chentímetru nixĩ ga norü tatachinü, rü 65 chentímetru nixĩ ga norü máchane.
11 Rü guxü̃wama úirumaxã nanatüxüne. Rü ñu̱xũchi norü guxü̃cüwawa úirumaxã nanaxübera.
12 Rü nanaxü ta ga norü ñaxpechinüxü̃ ga 7 chentímetru ixĩxü̃ ga norü tatachinü. Rü yema norü ñaxpechinüxü̃ rü úirumaxã ínanatüegupechinü.
13 37:13-14 Rü yexgumarüxü̃ ta nanaxü ga ãgümücü ga naxmachinügü ga úirunaxca̱x. Rü guma ãgümücü ga naparawa nananucu, naxü̃tawa ga yema norü ñaxpechinüxü̃ruxü̃ nax yéma yawe̱xgüãxü̃ca̱x ga naxpawerugü nax yangetaü̃güãxü̃ca̱x ga yema mecha.
14 Nüü̃ nadau 37:13
15 Rü guma naxpawerugü ga yema mechaarü ngetaxü̃ruxü̃ ixĩgüne rü acáchianaxca̱x nixĩgü. Rü úirumaxã nayatümena̱xãgü.
16 Rü yexgumarüxü̃ ta úiruwa nanaxü ga yema mechaarü yemaxü̃gü ga naétügu nuxü̃ ga poratugü, rü cuyeragü, rü teteragü rü axepáü̃gü, nax yemagu nabagüãxü̃ca̱x ga ãmaregü ga ãxchiüxü̃.
Omüpaweru ga úirunaxca̱x
17 Rü nüma ga Becharé rü nanaxü ta ga yema omüpaweru ga úiru ga ipomüxü̃wa üxü̃. Rü nawatama nanaxüxü̃ ga yema nachipatü rü yema nane, rü yema chíxü̃páxü̃chicagü, rü yema norü ngã̱xãẽruü̃gü ga naputürachacugüraxü̃xü̃.
18 Rü yema nanewa rü nayexma ga 6 ga nachacüxü ga nawatama naxüxüchigüxü̃. Rü wüxicüwawa rü nayexma ga tomaepü̱x ga nachacüxü, rü yema norü tocüwawa rü ta nayexma ga tomaepü̱x ga nachacüxü.
19 Rü wüxichigü ga yema nachacüüpe̱xewa rü nayexma ga tomaepü̱x ga norü chíxü̃páxü̃chicagü ga naputürachacugüraxü̃xü̃.
20 Rü yexgumarüxü̃ ta nanewa rü nayexma ga ãgümücü ga copugü ga norü ngã̱xãẽruü̃gü ga naputürachacugüraxü̃xü̃.
21 Rü natüü̃wachigü ga yema 6 ga nachacüügü rü nayexma ga norü nga̱xãẽruxü̃.
22 Rü guxü̃ma ga yema omüpaweruarü ngã̱xãẽruü̃gü rü guma nachacüügü, rü nanewatama nanaxüxüchigü. Rü guxü̃ma ga yemagü rü úiru ga ipomüxü̃wa nixĩ ga naxüxü̃.
23 Rü yexgumarüxü̃ ta úiruwa nanaxü ga 7 ga chíxü̃paxü̃gü, rü omüarü mexẽẽchiraxü̃ruü̃gü, rü yema poratugü ga naxü̃papáü̃gü.
24 Rü 33 quíru naguxü̃ ga úiruwa naxü ga yema omüpaweru namaxã ga norü yemaxü̃gü.
Pumarate̱xearü guruxü̃
25 Rü nüma ga Becharé rü acáchianaxca̱x nanaxü ga yema pumarate̱xearü guruxü̃ i norü guxü̃cüwawa wüxigumarexü̃. Rü 45 chentímetru nixĩ ga norü ma̱x, rü 45 chentímetru ta nixĩ ga norü tatachinü. Rü 90 chentímetru nixĩ ga norü máchane. Rü yema norü cuípe̱xegü rü nawatama nanaxüxüchigü.
26 Rü yema norü cuípe̱xegü rü yema nacüwagü rü úirumaxã nanatü. Rü norü guxü̃cüwawa úirumaxã nanaxübera.
27 Rü yexgumarüxü̃ ta úiruwa nanaxü ga ãgümücü ga naxmachinügü. Rü guma ãgümücü ga naparawa nananucu, natüxü̃wa ga yema norü ñaxpechinüxü̃ruxü̃. Rü wüxicüwawa nananucu ga taxre ga naxmachinügü, rü norü tocüwawa ta nananucu ga to ga taxre ga naxmachinügü nax yemawa yawe̱xgüãxü̃ca̱x ga naxpawerugü nax gumamaxã yangetaü̃güãxü̃ca̱x ga yema pumarate̱xearü guruxü̃.
28 Rü yema naxpawerugü rü ta acáchianaxca̱x nanaxü. Rü ñu̱xũchi úirumaxã nayatümena̱xãgü.
Nanaxü ga chíxü̃ ga baeruruxü̃, rü ñu̱xũchi pumarate̱xe
29 Rü nüma ga Becharé rü nanaxü ta ga yema chíxü̃ ga baeruruxü̃ ixĩxü̃ rü yema pumarate̱xe ga paacaxü̃. Rü yema pumarate̱xe rü ñoma pumaraarü üxü̃ cua̱xgüxü̃ naxügüxü̃rüü̃tama nanaxü.
