Éxodo 40:1-38
40 40:1-2 Rü Tupana rü Moichémaxã nidexa rü ñanagürü: —Yimá nüxíraü̃cü ya tauemacüarü ügügu tá nixĩ i cunachixẽxẽxü̃ ya yima chopata ya nawa cha̱u̱xca̱x pexĩĩxü̃ne.
2 Nüü̃ nadau 40:1
3 Rü yima chopatamachiãgu tá cunaxǘ i ngẽma baú i chorü mugü nagu nuxü̃, rü ñu̱xũchi tá cuyatüyepe̱xe nax tama ngóxü̃gu naxüxü̃ca̱x.
4 Rü ngẽma mecha i paũ nagu nuxü̃, rü ngẽma omüpaweru, rü aixepegu tá cunanu. Rü ngẽma mecha, rü nachicagu tá cunaxü rü naétügu tá mea cunanu i paũ. Rü ngẽma omüpaweruwa tá cunanucu i ngẽma norü chíxü̃paxü̃gü rü tá cuyanaigüxẽxẽ.
5 Rü ngẽma pumarate̱xearü guruxü̃ i úirunaxca̱x, rü ngẽma baú i chorü mugü nagu nuxü̃pe̱xegu tá cuyaxǘ. Rü ñu̱xũchi chopataã̱xwa tá cuyatücuchi i norü tüã̱xruxü̃.
6 Rü ngẽmawena rü yima chopata ya nawa cha̱u̱xca̱x pexĩxü̃nearü ĩã̱xpe̱xegu tá cuyaxǘ i ngẽma ãmarearü guruxü̃.
7 Rü yima chopataarü rü ngẽma ãmarearü guruü̃arü ngãxü̃wa ngẽxmaxü̃ i nachicagu tá cuyaxǘ ya yimá bachía ya ya̱u̱xme̱xü̃páxü̃, rü ñu̱xũchi tá dexámaxã cunaxüãcu.
8 Rü ngẽxguma cuxü̃́ yanguxgu ya yima chopata, rü tá ícunaxü i naã̱xtü rü tá ícunapoxegu. Rü ñu̱xũchi naã̱xwa tá cuyatücuchi i norü tüã̱xruxü̃.
9 Rü ngẽmawena tá cunayaxu i ngẽma chíxü̃ i baeruruxü̃, rü yima chopataétügu tá cunaba. Rü naétügu tá cunaba i guxü̃ma i ngẽma ngẽmaxü̃gü i chopatawa ngẽxmagüxü̃. Rü ngẽmaãcü tá cunaxüünexẽxẽ ya yima chopata namaxã i guxü̃ma i norü ngẽmaxü̃gü. Rü wüxi i nachica i üünexü̃ tá nixĩ.
10 Rü ngẽxgumarüxü̃ tá ta chíxü̃ i baeruruü̃maxã cunabaétü i ngẽma ãmarearü guruxü̃ namaxã i norü ngẽmaxü̃gü. Rü ngẽmaãcü tá cunaxüünexẽxẽ i ngẽma ãmarearü guruxü̃. Rü ãmarearü guruxü̃ i Üünexüchixü̃ tá nixĩ.
11 Rü ngẽxgumarüxü̃ tá ta chíxü̃ rü baeruruü̃maxã cunabaétü ya yimá bachía, rü ngẽma norü ünagüchicaxü̃. Rü ngẽmaãcü tá cunaxüünexẽxẽ.
12 Rü ngẽmawena rü chopataca̱x íxücuxü̃wa tá cunaga ya Aróü̃ rü nanegü, rü ñu̱xũchi tá cunamu nax ngéma naxaiyagüxü̃ca̱x.
13 Rü tá Aróü̃xü̃ cumu nax nagu yacúxü̃ca̱x i ngẽma naxchiru i mexẽchixü̃ i taxuxü̃ma i to i naxchirumaxã wüxiguxü̃. Rü ñu̱xũchi ngẽma chíxü̃ i baeruruü̃maxã tá cunabaeru nax ngẽmaãcü chorü chacherdóte yixĩxü̃ca̱x.
14 Rü ngẽmawena rü tá naxca̱x cuca i ngẽma nanegü rü ngẽxgumarüxü̃ tá ta nagu cuyacu̱xgüxẽxẽ i ngẽma norü chacherdótechirugü.
15 Rü ñu̱xũchi tá cuyabaerugü namaxã i ngẽma chíxü̃ i baeruruxü̃ nax ngẽmaãcü chorü chacherdótegü yaxĩgüxü̃ca̱x. Rü ngẽma nax cuyabaerugüxü̃ i nanegü rü ngẽma tá nixĩ i cua̱xruxü̃ nax namaxã chanaxueguxü̃ nax guxü̃gutáma chorü chacherdótegü yaxĩgüxü̃ i nataagü —ñanagürü ga Tupana.
16 Rü nüma ga Moiché rü nanaxü ga guxü̃ma ga yema Tupana namaxã nüxü̃ ixuxü̃ãcü.
17 Rü yexguma marü taxre ga taunecüwa yachocu̱xgu nax Equítuanewa ínachoxü̃xü̃, rü gumá nüxíraü̃cü ga tauemacüarü ügügu nixĩ ga ínachixẽẽgüãxü̃ ga guma Tupanapata.
18 Rü nümatama ga Moiché rü inanachitaxü̃xẽxẽ ga guma Tupanapata, rü nananucu ga norü caxtachipatügü. Rü nanangucu ga norü mürapewagü rü naxpawerugü. Rü ínanatogüxẽxẽ ga guma norü caxtagü.
19 Rü ñu̱xũchi nayatücuchi ga yema Tupanapataarü tüétüruxü̃ rü yemaétüwa nayaxǘcuchi ga naaxü̃ ga düxétüwaama üxü̃ yema Cori ya Tupana namaxã nüxü̃ ixuxü̃ãcü.
20 40:20-21 Rü yemawena ga Moiché rü nanade ga yema nutatachinügü ga Tupanaarü mugü nagu ümatüxü̃, rü yema baúgu nayanucu. Rü ñu̱xũchi nananucu ga naxpawerugü ga yema baú rü nayaxǘcuchi ga naxã́taxü̃. Rü Tupanapataarü aixepegu nayaxǘ. Rü ñu̱xũchi nananucu ga yema tüyemachiãruxü̃ rü yemamaxã nayatüyepe̱xe ga yema baú yema Cori ya Tupana namaxã nüxü̃ ixuxü̃ãcü.
21 Nüü̃ nadau 40:20
22 Rü yema mecha ga paũarü nuruxü̃ rü Tupanapatagu nayaxǘcuchi, norü nórtecüwawa ga tüyemachiãarü düxétügu.
23 Rü yema mechaétügu Tupanape̱xegu meama nayanuma ga paũ yema Cori ya Tupana nüxü̃ ixuxü̃ãcüma.
24 Rü yema omüpaweru rü Tupanapatagu nayaxǘcuchi norü súrcüwawa ga yema tüyemachiã ga mechaarü to̱xma̱xtawa.
25 Rü Cori ya Tupanaca̱x nayanaigüxẽxẽ ga yema omü yema Cori ya Tupana namaxã nüxü̃ ixuxü̃ãcü.
26 Rü yema úirunaxca̱x ga pumarate̱xearü guruxü̃ rü tüyemachiãarü düxétügu nanaxǘ ga guma Tupanapatawa.
27 Rü yemawa nayagu ga yema pumarate̱xe ga paacaxü̃ yema Cori ya Tupana namaxã nüxü̃ ixuxü̃ãcü.
28 Rü yemawena ga Moiché rü nayaxǘcuchi ga guma Tupanapataarü tüxã̱xruxü̃.
29 Rü ñu̱xũchi yema ãmaregüarü guruxü̃ rü guma Tupanapata ga nawa naxca̱x naxĩxü̃nepe̱xegu nayaxǘ. Rü yemawa Tupanaca̱x ínanagu ga naxü̃nagü rü trigute̱xe ga mexẽchixü̃, yema Cori ya Tupana namaxã nüxü̃ ixuxü̃ãcüma.
30 Rü nüma ga Moiché rü guma Tupanapataarü rü ãmarearü guruü̃arü ngaxü̃gu nayaxǘ ga gumá bachía ga ya̱u̱xme̱xü̃páxü̃. Rü dexámaxã nanaxüãcu ya̱u̱xme̱xü̃ruxü̃.
31 Rü yema bachíawa nixĩ ga dexá nayauxü̃güxü̃ ga Moiché rü Aróü̃ rü nanegü nax yemawa nügü yaya̱u̱xme̱xgüxü̃ca̱x rü nügü yayauxgücutüxü̃ca̱x.
32 Rü nügü niya̱u̱xgüxü̃ ga yexguma Tupanapatagu nachocuxü̃gu rü yexguma ãmaregüarü guruü̃na nangaicamagüxü̃gu, yema Cori ya Tupana namaxã nüxü̃ ixuxü̃ãcüma.
33 Rü yemawena ga Moiché rü ínanapoxegu ga yema naa̱xtü ga guma Tupanapata rü yema ãmaregüarü guruxü̃. Rü ñu̱xũchi nayaxǘcuchi ga naã̱xtüarü tütaã̱xruxü̃. Rü yemagu nixĩ ga yacuáxü̃ ga yema puracü.
Yema caixanexü̃ rü Tupanapataétügu ínarüxĩ
34 Rü yexguma Moiché yanguxẽẽgu ga guma Tupanapata ga nawa naxca̱x naxĩĩxü̃ne, rü yema caixanexü̃, rü guma Tupanapataétügu ínarüxĩ, rü Tupanaarü üünemaxã nanapá.
35 Rü nüma ga Moiché rü taxucürüwama yexma naxücu yerü yema caixanexü̃ rü Tupanapatagu ínarüxĩ rü norü üünemaxã nanapá ga guma Tupanapata.
36 Rü yexguma nachü̱xnagüxü̃gu ga yema caixanexü̃ ga Tupanapataétügu chüxüxü̃, rü nüma ga Iraétanüxü̃ rü nanabugüxü̃ ga napatagü rü nawe nixĩxü̃tanü ga yema caixanexü̃.
37 Natürü yexguma tama nachü̱xnagüxü̃gu ga yema caixanexü̃, rü nüma ga Iraétanüxü̃ rü tama inaxĩãchi ga yema ínapegüxü̃wa. Rü yéma nananguxẽẽgü ñu̱xmata nachü̱xüxnagü ga yema caixanexü̃.
38 Rü yemaacü ga Iraétanüxü̃ rü yexguma ngunecü namagu naxĩxgu rü nüxü̃ nadaugü ga yema caixanexü̃ ga Tupanapataétügu chüxüxü̃. Natürü yexguma nachütagu rü nüxü̃ nadaugü nax yayauraxü̃ ga yema caixanexü̃.
