Éxodo 5:1-23
5 Rü yemawena ga nüma ga Moiché rü Aróü̃ rü Faraóü̃xü̃tawa naxĩ nax namaxã nüxü̃ yaxugüxü̃ca̱x ga Tupanaarü ore. Rü ñanagürügü nüxü̃: —Cori ya Iraétanüxü̃arü Tupana rü ñanagürü: “¡Yange̱xgü i ngẽma chorü duü̃xü̃gü nax ngextá ínachianexü̃wa naxĩxü̃ca̱x nax ngéma naxüchigagüãxü̃ca̱x nax choxü̃ yacua̱xüü̃güxü̃!” ñanagürü ya Cori —ñanagürügü.
2 Natürü ga nüma ga Faraóü̃ rü nanangãxü̃, rü ñanagürü: —¿Texé tixĩ ya yíxema “Cori”, ixĩxẽ, rü ta̱xacüca̱x tá naga chaxĩnü rü chayange̱xgü i ngẽma Iraétanüxü̃ i duü̃xü̃gü? Choma rü tama nüxü̃ chacua̱x i ngẽma Tupana i nachiga pidexagüxü̃ rü taxũtáma chayange̱xgü i ngẽma Iraétanüxü̃ —ñanagürü.
3 Rü yexguma ga Moiché rü ñu̱xũchi ga Aróü̃ rü nüxü̃ ñanagürügü: —Yimá Ebréugüarü Tupana rü nua toxü̃tawa naxũ nax toxü̃ yanangü̃xẽẽxü̃ca̱x. Rü ngẽmaca̱x i ñu̱xma rü ngextá taxúema íxãpataxü̃wa tá taxĩ nawa i wüxi i nachica i tomaepü̱x i ngunexü̃ naxca̱x ixũxü̃wa nax ngéma torü Cori ya Tupanana ãmare tayaxãxü̃ca̱x. Erü tama tanaxwa̱xe nax da̱xaweanemaxã toxü̃ nada̱i̱xü̃ rüe̱xna daigu nax tayuexü̃ —ñanagürügü.
4 Natürü nüma ga Equítuanearü ãẽ̱xgacü ga Faraóü̃ rü nanangãxü̃ rü ñanagürü: —Pa Moichéx rü Pa Aróü̃x ¿rü tü̱xcüü̃ duü̃xü̃güxü̃ nüxna pixĩgachitanüxẽxẽ i ngẽma norü puracüwa? ¡Pewoegu rü peyapuracüe! —ñanagürü.
5 Rü ñu̱xũchi nüxü̃ ñanagürü ta ga Faraóü̃: —Rü ñu̱xma nax marü yamuxü̃ i ngẽma Iraétanüxü̃ i ñaa nachixü̃anewa, ¿Rü pema penaxwa̱xe nax marü taxũtáma napuracüexü̃? —ñanagürü.
6 Rü yematama ngunexü̃gu rü Faraóü̃ nanamu ga norü duü̃xü̃gü ga puracümaxã icua̱xgüxü̃ rü yema naerugü ga wüxitücumüchigü, rü ñanagürü:
7 —Ngẽma Iraétanüxü̃ i ladriyuarü üwa puracüexü̃ ¡rü marü taxũtáma noxrirüxü̃ maxẽ nüxna pexã norü ladriyueü̃! ¡Rü ẽcü nümatama nawa naxĩ ya norü maxẽ!
8 Natürü tá penamu nax noxritama naxügüãcü ya ladriyuepü̱x nax naxügüãxü̃, rü bai tá nanoxremaexü̃ ya yimá ñu̱xma tá naxügüãcü ya ladriyu. Rü wüxi i duü̃xü̃gü i oexü̃ nixĩgü. Rü ngẽmaca̱x nixĩ i nügüca̱x ínacagüxü̃ nax ínachianexü̃wa naxĩxü̃ca̱x nax ngéma norü Tupanaxü̃ yanacua̱xüü̃güxü̃ca̱x.
9 ¡Rü yexeraãcü penapuracüexẽxẽ i ngẽma duü̃xü̃gü! ¡Rü ngẽmagu penachoxẽxẽ nax tama Moichéarü rü Aróü̃arü doragügu naxĩnüexü̃ca̱x! —ñanagürü.
10 Rü yexguma ga yema Faraóü̃arü duü̃xü̃gü ga puracümaxã icua̱xgüxü̃ rü yema naeruchigü ga wüxitücumümaxã icua̱xgüxü̃, rü inaxĩãchi, rü duü̃xü̃gümaxã nüxü̃ nayarüxugüe. Rü ñanagürügü nüxü̃: —Faraóü̃ rü toxna naxãga nax pemaxã nüxü̃ tixuxü̃ca̱x nax marü taxũtáma maxẽ pexna tanaxãxü̃ perü ladriyueü̃.
11 Rü ñu̱xma rü pema tátama marü nawa pexĩ i ngextá ínayimaxü̃wa ya maxẽ. ¡Natürü taxũtáma ínarüxĩ i norü mu ya yima ladriyu! —ñanagürügü.
12 Rü nüma ga yema Iraétanüxü̃, rü guxü̃ma ga Equítuanegu nügü ninu nax ĩchicügu maxẽne nadaugüxü̃ca̱x norü ladriyueü̃.
13 5:13-14 Rü guxü̃ma ga ngunexü̃gügu rü yema Faraóü̃arü duü̃xü̃gü ga puracümaxã icua̱xgüxü̃, rü Iraétanüxü̃xü̃ namu nax noxrie̱xpü̱xtama ga ladriyu naxügüã̱xü̃ca̱x. Rü naétü tüxü̃ nicua̱i̱xgü ga guxema Iraétanüxü̃ ga tümatanüxü̃maxã icua̱xgüxe. Rü ñanagürügü tüxü̃: —¿Ñuxãcü ga ĩnex rü ñu̱xma rü tama noxrie̱xpü̱xwa ípenangu̱xẽẽxü̃ ya ladriyu? —ñanagürügü.
14 Nüü̃ nadau 5:13
15 Rü yema Iraétanüxü̃ ga natanüxü̃maxã icua̱xgüxü̃, rü Faraóü̃xü̃tawa nügüca̱x nayarüdexagü, rü ñanagürügü: —Pa Torü Ãẽ̱xgacüx ¿tü̱xcüü̃ ngẽmaãcü tomaxã quixĩ?
16 Ñu̱xma rü marü tama noxrirüxü̃ toxca̱x icunaxǘ ya maxẽ, natürü toxü̃ cumuama nax noxrie̱xpü̱xtama ya ladriyu tanaxüxü̃. Rü ngẽmaétüwa rü toxü̃ nicua̱i̱xgü i curü duü̃xü̃gü. Rü ngẽma curü duü̃xü̃gügagu nixĩ i ngẽma, Pa Ãẽ̱xgacüx —ñanarügügü.
17 Natürü ga nüma ga Faraóü̃ rü nanangãxü̃, rü ñanagürü: —Pema rü wüxi i oemarexü̃ pixĩgü. Rü ngẽmaca̱x naxca̱x ípecagü nax ínachianexü̃wa pexĩxü̃ nax ngéma perü Tupanaxü̃ peyarücua̱xüü̃güxü̃ca̱x.
18 ¡Peyawoegu rü peyapuracüe! Rü woo marü tama pexca̱x ichanaxǘxgu ya maxẽ rü chanaxwa̱xe i penaxü i noxrie̱xpü̱xtama ya ladriyu —ñanagürü.
19 Rü yema Iraétanüxü̃ ga natanüxü̃maxãtama icua̱xgüxü̃ rü nayaxĩ̱xãchitanüxãxẽ ga yexguma nüxü̃ yema ñagügu nax wüxichigü i ngunexü̃gu rü taxũtáma inaxĩxü̃ nax ladriyugü inaxüxü̃güaxü̃.
20 Rü yexguma Faraóü̃ nayacagüguwena rü ínachoxü̃. Rü Moichémaxã rü Aróü̃maxã nügü inayangaugü ga düxétüwa nangu̱xẽẽgüxü̃.
21 Rü namaxã nüxü̃ nixugügü, rü ñanagürügü: —¡Tupana nüxü̃ daux i ngẽma ñu̱xma tomaxã pexüxü̃, rü pexü̃ napoxcue! Erü pegagu nixĩ i ñu̱xma i Faraóü̃ rü norü duü̃xü̃gü rü chixri toxü̃ nadauxü̃. Rü pegagu nixĩ i ñu̱xma i tá toxü̃ nada̱i̱xü̃ —ñanagürügü.
Moichéarü yumüxẽchiga
22 Rü yexguma ga Moiché rü nayumüxẽ, rü ñanagürü Cori ya Tupanaxü̃: —Pa Corix ¿tü̱xcüü̃ i chixexü̃ naxca̱x ícunguxẽxẽxü̃ i ñaa curü duü̃xü̃gü? ¿Rü ta̱xacüwa yixĩxü̃ ga nua choxü̃ cumuxü̃?
23 Rü yexguma noxri cuégagu Faraóü̃maxã chidexagu, rü nüma rü yexeraãcü curü duü̃xü̃gümaxã chixexü̃ naxü. Rü cuma rü taxuxü̃ma cuxü nax naxme̱xwa ícunanguxü̃xẽẽxü̃ca̱x —ñanagürü.
