Éxodo 9:1-35
9 Rü yexguma ga Cori ya Tupana rü Moichéxü̃ ñanagürü: —¡Paxa Faraóü̃xü̃tawa naxũ, rü namaxã nüxü̃ ixu: “Cori ya Iraétanüxü̃arü Tupana, rü cuxca̱x nua namuga rü ñanagürü cuxü̃: ‘Nüxü̃ inge̱x i ngẽma chorü duü̃xü̃gü nax choxü̃ yanacua̱xüü̃güxü̃ca̱x!
2 9:2-3 Erü ngẽxguma taxũtáma nüxü̃ quinge̱xgux rü tama ícunamuxü̃chaü̃gu, rü nüma ya Cori ya Tupana rü ngẽma nachitaxü̃wa ngẽxmagüxü̃ i cuxü̃nagüétügu tá nananguemaxẽxẽ i da̱xaweane i poraxü̃. Rü nayue tá i muxü̃ma i cowarugü rü caméyugü rü wocagü rü carnérugü.
3 Nüü̃ nadau 9:2
4 Natürü ya Cori ya Tupana rü taxũtáma guxãxü̃newa nananguxẽxẽ i ngẽma da̱xaweane, erü ngẽma Equítuanecüã̱xarü naxü̃nagüxica tátama nayue, natürü ngẽma Iraétanüxü̃arü naxü̃nagü rü taxũtáma nayue’ ” —ñanagürü.
5 Rü yexguma ga Cori ya Tupana rü Moichémaxã inaxuneta nax ñuxgu tá yixĩxü̃ i ngẽma. Rü ñanagürü nüxü̃: —Choma rü moxü̃ tá nixĩ i chanaxüxü̃ —ñanagürü.
6 Rü yemaarü moxü̃ãcü rü Cori ya Tupana nanaxü ga yema. Rü muxü̃ma ga Equítuanecüã̱xarü naxü̃nagü rü nayue. Natürü yema Iraétanüxü̃arü naxü̃nagü rü taxuxü̃ma nayue, rü bai ga wüxi.
7 Rü nüma ga Faraóü̃ rü norü duü̃xü̃güxü̃ namu nax íyadaugüãxü̃ca̱x rü aixcüma yixĩ nax taxuxü̃ma yuexü̃ ga Iraétanüxü̃arü naxü̃na. Rü woo yemaxü̃ nax nacuáxchigaxü̃, rü nanuama rü tama nayange̱xgü ga Iraétanüxü̃.
Tupana rü taixnamaxã duü̃xü̃güxü̃ rü naxü̃nagüxü̃ nida̱xawexẽxẽ
8 Rü yexguma ga Cori ya Tupana rü ñanagürü nüxü̃ ga Moiché rü Aróü̃: —¡Paũpǘxü̃wa wüxi ya cuxme̱xãcu ya tanimaca nayaxu, rü ñu̱xũchi cuma Pa Moichéx, rü Faraóü̃pe̱xewa nagünagüte̱xe ya yima tanimaca!
9 Rü ngẽmaãcü ya yima tanimaca rü tá narücaxi, rü guxü̃ma i Equítuanewa tá nanguema. Rü ngẽmaãcü tá taixnagü naxü̃newa inarüyi i guxü̃ma i duü̃xü̃gü rü naxü̃nagü i Equítuanewa ngẽxmagüxü̃ —ñanagürü.
10 Rü nüma ga Moiché rü Aróü̃ rü wüxi ga paũpǘxü̃wa tanimaca ne nanayauxte̱xegü, rü yemamaxã Faraóü̃xü̃tawa naxĩ. Rü yéma Faraóü̃pe̱xewa rü Moiché nanagünagüte̱xe ga guma tanimaca. Rü guxü̃ma ga duü̃xü̃gü rü naxü̃nagü rü taixnamaxã nixaxüne.
11 Rü yema Faraóü̃arü yuüxü̃gü rü taxucürüwama Moichépe̱xewa nanaxügü ga yema, yerü nümagü rü ta rü nitaixnaxü̃negü naxrüü̃tama ga yema togü ga Equítuanecüã̱xgü.
12 Natürü nüma ga Cori ya Tupana rü nanayexrü ga Faraóü̃ nax nügütama nataiãchiarü maxü̃ã̱xẽẽxü̃ca̱x nax yemaacü tama Moichéga rü Aróü̃ga naxĩnüxü̃ca̱x, yema nüma ga Cori ya Tupana Moichémaxã nüxü̃ ixuxü̃rüxü̃.
Tupana rü taxü̃ ga gáuxü̃pütagü narüyixẽxẽ
13 Rü yexguma ga Cori ya Tupana rü ñanagürü Moichéxü̃: —¡Moxü̃ pa̱xmamaxü̃chi írüda rü Faraóü̃maxã nüxü̃ yarüxu, rü ñanagürü nüxü̃: “Cori ya Iraétanüxü̃arü Tupana rü cuxca̱x nua namuga rü ñanagürü cuxü̃: ‘Nüxü̃ inge̱xgü i ngẽma chorü duü̃xü̃gü nax choxü̃ yanacua̱xüü̃güxü̃ca̱x!
14 Rü ñu̱xmax rü tá cuxca̱x rü curü ngü̃xẽẽruü̃güca̱x, rü guxü̃ma i Equítuanecüã̱xgüca̱x tá nua chanamu i naguxü̃raü̃xü̃ i chorü poxcu nax ngẽmaãcü nüxü̃ cucuáxü̃ca̱x nax ñoma i naanewa rü nataxuxü̃ma i to ya Tupana i chauxrüxü̃ ixĩxü̃.
15 Rü ngẽxguma chi choma chanaxwa̱xegu nax cuxü̃ rü curü duü̃xü̃güxü̃ chapoxcuxü̃ namaxã i wüxi i da̱xaweane i poraxü̃ rü marü chi peyue.
16 Rü ñu̱xmarüta cuxü̃ chamaxẽxẽ rü tama cuxü̃ chiima̱x, erü cuxü̃ nüxü̃ chadauxẽẽchaü̃ nax ñuxãcü chaporaxüchixü̃. Erü chaugü nüxü̃ chacua̱xẽẽchaü̃ i guxü̃ma i duü̃xü̃gü i ñaa naanewa maxẽxü̃.
17 Natürü woo nax cuxü̃ chamaxẽẽxü̃, rü cuma rü tama icuxĩnüchaü̃ rü tama cuyange̱xgüchaü̃ i chorü duü̃xü̃gü.
18 Rü dücax, rü moxü̃ i ñoma i oragu rü tá chanayixẽxẽ i taxü̃ i gáuxü̃pütagü ga taguma ñuxgu ngẽxgumarüxü̃ Equítuanegu yixü̃.
19 Rü ngẽmaca̱x, rü name nixĩ nax ĩpatatüü̃gu cunachocuxẽẽxü̃ i guxü̃ma i curü duü̃xü̃gü rü cuxü̃nagü i düxétüwa ngẽxmagüxü̃. Erü ngẽxguma tá nayixgu i ngẽma taxü̃ i gáuxü̃pütagü, rü tá nanadai i guxü̃ma i ngẽma duü̃xü̃gü rü naxü̃nagü i tama ĩpatatüü̃wa ngẽxmagüxü̃’ ” —ñanagürü ga Tupana.
20 Rü nümaxü̃ ga yema Faraóü̃arü ngü̃xẽẽruü̃gü, rü naxca̱x namuü̃e ga yema Cori ya Tupana namaxã nüxü̃ ixuxü̃. Rü yemaca̱x ĩpatatüü̃gu nanamugü ga norü puracütanüxü̃ rü naxü̃nagü.
21 Natürü nayexma ga togü ga nüxü̃́ nataxuraxü̃xü̃ma ga yema Cori ya Tupanaarü ore, rü yemaca̱x düxétüwa nanawogümare ga norü duü̃xü̃gü rü naxü̃nagü.
22 Rü yexguma ga Cori ya Tupana rü Moichéxü̃ ñanagürü: —¡Naxunagüchacüxü nax ngẽma taxü̃ i gáuxü̃pütagü rü guxü̃ma i Equítuanegu nayiiixü̃ca̱x naétügu i duü̃xü̃gü rü naxü̃nagü rü nanetügü i norü naanewa! —ñanagürü.
23 Rü Moiché rü norü naixmena̱xãmaxã naxunagüchacüxü, rü nüma ga Cori ya Tupana rü ínanangu̱xẽxẽ ga duruane rü ãẽmacü rü taxü̃ i gáuxü̃pütagü ga yema naanewa. Rü yemaacü guxü̃ma ga Equítuanewa narüyi ga gáuxü̃pütagü.
24 Rü yema gáuxü̃pütagü rü guma ãẽmacügü rü tama ínayachaxãchi. Rü taguma ñuxgu yemaacü poraãcü gáuxü̃pütagü narüyiixü̃ ga Equítuanewa ga nũxcüma.
25 Rü yema taxü̃ ga gáuxü̃pütagü rü poraãcü nanachixexẽxẽ ga guxü̃ma ga ta̱xacü ga Equítuanewa yexmagüxü̃. Rü nanadai ga duü̃xü̃gü rü naxü̃nagü rü guxü̃ma ga nanetügü ga naanegüwa. Rü guxü̃ma ga naigü ga Equítuanewa yexmagüxü̃, rü yema gáuxü̃pütagümaxã nabüü̃chacüxü.
26 Rü woo nax yema ngupetüxü̃ ga Equítuanewa, natürü yema Iraétanüxü̃ nawa yexmagüxü̃ ga naane ga Gochéü̃wa rü taxuxü̃ma ga gáuxü̃pütagü yexma nayi rü bai ga wüxi.
27 Rü yexguma nüma ga Faraóü̃ rü Moichéca̱x rü Aróü̃ca̱x nangema rü ñanagürü: —Aixcüma nixĩ i choma rü chorü duü̃xü̃gü rü chixexü̃ taxüexü̃. Rü ngẽma rü togagu nixĩ rü tama Tupanagagu nixĩ.
28 ¡Rü ngẽmaca̱x Tupanana naxca̱x peca nax yanaxoxẽẽãxü̃ca̱x ya ãẽmacügü rü ngẽma gáuxü̃pütagü, erü marü tama namaxã taporae! Rü marü tá pexü̃ íchamuxü̃ —ñanagürü.
29 Rü yexguma nüma ga Moiché rü nanangãxü̃ rü ñanagürü: —Ñu̱xma tátama daa ĩanewa íchaxũxũgu rü tá chaxunagüchacüxü rü Tupanamaxã tá chidexa. Rü ngẽxguma rü tá ínayachaxãchi ya ãẽmacügü rü ngẽma gáuxü̃pütagü. Rü ngẽmawa tá nüxü̃ cucua̱x nax ñoma i naane rü Tupanaarü yixĩxü̃.
30 Natürü i choma rü nüxü̃ chacua̱x nax cuma rü ngẽma curü ngü̃xẽẽruü̃gü rü tama Cori ya Tupanaxü̃ pemuü̃echaü̃xü̃ —ñanagürü.
31 Rü yexguma rü guxü̃ma ga línunecügü, rü chebádanecügü rü poraãcü nichixe yerü yema chebádagü rü nixo rü yema línugü rü nixãchacu.
32 Natürü ga trigugü rü yema chéü̃ténugü rü taxuxü̃ma nüxü̃ naxüpetü, yerü tama paxa nixo.
33 Rü nawena ga nax Faraóü̃maxã yadexaxü̃ ga Moiché rü ínaxũxũ ga guma ĩanewa, rü naxunagüchacüxü rü Cori ya Tupanamaxã nidexa. Rü yexgumatama narüxo ga nax nayixü̃ ga gáuxü̃pütagü rü nax napuxü̃ rü nax yaduruanexü̃.
34 Natürü yexguma Faraóü̃ nüxü̃ nada̱u̱xgu nax yanaxoxü̃ ga pucü rü marü tama nayixü̃ ga gáuxü̃pütagü rü tama yaduruanexü̃, rü nüma ga Faraóü̃ rü wenatama chixexü̃ naxü. Rü tama nüxica nixĩ ga inataiãchiarü maxü̃xã́xü̃, natürü yema norü ngü̃xẽẽruü̃gü rü ta naxrüü̃tama nixĩgü.
35 Rü nüma ga Faraóü̃, rü nanuama rü tama nayange̱xgü ga yema Iraétanüxü̃, yema Cori ya Tupana Moichéwa nüxü̃ ixuxü̃rüxü̃.
