1 Corintios 10:1-33
10 Pa Chauenexẽgüx, tama chanaxwa̱xe i nüxü̃ perüngümae rü yexguma tórü o̱xigü Moichéwe rüxĩxgu rü wüxi ga caixanexü̃ nayadüxü. Rü guxü̃ma ga nümagü rü nawa nichoü̃ ga yema Taxtü ga Dauchíüxü̃.
2 Rü guxü̃ma ga yema duü̃xü̃gü rü yexguma wüxigu Moichémaxã yema caixanexü̃pechitatüü̃gu yaxĩxü̃tanügu rü yema Taxtü ga Dauchíüxü̃wa yachoü̃gu, rü nügü nango̱xẽẽgü nax Moichéweama naxĩxü̃.
3 Rü yexgumarüxü̃ ta ga guxü̃ma ga yema duü̃xü̃gü nanangõ̱xgü ga yema paũ ga daxũwa rüyixixü̃.
4 Rü guxü̃ma ga yema duü̃xü̃gü nayaxaxgü ga yema dexá ga Cristu nüxna ãxü̃. Yerü Cristu rü yema duü̃xü̃güxü̃ ínixümücü ga yema ínaxĩxü̃wa, rü nüxna nanaxã ga yema dexá ga yaxaxgüxü̃.
5 Natürü yema rümumaexü̃ ga duü̃xü̃gü rü tama Tupanaarü ngúchaü̃ naxügü. Rü yemaca̱x yexma nayue rü yéma nawogü ga naxü̃negü ga yema chianexü̃wa.
6 Rü guxü̃ma ga yema nüxü̃ ngupetüxü̃ ga yema duü̃xü̃gü rü tórü cua̱xruxü̃ nixĩ nax tama chixexü̃ca̱xama idaugüxü̃ naxrüxü̃ ga tórü o̱xigü.
7 Rü ngẽmaca̱x tama name i nüxü̃ picua̱xüü̃gü i ta̱xacürü tupananetachicüna̱xãgü, yexgumarüxü̃ ga ñuxre ga nümagü naxügüxü̃rüxü̃. Erü Tupanaarü ore i ümatüxü̃wa rü tórü o̱xigüchigaxü̃ nixu rü ñanagürü:“Duü̃xü̃gü ínarütogü nax nachibüexü̃ca̱x rü nax naxaxegüxü̃ca̱x, rü ngẽmawena rü inachigü nax norü ngúchaü̃ naxügüxü̃ca̱x”,
ñanagürü i ngẽma ore.
8 Rü tama name i yixema rü nai i ngexü̃maxã tamaxẽ yexgumarüxü̃ ga ñuxre ga nümagü naxügüxü̃rüxü̃. Rü yemaca̱x wüxitama ga ngunexü̃gu rü nayue ga 23,000.
9 Rü tama name i nüxü̃ taxü ya tórü Cori nax yáxna tamaxã naxĩnüxü̃ yexgumarüxü̃ ga ñuxre ga nümagü naxügüxü̃rüxü̃. Rü yemaca̱x nixĩ ga yema duü̃xü̃güxü̃ nangõ̱xcuxü̃ ga ãxtapegü rü nayuexü̃.
10 Rü tama name i chixri Tupanachiga pidexagü yema ñuxre ga nũxcümaü̃güxü̃ ga tórü o̱xigü ügüxü̃rüxü̃. Rü yemaca̱x ga Tupanaarü orearü ngeruxü̃ ga daxũcüã̱x rü nanadai.
11 Rü guxü̃ma ga yema nũxcümaü̃güxü̃ ga tórü o̱xigüxü̃ ngupetüxü̃, rü tórü cua̱xruxü̃ nixĩ. Rü naxümatü nax ngẽmawa nüxü̃ icuáxü̃ca̱x nax ñuxãcü Tupana naxwa̱xexü̃ nax imaxẽxü̃ i yixema i ñomaü̃cüü.
12 Rü ngẽmaca̱x ya yíxema tügügu rüxĩnüxe nax tamexü̃, rü name nixĩ nax mea tügüna tadauxü̃ nax tama chixexü̃gu tanguxü̃ca̱x.
13 Rü taguma pexca̱x ínangu i ta̱xacürü ngúchaü̃ i chixexü̃ i taxucürüwama duü̃xü̃ yáxna namaxã ĩnüxü̃. Rü name nixĩ i Tupanaaxü̃́ peyaxõ erü nüma rü taxũtáma nawa pexü̃ nawogü i ngúchaü̃gü i taxucürüwama yáxna namaxã pexĩnüexü̃. Natürü ngẽxguma tá ngúchaü̃gü i chixexü̃ pexca̱x ínguxgu, rü nüma rü tá pexü̃ ínapoxü̃ nax tama nagu peyixü̃ca̱x.
14 Rü ngẽmaca̱x, Pa Chauenexẽgü ya Pexü̃ Changechaü̃güxe, ¡rü nüxü̃ perüxoe i ngẽma nacümagü i tupananetachicüna̱xãgüca̱x naxügüxü̃ i ngẽma duü̃xü̃gü i tama yaxõgüxü̃!
15 Pemaxã nüxü̃ chixu i ngẽma ore, erü cha̱u̱xca̱x rü duü̃xü̃gü i nüxü̃ cuáxü̃ pixĩgü. Rü pema tátama penangugü i ngẽma pemaxã nüxü̃ chixuxü̃ rü aixcüma name rüe̱xna tama.
16 Rü ngẽxguma õna i üünexü̃ca̱x ingutaque̱xegügu, rü yaxaxgügu ya yimá bínu ya üünecü rü moxẽ naxca̱x ixãgügu, rü ngẽmaãcü yigü tawe̱x nax Cristu ya nagü taxca̱x ibacüwe rüxĩxü̃. Rü ngẽxguma nangõ̱xgügu i ngẽma paũ i ibücuxü̃, rü ngẽmaãcü yigü tawe̱x nax nawe rüxĩxü̃ ya Cristu ya naxü̃ne taxca̱x ixãcü.
17 Rü woo nax imuxü̃ i yixema, natürü wüxitama i paũ tangõ̱xgü. Rü ngẽmaãcü, woo nax imuxü̃ i yixema, natürü wüxitama i naxü̃ne tixĩgü.
18 ¡Rü dücax i ngẽma Iraétanüxü̃gü i nangõ̱xgüxü̃ i ngẽma naxü̃namachi i Tupanaca̱x nada̱i̱xü̃! Rü ngẽxguma wüxigu nügümaxã nangõ̱xgüãgu, rü guxü̃ma i ngẽma nangõ̱xgüxü̃ rü ngẽmaãcü ngẽma ãmarearü guruxü̃maxã Tupanaarü nax yixĩgüxü̃.
19 Rü ñu̱xma nax ngẽma ñachaxü̃, rü tama chanaxwa̱xe i nagu perüxĩnüe nax ta̱xacüwa namexü̃ i ngẽma tupananetachicüna̱xãgü rü ta̱xacüwa namexü̃ i ngẽma namachi i tupananetachicüna̱xãgüca̱x daixü̃.
20 Natürü pemaxã nüxü̃ chixu rü ngẽxguma ngẽma duü̃xü̃gü i tama Tupanaxü̃ cua̱xgüxü̃, norü tupananetachicüna̱xãgüca̱x nadaiãgu i ta̱xacürü naxü̃na, rü tama Tupanaca̱x nixĩ i nadaiaxü̃, natürü ngo̱xogüca̱x nixĩ i nadaiaxü̃. Rü tama chanaxwa̱xe i ngo̱xogütanüxü̃xü̃ pegü pixĩgüxẽxẽ.
21 Rü pema nax peyaxaxgüxü̃ ya yimá bínu ya tórü Corixü̃ namaxã picua̱xüü̃gücü rü taxucürüwama namaxã pexãmücü i ngẽma duü̃xü̃gü i ngo̱xgüwe rüxĩxü̃. Rü pema nax tórü Coriarü mechawa penangṍxü̃ i ngẽma õna i nüxü̃ namaxã picua̱xüü̃güxü̃ rü taxucürüwama ngẽma duü̃xü̃gü i ngo̱xgüwe rüxĩxü̃arü mechawa rü ta peyachibüe.
22 ¿Rü ñuxũ ñapegüxü̃ i ñu̱xmax? ¿Ẽ̱xna penanuxẽẽchaü̃ ya tórü Cori? ¿Ẽ̱xna pexca̱x rü nüxü̃ tarüporamaegü i yixemax?
Name nixĩ i taenexẽarü mexü̃ca̱x tadaugü rü tama i tóxrütama
23 Pema rü ñaperügügü: “Marü ítanguxü̃ nax naxügüxü̃ca̱x i ta̱xacü i inaxwa̱xegüxü̃”, ñaperügügü. Rü aixcüma nixĩ i ngẽma, natürü tama tüxü̃́ name i guxü̃ma i ngẽma ixügüchaü̃xü̃. Rü aixcüma ítanguxü̃ nax naxügüxü̃ca̱x i ngẽma inaxwa̱xexü̃, natürü tama guxü̃ma i ngẽma ixügüxü̃ tüxü̃ narüngü̃xẽxẽ nax yexeraãcü yaxõgüxü̃ca̱x.
24 Rü tama name nixĩ i tóxrütama mexü̃ca̱x tadaugü, natürü name nixĩ i togüarü mexü̃ca̱x tadaugü.
25 Rü marü name i penangõ̱x i naguxü̃raü̃xü̃ i namachi i namaxã nataxegüxü̃, natürü taxuca̱xma tü̱xcüü̃ naxca̱x ípeca rü marü tupananetagüxü̃ namaxã yacua̱xüü̃güxü̃ i namachi yixĩ.
26 Erü ñoma i naane rü guxü̃ma i nawa ngẽxmaxü̃, rü tórü Cori ya Tupanaarü nixĩ.
27 Rü ngẽxguma chi wüxi i duü̃xü̃ i tama yaxõxü̃ pexna uxgu nax naxü̃tawa peyachibüexü̃ca̱x, rü chi ngéma pexĩxgu, rü marü name i penangõ̱x i guxü̃ma i õna i pepe̱xegu yaxüxüchixü̃. Rü taxuca̱xma tü̱xcüü̃ naxca̱x pexoegaãẽ rü nüxna peca nax ta̱xacürü namachi nixĩ i pemaxã nangṍxü̃.
28 Natürü ngẽxguma ngürüãchi wüxíe pemaxã nüxü̃ ixuxgu rü ñatagu: “Ñaa namachi rü tupananetachicüna̱xãgüca̱x yama̱xgüxü̃ i naxü̃nawa ne ũxü̃ nixĩ”, ñagügu, rü ngẽxguma i pema rü tama name nax penangṍxü̃ i ngẽma namachi nax tama chixexü̃gu tüxü̃ pengu̱xẽẽxü̃ca̱x ya yíxema pemaxã nüxü̃ ixuxe, rü tama ngẽmaca̱x taxoegaãẽxü̃ca̱x rü nagu tarüxĩnüxü̃ca̱x i tümax nax chixexü̃ cuxüxü̃.
29 Rü tama pechiga nixĩ i chidexaxü̃ i ngẽxguma: “Nax tama taxoegaãẽxü̃ca̱x”, ñachagu. Natürü yíxema pemaxã nüxü̃ ixuxechiga nixĩ i chidexaxü̃. Natürü bexmana ngürüãchi wüxi i yaxõxü̃ tá cuxna naca rü ñanagürü tá cuxü̃: “¿Tü̱xcüü̃ i togü naxca̱x oegaãẽxü̃gagu choxna cunachu̱xu nax tama chanaxüxü̃ i ta̱xacü i chanaxwa̱xexü̃?
30 Rü ngẽxguma chi Tupanana moxẽ chaxãxgu naxca̱x i ngẽma õna i changṍxü̃, ¿rü tü̱xcüü̃ i ngẽma õnaca̱x choxü̃ quixu?” ñanagürü.
31 Dücax, pemaxã nüxü̃ chixu rü name nixĩ i guxü̃ma i ngẽma pexüxü̃maxã Tupanaxü̃ picua̱xüü̃gü. Rü ngẽxguma ta̱xacü pengõ̱xgügu, rüe̱xna ta̱xacü pixaxgügu rüe̱xna ta̱xacü i to pexügügu, rü name nixĩ i ngẽmamaxã Tupanaxü̃ picua̱xüü̃gü.
32 Rü tama name i penaxü i ta̱xacü i togüxü̃ chixexü̃gu yixẽẽxü̃, rü woo Yudíugü yixĩgügu rü ẽ̱xna tama Yudíugü yixĩgügu, rü ẽ̱xna yaxõgüxü̃ yixĩgügu.
33 Rü choma rü guxü̃wama guxü̃xü̃ma chataãẽxẽẽchaü̃. Rü ngẽmaca̱x tama chanaxü i ngẽma chomatama namaxã chataãẽxü̃, natürü chanaxü i ngẽma togü namaxã taãẽxü̃ nax ngẽmaãcü nümagü rü ta nüxü̃́ nangúchaü̃ nax yaxõgüãxü̃ rü nayauxgüãxü̃ i maxü̃ i taguma gúxü̃.
