1 Corintios 12:1-31
12 Pa Chauenexẽgüx, chanaxwa̱xe i nüxü̃ pecua̱x nax ñuxãcü yixĩxü̃ i ngẽma cua̱x rü ngẽma tauxcha i Tupanaãxẽ ya Üünecü tüxna ãxü̃.
2 Rü pema meama nüxü̃ pecua̱x ga yexguma tauta Cristuaxü̃́ peyaxõgügu, rü pegü nüxna pexãgü ga tupananetachicüna̱xãgü ga tama idexaxü̃.
3 Rü ngẽmaca̱x i ñu̱xma rü chanaxwa̱xe i mea nüxü̃ pecua̱x rü taxucürüwama texe ya Tupanaãxẽ ya Üünecü tümawa ngẽxmaxe rü chixri Ngechuchuchiga tidexa. Rü ngẽxgumarüxü̃ ta rü taxucürüwama texe ngürümare tüechama rü ñatarügü: “Ngechuchu rü tórü Cori nixĩ”, ñatarügü ega tama Tupanaãxẽ ya Üünecü tüxü̃ muxgu nax ngẽmaãcü tidexaxü̃ca̱x.
4 Rü ngẽma yaxõgüxü̃tanüwa rü nangẽxma i natoraü̃chigüxü̃ i cua̱x. Natürü wüxitama nixĩ i ngẽma Naãxẽ ya Üünexü̃ i tüxna naxãxü̃ i ngẽma cua̱x.
5 Rü nangẽxma nax toraxü̃ãcü Tupanaaxü̃́ ipuracüxü̃, natürü yimá tórü Cori ya tüxna naxãcü i ngẽma puracügü rü wüxitama nixĩ.
6 Rü Tupanaarü pora rü toraxü̃ãcü nango̱x. Natürü wüxitama nixĩ ya yimá Tanatü ya tawa nango̱xẽẽcü i ngẽma norü pora.
7 Rü Naãxẽ ya Üünexü̃ rü wüxíewachigü nanango̱xẽxẽ i Tupanaarü pora nax ngẽmaãcü guxãarü ngü̃xẽẽruxü̃ yixĩxü̃ca̱x.
8 Rü Naãxẽ ya Üünexü̃ rü tümaxü̃ nanaxã i tauxcha nax ucu̱xẽxü̃ tacuáxü̃ca̱x. Rü ngẽmatama Naãxẽ ya Üünexü̃ rü toguxeaxü̃́ nanatauxchaxẽxẽ nax nüxü̃ tacuáxü̃ nax mea tangúexẽẽtaexü̃ i Tupanaarü ore.
9 Rü toguxe rü ngẽmatama Naãxẽ ya Üünexü̃ tüxü̃́ nanatauxchaxẽxẽ nax Tupanaaxü̃́ tayaxõxü̃ca̱x. Rü toguxe rü tüxna nanaxã i pora nax ngẽmamaxã naxca̱x tayataanegüxẽẽxü̃ca̱x i ngẽma ida̱xaweexü̃.
10 Rü toguxe rü tüxna nanaxã i pora nax itanawéxü̃ca̱x i cua̱xruü̃gü i Tupanaarü poramaxã üxü̃. Rü toguxe rü tüxü̃́ nanatauxchaxẽxẽ nax nüxü̃ tixuxü̃ca̱x i Tupanaarü ore. Rü toguxe rü tüxna nanaxã i cua̱x nax nüxü̃ tacuáxü̃ca̱x i ta̱xacü yixĩxü̃ i ngo̱xogüarü ixĩxü̃ rü ta̱xacü yixĩxü̃ i Tupanaãxẽ i Üünexü̃arü ixĩxü̃. Rü toguxe rü tüxna nanaxã i tauxcha nax ngẽma tama nüxü̃ tacuáxü̃ i nagawa tidexaxü̃ca̱x. Rü toguxe rü tüxna nanaxã i cua̱x nax tanango̱xẽẽxü̃ca̱x nax ta̱xacüchiga yixĩxü̃ nax tidexaxü̃ ya yíxema to i nagawa idexaxe.
11 Rü guxü̃ma i ngẽma rü Tupanaãxẽ i Üünexü̃tama nixĩ i naxüxü̃. Rü nüma nixĩ i wüxichigü i duü̃xü̃na naxããxü̃ i ngẽma cua̱x i nüma nanaxwa̱xexü̃ nax nüxna naxããxü̃.
Guxü̃ma i yaxõgüxü̃ rü wüxitama i naxü̃newa naxügü
12 Rü duü̃xü̃xü̃ne rü woo muxü̃gu nixüye, natürü wüxitama i naxü̃ne nixĩ. Rü ngẽxgumarüxü̃ ta i ngẽma Cristuaxü̃́ yaxõgüxü̃ rü woo namu, natürü wüxitama i naxü̃newa naxügü.
13 Rü yexguma íibaiü̃gu rü Tupanaãxẽ ya Üünecü rü wüxitama i naxü̃ne tüxü̃ nixĩgüxẽxẽ. Rü woo Yudíugü nax ixĩgüxü̃, rüe̱xna tama Yudíugü nax ixĩgüxü̃, rü woo mugüruxü̃ ixĩgügu, rüẽ̱xna taxúxeme̱xẽwa ingẽxmagügu, natürü wüxitama i naxü̃ne tüxü̃ nixĩgüxẽxẽ i nümax i Naãxẽ ya Üünexü̃ i nüxicatama ixĩxü̃. Rü guxãma i yixema rü Tupana marü tüxna nananguxẽxẽ i ngẽma Naãxẽ ya Üünexü̃.
14 Wüxi i naxü̃ne rü tama naxãmena̱xãmare, natürü muxü̃gu nixüye.
15 Rü ngẽxguma chi yimá nacutü ñaxgu: “Rü ñu̱xma nax tama naxme̱x chixĩxü̃, rü ngẽmaca̱x tama ngẽma naxü̃newa changexma”, ñaxgu, rü tama ngẽmaca̱x nüxü̃ narüxo nax ngẽma naxü̃newa nangẽxmaxü̃.
16 Rü ngẽxguma chi yima naxpachinü ñaxgu: “Rü ñu̱xma nax tama naxetü chixĩxü̃, rü ngẽmaca̱x tama naxü̃newa changexma”, ñaxgu, rü tama ngẽmaca̱x nüxü̃ narüxo nax ngẽma naxü̃newa nangẽxmaxü̃.
17 Rü ngẽxguma chi guxü̃ma i naxü̃ne rü naxetü yixĩxgu, ¿rü ta̱xacümaxã chi i nüxü̃ naxĩnüxü̃ i ngẽma naxü̃ne? Rü ngẽxguma chi guxü̃ma i naxü̃ne rü naxmachixẽ yixĩxgu, ¿rü ta̱xacümaxã chi i nüxü̃ nawãxĩxü̃?
18 Natürü Tupana ga naxücü ga taxü̃ne, rü ngextá nüma ínanaxwa̱xexü̃wa nanangexmaxẽxẽ i taeru rü tachacüxügü rü taparagü.
19 Rü ngẽxguma chi nataxuxgu i norü üyechigü i taxü̃ne rü chi naxãmena̱xãmare.
20 Rü ngẽma naxü̃ne rü woo muxü̃gu nixüye, natürü wüxitama i naxü̃ne nixĩ.
21 Rü taxetü rü taxucürüwa taxme̱xü̃ ñanagürü: “Choma rü tama chacuxwa̱xe”, ñanagürü. Rü ngẽxgumarüxü̃ ta i taeru rü taxucürüwa tacutügüxü̃ ñanagürü: “Choma rü tama chapexwa̱xe”, ñanagürü.
22 Natürü ngẽma nagu rüxĩnüegu rü yexeraãcü turaexü̃ i taxünewa, rü ngẽma nixĩ i yexera nanaxwa̱xexü̃ i taxü̃ne.
23 Rü ngẽma taxünewa yexeraãcü naxca̱x ixãnexü̃, rü ngẽma nixĩ i yexera mea ixüxchiruxü̃. Rü ngẽma taxü̃newa ngẽxmaxü̃ i tama inaxwa̱xexü̃ nax nangóxü̃, rü ngẽma nixĩ i yexera mea idüxüxü̃.
24 Natürü tama ngẽmaãcü tanaxü namaxã i ngẽma taxünewa ngẽxmaxü̃ i guxãxü̃ma iwéxü̃. Rü ngẽmaãcü Tupana nanaxü i taxü̃ne, nax yexeraãcü nüxna idauxü̃ca̱x i ngẽma yexera naxca̱x ixãnexü̃.
25 Rü ngẽmaãcü Tupana nanaxü i taxü̃ne nax wüxichigü i norü üye nügügu naxĩnüexü̃ca̱x rü nügü nangüxẽẽgüxü̃ca̱x.
26 Rü ngẽxguma chi wüxi i ngẽma taxünearü üye nüxü̃́ ngu̱xgu, rü guxü̃ma i ngẽma togü i natanüxü̃ rü ta nüxü̃́ nangu̱x. Rü ngẽxguma chi wüxi i ngẽma taxünearü üye taãẽgu, rü guxü̃ma i ngẽma togü i natanüxü̃ rü ta nataãxẽgü.
27 Rü ñu̱xma i wüxichigü i pemax, rü Cristuxü̃nearü üye pixĩgü, rü wüxichigü rü naxü̃newa pexügü.
28 Rü ngẽmaca̱x ya Tupana rü nanaxwa̱xe nax mea nügü inanuxü̃ i ngẽma yaxõgüxü̃. Rü yíxema tüxíra tüxü̃ naxunetagüxe tixĩ ya yíxema norü puracüwa tüxü̃ namugüxe. Rü ngẽmawena tüxü̃ naxuneta ya toguxegü nax nüxü̃ tixugüxü̃ca̱x i norü ore. Rü ngẽmawena tüxü̃ naxuneta ya toguxegü nax duü̃xü̃güxü̃ tangúexẽẽxü̃ca̱x i norü ore. Rü ngẽxgumarüxü̃ ta tüxü̃ naxuneta ya toguxegü nax tanaxügüxü̃ca̱x i cua̱xruü̃gü i Tupanaarü poramaxã taxügüxü̃, rü toguxegü rü tüxna nanaxã i cua̱x nax tanameexẽẽxü̃ca̱x i ida̱xaweexü̃, rü toguxegü rü tüxna nanaxã i cua̱x nax nüxü̃ tarüngü̃xẽẽgüxü̃ca̱x i ngẽma togü, rü toguxegü rü tüxna nanaxã i cua̱x nax yaxõgüxü̃arü ãẽ̱xgacügü tixĩgüxü̃ca̱x. Rü toguxegü rü tüxna nanaxã i cua̱x nax ngẽma nagagü i tama nüxü̃ tacuáxü̃wa tidexagüxü̃ca̱x.
29 Rü tama guxãma Tupana tüxü̃ imugüxe tixĩgü, rü tama guxãma Tupanaarü orearü uruxü̃ tixĩgü. Rü tama guxãma norü orewa ngu̱xẽẽtaegüxe tixĩgü, rü tama guxãma nüxü̃ tacua̱x nax tanaxüxü̃ i cua̱xruü̃gü i Tupanaarü poramaxã üxü̃.
30 Rü tama guxãma nüxü̃ tacua̱x nax tanameexẽẽxü̃ i duü̃xü̃gü i ida̱xaweexü̃. Rü tama guxãma nüxü̃ tacua̱x nax nawa tidexagüxü̃ i wüxi i naga i tama nüxü̃ tacuáxü̃. Rü tama guxãma nüxü̃ tacua̱x nax tanango̱xẽẽxü̃ nax ta̱xacüchiga yixĩxü̃ nax yadexaxü̃ i ngẽma duü̃xü̃gü i tama nüxü̃ nacuáxü̃ i nagawa idexaxü̃.
31 Rü name nixĩ i yexera naxca̱x peda̱u̱xgü nax Tupana pexna naxãxü̃ca̱x i ngẽma cua̱x rü tauxchagü irümemaegüxü̃.
Yigü nax ingechaü̃güxü̃chiga
Natürü i ñu̱xma rü tá pexü̃ changúexẽxẽ i ta̱xacü nixĩ i guxü̃ma i ngẽma pemaxã nüxü̃ chixuxü̃arü yexera rümemaexü̃.
