1 Corintios 15:1-58
15 Rü ñu̱xmax, Pa Chauenexẽgüx, rü chanaxwa̱xe i nüxna pecua̱xãchie i ngẽma Tupanaarü ore i tüxü̃ maxẽxẽẽxü̃ ga pemaxã nüxü̃ chixuxü̃. Rü yematama ore nixĩ ga pema peyauxgüxü̃. Rü ñu̱xma rü ngẽmatama oregagu nixĩ i mea peyaxõgüxü̃.
2 Rü ngẽma oregagu nixĩ i pexü̃́ nangẽxmaxü̃ i maxü̃ i taguma gúxü̃, ega aixcüma guxü̃guma peyaxõgügu. Natürü ngẽxguma tama guxü̃guma peyaxõgügu, rü natüca̱xmamare nixĩ i ngẽma perü õ.
3 Rü yexguma noxri petanüwa changuxgu, rü yema nüxíra pexü̃ changu̱xẽẽxü̃ nixĩ ga yema ngu̱xẽẽtae ga choxü̃ namaxã nangu̱xẽẽgüxü̃ nax Cristu rü tórü pecaduca̱x nayuxü̃, ngẽma Tupanaarü ore i ümatüxü̃wa nüxü̃ yaxuxü̃rüxü̃.
4 Rü yexgumarüxü̃ ta pexü̃ changúexẽxẽ nax inata̱xgüãxü̃, rü norü tomaepü̱x ga ngunexü̃gu rü wena nax namaxü̃xü̃, ngẽma Tupanaarü ore i ümatüxü̃wa nüxü̃ yaxuxü̃rüxü̃.
5 Rü yexgumarüxü̃ ta pexü̃ changúexẽxẽ nax Pedruca̱x nangóxü̃ ga Cristu, rü yixcüra norü ngúexü̃gü ga yamugüxü̃ca̱x nangóxü̃.
6 Rü yemawena ga Cristu rü 500 arü yexera ga duü̃xü̃gü ga yaxõgüxü̃ca̱x nango̱x. Rü muxü̃ma i ngẽma duü̃xü̃gü rü ñu̱xma rü ta namaxẽ, natürü nümaxü̃ rü marü nayue.
7 Rü yemawena rü Chantiáguca̱x nango̱x, rü yixcaama guxü̃ma ga yema togü ga ngúexü̃gü ga imugüxü̃ca̱x nango̱x.
8 Rü düxwa chowa inayacua̱x ga cha̱u̱xca̱x rü ta nax nangóxü̃, woo ngürüãchimare nixĩ ga yema, ngẽxgumarüxü̃ i wüxi i buxü̃ i taxũtáma norü ngunexü̃wa nanguyane buxü̃rüxü̃.
9 Rü choma rü guxü̃ma i ngẽma togü ya Tupana imugüxü̃tüü̃wa chaxü. Rü ngẽmaca̱x tama name ya Tupana imuxü̃maxã choxü̃ naxugü i duü̃xü̃gü, yerü nawe chingẽchigü ga Tupanaarü duü̃xü̃gü rü poraãcü chixexü̃ chaxü.
10 Natürü ga Tupana rü chomaxã namecüma, rü ngẽmaca̱x i ñu̱xma rü choxü̃ pedau nax ta̱xacü chixĩxü̃ rü ñuxãcü nax chixĩxü̃. Rü yema chomaxã nax namecümaxü̃ rü tama natüca̱xma nixĩ. Yerü choma rü guxü̃ ga togü ga yamugüxü̃arü yexera chanaxü ga Tupanaarü puracü. Natürü tama chauechama chanaxü ga yema puracü, natürü Tupana ga chomaxã mecümacü rü chomaxã puracücü nixĩ ga naxücü ga yema puracü nax nüxü̃ chixuxü̃ca̱x ga norü ore.
11 Natürü i ñu̱xma rü nüetama nixĩ ega woo choma chixĩxgu rü ẽ̱xna togü yixĩxgu ga pemaxã nüxü̃ ixuxü̃ ga yema ore. Yerü yema ore ga pemaxã nüxü̃ tixuxü̃, rü Tupanaarü ore i tüxü̃ maxẽxẽẽxü̃ nixĩ, rü yema nixĩ ga pixõgüxü̃.
Wena tá namaxẽ i ngẽma yuexü̃
12 Marü pemaxã nüxü̃ tixu nax Cristu rü yuwa ínadaxü̃. ¿Rü tü̱xcüü̃ ñuxre i pema rü ñaperügügü: “Yuexü̃ rü tagutáma wena namaxẽ”, ñaperügügü?
13 Rü ngẽxguma chi ngẽma yuexü̃ rü taguchima wena namaxẽgu rü yimá Cristu rü taxũchima wena namaxü̃.
14 Rü yexguma chi Cristu tama wena maxü̃gu, rü ngẽma ore i nüxü̃ tixuxü̃ i nachiga rü taxuwa chima name, rü natüca̱xmamare chi nixĩ i perü õ.
15 Rü ngẽxguma chi ngẽmaãcü yixĩxgu, rü toma i Tupanaarü orearü uruü̃gü rü dorata̱a̱xgüxü̃ tixĩgü. Erü nüxü̃ tixu nax Tupana Cristuxü̃ wena maxẽẽxü̃. Rü ngẽxguma chi tama aixcüma yixĩxgu nax wena namaxẽxü̃ i yuexü̃, rü chi wüxi i doramare nixĩ nax Tupana Cristuxü̃ wena maxẽẽxü̃.
16 Rü ngẽxguma chi ngẽma yuexü̃ rü taguchima wena namaxẽgu, rü Cristu rü chi ta taxũchima wena namaxü̃.
17 Rü yexguma chi Cristu tama wena maxü̃gu, rü natüca̱xmamare chi nixĩ i peyaxõgüxü̃, rü ñu̱xma rü chi ta perü pecadugagu ipeyarütauxe.
18 Rü chi aixcüma yixĩxgu nax tama wena namaxẽxü̃ i duü̃xü̃gü, rü ngẽma duü̃xü̃gü i Cristuaxü̃́ yaxõgüxü̃ i marü yuexü̃, rü chi ta taxũchima nüxü̃́ nangẽxma i maxü̃ i taguma gúxü̃.
19 Rü ngẽxguma chi ñoma i maxü̃ca̱xicatama yixĩxgu nax Cristuaxü̃́ yaxõgüxü̃, rü chi guxü̃ i togü i duü̃xü̃güarü yexera tangechaü̃tümüü̃gü.
20 Natürü aixcümaxü̃chi nixĩ ga Cristu ga yuwa nax ínadaxü̃. Rü natanüwa i guxü̃ma i ngẽma yuexü̃ i yixcüra tá írüdagüxü̃, rü Cristu nixĩ ga namaxã inaxügücü nax ínadaxü̃, yerü nüma nixĩ ga nüxíra wena namaxü̃xü̃.
21 Rü ngẽxgumarüxü̃ nax wüxi ga yatügagu nayuexü̃ ga duü̃xü̃gü, rü ngẽxgumarüxü̃ ta nixĩ nax wüxi i yatügagu wena namaxẽxü̃ i ngẽma marü yuexü̃.
22 Rü yexgumarüxü̃ nax Adáü̃gagu guxãma nayuexü̃, rü ngẽxgumarüxü̃ ta Cristugagu tá namaxẽxü̃ i guxü̃ma i duü̃xü̃gü i nüxü̃́ yaxõgüxü̃.
23 Natürü wüxichigü rü tá tümawa nangu nax wena tamaxü̃xü̃. Rü Cristu nixĩ ga nüxíra maxü̃cü. Rü ngẽxguma wena núma naxũxgu i nümax, rü ngẽxguma tá nixĩ i wena namaxẽxü̃ i norü duü̃xü̃gü.
24 Rü ngẽmawena tá nixĩ i nagúxü̃ i naane. Rü ngẽxguma tá nixĩ ya Cristu i nüxü̃ naporamaexü̃ i guxü̃ma i norü uanügü i poraexü̃. Rü ngẽxguma tá nixĩ i Nanatü ya Tupanana naxããxü̃ i guxü̃ma nax nüma namaxã inacuáxü̃ca̱x.
25 Erü nüma ya Cristu rü ãẽ̱xgacü tá nixĩ ñu̱xmatáta nüxü̃ naporamae i guxü̃ma i norü uanügü.
26 Rü ngẽma nawa iyacuáxü̃ i norü uanü i tá nüxü̃ naporamaexü̃, rü yu nixĩ.
27 Yerü Tupana rü marü Cristume̱xẽwa nanayexmagüxẽxẽ ga guxü̃ma. Natürü woo Tupanaarü ore nüxü̃ ixuxgu nax Cristume̱xẽwa nangẽxmagüxü̃ i guxü̃ma, natürü nümatama ya Tupana rü tama Cristume̱xẽwa nangẽxma. Yerü nüma ga Tupana nixĩ ga Cristume̱xẽwa nayexmagüxẽẽãxü̃ ga guxü̃ma.
28 Rü ngẽxguma guxü̃ma Cristume̱xẽwa ngẽxmagügu, rü ñu̱xũchi nümatama ya Cristu ya Tupana Nane rü tá Nanatüme̱xẽwa nügü nangẽxmaxẽxẽ. Yerü nüma ga Tupana nixĩ ga Cristume̱xẽwa nayexmagüxẽẽãxü̃ ga guxü̃ma. Rü ngẽmaãcü ya Tupana rü guxü̃maxã tá inacua̱x.
29 Rü nangẽxma i ñuxre i duü̃xü̃gü i petanüwa i Tupanaégagu yuexü̃chicüü íbaiü̃xü̃. ¿Rü tü̱xcüü̃ ngẽma naxügü? Rü ngẽxguma chi tama wena namaxẽgu i duü̃xü̃gü i yuexü̃, ¿rü tü̱xcüü̃ ngẽma yuexü̃chicüü ínabaiü̃?
30 ¿Rü tü̱xcüü̃ i toma rü guxü̃guma ãũcümaxü̃wa tangexmagü?
31 Pemaxã nüxü̃ chixu, Pa Chauenexẽgüx, rü guxü̃ i ngunexü̃gu rü ãũcümaxü̃wa changexma, rü tama nüxü̃ chacua̱x i ta̱xacürü ngunexü̃gu Tupanaarü oregagu tá nax chayuxü̃. Rü ngẽma rü aixcümaxü̃chi nixĩ, ngẽxgumarüxü̃ nax aixcüma yixĩxü̃ nax choxü̃́ nangẽxmaxü̃ i wüxi i taãxẽ i taxü̃ i ñu̱xma nax tórü Cori ya Ngechuchu ya Cristuaxü̃́ peyaxõgüxü̃.
32 Choma rü nua Epéchiuwa rü Tupanaarü orechigagu chorü uanügümaxã poraãcü togü tachoxü̃gagü. Rü ñoma naeü̃ i idüraexü̃maxã togü tadaixü̃rüxü̃ tixĩgü. ¿Natürü ta̱xacüwa choxü̃́ namexü̃ ga yema ega chorü maxü̃ i ñoma i naanewa choxü̃́ ngẽxmaxü̃ca̱xicatama yixĩxgu? Rü ngẽxguma chi aixcüma yixĩxgu nax tama wena namaxẽxü̃ i yuexü̃, rü marü name i ñatarügügü: “¡Ngĩxã tachibüe rü taxaxegü, erü paxa tá tayue!” ñatarügügü.
33 ¡Natürü taxũtáma nawe perüxĩ i ngẽma duü̃xü̃gü i ngẽmaãcü chixri idexagüxü̃! Erü aixcüma nixĩ i ngẽma ore i ñaxü̃: “Rü texé ya chixexü̃ i duü̃xü̃maxã ãmücüxe, rü tüxü̃́ inayanaxoxẽxẽ i tümacümagü i mexü̃”, ñaxü̃.
34 Rü name nixĩ i mea pegüãẽgu perüxĩnüe rü nüxü̃ perüxoe i ngẽma perü chixexü̃gü. Rü wüxi i perü ãne nixĩ nax pemaxã nüxü̃ chixuxü̃ nax ñuxre i pemax rü tama aixcüma Tupanaxü̃ pecua̱xgüxü̃.
Ñuxãcü wena namaxẽ i yuexü̃gü
35 Natürü ngürüãchi tá texé pexna taca rü ñatarügü pexü̃: “¿Ñuxãcü tá wena namaxẽxü̃ i yuexü̃? ¿Rü nañuxraü̃xü̃ i naxü̃nemaxã tá ínadagüxü̃?” ñatarügü tá pexü̃.
36 Pa Duü̃xü̃ i Ngeãẽmarexü̃, ¡rü dücax! Rü ngẽxguma wüxi ya nanetüchire itoxgu, rü nüma ya yimá naxchire rü nayu nax ngẽmaãcü naxüxü̃ca̱x i ngẽma nanetü.
37 Rü ngẽma waixü̃mügu itoxü̃, rü tama marü nanetü ixĩxü̃ nixĩ, natürü naxchire nixĩ ya yimá itoxü̃ne woo triguchire rü ẽ̱xna ngexü̃rüüxü̃mare i to i nanetüchire yixĩxgu.
38 Rü ngẽxguma marü inatoxguwena, rü Tupana nixĩ i yanaxüxẽẽcü ya yima naxchire nax nüma nanaxwa̱xexü̃ãcüma yixĩxü̃ca̱x i ngẽma nanetü.
39 Rü tama guxü̃ i naxü̃negü nawüxigu. Rü duü̃xẽxü̃ne rü nanatoraxü̃, rü naeü̃güxü̃ne rü to nixĩ, rü werigüxü̃ne rü to nixĩ, rü choxnigüxü̃ne rü to nixĩ.
40 Rü ngẽxgumarüxü̃ ta nangẽxma i naxü̃negü i daxũguxü̃ i naanecüã̱x, rü nangẽxma i naxü̃negü i ñoma i naanecüã̱x. Rü ngẽma daxũguxü̃ i naanecüã̱x i naxü̃negü rü nüxü̃́ nangẽxma i noxrütama mexü̃, rü ngẽma ñoma i naanecüã̱x i naxü̃negü rü ta nüxü̃́ nangẽxma i noxrütama mexü̃. Natürü tama nawüxigu i ngẽma norü mewa.
41 Rü üa̱xcüarü ya̱u̱xracüü rü tama namaxã nawüxigu i tauemacüarü ya̱u̱xracüü. Rü woramacurigüarü ya̱u̱xracüü rü to nixĩ. Rü nügütanüwa ya woramacurigü, rü tama nawüxigu i norü ya̱u̱xracüüwa.
42 Rü ngẽxgumarüxü̃ tá ta naxüpetü namaxã i naxü̃negü i ngẽma duü̃xü̃gü i yuexü̃. Erü ngẽma naxü̃ne i noxri nüxü̃́ ngẽxmaxü̃ rü iyarüxoxwa̱xexü̃ nixĩ. Natürü ngẽma naxü̃ne i tá nüxü̃́ ngẽxmaxü̃ i ngẽxguma wena namaxẽgu, rü ngẽma rü tagutáma inayarüxo.
43 Rü ngẽma naxü̃ne i ítáxü̃ rü taxuwama name. Natürü ngẽma naxü̃ne i wena maxü̃xü̃ rü naxüüne. Rü ngẽma naxü̃ne i ítáxü̃ rü natura, natürü ngẽma naxü̃ne i wena maxü̃xü̃ rü napora.
44 Rü itanata̱x i ngẽma naxü̃ne i ñoma i naanecüã̱x ixĩxü̃. Natürü ngẽxguma ínadaxgu, rü daxũcüã̱x i naxü̃ne tá nixĩ. Rü ñu̱xma nax nangẽxmaxü̃ i naxü̃ne i ñoma i naanecüã̱x rü ngẽmawa nüxü̃ tacua̱x nax nangẽxmaxü̃ ta i naxü̃ne i daxũcüã̱x.
45 Tupanaarü ore i ümatüxü̃wa rü ñanagürü:“Gumá nüxíraü̃cü ga yatü ga Adáü̃ rü nüxü̃́ nayexma ga ñoma ga naanecüã̱x ga naxü̃ne ga paxaãchi maxü̃xü̃”,
ñanagürü. Natürü ya Cristu rü daxũcüã̱x nixĩ. Rü nüma nixĩ i tüxna naxããxü̃ i maxü̃ i taguma gúxü̃.
46 Noxri rü tüxü̃́ nangẽxma i ñoma i naanecüã̱x i taxü̃ne. Natürü yixcaama rü Tupana tá tüxna nanaxã i to i taxü̃ne i daxũcüã̱x ixĩxü̃.
47 Gumá nüxíraü̃cü ga yatü ga waixü̃müwa ücü, rü ñoma ga naanecüã̱x nixĩ. Natürü tórü Cori ya Cristu rü daxũguxü̃ i naanecüã̱x nixĩ.
48 Rü ngẽma taxü̃negü i ñoma i naanewa tüxü̃́ ngẽxmaxü̃, rü gumá Adáü̃xü̃ne ga waixü̃müwa ücürüxü̃ nixĩgü. Natürü ngẽma naxü̃negü i daxũwa nüxü̃́ ngẽxmaxü̃ i duü̃xü̃gü, rü Cristuxü̃nerüxü̃ nixĩgü.
49 Rü ngẽxgumarüxü̃ nax Adáü̃ ga waixü̃müwa ücürüxü̃ nax yixĩxü̃ i taxü̃ne, rü ngẽxgumarüxü̃ tá ta Cristu ya daxũwa ngẽxmacürüxü̃ nixĩ i taxü̃ne i yixcüra.
50 Rü dücax, Pa Chauenexẽgüx, pemaxã nüxü̃ chixu rü ñaa taxü̃ne i namachinaxca̱x rü naxchina̱xãnaxca̱x, rü taxucürüwa Tupana ãẽ̱xgacü íyixĩxü̃wa nangu. Erü ngẽma iyarüxoxü̃, rü taxucürüwama Tupanaxü̃tawa i ngextá taxuxü̃ma íyarüxoxü̃wa nixücu.
51 Natürü chanaxwa̱xe nax nüxü̃ pecuáxü̃ i Tupanaarü ĩnü i ẽxü̃guxü̃ ga noxri nüxicatama nüxü̃ nacuáxü̃. Rü dücax, taxũtáma guxã tayue, natürü guxãxü̃ne rü tá naxüchicüü.
52 Rü ngürüãchimare wüxi i peãxetügu tá nixĩ i ngẽma nax naxüchicüüxü̃ i taxü̃ne i ngẽxguma naanearü guxgux naxãgagu ya cornéta. Rü tá naxãga ya yimá cornéta, rü ngẽxguma i ngẽma duü̃xü̃gü i yuexü̃ rü tá ínarüdagü nax tagutáma wena nayuexü̃ca̱x. Rü yixema nax imaxẽxü̃ rü tá naxüchicüü i taxü̃negü.
53 Erü ngẽma taxü̃ne i yixwa̱xexü̃ rü tá namaxã naxüchicüü i wüxi i naxü̃ne i taguma yixĩxü̃. Rü taxü̃ne i yuxwa̱xexü̃ rü tá namaxã naxüchicüü i wüxi i naxü̃ne i tagutáma yuxü̃.
54 Rü ngẽxguma ngẽmaãcü naxüchicüügu i taxü̃ne i yuxwa̱xexü̃, rü tüxü̃́ nangẽxmagu i taxü̃ne i ngexwaca̱xü̃xü̃ i taguma yuxü̃, rü ngẽxguma tá nixĩ i yanguxü̃ i Tupanaarü ore i ümatüxü̃ i ñaxü̃:“Marü inayarüxo nax nayuexü̃ i duü̃xü̃gü. Rü Tupana rü marü yuxü̃ narüyexera.
55 Rü dücax, Pa Yux, ¿ngexü̃ i curü pora i namaxã toxü̃ curüyexeraxü̃?¿Rü ngexü̃ i ngẽma cuxne i namaxã toxü̃ cuda̱i̱xü̃?”
ñanagürü i ngẽma Tupanaarü ore.
56 Rü ngẽma naxne i yu, rü pecadu nixĩ. Erü ngẽma pecadu nixĩ i naporaxẽẽxü̃ i ngẽma yu nax tüxü̃ nada̱i̱xü̃ca̱x. Rü ngẽma mugü ga Moiché ümatüxü̃ nixĩ i naporaxẽẽxü̃ i pecadu.*
57 Natürü name nixĩ i Tupanana moxẽ taxã yerü núma nanamu ga tórü Cori ya Ngechuchu ya Cristu nax ngẽma yuxü̃ tüxü̃ naporamaexẽẽxü̃ca̱x.
58 Rü ngẽmaca̱x, Pa Chauenexẽgü ya Pexü̃ Changechaü̃güxex, rü name nixĩ i mea peyaxõgüama rü taguma ípenata̱x i Tupanaarü ore. Rü name nixĩ i guxü̃guma mea penaxü i tórü Coriarü puracü, erü pema nüxü̃ pecua̱x rü ngẽma puracü i nüxü̃́ pexüxü̃, rü tama natüca̱xma nixĩ.
Notas
^ 15:56 Erü woo namexgu i ngẽma mugü, natürü taxucürüwama texé aixcüma tayanguxẽxẽ.
