1 Corintios 16:1-24
16 Rü ñu̱xma tá pemaxã nüxü̃ chixu ngĩchiga i ngẽma diẽru i penutaque̱xexü̃ nax ngĩmaxã nüxü̃ perüngü̃xẽẽgüxü̃ca̱x i taenexẽgü i yaxõgüxü̃ i Yudéaanewa ngẽxmagüxü̃. Rü ngẽma yaxõgüxü̃ i Gárataanewa ngẽxmagüxü̃ rü marü namaxã nüxü̃ chixu nax ngĩxü̃ nanutaque̱xegüxü̃ i ngẽma diẽru. Rü chanaxwa̱xe i pema rü ta ngẽxgumarüxü̃ penaxü.
2 Rü ngẽma diẽru i perü puracüwa ngĩxü̃ peyaxucüwa rü guxcü i yüxüarü ngunexü̃gu rü tá ngĩxü̃ pexã i ngẽma diẽru i Tupanaarü ixĩcü. Rü ngĩmaxã tá penguxü̃ nax tama ngẽxguma ngéma changuxguama ngĩxü̃ nax pedexü̃ca̱x.
3 Rü ngẽxguma petanüwa changuxgu, rü tá chanaxümatü i ñuxre i poperagü naxca̱x i taenexẽgü i Yerucharéü̃wa ngẽxmagüxü̃. Rü ñu̱xũchi ngẽma poperamaxã tá Yerucharéü̃wa chanamugü i ngẽma duü̃xü̃gü i pema nüxü̃ pexunetaxü̃ nax ngéma ngĩxü̃ nangegüxü̃ca̱x i ngẽma diẽru i taenexẽgüca̱x ngĩxü̃ penutaque̱xecü.
4 Rü ngẽxguma chi choxü̃́ natauxchagu nax ngéma Yerucharéü̃wa chaxũxü̃, rü nümagü rü tá wüxigu chomaxã ngéma naxĩ.
Pauru nagu narüxĩnü nax Coríntiuwa naxũxü̃
5 Choma rü Machedóniaanewa tá chaxüpetü nax íchayadauxü̃ca̱x i taenexẽgü i ngéma ngẽxmagüxü̃. Rü ngẽmawena rü tá petanüwa changu nax pexü̃ íchayadauxü̃ca̱x.
6 Rü ngürüãchi tá ñuxre i ngunexü̃gü ngẽxma petanügu charüxã̱ũ̱x, rü bexmana ngürüãchi ngéma petanüwa tá chanangupetüxẽxẽ ya yimá tauemacügü ya nagu nagáuanecü. Rü ngẽmawena rü marü name nax choxü̃ perüngü̃xẽẽgüxü̃ nax ngẽma íchaxũxchaü̃xü̃wa chaxũxü̃ca̱x.
7 Erü tama chanaxwa̱xe i paxaãchimare pexü̃ chadau. Natürü ngürüãchi muxü̃ i ngunexü̃gü petanügu charüxã́ũxchaü̃ ega chi norü ngúchaü̃ yixĩxgu ya tórü Cori.
8 Natürü nua Epéchiuarü ĩanewa tá changexma ñu̱xmatáta Pẽntecostéarü ngunexü̃wa nangu.
9 Erü nua rü tórü Cori poraãcü choxü̃́ nanatauxchaxẽxẽ nax nüxü̃́ chapuracüxü̃ca̱x nax nüxü̃́ yaxõgüãxü̃ca̱x i muxü̃ma i duü̃xü̃gü woo namu i ngẽma tama naxwa̱xegüxü̃ nax nua chapuracüxü̃.
10 Rü ngẽxguma Timutéu petanüwa nguxgu, rü chanaxwa̱xe i meama penayaxu nax petanüwa nataãẽxü̃ca̱x. Erü nüma rü ta chauxrüxü̃ tórü Coriaxü̃́ napuracü.
11 Rü ngẽmaca̱x tama chanaxwa̱xe i texé petanüwa nüxü̃ taxoe. Natürü chanaxwa̱xe i nüxü̃ perüngü̃xẽxẽ nax taãẽãcüma nua Epéchiuwa choxü̃ íyadauxü̃ca̱x. Erü poraãcü íchanangu̱xẽxẽ nax nua nanguxü̃ca̱x namaxã i ngẽma togü i taenexẽgü.
12 Rü ngẽma taenexẽ i Apóru rü poraãcü nüxü̃ chaca̱a̱xü̃ nax petanüwa íyadauxü̃ca̱x namaxã i ngẽma togü i taenexẽgü. Natürü tama ngéma naxũxchaü̃ i ñu̱xmax. Natürü ngẽxguma naxãchicagu rü tá ngéma naxũ.
Pauru nüxü̃ narümoxẽ ga yema yaxõgüxü̃
13 ¡Rü pexuãxẽgü nax taxuxü̃ma i chixexü̃gu peyixü̃ca̱x! ¡Rü meama peyaxõgüama woo ta̱xacü pexü̃ üpetügu! Rü name nixĩ i peporaeama rü taxuca̱xma pemuü̃e.
14 Rü guxü̃ma i ngẽma pexüxü̃, rü name nixĩ i pegü pengechaü̃güãcüma penaxü.
15 Rü dücax, Pa Chauenexẽgüx, pema nüxü̃ pecua̱x nax Etéfanatanüxü̃ yixĩxü̃ ga nüxíra yaxõgüxü̃ ga Acáyaanewa. Rü meama nüxü̃ pecua̱xgü nax poraãcü taenexẽgü i yaxõgüxü̃xü̃ nax nangü̃xẽẽgüxü̃.
16 Rü chanaxwa̱xe i naga pexĩnüe i ngẽma duü̃xü̃gü i Etéfanatanüxü̃rüxü̃ ixĩgüxü̃. Rü ngẽxgumarüxü̃ ta chanaxwa̱xe i naga pexĩnüe i guxü̃ma i ngẽma duü̃xü̃gü i ñaa Tanatüarü puracüwa puracüexü̃ rü ngü̃xẽẽtaegüxü̃.
17 16:17-18 Rü ñu̱xma nax taxucürüwama chauxü̃tawa pengẽxmagüxü̃, rü wüxi ga chorü taãxẽ nixĩ nax núma naxĩxü̃ ga taenexẽgü ga Etéfana rü Fortunátu rü Acáicu. Rü yema taenexẽgü ga núma ĩxü̃ rü pexü̃ nixuchigagü rü yemaacü choxü̃ nataãẽxẽẽgü ga yema pexü̃ nax nataãẽxẽẽgüxü̃rüxü̃. Rü tanaxwa̱xe i naga pexĩnüe rü nüxü̃ pengechaü̃ i ngẽma duü̃xü̃gü i ngẽmagürüxü̃ ixĩgüxü̃.
18 Nüü̃ nadau 16:17
19 Rü guxü̃ma i taenexẽgü i yaxõgüxü̃ i Áchiaanearü ĩanegüwa ngẽxmagüxü̃, rü moxẽ pexca̱x ngéma namugü. Rü Aquíra rü Prichíra rü guxü̃ma i ngẽma yaxõgüxü̃ i Aquírapatawa ngutaque̱xegüxü̃, rü moxẽ pexca̱x ngéma namugü naégagu ya tórü Cori.
20 Rü guxü̃ma i taenexẽgü i núma ngẽxmagüxü̃ rü moxẽ pexca̱x ngéma namu. Rü chanaxwa̱xe i wüxichigü i pemax rü pegü pengechaü̃güãcüma pegü perümoxẽgü.
21 Choma i Pauru rü cho̱xme̱xmaxãtama pexca̱x chanaxümatü i ñaa chorü moxẽ.
22 Rü ngẽxguma chi texé tama tórü Cori ya Ngechuchu ya Cristuxü̃ ngechaü̃gu, rü Tupana tá poxcu tümamaxã naxuegu. ¡Paxa nua naxũ, Pa Tórü Corix!
23 Rü chanaxwa̱xe i tórü Cori ya Ngechuchu ya Cristu poraãcü pexü̃ narüngü̃xẽxẽ.
24 Rü guxãma i pemax, rü poraãcü pexü̃ changechaü̃ãcüma pexü̃ charümoxẽ naégagu ya tórü Cori ya Ngechuchu ya Cristu.
