1 Corintios 3:1-23
3 Pa Chauenexẽgüx, yexguma noxri petanüwa changuxgu, rü taxucürüwa duü̃xü̃gü i meama Tupanaxü̃ cua̱xgüxü̃rüxü̃ãcü pemaxã nüxü̃ chixu i Tupanaarü ore. Natürü duü̃xü̃gü ga yexwacax yaxõgüxü̃rüü̃ãcü pemaxã nüxü̃ chixu yerü pema rü yexwacax peyaxõgü ga yexguma. Rü yemaca̱x yexwacax yaxõgüxü̃rüü̃ãcü pemaxã nüxü̃ chixu ga Cristuchiga.
2 3:2-3 Rü tauxchaxü̃ ga oremaxã pexü̃ changúexẽxẽ, ngẽxgumarüxü̃ i wüxi i õxchana ega noxri nabuxgu rü naégünenixü̃ ya tauxchaãcü yaxaxü̃ne nüxna taxã. Rü yemaacü tauxchaxü̃ ga oremaxã pemaxã nüxü̃ chixu ga Tupanaarü ore ga noxrix, yerü taxucürüwa nüxü̃ pecua̱xéga ga Tupanaarü ore ga yexera guxchaxü̃. Rü ñu̱xma rü ta tama nüxü̃ pecua̱xéga i ngẽma Tupanaarü ore i yexera guxchaxü̃, erü ñoma tama yaxõgüxü̃rüü̃tama pemaxẽ. Rü dücax, ñu̱xma nax pixãũxãchiwa̱xegüxü̃ rü pegümaxã penuexü̃, rü ngẽmawa nango̱x nax ngẽma tama mea yaxõgüxü̃rüü̃tama pemaxẽxü̃ rü ñoma i naanecüã̱x nagu rüxĩnüexü̃ãcütama penaxüxü̃.
3 Nüü̃ nadau 3:2
4 Rü ngẽxguma petanüwa wüxíe ñagügu rü: “Choma rü Pauruwe charüxũ”, ñagügu, rü togue rü: “Choma rü Apóruwe charüxũ”, ñagügu, rü ngẽmawa nango̱x nax ngẽma duü̃xü̃gü i tama yaxõgüxü̃ãcüma pemaxẽxü̃.
5 Rü ngẽxguma mea nagu rüxĩnüegu, ¿rü ta̱xacü chixĩ i choma i Paurux? rü ¿ta̱xacü nixĩ i nüma i Apórux? Toma rü Tupanaarü duü̃xü̃gümare tixĩgü, rü togagu nixĩ ga nüxü̃́ peyaxõgüxü̃ ya Cori ya Ngechuchu. Rü wüxichigü ga toma rü tanaxü ga yema puracü ga tórü Cori toxna ãxü̃.
6 Rü chauxü̃tawa nixĩ ga nüxü̃ pexĩnüexü̃ rü peyaxõgüxü̃ ga Tupanaarü ore ga noxrix. Rü Apóru nixĩ ga pexü̃ rüngü̃xẽẽcü nax yexeraãcü mea peyaxõgüxü̃ ga yema ore. Natürü Tupana nixĩ ga pexü̃ maxẽxẽẽcü.
7 Rü ngẽmaca̱x woo yíxema tüxíra duü̃xü̃gümaxã nüxü̃ ixuxe i Tupanaarü ore rü woo yíxema wixwena yexeraãcü duü̃xü̃güxü̃ ngúexẽẽ́xe, rü taxuxü̃ma tixĩgü. Natürü Tupana nixĩ ya guxü̃ma ücü, erü nüma nixĩ i duü̃xü̃güxü̃ namaxẽxẽẽxü̃.
8 Rü ngẽmaãcü ya yíxema tüxíra duü̃xü̃gümaxã nüxü̃ ixuxe i Tupanaarü ore, rü yíxema wixwena yexeraãcü duü̃xü̃güxü̃ ngúexẽxẽ́xe rü tawüxigumare i ngẽma puracüwa. Natürü ngẽxgumarüxü̃ nax tanaxüxü̃ i ngẽma puracü, rü Tupana rü tá tüxü̃́ nanaxütanü ya wüxichigü.
9 Rü toma rü wüxigu Tupanaaxü̃́ tapuracüe. Rü ngẽmaãcü nixĩ i perü maxü̃wa napuracüxü̃ ya Tupana nax nüma nanaxwa̱xexü̃ãcüma noxrü pixĩgüxü̃ca̱x.
10 Rü choma nixĩ ga Tupana choxü̃ muxü̃ nax chaxíra pemaxã nüxü̃ chixuxü̃ca̱x ga Cristuchiga. Rü togü nixĩ ga chowena yexeraãcü pexü̃ ngúexẽẽxü̃. Natürü guxãma ya texé ya naxǘxe i ñaa puracü rü name nixĩ i taxuãxẽ nax mea tanaxüxü̃ca̱x.
11 Rü ngẽma puracü rü Ngechuchu ya Cristu nixĩ ga inaxügücü, rü ngẽmaca̱x taxucürüwama texé toguena tanaxü i ngẽma puracü ga noxri Ngechuchu ya Cristu ixügüxü̃.
12 Rü ñu̱xma nax Ngechuchu ya Cristu yixĩxü̃ ga inaxügücü i ngẽma puracü rü wüxichigü i yixema rü tanaxwa̱xe i taxuãxẽ nax mea yanguxẽẽxü̃ i ngẽma puracü i Cristu tüxna ãxü̃. Erü yíxema aixcüma mea naxǘxe i ngẽma puracü, rü ñoma wüxi i ĩpataarü üruxü̃ i úirumü rü diẽrumü rü nuta ya mexẽchicümaxã üpataxü̃rüxü̃ tixĩ. Natürü yíxema tama aixcüma mea naxǘxe i ngẽma puracü rü ñoma ĩpataarü üruxü̃ i chixexü̃ i nai rü naixatü rü dexnemena̱xãmaxã üpataxü̃rüxü̃ tixĩ.
13 Natürü ngẽxguma nawa nanguxgu i ngẽma ngunexü̃ i nagu Tupana tüxna ca̱xaxü̃, rü tá nango̱x nax ñuxãcü wüxichigü i duü̃xü̃ naxüxü̃ i Tupanaarü puracü. Erü ngẽma ngunexü̃gu rü tá nangẽxma ya üxü ya taxüchine. Rü ñoma ta̱xacü üxüwa iguxü̃rüxü̃ tá nixĩ ya Tupana nüxü̃ üxü̃ i wüxichigü i duü̃xü̃arü puracü rü aixcüma name rüe̱xna tama.
14 Rü yíxema aixcüma mea naxǘxe i Cristuarü puracü, rü yimá ĩpata ya taixü̃ne ya tama üxümaxã ixaxü̃nerüxü̃ tá nixĩ i ngẽma tümaarü puracü. Rü tá Tupanaxü̃tawa tanayaxu i tümaarü natanü naxca̱x i ngẽma taxüxü̃.
15 Natürü yíxema tama aixcüma mea naxǘxe i ngẽma puracü, rü yima ĩpata ya tama taixü̃ne ya üxümaxã ixaxü̃nerüxü̃ tá nixĩ i ngẽma tümaarü puracü. Rü tá ngẽxma inayarüxomare i guxü̃ma i ngẽma taxüxü̃. Rü tüxicatama taxũtáma tixa ñoma wüxi i duü̃xü̃ i üxüemawa iyagoxü̃rüxü̃.
16 ¿Tama ẽ̱xna nüxü̃ pecua̱x nax Tupanapata pixĩgüxü̃, rü nüma i Tupanaãxẽ pewa nax namaxü̃xü̃?
17 Rü ngẽxguma texé Tupanapata chixexẽẽgu, rü Tupana tá tüxü̃ napoxcu, erü Tupanapata ya nawa namaxü̃ne rü naxüüne. Rü pematama nixĩ ya yimá Tupanapata nax pixĩgüxü̃.
18 Tama name i texé tügütama tawomüxẽxẽ. Rü ngẽxguma petanüwa texé tügügu rüxĩnügu nax aixcüma nüxü̃ tacuáxü̃ i ñoma i naanearü cua̱x, rü name nixĩ i ñoma taxuxü̃ma tacuáxü̃rüxü̃ tügü tixĩxẽxẽ. Rü ngẽxguma tá nixĩ i wüxi i duü̃xü̃ i aixcüma nüxü̃ cuáxe tixĩxü̃.
19 Erü ñoma i naanearü cua̱x rü Tupanaca̱x rü wüxi i ngeãẽmare nixĩ. Erü Tupanaarü ore i ümatüxü̃wa rü ñanagürü:“Ngẽma duü̃xü̃gü i nügügu rüxĩnüexü̃ nax norü cua̱xmaxã duü̃xü̃güxü̃ nawomüxẽẽxü̃, rü Tupana rü tá ngẽmatama norü womüxẽẽgu nanayixẽxẽ”,
ñanagürü.
20 Rü Tupanaarü ore rü ñanagürü ta:“Tórü Cori ya Tupana rü nüxü̃ nacua̱x nax taxuwama namexü̃ i norü ĩnü i ngẽma duü̃xü̃gü i ñoma i naanearü cua̱xmaxã tügü ticua̱xüxü̃”,
ñanagürü.
21 Rü ngẽmaca̱x tama name i texé tügü ticua̱xüxü̃ ega duü̃xü̃güarü cua̱x tüxü̃́ ngẽxmagu. Erü Tupana rü marü pexna nanaxã i guxü̃ma nax pexrü yixĩxü̃ca̱x.
22 Rü ngẽmaca̱x i choma i Pauru, rü Apóru, rü Pedru rü ñoma i naane, rü tórü maxü̃, rü tórü yu, rü ngẽma ñu̱xma ngẽxmaxü̃ rü ngẽma yixcüra tá ngẽxmaxü̃, rü guxü̃ma i ngẽma rü pexrü nixĩ.
23 Rü pema rü Cristuarü pixĩgü, rü Cristu rü Tupanaarü nixĩ.
