1 Corintios 4:1-21
4 Rü ngẽmaca̱x tanaxwa̱xe i nagu perüxĩnüe nax Cristuarü puracütanüxü̃mare tixĩgüxü̃. Rü nüma nixĩ i toxü̃ namuxü̃ nax pexü̃ tangúexẽẽxü̃ca̱x ga yema ore ga noxri Tupanaxicatama nüxü̃ cuáxü̃.
2 Rü ngẽxguma texé wüxi i puracü tüxna ãxgu, rü name nixĩ i mea tayanguxẽxẽ i ngẽma puracü nax ngẽmaãcü tügü itawéxü̃ca̱x nax wüxi i duü̃xü̃ i mexü̃ tixĩxü̃.
3 Rü ngẽmaca̱x i ñu̱xma nax mea íchanaxüxü̃ i ngẽma puracü ya Tupana choxna ãxü̃, rü taxuca̱xma chaxoegaãxẽ ega woo ngẽma puracüchigaca̱x choxna pecagu, rüe̱xna ta̱xacürü ãẽ̱xgacü choxna ca̱xgux. Rü woo i chomatama rü taxuxü̃ca̱xma íchicua̱x nax ngextá chixri chanaxüxü̃ i ngẽma puracü.
4 Natürü ñu̱xma nax chomatama nagu charüxĩnüxü̃ nax nataxuxü̃ma i chorü chixexü̃ i Tupanape̱xewa, rü tama ngẽmaca̱x Tupana choxü̃ nadau nax changearü pecaduã́xü̃. Erü nümatama ya tórü Cori ya Tupana nixĩ ya choxü̃ cuáarü maxü̃ãcü.
5 Rü ngẽmaca̱x tama name nax yaxtacüma texéxü̃ pengugüarü maxü̃ã́xü̃. Natürü name nixĩ i ípenangu̱xẽxẽ nax núma naxũxü̃ ya tórü Cori. Rü nüma tá nixĩ i nango̱xẽẽãxü̃ i guxü̃ma i ngẽma ñu̱xma icúxü̃ rü guxü̃ma i ngẽma duü̃xü̃gü naãẽwa nagu rüxĩnüexü̃. Rü ngẽxguma tá nixĩ ya Tupana i tüxü̃ yacua̱xüxü̃ ya wüxichigü ya yíxema aixcüma mexü̃ ügüxe.
6 Pa Chauenexẽgüx, perü mexü̃ca̱x nixĩ i pemaxã nüxü̃ tixuxü̃ i ngẽma ore nax Tupana naxwa̱xexü̃ãcüma pemaxẽxü̃ca̱x. Rü choma rü Apóru nixĩ i perü cua̱xruü̃gü tixĩgüxü̃. Rü name nixĩ nax towa pengúexü̃ rü tama ípeyatóxẽẽxü̃ i Tupanaarü ore i marü ümatüxü̃. Rü ngẽmaãcü taxũtáma texé tügü ticua̱xüxü̃ namaxã i wüxi i Tupanaarü orearü uruxü̃ rü ngẽma to rü tama.
7 Rü ñu̱xma rü cuxna chaca, ¿rü texé tixĩ ya yíxema togüarü yexera cuxü̃ ixĩxexẽ́xẽ? Rü guxü̃ma i ngẽma cuxü̃́ ngẽxmaxü̃ rü Tupana nixĩ ya cuxna naxãcü. Rü ñu̱xma nax Tupana cuxna naxãxü̃ i ngẽma cuxü̃́ ngẽxmaxü̃ ¿rü tü̱xcüü̃ cugü quicua̱xüxü̃ ñoma cumatama cugüna cunaxãxü̃rüxü̃?
8 Rü pegügu perüxĩnüegu rü marü pexü̃́ nangẽxma i guxü̃ma i penaxwa̱xexü̃ nax Tupanape̱xewa pimexü̃ca̱x. Rü pegügu perüxĩnüegu rü ñoma ãẽ̱xgacügü i taxü̃rüxü̃ pixĩgü, rü taxuxü̃ma i ngü̃xẽxẽ toxü̃tawa penaxwa̱xe. ¡Chierüx aixcüma Tupanape̱xewa ãẽ̱xgacügü pixĩgügu nax toma rü ta wüxigu pemaxã ãẽ̱xgacügü nax tixĩgüxü̃ca̱x!
9 Rü toma nax Ngechuchu toxü̃ imugüxü̃, rü cha̱u̱xca̱x rü Tupana rü wixwe toxü̃ nawogü. Rü ñoma poxcuexü̃ i yuwa ĩxü̃rüxü̃ tixĩgü. Rü ñoma i naanecüã̱xpe̱xewa, rü Tupanaarü orearü ngeruü̃gü i daxũcüã̱xpe̱xewa, rü yatügüpe̱xewa ñoma wüxi i cugürüxü̃ tixĩgü.
10 Rü ñu̱xma rü Cristugagu taxuxü̃ma icuáxü̃ toxü̃ nawogü i duü̃xü̃gü, natürü i pema rü Cristugagu pegu narüxĩnüe nax duü̃xü̃gü i nüxü̃ icuáxü̃ pixĩgüxü̃. Rü duü̃xü̃güca̱x rü taturae, natürü i pema rü peporae. Rü duü̃xü̃gü toxü̃ naxo, natürü i pema rü pexü̃ nangechaü̃gü.
11 Rü ñu̱xma rü ta tama inayacua̱x nax ngúxü̃ tingegüxü̃, rü taiya toxü̃́ nangu̱x, rü tita̱xawae, rü tangexchiru. Rü duü̃xü̃gü rü chixri tomaxã nachopetü, rü tangepata.
12 Rü tipae nax yeü̃cürü toxme̱xmaxã tapuracüexü̃. Rü duü̃xü̃gü rü chixexü̃ tomaxã nixugüe, natürü i toma rü mexü̃ i oremaxã tanangãxü̃gü. Rü towe ningẽxü̃tanü, natürü yáxna namaxã taxĩnüe.
13 Rü chixri tochiga nidexagü, natürü i toma rü mea nachiga tidexagü. Rü ñoma guxchirexü̃ nadaugüxü̃rüxü̃ tomaxã nixĩgü, rü ñoma duü̃xü̃gü i taxuwama mexü̃ãcü toxü̃ nixĩgüxẽxẽ. Rü ñu̱xma rü ta ngẽmaãcütama tomaxã nixĩgü.
14 Tama pexca̱x chanaxümatü i ngẽmachiga nax pexü̃ chaxãneexẽẽxü̃ca̱x. Natürü pexca̱x chanaxümatü nax pexü̃ chixucu̱xẽgüxü̃ca̱x chauxacügürüxü̃ erü pexü̃ changechaü̃.
15 Rü woo nangẽxmagu i 10,000 i perü ngu̱xẽẽruü̃gü i Cristuchiga pexü̃ ngúexẽẽxü̃, natürü chaxicatama nixĩ i penatü chixĩxü̃ i Tupanaarü orewa. Yerü chaxíra nixĩ ga pemaxã nüxü̃ chixuxü̃ ga Tupanaarü ore i mexü̃, rü chauxü̃tawa nixĩ ga penayaxuxü̃ ga Ngechuchu ya Cristu.
16 Rü ngẽmaca̱x pexü̃ chaca̱a̱xü̃ nax chauxrüxü̃ mea pemaxẽxü̃.
17 Rü ngẽmaca̱x pexü̃tawa chanamu ya Timutéu ya poraãcü nüxü̃ changechaü̃cü. Rü nüma rü chaunerüxü̃ nixĩ i Coriarü puracüwa, rü aixcüma mea nayanguxẽxẽ i guxü̃ma i ngẽma nagu chanamuxü̃. Rü nüma tá pexna nüxü̃ nacua̱xãchixẽxẽ nax ñuxãcü Ngechuchu ya Cristupe̱xewa mea chamaxü̃xü̃ rü mea chanangúexẽẽxü̃ ga yema yaxõgüxü̃ ga natanügu chixũgüxü̃.
18 Rü ñuxre i pemax rü pegü picua̱xüü̃gü, erü nagu perüxĩnüe nax tagutáma pexü̃tawa íchayadauxü̃.
19 Natürü ngẽxguma tórü Cori ya Tupana naxwa̱xegu, rü paxa tá ngéma chaxũ nax pexü̃ íchayadauxü̃ca̱x. Rü ngẽxguma rü tá chomaxü̃chi nüxü̃ chadau rü aixcüma yixĩ nax nüxü̃́ nangẽxmaxü̃ i Tupanaarü pora i ngẽma duü̃xü̃gü i nügü icua̱xüü̃güxü̃, rüe̱xna dexagümare yixĩ i ngẽma nüxü̃ yaxugügüxü̃.
20 Erü Tupana íngẽxmaxü̃wa rü tama dexagümare nixĩ, natürü ngéma nango̱x i Tupanaarü pora.
21 ¿Rü ta̱xacü nixĩ i penaxwa̱xexü̃ i pemax? ¿Penaxwa̱xe nax pexü̃ chingagüxü̃ i ngẽxguma ngéma changuxgu, rüe̱xna penaxwa̱xe nax pexü̃ changechaü̃ãcüma rü pemaxã chamecümaãcüma pexü̃ nax íchayadauxü̃?
