1 Corintios 6:1-20
6 Rü ngẽxguma wüxíe i pema pexü̃́ nangẽxmagu i ta̱xacürü guxchaxü̃ i wüxi i peenexẽ i yaxõxü̃maxã, ¿rü tü̱xcüü̃ wüxi i ãẽ̱xgacü i tama yaxõxü̃arü ngü̃xẽẽca̱x ípeyaca nax nüma pexü̃́ namexẽẽãxü̃ca̱x i ngẽma perü guxchaxü̃gü? ¿Rü tama ẽ̱xna inamexü̃ i ngẽma peenexẽgü i yaxõgüxü̃ nax pexü̃́ namexẽẽgüaxü̃́ i ngẽma perü guxchaxü̃gü?
2 ¿Tama ẽ̱xna nüxü̃ pecua̱x nax yixema nax yaxõgüxü̃ tá yixĩxü̃ i naanearü gu̱xgu nüxna icagüxü̃ i guxü̃ma i ñoma i naanecüã̱x i duü̃xü̃gü? Rü ñu̱xma nax pema tá yixĩxü̃ i ñoma i naanecüã̱x i duü̃xü̃güxü̃ picagüxü̃, ¿rü tü̱xcüü̃ taxucürüwa i pematama penamexẽxẽ i ngẽma perü guxchaxü̃gü i íxrachiréxü̃?
3 ¿Tama ẽ̱xna nüxü̃ pecua̱x rü woo ngẽma daxũcüã̱x i Tupanaarü orearü ngẽruü̃gü, rü yixema tá yixĩxü̃ i nüxü̃ icagüxü̃? Rü ngẽmaca̱x yexeraãcü pexme̱xwa nangẽxma nax penamexẽẽxü̃ i ngẽma guxchaxü̃gü i petanüwa ngẽxmagüxü̃.
4 Rü ngẽmaca̱x, ngẽxguma ta̱xacürü guxchaxü̃ pexü̃́ ngẽxmagu i petanüwa, ¿rü tü̱xcüü̃ i ngẽma ãẽ̱xgacügü i tama yaxõgüxü̃xü̃tawa pegü ípeyaxuaxü̃güxü̃ nax pexü̃́ namexẽẽgüãxü̃ca̱x i ngẽma?
5 Rü pemaxã nüxü̃ chixu i ngẽma ore nax pexãneexü̃ca̱x. ¿Ẽ̱xna tataxuma i petanüwa ya wüxíe ya nüxü̃ cuáxe nax tanamexẽẽxü̃ i ngẽma guxchaxü̃ i petanüwa ngẽxmaxü̃?
6 Rü pema rü tama pegümaxã penuẽxicatama, natürü naétü rü ãẽ̱xgacügü i tama yaxõgüxü̃xü̃tawa pexĩ nax penamexẽẽxü̃ca̱x i ngẽma perü guxchaxü̃gü.
7 Rü ngẽma nax pegümaxã penuexü̃, rü ngẽma rü poraãcü chixexü̃ nixĩ. ¿Rü tü̱xcüü̃ tama yáxna namaxã pexĩnüe i ngẽma guxchaxü̃gü i peenexẽ pemaxã üxü̃? ¿Rü tü̱xcüü̃ tama namaxã peporae ega texé perü ngẽmaxü̃ca̱x ngĩ̱xgux?
8 Natürü i pemax, rü poraãcü chixexü̃ pexüe, erü woo peenexẽgü i yaxõgüxü̃axü̃́ rü ta pengĩ̱x.
9 6:9-10 ¿Tama ẽ̱xna nüxü̃ pecua̱x nax ngẽma duü̃xü̃gü i chixexü̃ ügüxü̃ rü nataxuxü̃táma i nachica i Tupana ãẽ̱xgacü íyixĩxü̃wa? ¡Rü tama name i pegütama pewomüxẽxẽgü! Erü Tupana ãẽ̱xgacü íyixĩxü̃wa rü nataxutama i nachica i ngẽma duü̃xü̃gü i nai i ngexü̃maxã ipexü̃, rü ngẽma duü̃xü̃gü i tupananetachicüna̱xãxü̃ icua̱xüü̃güxü̃, rü ngẽma duü̃xü̃gü i naxma̱xẽchita rüe̱xna nateechita ngeãẽxü̃, rü ngẽma yatügü i naxrüxü̃ yatüxü̃maxã ngeãẽxü̃, rü ngẽma ngexü̃gü i naxrüxü̃ ngexü̃gümaxã ngeãẽxü̃, rü ngẽma ngĩ́ta̱xagüxü̃, rü ngẽma aüwa̱xegüxü̃, rü ngẽma ngãxẽwa̱xegüxü̃, rü ngẽma oregüta̱a̱xgüxü̃, rü ngẽma womüxẽẽwa̱xegüxü̃. Rü guxü̃ma i ngẽmagü rü nataxutama i nachica i Tupana ãẽ̱xgacü íyixĩxü̃wa.
10 Nüü̃ nadau 6:9
11 Rü yexgumarüü̃tama pixĩgü ga ñuxre ga pema ga ü̃pax. Natürü i ñu̱xma ya Tupana rü marü pexü̃́ ínanapi i perü chixexü̃ nax noxrüxicatama pixĩgüxü̃ca̱x. Rü ñu̱xma rü nape̱xewa pime yerü Naãxẽ ya Üünexü̃ rü tórü Cori ya Ngechuchu ya Cristuégagu marü perü pecaduna pexü̃ ínanguxü̃xẽxẽ.
Taxü̃ne rü naxüüne
12 Rü ñuxre i pema rü ñaperügügü: “Marü name nax chanaxüxü̃ i ngẽma chanaxwa̱xexü̃”, ñaperügügü. Rü aixcüma nixĩ i ngẽma, natürü tama guxü̃ i ngẽma ixügüxü̃ rü tüxü̃́ name. Rü aixcüma nixĩ ya Tupana choxü̃ ínguxuchixẽẽxü̃ nax chanaxüxü̃ca̱x i ngẽma mexü̃ i chanaxwa̱xexü̃, natürü tama name nax ta̱xacürü chixexü̃gu chaugü changu̱xẽẽxü̃ nax ngẽma chomaxã icuáxü̃ca̱x.
13 Rü ngẽxgumarüxü̃ ta rü ñuxre i duü̃xü̃gü rü ñanagürügü: “Õna rü taxü̃neca̱x nixĩ, rü taxü̃ne rü õnaca̱x nixĩ”, ñanagürügü. Rü aixcüma ngẽmaãcü nixĩ, natürü ya Tupana rü tá inayanaxoxẽxẽ i guxü̃ma i ngẽma. Rü taxü̃ne rü tama nai i ngexü̃maxã namaxã nax ingẽãẽmarexü̃ca̱x nixĩ. Erü taxü̃nemaxã nixĩ i inaxüxü̃ i tórü Coriarü ngúchaü̃. Rü tórü Cori nixĩ ya taxü̃nearü yora.
14 Rü nüma ya Tupana rü wena nanamaxẽxẽ ga tórü Cori ya Ngechuchu, rü ngẽxgumarüxü̃ tá ta norü poramaxã wena tüxü̃ namaxẽxẽxẽ.
15 ¿Rü tama ẽ̱xna nüxü̃ pecua̱x nax ngẽma pexene rü Cristuarü nax yixĩxü̃? ¿Rü ñuxãcü tá ngẽma chaxune i Cristuarü ixĩxü̃ rü wüxi i ngexü̃ i naxü̃nemaxã taxexü̃maxã namaxü̃? Taxucürüwama ngẽmaãcü nixĩ.
16 ¿Ẽ̱xna tama nüxü̃ pecua̱x rü ngẽxguma wüxi i ngexü̃ i naxü̃nemaxã taxexü̃maxã namaxü̃gu ya wüxi ya yatü rü ngẽma taxre i naxü̃ne rü wüxitama i naxü̃ne yixĩxü̃? Erü Tupanaarü ore i ümatüxü̃wa rü ñanagürü:“Ngẽma taxre i naxü̃ne rü wüxitama i naxü̃ne tá nixĩ”,
ñanagürü.
17 Natürü ngẽxguma wüxi i duü̃xü̃ rü tórü Cori ya Cristuaxü̃́ yaxõõxgu, rü ngẽma naãxẽ i ngẽma duü̃xü̃ rü Cristuãẽmaxã wüxigutama narüxĩnüe.
18 Rü ngẽmaca̱x name nixĩ nax nüxü̃ perüxoexü̃ i pexenearü ngúchaü̃ nax pexüxü̃. Rü guxü̃ma i togü i pecadu i wüxi i duü̃xü̃ üxü̃ rü tama naxü̃nexü̃ nachixexẽxẽ. Natürü ngẽma nax nai i ngexü̃maxã namaxü̃xü̃ rü ngẽmawaxi nixĩ i naxü̃nexü̃ chixexẽẽxü̃.
19 ¿Tama ẽ̱xna nüxü̃ pecua̱x i pexene rü Tupanaãxẽ i Üünexü̃pata nax yixĩxü̃? Rü pegu nixĩ i naxãchiü̃xü̃ i Naãxẽ ya Üünexü̃ ya Tupana pexna muxü̃. Rü ngẽmaca̱x i pema rü tama pexenearü yora pixĩgü.
20 Erü Tupana rü marü pexca̱x nataxe rü poraãcü nüxü̃́ petatanü. Rü ngẽmaca̱x penaxwa̱xe i ngẽma pexenemaxã mea Tupanaca̱x pemaxẽ rü nüxü̃ picua̱xüü̃gü.
