1 Corintios 9:1-27
9 Pemaxã nüxü̃ chixu rü tórü Coritama nixĩ ya choxü̃ yaxucü rü choxü̃ mucü nax norü puracü chaxüxü̃ca̱x, rü ngẽmaca̱x taxuxü̃ma i duü̃xü̃güme̱xẽwa changexma i ñu̱xmax. Rü chomatama chauxetümaxã tórü Cori ya Ngechuchuxü̃ chadau, rü ngẽma puracü i nüxü̃́ chaxüxü̃gagu nixĩ i peyaxõgüxü̃ i pemax.
2 Rü woo togü i duü̃xü̃gü tama choxü̃ cua̱xgüchaü̃gu nax tórü Cori choxü̃ muxü̃, natürü i pema rü meama nüxü̃ pecua̱x nax nüma yixĩxü̃ ga choxü̃ namuxü̃. Rü chauxü̃tawa nixĩ ga tórü Coriaxü̃́ peyaxõgüxü̃, rü ngẽmawa nüxü̃ pecua̱x nax aixcüma yixĩxü̃ nax nüma choxü̃ namuxü̃.
3 9:3-4 Rü ñaa nixĩ i chorü dexa i namaxã chanangãxü̃xü̃ i ngẽma duü̃xü̃gü i chauchiga idexagüxü̃: “¿Ẽ̱xna tama name nax duü̃xü̃gü choxna naxãxü̃ i chorü õna rü chorü axexü̃ naxca̱x i chorü puracü?
4 Nüü̃ nadau 9:3
5 ¿Ẽ̱xna tama i namexü̃ nax wüxi i ngexü̃ i yaxõxü̃maxã nax chaxãmaxü̃ nax chayagaxü̃ca̱x ngẽxgumarüxü̃ nax naxãmaxü̃ i Pedru, rü naenexẽgü ya tórü Cori, rü ngẽma togü i yatügü ya Tupana imugüxü̃?
6 ¿Rü ẽ̱xna pema nagu perüxĩnüegu rü choma rü Bernabéxicatama i tama namexü̃ nax toxü̃ perüngü̃xẽẽgüxü̃ ngẽma togü i orearü uruü̃güxü̃ nax perüngü̃xẽẽgüxü̃rüxü̃?
7 ¿Ta̱xacü rü duü̃xü̃ i churarawa ũxü̃ i nügüxü̃tama naxütanüxü̃ i norü õna? ¿Rü ta̱xacürü duü̃xü̃ i úba itoxü̃ i tama namúxü̃ i norü o? ¿Rü ta̱xacürü duü̃xü̃ i carnérugüna dauxü̃ i tama nagünenixü̃ ne ixaxüxü̃?”
8 ¡Rü ñu̱xma rü taxũtáma nagu perüxĩnüe nax chorü orexicatama yixĩxü̃ i ñaa nüxü̃ chixuxü̃! Erü Tupanaarü ore ga Moiché ümatüxü̃wa rü ta ngẽma ñanagürü.
9 Erü ngẽma ore i ümatüxü̃wa rü ñanagürü:“¡Ngẽma woca i tríguarü pute̱xewa puracüxü̃, rü taxũtáma cunawẽxnagu nax tama yimá triguwa nachibüxü̃ca̱x!”
ñanagürü i ngẽma ore. Rü nüxü̃ tacua̱x nax tama wocagügu naxĩnüxü̃ ga Tupana ga yexguma yema ñaxgu.
10 Natürü pemaxã nüxü̃ chixu rü tagu nixĩ ga naxĩnüxü̃ ga yexguma yema ñaxgu ga Tupana. Rü tachiga nixĩ ga naxümatüxü̃ ga yema ore. Erü yíxema trigunecü ǘxe rü yíxema norü oarü pu̱xwa puracüxe, rü wüxigu ítanangu̱xẽxẽ i norü o i tüxna üxü̃.
11 Rü toma rü wüxi ya nanetüchire ya itatoxü̃nerüxü̃ pemaxã nüxü̃ tixu ga Tupanaarü ore. ¿Rü ñu̱xma rü tama ẽ̱xna i pexca̱x namexü̃ nax toxna penaxãxü̃ i ta̱xacü i toxü̃́ taxuxü̃?
12 Rü ngẽxguma ngẽma togü i orearü uruü̃gü petanüwa nayauxgügu i ngẽma nüxü̃́ taxuxü̃, rü toma rü yexera name nixĩ i petanüwa tanayaxu i ngẽma toxü̃́ taxuxü̃. Natürü i toma rü tama ngẽmaãcü tanaxü. Erü toma rü guxü̃ i guxchaxü̃maxã taporae nax tama pexü̃́ tanaguxchaxẽẽxü̃ca̱x nax Cristuaxü̃́ peyaxõgüxü̃.
13 Pema nüxü̃ pecua̱x rü guxü̃ma i duü̃xü̃gü i Tupanapata ya taxü̃newa puracüexü̃, rü ngẽma õna ya yimá Tupanapata ya taxü̃newa ngẽxmaxü̃tama nangõ̱xgü. Rü ngẽma duü̃xü̃gü i Tupanapata ya taxü̃negu Tupanaca̱x naxü̃nagü daixü̃, rü nanade i ñuxre i ngẽma namachi norü ngõ̱xruxü̃.
14 Rü ngẽxgumarüxü̃ ta ya yíxema nüxü̃ ixugüxe i ore i tüxü̃ maxẽxẽẽxü̃, rü tórü Cori nüxü̃ nixu rü name nixĩ i tanayauxtanü i ngẽma tümaarü puracü.
15 Natürü i chomax rü taguma ngẽmaãcü chanaxü. Rü ñu̱xma nax pexca̱x chanaxümatüxü̃ i ñaa popera, rü tama ta̱xacü choxna pexãxü̃ca̱x nixĩ. Erü ngẽma nax taguma texéxü̃tawa ta̱xacüca̱x íchacaxaxü̃, rü wüxi i chorü taãxẽ nixĩ. Rü narümemae chi nixĩ nax chayuxü̃ naxü̃pa nax texé choxna nayaxuxü̃ i ñaa taãxẽ i choxü̃́ ngẽxmaxü̃.
16 Rü ñu̱xma nax nüxü̃ chixuxü̃ i ngẽma ore i tüxü̃ maxẽxẽẽxü̃, rü taguma ngẽmaca̱x chaugü chicua̱xüxü̃. Erü woetama ngẽma nixĩ i chorü puracü ga Tupana choxna ãxü̃, rü ngẽmaca̱x taxucürüwama chanangexrü. Erü poraãcü chi chachixexü̃gu i ngẽxguma taxũchima nüxü̃ chixuxgu.
17 Rü ngẽxguma chi chaugagu chitama chanaxüxgu i ngẽma puracü, rü nagu chi charüxĩnü nax choxü̃́ naxãtanüxü̃. Natürü ngẽxguma Tupana choxü̃ muxü̃ãcüma chanaxüxgu, rü chanaxüama erü woetama ngẽma nixĩ i chorü puracü ga Tupana choxna ãxü̃.
18 ¿Rü ñu̱xma rü ta̱xacü tá nixĩ i chorü natanü naxca̱x i ngẽma puracü i chaxüxü̃? Rü chorü natanü nixĩ i ngẽma taãxẽ i chayaxuxü̃ i ngẽxguma ngetanüãcüma nüxü̃ chixuxgu i ngẽma ore i tüxü̃ maxẽxẽẽxü̃. Rü ngẽmaãcü woo name nax petanüwa chanayaxuxü̃ i chorü natanü nax ngẽmamaxã chamaxü̃xü̃ca̱x, natürü taguma texéna naxca̱x chaca.
19 Rü woo taxúxearü mugüruxü̃ chixĩ i chomax, natürü guxãarü mugüruxü̃ chaugü chixĩxẽxẽ, nax ngẽmaãcü muxü̃ma i duü̃xü̃gü Cristuaxü̃́ yaxõgüxü̃ca̱x.
20 Rü yexguma chautanüxü̃ ga Yudíugütanüwa chayexmagu, rü namaxã chaugü chawüxiguxẽxẽ nax yemaacü nüxü̃ charüngü̃xẽẽxü̃ca̱x nax Cristuaxü̃́ yaxõgüãxü̃ca̱x. Rü woo tama yema Moiché ümatüxü̃ ga mugütüü̃wa changexmagu, natürü chayanguxẽẽãma i ngẽma mugü nax ngẽmaãcü Cristuxü̃tawa chanagagüxü̃ i ngẽma duü̃xü̃gü i ñu̱xma rü ta nagu ĩxü̃ i ngẽma mugü ga Moiché ümatüxü̃.
21 Rü yexguma natanüwa chayexmagu ga yema duü̃xü̃gü ga tama Yudíugü ixĩgüxü̃, rü yema duü̃xü̃gümaxã chaugü chawüxiguxẽxẽ nax yemaacü nüxü̃ charüngü̃xẽẽxü̃ca̱x nax Cristuaxü̃́ yaxõgüãxü̃ca̱x. Natürü taguma íchanange̱x i Tupanaarü mugü. Rü guxü̃guma Cristuarü mugütüü̃wa changexma.
22 Rü yexguma natanüwa chayexmagu ga yema duü̃xü̃gü ga norü õwa turaexü̃, rü choma rü ta yema duü̃xü̃gümaxã chaugü chawüxiguxẽxẽ, nax yemaacü nüxü̃ charüngü̃xẽẽxü̃ca̱x nax Cristuaxü̃́ yaxõgüãxü̃ca̱x. Rü yemaacü guxü̃ma ga duü̃xü̃gürüxü̃ chaugü chixĩxẽxẽ, rü naguxü̃raü̃ãcüma naxca̱x chadau nax yemaacü düxwa Tupanaxü̃tawa chanagagüxü̃ca̱x ga ñuxre ga nümagü.
23 Rü ngẽmaãcü nixĩ i chapuracüxü̃ nax guxü̃wama nanguxü̃ca̱x i ngẽma ore i mexü̃ i tüxü̃ maxẽxẽẽxü̃. Erü chanaxwa̱xe nax choma rü ta choxü̃́ nangẽxmaxü̃ i ngẽma maxü̃ i taguma gúxü̃, naxrüxü̃ i guxü̃ma i ngẽma duü̃xü̃gü i nüxü̃́ yaxõgüxü̃.
24 Pema rü meama nüxü̃ pecua̱x i wüxi i inüca i nawa iñaãchixü̃ rü muxü̃ma inaxü̃ãchi, natürü wüxixicatama nixĩ i ngẽma nüxíra ínguxü̃ rü nayaxuxü̃ i norü ãmare. Rü name nixĩ i pegüna pedau nax Tupana pexna naxãxü̃ca̱x i ngẽma perü ãmare.
25 Guxü̃ma i ngẽma duü̃xü̃gü i nügü ngúexẽẽxü̃ naxca̱x i wüxi i inüca nax toguegüxü̃ naporamaexü̃ca̱x, rü mea nügüna nadaugü nax ngẽmaãcü nayauxgüãxü̃ca̱x i norü ãmare i paxaãchiruxü̃ ixĩxü̃. Natürü yixema nax yaxõgüxü̃ rü yigüna tadaugü nax nayauxgüxü̃ca̱x i tórü ãmare i taguma gúxü̃.
26 Rü ngẽmaca̱x i choma rü tama ñoma chauechitamare chiñaxü̃rüxü̃ chixĩ, rü tama ñoma ta̱xacü i nügü daixü̃ i ngürüanegumare idagüxü̃rüxü̃ chixĩ.
27 Natürü mea chaugümaxã ichacua̱x nax taxuxü̃ma i chaxünearü ngúchaü̃ chaxüxü̃ca̱x. Erü tama chanaxwa̱xe i mexü̃maxã togüxü̃ changu̱xẽẽmare rü ñu̱xũchi chixexü̃ chaxü rü ngẽmagagu tama chanayaxu i chorü ãmare.
