1 Crónicas 11:1-47
11 Rü guxü̃ma ga Iraéanecüã̱xgüarü ãẽ̱xgacügü rü nangutaque̱xegü rü ĩane ga Ebróü̃wa naxĩ rü Dabímaxã narüdexagü. Rü Dabíxü̃ ñanagürügü: —Toma rü cutanüxü̃tama tixĩgü.
2 Natürü woo yexguma tórü ãẽ̱xgacü yixĩxgu ga Chaú, natürü cuma nixĩ ga Iraéanearü churaragümaxã icucuáxü̃ ga yexguma tórü uanügümaxã nügü nadaixgu. Rü ñu̱xũchi nüma ya Cori ya curü Tupana rü cumaxã inaxuneta nax cuma yixĩxü̃ i tomaxã icucuáxü̃ nax torü ãẽ̱xgacü quixĩxü̃ca̱x —ñanagürügü.
3 Rü yexguma ga nüma ga Dabí rü Cori ya Tupanape̱xewa natanüxü̃ga naxĩnü. Rü nümagü rü Dabíxü̃ chíxü̃maxã nabaerugü nax Iraéanecüã̱xgüarü ãẽ̱xgacü yixĩxü̃ca̱x. Yerü yemaacü nixĩ ga Tupana ga Chamuémaxã nüxü̃ yaxuxü̃.
Dabí rü nanapu ga yema norü uanügüarü dauxü̃taechica ga ma̱xpǘne ga Chióü̃wa yexmaxü̃
4 Dabí rü guxü̃ma ga yema Iraéanecüã̱xgüarü ãẽ̱xgacügü rü Yerucharéü̃wa naxĩ. Rü guma ĩane rü Yebúgu nixĩ ga naxãégaxü̃ ga noxri, yerü yema naanegu nixĩ ga naxãchiü̃güxü̃ ga Yebútanüxü̃.
5 Natürü nüma ga yema Yebúcüã̱x rü Dabína nanachu̱xgü rü ñanagürügü: —Cuma rü taxuacüma nuxã cuxücu —ñanagürügü. Natürü nüma ga Dabí rü nanapu ga yema dauxü̃taechica ga ma̱xpǘne ga Chióü̃wa yexmaxü̃. Rü yexguma marü napuãguwena rü nügügu nanaxüéga. Rü ñu̱xma rü Dabíarü Ĩane nixĩ i naéga.
6 Rü naxü̃pa ga nax napuãxü̃ ga yema nachica rü nüma ga Dabí rü ñanagürü: —Rü yíxema tüxíra naxca̱x íyagoõchixe i ngẽma Yebúcüã̱x rü yíxema tá tixĩ ya chorü churaragüarü ãẽ̱xgacüxü̃ tüxü̃ chaxunetaxe —ñanagürü. Rü Yoá ga Cheruiá nane nixĩ ga nüxíra Yebúcüãxgüca̱x íyagoõchicü rü gumáxü̃ naxuneta ga Dabí nax norü churaragüarü ãẽ̱xgacü yixĩxü̃ca̱x.
7 Rü yemawena ga nüma ga Dabí rü yema dauxü̃taechicagu naxãchiü̃. Rü yemaca̱x nixĩ ga Dabíarü Ĩanemaxã naxugüãxü̃.
8 Rü nüma ga Dabí rü nayaxüama ga guma ĩane nacüwawa ga yema dauxü̃taechica. Rü yoxni ga Yoá rü nayamexẽxẽ ga guma náigü ga Yerucharéü̃arü ĩgü ga nagu ínapogüexü̃wa.
9 Rü yemaacü ga Dabí rü guxü̃wama nanguchiga nax naporaxüchixü̃. Rü nüma ya Cori ya Tupana ya Guxãétüwa Ngẽxmacü rü naxü̃tawa nayexma.
Dabíarü churaragüarü ãẽ̱xgacügü ga iporaexü̃
10 Rü ñaagü nixĩ ga yema Dabíarü churaragü ga yexera rüporamaegüxü̃ rü tama muü̃wa̱xegüxü̃ ga nüxü̃ rüngü̃xẽẽgüxü̃ ga yexguma ãẽ̱xgacü yixĩxgu. Rü nümagü rü wüxigu guxü̃ma ga Iraétanüxü̃maxã nixĩ ga Dabíxü̃ yangucuchixẽẽgüxü̃ nax ãẽ̱xgacü yixĩxü̃ca̱x, yema Cori ya Tupana Iraétanüxü̃maxã nüxü̃ ixuxü̃ãcüma.
11 Rü ñaa nixĩ ga naégagü ga yema Dabíarü churaragü ga rüporamaegüxü̃: Yachobeáü̃ ga Axmoní nane. Rü nüma nixĩ ga namaxã inacuáxü̃ ga yema tomaepü̱x ga yexera rüporamaegüxü̃ rü tama muü̃wa̱xegüxü̃. Rü nüma rü wüxi ga daigu norü wocaemaxã nanadai ga 300 ga yatügü.
12 Rü nawe naxü ga Ereachá ga Dodó nane. Rü nüma ga Dodó rü Aótanüxü̃ nixĩ. Rü nüma ga Ereachá nixĩ ga wüxi ga yema tomaepü̱x ga yexera rüporamaexü̃ rü tama muü̃wa̱xexü̃.
13 11:13-14 Rü nüma ga Ereachá nixĩ ga Dabíxü̃tawa nayexmaxü̃ ga Pax-damíü̃wa ga yexguma Firitéugü daica̱x yexma ngutaque̱xegügu. Yéma nayexma ga wüxi ga chebádanecü. Rü yexguma Firitéugücha̱xwa yabuxmügu ga Iraétanüxü̃, rü nüma ga Ereachá rü Dabímaxã yema chebádanecüarü ngãxü̃wa Firitéugüxü̃ nananguxẽẽgü. Rü ínanapoxü̃ ga yema naane rü Firitéugüxü̃ narüporamaegü. Rü yemaacü nüma ga Cori ya Tupana rü poraãcü nanaporamaexẽẽgü.
14 Nüü̃ nadau 11:13
15 Rü wüxicana rü yema 30 ga íporaexü̃tanüwa rü tomaepü̱x Dabíxü̃tawa naxĩ ga Aduráü̃arü ãxmaxü̃wa. Rü nüma ga yema Firitéugüarü churaragü rü Refaíü̃arü doxonexü̃wa nayexmagü.
16 Rü nüma ga Dabí rü yema ãxmaxü̃wa nayexma ga yexguma wüxitücumü ga Firitéugüarü churaragü Beréü̃wa yexmagügu.
17 Rü nüma ga Dabí rü nita̱xawa rü yemaca̱x ñanagürü: —Chierüx texe yima puchu ya Beréü̃arü ĩã̱xwa ngẽxmacüarü dexá nua choxü̃ tangexgu —ñanagürü.
18 Rü yexgumatama ga yema tomaepü̱x ga tama muü̃ewa̱xexü̃ rü Firitéugü íyexmagüxü̃wa naxĩ rü gumá puchu ga Beréü̃arü ĩã̱xwa yexmacüwa dexá tanayauxgü. Rü ñu̱xũchi Dabíxü̃tawa nanangegü. Natürü nüma ga Dabí rü tama nayaxaxchaü̃, rü ínanabamare, rü yemaacü Cori ya Tupanana nanaxã.
19 Rü ñanagürü: —Tupana rü tama nanaxwa̱xe nax chayaxa̱xüxü̃ i ñaa dexá. Erü ngẽxguma chi chayaxaxügu rü ñoma ngẽma tomaepü̱x i yatüarü nagüwa chaxaxexü̃rüxü̃ chi nixĩ. Erü nümagü rü ãũcümaxü̃wa nanangexmagüxẽxẽ i norü maxü̃ nax nawa naxĩxü̃ca̱x i ngẽma dexá —ñanagürü. Rü yema nixĩ ga naxügüxü̃ ga yema tomaepü̱x ga yatü ga tama muü̃wa̱xegüxü̃.
20 11:20-21 Rü Abichái ga Yoá naenexẽ nixĩ ga namaxã icuáxü̃ ga yema 30 ga yexera rüporamaegüxü̃ rü tama muü̃wa̱xegüxü̃. Rü wüxi ga ngunexü̃gu Abichái norü wocaemaxã nanadai ga 300 ga yatü. Rü yemaca̱x natachiga natanüwa ga yema 30 ga yexera rüporamaegüxü̃. Rü nawa nangu nax yema 30 maxã inacuáxü̃. Natürü nüma ga Abichái rü tama namaxã nawüxigu ga yema tomaepü̱x ga nüxíraxü̃güxü̃ ga Yoá rü Yachobeáü̃ rü Ereachá.
21 Nüü̃ nadau 11:20
22 Rü Benaía ga Yoiadá nane rü wüxi ga yatü ga poracü nixĩ. Rü nüma rü ĩane ga Caxcheécüã̱x nixĩ, rü muxü̃ma ga daiwa ínanguxuchi. Rü nüma nixĩ ga nadaiaxü̃ ga yema taxre ga nanegü ga Arié ga Moácüã̱x. Rü wüxi ga ngunexü̃ ga yexguma gáuxü̃ rüyixgu rü wüxi ga ãxmaxü̃gu naxücu rü yexma aixepegu wüxi ga leóü̃xü̃ nima̱x.
23 Rü yexgumarüxü̃ ta nayama̱x ga wüxi ga Equítuanecüã̱x ga máxchanexü̃chixü̃ ga wixgutaa̱x taxre ga metruarü ngãxü̃gu ixüchanexü̃. Rü yema Equítuanecüã̱x rü wüxi ga wocae ga tamena̱xãcümaxã naxãxne. Rü nüma ga Benaía rü wüxi ga naimaxã naxãxne. Natürü yema Equítuanecüã̱xna nanapu ga norü wocae rü gumamaxãtama nayama̱x.
24 11:24-25 Rü yema nax naxüxü̃gagu ga Benaía ga Yoiadá nane rü natachiga natanüwa ga yema 30 ga tama muü̃wa̱xegüxü̃. Rü nüma rü yema 30 arü yexera natachiga, natürü tama namaxã nawüxigu ga yema tomaepü̱x ga nüxíraxü̃güxü̃. Rü nüma ga Dabí rü Benaíaxü̃ naxuneta nax yema norü dauruü̃gümaxã inacuáxü̃ca̱x.
25 Nüü̃ nadau 11:24
26 Rü yema yexera tama muü̃wa̱xegüxü̃ rü ñaagü nixĩ: Achaé ga Yoá naenexẽ; rü Eranáü̃ ga Dodó ga Beréü̃cüã̱x ixĩxü̃ nane;
27 rü Chamóx ga Aróxcüã̱x; rü Ére ga Peróü̃cüã̱x;
28 rü Irá ga Iqué nane ga Tecóacüã̱x; rü Abiéche ga Anatócüã̱x;
29 rü Chibecái ga Uchácüã̱x; rü Irái ga Aótanüxü̃;
30 rü Maarái ga Netopácüã̱x; rü Érex ga Baaná nane ga Netopácüã̱x ta ixĩxü̃;
31 rü Itái ga Ribái nane ga Bẽyamíü̃anewa yexmane ga ĩane ga Guibeácüã̱x; rü Benaía ga Piratóü̃cüã̱x;
32 rü Idái ga Gaáarü natücüã̱x; rü Abié ga Arbácüã̱x;
33 rü Amábe ga Bauríü̃cüã̱x; rü Eriabá ga Chaabóü̃cüã̱x;
34 rü nanegü ga Yachéü̃ ga Guichóü̃cüã̱x ixĩxü̃; rü Yonatáü̃ ga Chagué ga Araráanecüã̱x nane;
35 rü Aiáü̃ ga Chacá ga Araráanecüã̱x nane; rü Eripá ga Úx nane;
36 rü Éfe ga ĩane ga Mequerácüã̱x; rü Aía ga Peróü̃cüã̱x;
37 rü Eraí ga Carméxcüã̱x; rü Naarái ga Ebái nane;
38 rü Yoé ga Natáü̃enexẽ; rü Mibáx ga Agarái nane;
39 rü Chérex ga Amóü̃tanüxü̃; rü Naarái ga Beerúxcüã̱x. Rü nüma ga Naarái rü Yoá ga Cheruiá nanearü ngü̃xẽẽruxü̃ nixĩ ga naxnegüarü ngewa.
40 Rü yema churaragü ga tama muü̃wa̱xegüxü̃tanüwa nayexma ta ga Irá ga Yatícüã̱x; rü Garéx ga Yatícüã̱x ta;
41 rü Uría ga Itítanüxü̃; rü Chabáx ga Araí nane;
42 rü Adiná ga Rubéü̃tanüxü̃ ga Chichá nane. Rü nüma ga Chichá nixĩ ga Rubéü̃tanüxü̃maxã icuáxü̃. Rü nüxü̃́ nayexma ga 30 ga yatügü.
43 Rü yema Dabíarü churaragütanüwa nayexma ta ga Anáü̃ ga Maacá nane; rü Yochapáx ga Mixníxcüã̱x;
44 rü Uchía ga Atarúcüã̱x; rü Chamá rü Yeié ga Otáü̃ ga Aroécüã̱x nanegü;
45 rü Yediaé ga Chimrí nane rü naenexẽ ga Yoá ga Tichícüã̱x ixĩxü̃;
46 rü Erié ga Maanaíü̃cüã̱x; rü Yerebái rü Yochabía ga Ernaáü̃ nanegü; rü Ixmá ga Moátanüxü̃;
47 rü Erié, rü Obéx, rü Yaachié ga Chobácüã̱x ixĩgüxü̃.
