1 Crónicas 12:1-40
12 Rü yexguma Dabí iñaxgu naxcha̱xwa ga Chaú ga Chíx nane, rü ñuxre ga churaragü ga poraexü̃ rü Dabíwa nachoü̃ ga Chicáxwa. Rü yemagü nixĩ ga Dabíxü̃ rüngü̃xẽẽgüxü̃ ga daiwa.
2 Rü yema churaragü ga würamaxã ixãxnexü̃ rü nüxü̃ nicua̱xüchi nax norü tügünechacüxümaxã rü norü to̱xwechacüümaxã norü maxgütaeruü̃maxã inamaxgüaxü̃ ga nuta. Rü yexgumarüxü̃ ta nüxü̃ nicua̱xüchi nax norü würamaxã inamaxgüaxü̃ ga norü chuxchi. Rü ñaagü nixĩ ga naégagü rü nachica ga nagu nabuexü̃ ga yema Chaútanüxü̃ ga Bẽyamíü̃tücumüwa ne ĩxü̃ rü Dabíwa choü̃xü̃:
3 Rü Aiéche rü Yoá nixĩ ga taxre. Rü nümagü rü Guibeácüã̱x ga Chemaá nanegü nixĩgü. Rü Aiéche nixĩ ga yema churaragümaxã icuáxü̃ rü naenexẽ ga Yoá nixĩ ga nawe üxü̃. Rü togü nixĩ ga Amábe nanegü ga Yechié rü Pérex. Rü togü ga namücügü nixĩ ga Beracá rü Yeú. Rü nümagü rü ĩane ga Anatócüã̱x nixĩgü.
4 Rü to ga natanüxü̃maxã icuáxü̃ nixĩ ga Imaía ga Gabaóü̃cüã̱x. Rü nüma rü yema 30 ga churaragü ga tama muü̃wa̱xegüxü̃tanüwa naxü rü namaxã inacua̱x. Rü togü ga Dabíwe rüxĩxü̃ nixĩ ga Yeremía, rü Yaachié, rü Yoanáü̃, rü Yochabá ga Guederácüã̱x,
5 rü Eruchái, rü Yerimóx, rü Bearía, rü Chemaría rü Chepatía ga Arupítanüxü̃,
6 12:6-7 rü Yoerá rü Chebadía. Rü yema taxre rü Yeruáü̃ ga Guedóxcüã̱x nanegü nixĩgü. Rü nayexmagü ta ga Corétanüxü̃ ga Ercaná rü Ichía rü Acharé rü Yoéche rü Yachobeáü̃.
7 Nüü̃ nadau 12:6
8 Rü nayexma ta ga ñuxre ga Gáxtanüxü̃ ga Dabíwa choü̃xü̃ ga yexguma chianexü̃wa nayexmagu ga Dabí. Rü nümagü rü churaragü ga tama muü̃wa̱xegüxü̃ rü daica̱x ngúexü̃ nixĩgü. Rü wocaegümaxã nixãxne rü poxü̃ruxü̃ nüxü̃́ nayexma. Rü nanuchametügü ñoma leóü̃gürüxü̃. Rü yexguma ma̱xpǘnegüwa ínaxüãchigu rü ñoma cowürüxü̃ nixĩgü.
9 Rü ñaagü nixĩ ga naégagü ga yema churaragü: Éche nixĩ ga namaxã icuáxü̃, rü Adía nixĩ ga nawe üxü̃, rü Eriá nixĩ ga norü tomaepü̱x,
10 rü Michimaná nixĩ ga norü ãgümücü, rü Yeremía nixĩ ga norü wüxime̱e̱xpü̱x,
11 rü Atái nixĩ ga norü 6, rü Erié nixĩ ga norü 7,
12 rü Yoanáü̃ nixĩ ga norü 8, rü Echabá nixĩ ga norü 9,
13 rü Yeremía nixĩ ga norü 10, rü Mabanái nixĩ ga norü 11.
14 Rü yema Gáxtanüxü̃ rü churaragüeru nixĩgü. Rü yema yexera nüxü̃ rücua̱xmaexüchixü̃ rü 1,000 ga churaragümaxã inacua̱x rü yema natüxü̃wa yexmaxü̃ rü 100 ga churaragümaxã inacua̱x.
15 Rü yema churaragü nixĩ ga ichoü̃amaxü̃ ga natü ga Yudáü̃ ga yexguma gumá nüxíraü̃cü ga tauemacügu poraãcüxüchi nabaixgu. Rü tüxü̃ nibuxmüxẽxẽ ga guxema duẽxẽgü ga yema ínadoxonexü̃wa maxẽxe ga natüarü éstewaama rü oéstewaama.
16 Rü yexgumarüxü̃ ta ñuxre ga Bẽyamíü̃tanüxü̃ rü Yudátanüxü̃ rü Dabí íyexmaxü̃wa naxĩ nax nawa naxügüxü̃ca̱x.
17 Rü yexguma yema duü̃xü̃güxü̃ nada̱u̱xgu rü nüma ga Dabí rü naxca̱x nixũ rü ñanagürü: —Ngẽxguma chorü ngü̃xẽẽwa nua pexĩxgu rü guxü̃ne ya chorü maxü̃nemaxã pexü̃ chade nax chorü churaragütanüwa pichoü̃xü̃ca̱x. Natürü ngẽxguma chixexü̃ i ĩnümaxã nua pexĩxgu nax chauechita chorü uanügüna choxü̃ ípexuaxü̃xü̃ca̱x yixĩxgu, rü ẽcü pexü̃ napoxcu ya yima tórü o̱xigüarü Tupana, erü choma rü taxúemaama guxchaxü̃ chaxü rü tama wüxi i máetaxü̃ chixĩ —ñanagürü ga Dabí.
18 Rü Tupanaãxẽ nüxna nangu ga Amachái ga namaxã icuácü ga yema 30 ga Dabíarü churaragü ga rüporamaegüxü̃, rü ñanagürü: —Pa Dabíx Pa Ichaxí Nanex, toma rü curü ngü̃xẽẽruü̃gü tixĩgü, rü tanaxwa̱xe nax mea cuxü̃́ ínanguxuchixü̃ i guxü̃ma i nagu curüxĩnüxü̃wa. Rü tanaxwa̱xe i mea nüxü̃ naxüpetüxü̃ i guxü̃ma i ngẽma cuwa ügüxü̃, erü yimá curü Tupana cuxü̃ narüngü̃xẽxẽ —ñanagürü. Rü yexguma nüma ga Dabí rü nanade rü norü churaragüeruxü̃ nayaxĩgüxẽxẽ.
19 Rü yexgumarüxü̃ ta ga ñuxre ga Manachétanüxü̃ rü Dabíwa nachoü̃ ga yexguma Firitéugütanüwa nayexmagu nax Chaúmaxã nügü nada̱i̱xü̃ca̱x. Natürü nüma ga yema Firitéugüarü churaramaxã icua̱xgüxü̃ rü tama nanaxwa̱xe nax Dabí rü norü churaragümaxã Firitéugütanügu naxãgüxü̃ ga yema daiwa. Rü yemaca̱x ñanagürügü: —Dabí rü ngürüãchi tá tüxü̃ nadai, rü ngẽmawena rü tá norü ãẽ̱xgacü i Chaúca̱x nataegu —ñanagürügü.
20 Rü ñaagü nixĩ ga yema churaragü ga Manachétanüxü̃ ga Dabíwa choü̃xü̃ ga yexguma Chicáxwa nayexmagu: Axná, rü Yochabá, rü Yediaé, rü Micaé, rü Yochabá, rü Eriú, rü Chiletái. Rü wüxichigü ga nümagü rü 1,000 ga Manachétanüxü̃arü churaragümaxã inacua̱xgü.
21 Rü guxü̃ma ga nümagü rü churaragü ga iporaxü̃ nixĩgü. Rü yemagü nixĩ ga Dabíarü churaragümaxã icua̱xgüxü̃ rü Dabíxü̃ rüngü̃xẽẽgüxü̃ ga yexguma norü uanügümaxã nügü nadaixgu. Rü nümagü rü Dabíarü churaragüarü ãẽ̱xgacügüwa nangugü.
22 Rü wüxichigü ga ngunexü̃gu rü nimuetanü ga churaragü ga Dabíwa choü̃xü̃. Rü yemaacü düxwa namuxũchi, rü wüxi ga churaragütücumü ga taxü̃ rü poraxüchixü̃ nixĩ.
Churaragü ga Dabíwa choü̃xü̃ ga Ebróü̃wa
23 Rü ñaa nixĩ ga norü mu ga yema churaragü ga meama ixãxnexü̃ rü daixü̃ icuáxü̃ ga Dabíwa choü̃xü̃ ga Ebróü̃wa nax Chaúchicüxü Iraéanearü ãẽ̱xgacüxü̃ yangucuchixẽẽgüãxü̃ca̱x, yema Cori ya Tupana naxunagüxü̃rüxü̃.
24 Rü yema churaragü rü ñaa nixĩ ga norü mu: Rü yema Yudátanüxü̃ rü 6,800 nixĩ ga daica̱x ímegüxü̃. Rü guxü̃ma ga yemagü rü wocaemaxã nixãxne rü nüxü̃́ nayexma ga norü poxü̃ruü̃gü.
25 Rü Chimeóü̃tanüxü̃ ixĩgüxü̃ rü 7,100 nixĩ ga norü mu ga churaragü ga iporaexü̃.
26 Rü yema Lebítanüxü̃ ixĩgüxü̃ rü 4,600 nixĩ.
27 Rü yema Aróü̃tanüxü̃ ixĩgüxü̃ rü 3,700 nixĩ ga norü mu. Rü Yoiadá nixĩ ga namaxã icua̱xü̃.
28 Rü Chadóx rü wüxi ga ngextü̱xücü nixĩ, natürü wüxi ga churara ga poracü nixĩ rü 22 ga natanüxü̃arü ãẽ̱xgacügümaxã yéma nangu.
29 Rü Bẽyamíü̃tanüxü̃ ga Chaútanüxü̃ ixĩgüxü̃ rü 3,000 nixĩ ga norü mu. Rü nümagü rü Chaúarü churaragüchire̱x nixĩgü.
30 Rü yema Efraíü̃tanüxü̃ ixĩgüxü̃ rü 20,800 nixĩ ga norü mu. Rü nümagü rü daiwa poraexü̃ nixĩgü rü natanüxü̃tanüwa rü natachigagü.
31 Rü yema ngãxü̃tücumü ga Manachétanüxü̃ rü 18,000 nixĩ ga norü mu. Rü yemagü nixĩ ga nüxü̃ naxunetagüxü̃ nax Dabíxü̃ yangucuchixẽẽgüxü̃ca̱x nax Iraéanearü ãẽ̱xgacü yixĩxü̃ca̱x.
32 Rü yema Ichacátanüxü̃ rü 200 ga ãẽ̱xgacügü nixĩ. Rü nümagü rü guxü̃ma ga natanüxü̃ ga churaragümaxã yéma Dabíxü̃tawa nangugü. Rü nüma ga yema churaragüarü ãẽ̱xgacügü rü meama nüxü̃ nacua̱xgü i ñuxgu tá rü ñuxãcü tá namexü̃ nax Iraétanüxü̃ norü uanügümaxã nügü nada̱i̱xü̃.
33 Rü yema Chaburóü̃tanüxü̃ ixĩgüxü̃ rü 50,000 nixĩ ga norü mu. Rü nümagü rü churaragü ga daixca̱x ímemarexü̃ nixĩgü rü nüxü̃́ nayexmagü ga naguxü̃raü̃xü̃ ga naxnegü. Rü ínamemaregü nax Dabíxü̃ nangü̃xẽẽgüxü̃.
34 Rü yema Netarítanüxü̃ rü 1,000 nixĩ ga churaragüerugü ixĩgüxü̃. Rü 37,000 nixĩ ga norü churaragü. Rü guxü̃ma ga yemagü rü meama wocaegümaxã nixãxne rü nipoxü̃ruü̃ã̱x.
35 Rü yema Dáü̃tanüxü̃ rü 28,600 nixĩ ga norü churaragü.
36 Rü yema Achétanüxü̃ rü 40,000 nixĩ ga norü mu. Rü nümagü rü churaragü ga da̱i̱xca̱x ímegümarexü̃ nixĩgü.
37 Rü yema Rubéü̃tanüxü̃ rü Gáxtanüxü̃ rü yema ngãxü̃tücumü ga Manachétanüxü̃ rü natü ga Yudáü̃arü tocutüwa namaxẽ. Rü 120,000 nixĩ ga norü mu, rü nüxü̃́ nayexmagü ga naguxü̃raü̃xü̃ ga naxnegü.
38 Rü guxü̃ma ga yema churaragü rü daica̱x ínamemaregü. Rü taãẽãcü Ebróü̃wa naxĩ nax Dabíxü̃ yangucuchixẽẽgüxü̃ca̱x nax guxü̃ma i Iraétanüxü̃arü ãẽ̱xgacü yixĩxü̃ca̱x. Rü guxü̃ma ga yema togü ga Iraétanüxü̃ rü yexgumarüxü̃ ta yemagutama narüxĩnüe.
39 Rü guxü̃ma ga yema churaragü rü tomaepü̱x ga ngunexü̃ yéma Dabíxü̃tawa nayexmagü ga Ebróü̃wa. Rü nachibüe rü naxaxegü, yerü yema togü ga natanüxü̃ rü naxca̱x naxüwemügü.
40 Rü yema nüxna ngaicamagüxü̃ rü woo ga yema nüxna yáxü̃gugüxü̃ ga Ichacátanüxü̃ rü Chaburóü̃tanüxü̃ rü Netarítanüxü̃ rü muxü̃ma ga nawemügü yéma naxca̱x nana. Rü caméyugu rü búrugu rü mulagu rü wocagu yéma nanana ga arínagü rü paü̃gü rü úbaarü patanüxü̃ rü bínugü rü chíxü̃gü. Rü yexgumarüxü̃ ta yéma nanagagü ga wocagü rü carnérugü. Rü namuxũchi ga guxü̃ma ga yema nawemügü, yerü guxü̃ma ga Iraétanüxü̃ rü nataãẽgü.
