1 Crónicas 13:1-14
13 Rü nüma ga Dabí rü nangutaque̱xe namaxã ga yema norü churaragüerugü rü capitáü̃gü nax norü ucu̱xẽgüca̱x ínaca̱xü̃ca̱x.
2 13:2-3 Rü yemawena rü guxü̃ma ga yema Iraéanecüã̱xgü ga yexma ngutaque̱xegüxü̃xü̃ ñanagürü: —Ngẽxguma chi perü me yixĩxgu i pemax rü nüma ya Cori ya Tupana tüxü̃́ natauxchaxẽẽãgu, rü name nixĩ i naxca̱x tangema i guxü̃ma i tatanüxü̃ i Iraéanewa ngẽxmagüxü̃ rü chacherdótegü rü Lebítanüxü̃ i norü ĩanewa rü norü naanewa ngẽxmagüxü̃. ¡Rü ngĩxã nüxna taxu nax nümagü rü ta tüxü̃ nangü̃xẽẽgüxü̃ca̱x nax nua nangegüxü̃ i ngẽma baú i Tupanaarü mugü nagu ixücuchixü̃! Yerü yexguma Chaú ãẽ̱xgacü ixĩxgucürüwa rü nüxü̃ itarüngümae ga yema baú —ñanagürü.
3 Nüü̃ nadau 13:2
4 Rü guxü̃ma ga yema duü̃xü̃gü rü norü me nixĩ nax yemaacü naxügüãxü̃. Yerü yema ore ga Dabí nüxü̃ ixuxü̃ rü naxca̱x rü name.
Dabí rü nayange ga yema baú ga Tupanaarü mugü nawa yexmaxü̃
5 Rü Dabí rü nanangutaque̱xexẽxẽ ga guxü̃ma ga Iraétanüxü̃. Rü Chió ga Equítuanearü üyewa inaxügü rü ñu̱xmata ĩane ga Amáca̱x íxücuxü̃wa nangu nax Dabíxü̃tawa naxĩxü̃ ga Iraétanüxü̃ nax Quiriáx-yearíü̃wa yayauxgüãxü̃ca̱x ga yema baú ga Tupanaarü mugü nawa yexmaxü̃.
6 Rü yemawena ga nüma ga Dabí rü wüxigu namaxã ga guxü̃ma ga yema Iraétanüxü̃ rü guma ĩane ga Quiriáx-yearíü̃wa naxĩ. Rü guma ĩane rü Yudáanewa nayexma rü Baará nixĩ ga to ga naéga. Rü guma ĩanewa naxĩ nax yéma yayauxgüãxü̃ca̱x ga yema baú ga Tupanaarü mugü nawa yexmaxü̃. Rü yema baúxü̃tawa nixĩ ga Cori ya Tupanamaxã yadexagüüxü̃. Rü nüma rü querubíü̃güarü ngãxü̃tanüwa nüxü̃́ nayexma ga norü tochicaxü̃.
7 Rü yema baú ga Tupanaarü mugüchixü̃ rü wüxi ga caru ga ngexwacaxü̃ne ga wocagü itúchigünegu nayaxüegü. Rü yemaacü Abinadápatawa nanangegü. Rü nümagü ga Uchá rü Aió rü yema carumaxã inacua̱xgü.
8 Rü nüma ga Dabí rü guxü̃ma ga Iraétanüxü̃maxã Cori ya Tupanape̱xegu naxĩ. Rü guxü̃ma i norü taãẽmaxã nawiyaegü, rü íniyüxü. Rü paxetaruü̃gü ga árpagümaxã rü árpa i íxraxü̃gümaxã rü paü̃derugümaxã rü platíyugümaxã rü cornétagümaxã nipaxetatanü.
9 Rü yexguma nachica ga Erá-quidóü̃gu ãégaxü̃wa nangugügu, rü nüma ga Uchá rü naxme̱xmaxã nüxü̃ nayayauxãchi ga yema baú ga Tupanaarü mugü nagu üxü̃ nax tama nanguxü̃ca̱x, yerü ga yema wocagü ga yangegüxü̃ rü iniyi yerü nutagu nayarüpucutügü.
10 Rü yemaca̱x ga Cori ya Tupana rü Uchámaxã nanu yerü nüxü̃ ningõgü ga yema baú ga Tupanaarü mugüchixü̃. Rü yemaca̱x nüma ga Tupana rü nüxna nanayaxu ga norü maxü̃, rü yexmatama nayu Cori ya Tupanape̱xegu.
11 Rü yexguma ga Dabí rü poraãcüma nanu yerü Cori ya Tupana rü Ucháxü̃ nayuxẽxẽ. Rü yemaca̱x ga yema nachica rü Fére-uchágu nanaxüéga. Rü ñu̱xma rü ta ngẽmatama nixĩ i naéga.
12 Natürü yematama ngunexü̃gu ga Dabí rü poraãcüma Tupanaxü̃ namuü̃, rü tagaãcü ñanagürü: —Marü tama nagu charüxĩnü nax chopatawa chanangexü̃ i ngẽma baú i Tupanaarü mugüchixü̃ —ñanagürü ga Dabí.
13 Rü yemaca̱x tama guma Dabíarü Ĩanewa nayange ga yema baú ga Cori ya Tupanaarü mugüchixü̃. Rü norü duü̃xü̃güxü̃ namu nax Obéx-edóü̃patagu naxügüã̱xü̃ca̱x. Rü nüma ga Obéx-edóü̃ rü wüxi ga yatü ga Gáxcüã̱x nixĩ.
14 Rü yema baú ga Cori ya Tupanaarü mugü nawa yexmaxü̃ rü tomaepü̱x ga tauemacü Obéx-edóü̃patawa nayexma. Rü nüma ga Cori ya Tupana rü poraãcü Obéx-edóü̃xü̃ narüngü̃xẽxẽ guxü̃ma ga norü yemaxü̃gümaxã.
