1 Crónicas 14:1-17
14 Rü Iráü̃ ga ĩane ga Tíruarü ãẽ̱xgacü ixĩcü rü Dabíxü̃tawa nanamugü ga ñuxre ga norü ngü̃xẽẽruü̃gü nax Dabímaxã yanadexagüxü̃ca̱x. Rü ñu̱xũchi yéma nanamugü ta ga yatügü ga nüxü̃ icuáxü̃ ga nutaarü mexẽẽcüwagü rü corapinagü. Rü yema duü̃xü̃gü rü yéma nanana ga mürapewagü ga ocayiwanaxca̱x nax yemamaxã naxügüãxü̃ca̱x ga guma Dabípata.
2 Rü nüma ga Dabí rü nüxna nacua̱xãchi nax Cori ya Tupana yixĩxü̃ ga guma nüxü̃ unetacü nax Iraéanearü ãẽ̱xgacü yixĩxü̃ca̱x, yerü nüxü̃ narüngü̃xẽxẽ nax mea yaxũxü̃ca̱x nax ãẽ̱xgacü yixĩxü̃ rü aixcüma mea Iraétanüxü̃maxã inacuáxü̃ca̱x.
Togü ga Dabí nanegü
3 Rü nüma ga Dabí rü toguxe ga ngexegümaxã naxãxma̱x ga Yerucharéü̃wa, rü yexera namu ga nanegü rü naxacügü.
4 14:4-7 Rü yema nanegü ga Yerucharéü̃gu buexü̃ nixĩ ga Chamúa, rü Chobáx, rü Natáü̃, rü Charomóü̃, rü Ibá, rü Erichúa, rü Eriférex, rü Nóga, rü Néfex, rü Yapía, rü Erichamá, rü Eriadá, rü Eriférex.
5 Nüü̃ nadau 14:4
6 Nüü̃ nadau 14:4
7 Nüü̃ nadau 14:4
Dabí rü Firitéugüxü̃ nadai
8 Rü yexguma Firitéugü nüxü̃ cua̱xgügu nax Dabí rü guxü̃ma ga Iraétanüxü̃arü ãẽ̱xgacüxü̃ nax yangucuchixü̃, rü guxü̃ma ga nümagü ga Firitéugü rü Dabíca̱x ínayaxüãchi. Natürü nüma ga Dabí rü nüxü̃ nacua̱x, rü yemaca̱x naxca̱x inaxũãchi.
9 Rü yexguma nümagü ga Firitéugü rü inixĩxü̃tanü rü nagu nachocu ga Refaíü̃arü doxonexü̃.
10 Rü nüma ga Dabí rü Cori ya Tupanamaxã nidexa, rü nüxna naca rü ñanagürü: —¿Tá chanadaixü̃ i Firitéugü? ¿Rü nüxü̃ tá choxü̃ curüporamaexẽxẽxü̃? —ñanagürü. Rü Cori ya Tupana nangãxü̃ rü nüxü̃ ñanagürü: —¡Ẽcü nadai! Rü tá nüxü̃ cuxü̃ charüporamaexẽxẽ —ñanagürü.
11 Rü yexguma ga Dabí rü Baá-perachíü̃wa naxũ rü naxca̱x ínayagoõchi, rü yexma nayadai. Rü yemaca̱x ñanagürü: —Ñoma wüxi i dexá i poraü̃chíüxü̃rüxü̃, Tupana choxü̃ nüxü̃ narüporamaexẽxẽ i chorü uanügü —ñanagürü. Rü yemaca̱x Baá-perachíü̃gu nanaxüégagü ga yema nachica.
12 Rü yema Firitéugü rü yéma nanawogü ga norü tupananetachicüna̱xãgü. Rü nüma ga Dabí rü norü duü̃xü̃güxü̃ namu nax ínaguaxü̃ca̱x.
13 Natürü ga yema Firitéugü rü wena nagu nachocu ga yema Refaíü̃arü doxonexü̃.
14 Rü yemaca̱x nüma ga Dabí rü wenaxarü Cori ya Tupanana naca. Rü nüma ga Tupana rü Dabíxü̃ nangãxü̃ rü ñanagürü: —¡Taxṹ i nape̱xewaama naxca̱x ípeyaxüãchixü̃! ¡Rü nüxü̃ ípechoegu rü naweama tá naxca̱x ípeyaxüãchi i ngẽxguma ngẽma nai i pengugügu!
15 Rü ngẽxguma naixtanüwa nüxü̃ cuxĩnügu i churaragücutüga ¡rü naxca̱x íyagoõchi erü ngẽma nixĩ i cua̱xruxü̃ nax choma rü cupe̱xegu chixũxü̃ nax chanadaixü̃ca̱x i ngẽma Firitéugüarü churaragü! —ñanagürü.
16 Rü nüma ga Dabí rü yema Tupana namuxü̃ãcü nanaxü, rü yemaacü Firitéugüxü̃ narüporamae ga Gabaóü̃wa rü ñu̱xmata Guéchewa nangu.
17 Rü yemaacü guxü̃ ga nachixü̃anegüwa nanguchiga ga Dabí. Rü nüma ga Cori ya Tupana rü yemaacü nanaxü nax yemaacü guxü̃ i nachixü̃anegücüã̱xgü nüxü̃ muü̃exü̃ca̱x.
