1 Crónicas 16:1-43
16 Rü yema baú ga Tupanaarü mugü nagu üxü̃ rü nawa nanangegü ga guma ĩpata ga naxchirunaxca̱x ga Dabí woetama yemaca̱x üxü̃ne. Rü ñu̱xũchi Tupanape̱xewa ínanagu ga ãmaregü ga Tupanaxü̃ namaxã nangüxmüxẽẽgüxü̃.
2 Rü yexguma marü nüxü̃ nachauegu nax Tupanaca̱x ãmare ínaguxü̃, rü nüma ga Dabí rü Tupanaégagu mexü̃ duü̃xü̃gümaxã naxuegu.
3 Rü ñu̱xũchi nüma ga Dabí rü guxü̃ma ga yema Iraétanüxü̃ ga iyatüxü̃ rü ngexü̃ rü wüxichigüxü̃ nayanu ga wüxi ga paũ, rü wüxi ga paũ ga maixcuraxü̃ ga dátilwa üxü̃, rü to ga paũ ga maixcuraxü̃ ga úbaarü pagüxü̃wa üxü̃.
4 Rü nüma ga Dabí rü nüxü̃ naxuneta ga ñuxre ga Lebítanüxü̃ nax yema baúpe̱xewa moxẽ nüxna naxãgüxü̃ca̱x rü nüxü̃ yacua̱xüü̃güxü̃ca̱x ya yimá norü Tupana i Iraétanüxü̃.
5 Rü Achá nixĩ ga namaxã icuáxü̃ ga yema Lebítanüxü̃ ga Dabí nüxü̃ unetaxü̃. Rü Acháweama naxü ga Chacaría, rü Chacaríaweama naxügü ga Yeié, rü Chemiramóx, rü Yexié, rü Matatía, rü Eriá, rü Benaía, rü Obéx-edóü̃ rü Yeié. Rü wüxichigü rü nüxü̃́ nayexma ga norü paxetaruxü̃ ga árpa ga ixíxraxü̃ rü árpa ga ítáxü̃ ga napaxgüxü̃. Rü Acháx nixĩ ga platiyuarü paxruxü̃ ixĩxü̃.
6 Rü nüma ga Chacherdótegü ga Benaía rü Yaachié nixĩ ga guxü̃guma cornétagu icuegüxü̃ nape̱xewa ga yema baú ga Tupanaarü mugüchixü̃.
Wiyaeãcü Tupanana moxẽ naxã ga Dabí
7 Rü yema ngunexü̃gu nixĩ ga Dabí noxri Acháxü̃ rü namücügüxü̃ namuxü̃ nax wiyaeãcü Tupanana moxẽ naxãgüxü̃ namaxã ga ñaa wiyae:
8 —¡Moxẽ nüxna pexãgü ya Cori ya Tupana!¡Rü norü ngü̃xẽxẽca̱x ípeca!¡Rü guxü̃ma i nachixü̃anecüã̱xgümaxã nüxü̃ pixu i ngẽma mexü̃gü i pexca̱x naxüxü̃!
9 ¡Rü perü wiyaegümaxã nüxü̃ picua̱xüü̃gü!¡Rü nüxü̃ pixugüe i ngẽma taxü̃ i mexü̃gü i naxüxü̃!
10 ¡Rü pegü namaxã picua̱xüü̃gü ya yimá üünecü!Rü pema nax naxca̱x pedaugüxü̃ ¡rü petaãxẽgü!
11 ¡Rü naxca̱x pexĩ ya Cori ya Tupana rü norü poraca̱x pedaugü!¡Rü guxü̃guma norü ngü̃xẽxẽca̱x ípeca!
12 16:12-13 ¡Rü nüxna pecua̱xãchie ga yema mexü̃gü ga taxü̃gü ga norü poramaxã naxüxü̃ rü ngẽma norü mugü ga pemaxã nüxü̃ yaxuxü̃,Pa Iraétanüxü̃ i Acóbutaagü ya Tupana Pexü̃ Unetagüxü̃x!
13 Nüü̃ nadau 16:12
14 Rü nüma nixĩ i Cori ya tórü Tupana yixĩxü̃.Rü nüma nixĩ i ñoma i naanemaxã inacuáxü̃.
15 16:15-17 Rü woo 1,000 tücumüwa ngupetügu nax yangṍetanüxü̃ i nataagü i ñoma i naanewa rü nüma ya Tupana rü tagutáma nüxü̃ inayarüngüma i norü uneta ga Abraáü̃maxã nüxü̃ yaxuxü̃ rü Ichaámaxã inaxügaxü̃ rü wenaxarü Acóbumaxã nüxü̃ yaxuxü̃ nax guxü̃gutáma nüxü̃ nangü̃xẽẽxü̃ i nataagü i Iraétanüxü̃.
16 Nüü̃ nadau 16:15
17 Nüü̃ nadau 16:15
18 Rü yemaca̱x Acóbumaxã nüxü̃ nixu rü ñanagürü nüxü̃:“Choma rü tá cuxna chanaxã i guxü̃ma i ñaa Canaáü̃ane nax guxü̃gutáma cuxrü rü cutaagüarü yixĩxü̃ca̱x”, ñanagürü.
19 16:19-22 Rü woo yema tórü o̱xigü rü noxretama ga tóxnamanacüã̱x nixĩgü natanüwa ga yema duü̃xü̃gü ga nua maxẽxü̃,rü woo ñuxre ga nachixü̃anegüwa nichopetüetanü rü ñuxre ga ãẽ̱xgacügüme̱xẽwa íninguxü̃etanü,natürü nüma ga Tupana rü tama nanaxwa̱xe nax texé chixri namaxã icuáxü̃ ga Iraétanüxü̃gü.Rü yemaca̱x yema ãẽ̱xgacügü ga naxme̱xwa nayexmagüxü̃maxã nüxü̃ nixu rü ñanagürü nüxü̃:“Tama chanaxwa̱xe i ngẽma choma nüxü̃ chaxunetaxü̃ i chorü duü̃xü̃gü rü chixri namaxã ipecua̱x rü ngẽma chorü orearü uruü̃gü rü ngúxü̃ nüxü̃ pingexẽẽgü”, ñanagürü.
20 Nüü̃ nadau 16:19
21 Nüü̃ nadau 16:19
22 Nüü̃ nadau 16:19
23 Pa Guxü̃ma i Ñoma i Naanecüã̱x i Duü̃xü̃güx¡rü naxca̱x pewiyaegü ya Cori ya Tupana!¡Rü guxü̃ i ngunexü̃gügu penaxunagü nax nüma yixĩxü̃ i tüxü̃ namaxẽxẽxẽxü̃!
24 ¡Rü guxü̃ma i duü̃xü̃gü i guxü̃ i nachixü̃anegüwa ngẽxmagüxü̃maxã nüxü̃ pixuchiga nax nüma rü naxüünexü̃ rü naxüaxü̃ i muxü̃ma i mexü̃gü i norü poramaxã naxüxü̃!
25 Erü nüma ya Cori ya Tupana rü guxãétüwa nangẽxma,rü ngẽmaca̱x name nax nüxü̃xicatama icua̱xüü̃güxü̃.Erü nüma rü naxãũcümaxü̃chi rü guxü̃ma i ngẽma tupananetagüarü yexera tanaxwa̱xe i nüxü̃ tamuü̃e.
26 Rü ngẽma togü i nachixü̃anegüarü tupanagü rü naxchicüna̱xãmare nixĩgü.Natürü nüma ya Cori ya Tupana nixĩ ga naxüxü̃ i guxü̃ma i ngẽma dauxü̃wa nüxü̃ idauxü̃.
27 Rü nüma ínangexmaxü̃wa rü poraãcü nangóone.Rü napatawa nangẽxma i pora rü taãxẽ.
28 Pa Guxü̃ma i Nachixü̃anecüã̱xgüx ¡rü nüxü̃ pixuchigagü rü nüma ya Cori ya Tupana rü nüxicatama yixĩxü̃ nax aixcüma naporaxü̃ rü naxüünexü̃!
29 ¡Rü nüxü̃ picua̱xüü̃gü erü ngẽma nixĩ i mexü̃ nax naxca̱x penaxüxü̃!¡Rü perü ãmaregümaxã naxü̃tawa pexĩ!¡Rü napata ya mexẽchínepe̱xewa nüxü̃ picua̱xüü̃gü!
30 Rü name nixĩ nax guxü̃ma i duü̃xü̃gü i ñoma i naanewa maxẽxü̃ rü aixcüma naga naxĩnüexü̃ rü nüxü̃ namuü̃exü̃.Yerü nüma rü namaxü̃gu nayaxũxẽxẽ ga ñoma i naane nax tama namaxü̃na yaxũgachixü̃ca̱x.
31 Rü name nixĩ i nataãxẽ i guxü̃ma i ngẽma daxũguxü̃ i naanewa ngẽxmagüxü̃,rü ngẽma ñoma i naanewa ngẽxmagüxü̃.¡Rü guxü̃ i nachixü̃anegüwa nüxü̃ pixu rü ñapegügü:“Nüma ya Cori ya Tupana nixĩ i ãẽ̱xgacü ya guxãétüwa ngẽxmacü yixĩxü̃”, ñapegügü!
32 Rü name nixĩ i norü taãẽmaxã naxãũga i ngẽma már,rü naxãũgatanü i guxü̃ma i ngẽma nawa ngẽxmagüxü̃.¡Rü nataãxẽ i ngẽma naanegü rü guxü̃ma i nanetügü i nawa ngẽxmagüxü̃!
33 Rü ngẽma naigü i naixnecüwa ngẽxmagüxü̃ rü name nixĩ i taãẽãcü nicuxcu nape̱xewa ya Cori ya Tupana ya núma ũcü nax ñoma i naanemaxã inacuáxü̃ca̱x.
34 ¡Rü moxẽ nüxna pexã ya Cori ya Tupana! Erü nüma rü namecümaxüchi rü ngẽma norü ngechaü̃ rü taguma nagu̱x.
35 Rü ñapegü nüxü̃:“¡Toxü̃ ínanguxü̃xẽxẽ, Pa Tupanax, Pa Torü Maxẽxẽxẽruxü̃x!¡Rü toxü̃ nade nax naxme̱xwa toxü̃ ícunguxü̃xẽxẽxü̃ca̱x i ngẽma togü i nachixü̃anegü nax ngẽmaãcü tanataxẽxẽxü̃ca̱x i cuéga i Üünexü̃ rü taãxẽãcüma cuxü̃ ticua̱xüxü̃güxü̃ca̱x”, ñapegü nüxü̃!
36 Rü guxü̃guma namecümaxüchi ya yimá tórü Cori ya Tupana i yixema i Iraétanüxü̃
—nawiyaegü ga Acháx rü namücügü. Rü guxü̃ma ga duü̃xü̃gü rü nachonagütanü rü ñanagürügü: —Aixcüma ngẽmaãcü nixĩ —ñanagürügü. Rü yemaacü Cori ya Tupanaxü̃ nicua̱xüü̃gü.
37 Rü nüma ga Dabí rü yema baú ga Cori ya Tupanaarü mugüchixü̃pe̱xegu nanamu ga Acháx rü namücügümaxã nax wüxichigü ga ngunexü̃gu naxügüã̱xü̃ca̱x ga yema Tupanapataarü puracü.
38 Rü nüma ga Dabí rü yexgumarüxü̃ ta nanamu ga Obéx-edóü̃ ga Yedutúü̃ nane rü Ochá namaxã ga 68 ga namücügü nax Tupanapataarü ĩã̱xarü dauruü̃gü yixĩgüxü̃ca̱x.
39 Rü Dabí rü chacherdóte ga Chadóxü̃ rü ñu̱xũchi namücügü i chacherdótegüxü̃ naxuneta nax Tupanapata ga nüxíraxü̃ne ga Gabaóü̃wa yexmanemaxã inacua̱xgüxü̃ca̱x.
40 Rü nanamu nax guxü̃guma pa̱xmama rü yáuanecü yema ãmarearü guruü̃wa Cori ya Tupanaca̱x ãmare yagugüxü̃ca̱x, yema Cori ya Tupanaarü mugüwa Iraétanüxü̃ca̱x naxümatüxü̃rüxü̃.
41 Rü yexgumarüxü̃ ta ga Dabí rü nüxü̃ naxuneta ga Emáü̃ rü Yedutúü̃ rü yema togü ga namücügü ga naégamaxã nadexü̃ nax Cori ya Tupanaca̱x nawiyaegüxü̃ca̱x nagu i ñaa wiyae: “Moxẽ Cori ya Tupanana pexã, erü norü ngechaü̃ rü taguma inayacua̱x”.
42 Rü nüma ga Emáü̃ rü Yedutúü̃ rü nüxü̃́ nayexma ga norü cornétagü rü platíyugü rü toamachigü ga norü paxetaruü̃gü nax yemamaxã napaxetagüxü̃ca̱x ga yexguma Tupanaca̱x nawiyaegügu. Rü yema ĩã̱xarü dauruü̃gü nixĩ ga Yedutúü̃ nanegü.
43 Rü yemawena rü guxü̃ma ga Iraétanüxü̃ rü napataca̱x nawoegu. Rü nüma ga Dabí rü ta napatawa naxũ nax napatacüã̱xgümaxã Cori ya Tupanaégagu mexü̃ naxueguxü̃ca̱x.
