1 Crónicas 19:1-19
19 Rü yixcamaxü̃ra ga yexguma nayu̱xgu ga Amóü̃tanüxü̃arü ãẽ̱xgacü ga Naáx, rü nachicüxü ãẽ̱xgacüxü̃ ningucuchi ga nane.
2 19:2-3 Rü yexguma ga Dabí rü nagu narüxĩnü nax Naáx nane ga Anúü̃maxã namecümaxü̃, yerü nüma ga Naáx ga Anúü̃ nanatü rü guxü̃guma Dabímaxã namecüma. Rü yemaca̱x nüma ga Dabí rü Anúü̃xü̃tawa nanamu ga ñuxre ga norü orearü ngeruü̃gü nax Anúü̃maxã nüxü̃ yanaxugüexü̃ca̱x nax nüma rü ta poraãcüxüchima nangechaü̃xü̃ naxca̱x nax nayuxü̃ ga nanatü ga Naáx. Natürü yexguma Amóü̃anewa nangugügu ga yema Dabíarü orearü ngeruü̃gü rü yema Amóü̃tanüxü̃maxã icua̱xgüxü̃ rü norü ãẽ̱xgacü ga Anúü̃maxã ñanagürügü: —Pa Ãẽ̱xgacüx, ¿ẽ̱xna cuma cuyaxõxü̃ i ngẽma yatügü i Dabí nua mugüxü̃ rü aixcüma yixĩxü̃ i nua nüxü̃ yanaxugüxü̃ nax ngechaü̃wa nangẽxmaxü̃ i Dabí naxca̱x nax nayuxü̃ ya cunatü? ¿Rü tama ẽ̱xna nua namugüãxü̃ nax nua ngugütaewa naxĩxü̃ca̱x nax mea nüxü̃ yacuáanegüxü̃ca̱x i tórü naane nax ngẽmaãcü nüxü̃́ natauxchaxü̃ca̱x nax tüxü̃ nada̱i̱xü̃? —ñanagürügü.
3 Nüü̃ nadau 19:2
4 Rü yexguma ga Anúü̃ rü norü duü̃xü̃güxü̃ namu nax Dabíarü orearü ngeruü̃güxü̃ ínayauxü̃xü̃ca̱x. Rü yexguma marü ínayauxü̃ãgu rü nayadüxchinágugü rü nata̱xrü̱xügu nayagáuyechirugü. Rü yemawena rü ñu̱xũchi ínayamugü.
5 Rü yexguma Dabímaxã nüxü̃ yanaxugüegu ga yema norü orearü ngeruü̃güxü̃ ngupetüxü̃, rü nüma ga Dabí rü norü duü̃xü̃güxü̃ yéma namugü nax íyadaugüãxü̃ca̱x, yerü nüxü̃ nacua̱x nax nümagü rü poraãcüxüchima naxãneexü̃. Rü yemaca̱x ga Dabí rü nanamu nax Yericúwa nayexmagüxü̃ rü ñu̱xmata naxügüchinagugü, rü yemawena naxü̃tawa nax naxĩxü̃ca̱x.
6 Rü yexguma Amóü̃tanüxü̃ nüxü̃ cua̱xgügu nax Dabíxü̃ nanuxẽẽgüxü̃, rü Mechopotámiawa, rü Chíriaanewa, rü Maacáanewa rü Chobáanewa nanamu ga 33,000 quíru ga diẽrumü nax nüxü̃ nangü̃xẽẽgüxü̃ca̱x ga churaragü ga cowaruétügu ĩxü̃ rü carugü ga dairuü̃gü nax yemaacü Dabímaxã nügü nada̱i̱xü̃ca̱x.
7 Rü Chíriaane rü inanamuãchitanü ga 32,000 ga carugü ga dairuxü̃ ga cowaru itúgüne. Rü Maacáanearü ãẽ̱xgacü rü guxü̃ma ga norü churaragümaxã nüxü̃ narüngü̃xẽxẽ. Rü guxü̃ma ga yema churaragü rü ĩane ga Medebáarü to̱xma̱xtawa nangugü rü yexma nügü naxüpatagü. Rü nüma ga Amóü̃tanüxü̃ rü norü ĩanegüna ínachoxü̃ nax nügü namexẽẽgüxü̃ca̱x nax Dabíarü churaragümaxã nügü nada̱i̱xü̃ca̱x.
8 Rü yexguma Dabí nüxü̃ cua̱xgu yema Amóü̃tanüxü̃ üxü̃, rü Yoáxü̃ inamuãchi namaxã ga guxü̃ma ga norü churaragü.
9 Rü nüma ga Amóü̃tanüxü̃ rü inaxĩãchi rü guma ĩaneca̱x íxücuxü̃wa nügü namexẽẽgü nax Yoámaxã nügü nada̱i̱xü̃ca̱x. Rü yema Chíriaanearü ãẽ̱xgacü rü yema togü ga ãẽ̱xgacügü ga Amóü̃tanüxü̃arü ngü̃xẽẽwa ĩxü̃ rü ĩanearü yáxü̃waxü̃ra nayexmagü.
10 Rü yexguma Yoá nüxü̃ da̱u̱xgu nax nape̱xewaama rü naweama ne naxĩxü̃ ga norü uanügü, rü nayadexechi ga yema Iraéanearü churaragü ga meama daixü̃ icuáxü̃. Rü yemaxü̃ namu nax Chíriaanearü churaragümaxã nügü nada̱i̱xü̃ca̱x.
11 Rü yema totücuma ga Iraétanüxü̃arü churaragü rü naenexẽ ga Abicháixü̃ namaxã inacua̱xẽxẽ nax Amóü̃tanüxü̃xü̃ nada̱i̱xü̃ca̱x.
12 Rü nüma ga Yoá rü naenexẽ ga Abicháixü̃ ñanagürü: —Rü ngẽxguma Chíriaanearü churaragü choxü̃ rüporamaegügu, rü cuma tá choxü̃ curüngü̃xẽxẽ. Rü ngẽxguma Amóü̃tanüxü̃arü churaragü cuxü̃ rüporamaegügu, rü choma tá cuxü̃ charüngü̃xẽxẽ.
13 ¡Rü pegü peporaexẽxẽgü rü taxṹ ipemuü̃exü̃! ¡Rü ngĩxã itanaxã i tórü pora naxca̱x ya tachixü̃ane rü tórü ĩanegü i Cori ya Tupana tüxna naxü̃ne! Rü nüma ya Cori ya Tupana rü tá tüxü̃ narüngü̃xẽxẽ namaxã i ngẽma norü ngúchaü̃ ixĩxü̃ —ñanagürü.
14 Rü nüma ga Yoá rü inanaxügü nax norü churaragümaxã inaxĩxü̃ nax Chíriaanearü churaragümaxã nügü nada̱i̱xü̃ca̱x. Rü nüma ga Chíriaanearü churaragü rü naxcha̱xwa nibuxmü.
15 Rü yexguma yema Amóü̃tanüxü̃ nüxü̃ daugügu nax yema Chíriaanearü churaragü rü Iraétanüxü̃cha̱xwa yabuxmüxü̃, rü nüma ga Amóü̃tanüxü̃ rü ta Abichái ga Yoá naenexẽcha̱xwa nibuxmü, rü ĩanearü aixepegu naxücu. Rü yexguma ga Yoá rü Yerucharéü̃ca̱x nataegu.
16 Rü yexguma yema Chíriaanearü churaragü nüxü̃ icua̱xãchitanügu nax Iraétanüxü̃ nüxü̃ rüporamaegüxü̃, rü yema Eufrátearü tocutüwa yexmagüxü̃ ga Chíriaanearü churaragüca̱x yéma namugagü nax nüxü̃ yanangü̃xẽẽgüxü̃ca̱x. Rü yema churaragümaxã icuáxü̃ nixĩ ga Chofá ga Adáx-échearü churaragüeru.
17 Natürü Dabímaxã nüxü̃ nixugüe ga yema Chíriaanearü churaragü ügüxü̃. Rü yexgumatama ga nüma ga Dabí rü guxü̃ma ga Iraétanüxü̃arü churaragüxü̃ inamuãchitanü. Rü natü ga Yudáü̃wa nichoü̃ nax yema Chíriaanearü churaragüpe̱xegu nügü yanuxü̃ca̱x. Rü nüma ga Dabí rü inayanu ga norü churaragü nax Chíriaanearü churaragümaxã nügü nada̱i̱xü̃ca̱x.
18 Rü nüma ga Chíriaanearü churaragü rü düxwa Iraétanüxü̃cha̱xwa nibuxmü. Rü yema ngunexü̃gu rü Dabí nanadai ga 40,000 ga churaragü ga nacutügu ĩxü̃, rü 7,000 ga churaragü ga caru ga dairuü̃gu ĩxü̃. Rü ñu̱xũchi nayama̱x ga Chofá ga Chíriaanearü churaragümaxã icuáxü̃.
19 Rü yexguma yema Adáx-échewa ügüxü̃ ga churaragü nüxü̃ daugügu nax Iraétanüxü̃arü churaragü nüxü̃ rüporamaegüxü̃, rü Dabína nacagü nax nügümaxã nangüxmüxẽẽxü̃ca̱x. Rü yemaca̱x Dabíme̱xẽwa nügü nayexmagüxẽxẽ. Rü yemawena ga yema Chíriaanecüã̱x rü tama Amóü̃tanüxü̃xü̃ narüngü̃xẽẽgüchaü̃.
