1 Crónicas 21:1-30
21 Rü nüma ga Chataná rü Iraéanecüã̱xgümaxã nanu, rü yemaca̱x Dabíãẽwa ínananguxẽxẽ nax Iraéanecüã̱xgüxü̃ yaxugüxü̃ca̱x.
2 Rü nüma ga Dabí rü nanamu ga Yoá rü norü churaragüarü ãẽ̱xgacügü rü ñanagürü nüxü̃: —¡Ẽcü ipexĩãchi rü peyaxugü i ngẽma Iraéanecüã̱xgü! ¡Rü ĩane ya Bechébawa ipenaxügü nax peyaxugüxü̃ rü ñu̱xmatáta Dáü̃arü ĩanewa nangu! ¡Rü ngẽmawena rü ñu̱xũchi nua penange i napane nax nüxü̃ chacuáxü̃ca̱x nax ñuxre yixĩxü̃ i norü mu i ngẽma duü̃xü̃gü! —ñanagürü.
3 Natürü nüma ga Yoá rü nanangãxü̃ rü ñanagürü: —Ngẽxguma chi Cori ya Tupana naxwa̱xegu ¿rü taux ẽ̱xna nüxü̃́ natauxcha nax 100 e̱xpü̱xcüna yamuxẽxẽãxü̃ i norü duü̃xü̃gü? ¿Rü taux ẽ̱xna guxü̃ma i ngẽma duü̃xü̃gü rü chi cuxme̱xwa nangẽxmagüxü̃, Pa Ãẽ̱xgacüx? ¿Rü tü̱xcüü̃ i cumax i cunaxwa̱xexü̃ nax tayaxugüxü̃? ¿Rü ngẽmaãcü ẽ̱xna chixexü̃gu cunayixẽxẽchaü̃xü̃ i Iraétanüxü̃? —ñanagürü.
4 Natürü nüma ga ãẽ̱xgacü rü nanamuama, rü düxwa nüma ga Yoá rü nanaxü ga yema ãẽ̱xgacü namaxã nüxü̃ ixuxü̃. Rü inaxũãchi rü guxü̃ma ga Iraéanegu nixũgü. Rü yemawena rü Yerucharéü̃ca̱x nataegu.
5 Rü nüma ga Yoá rü Dabímaxã nüxü̃ nixu nax ñuxre yixĩxü̃ ga norü mu ga yema yatügü ga marü churarawa imexü̃. Rü Iraéanewa rü 1’100,000 wa nangu ga yema yatügü ga marü nagu imexü̃ nax churara yixĩgüxü̃, rü Yudáanewa rü 470,000 nixĩ.
6 Natürü tama nayaxugü ga yema Lebítanüxü̃ rü Bẽyamíü̃tanüxü̃, yerü nüma ga Yoá rü tama norü me nixĩ ga yema ãẽ̱xgacü nüxü̃ üxẽẽxü̃.
7 Rü nüma ga Tupana rü tama norü me nixĩ ga yema nax yaxugüxü̃ ga duü̃xü̃gü, rü yemaca̱x yema Iraétanüxü̃xü̃ napoxcu.
8 Natürü nüma ga Dabí rü Tupanamaxã nüxü̃ nixu ga yema norü chixexü̃ rü ñanagürü: —Aixcüma cupe̱xewa poraãcü chixexü̃ chaxü. Natürü cuxna chaca nax choxü̃́ nüxü̃ curüngü̃maxü̃ca̱x erü wüxi i duü̃xü̃ i naechitamare maxü̃xü̃ãcü íchanaxü —ñanagürü.
9 Rü yexguma ga Cori ya Tupana rü Dabíarü ucu̱xẽruxü̃ ga Gáxü̃ namu, yerü guma nixĩ ga Dabímaxã Tupanaarü orexü̃ ixucü. Rü nüma ga Tupana rü Gáxü̃ ñanagürü:
10 —¡Ẽcü Dabíxü̃tawa naxũ rü namaxã nüxü̃ yarüxu i ñaa tomaepü̱x i poxcu nax nüxü̃ yaxuxü̃ca̱x rü ngexü̃rüüxü̃ i ngẽma poxcu nixĩ i nanaxwa̱xexü̃ nax namaxã chanapoxcuexü̃ i Iraétanüxü̃! —ñanagürü.
11 Rü nüma ga Gáx rü Dabíxü̃tawa naxũ rü ñanagürü nüxü̃: —Cori ya Tupana rü cumaxã nüxü̃ nixu i tomaepü̱x i poxcu nax cuma nüxü̃ quixuxü̃ rü ngexü̃rüüxü̃ yixĩxü̃ i ngẽma cuma cunaxwa̱xexü̃.
12 Rü wüxi nixĩ nax tomaepü̱x ya taunecü taiya ngẽxmaxü̃ i Iraéanewa. Rü to nixĩ nax tomaepü̱x ya tauemacügu perü uanügü pexü̃ daixü̃. Rü to nixĩ nax tomaepü̱x i ngunexü̃ Cori ya Tupana ínanguxẽẽxü̃ i da̱xaweane rü ngẽma norü duü̃xü̃ i daxũcüã̱x rü poraãcü nachixexẽẽxü̃ i guxü̃ma i Iraéanewa. Rü ñu̱xma rü chanaxwa̱xe nax chomaxã nüxü̃ quixuxü̃ rü ngexü̃rüüxü̃ yixĩxü̃ i ngẽma cuma cunaxwa̱xexü̃ nax namaxã nüxü̃ chixuxü̃ca̱x ya yimá cuxü̃tawa choxü̃ mucü —ñanagürü.
13 Rü nüma ga Dabí rü Gáxü̃ nangãxü̃ rü ñanagürü: —Ñu̱xma rü taxü̃ma i guxchaxü̃ chauétü nangu. Rü cha̱u̱xca̱x narümemae nax Tupaname̱xẽgu changuxü̃ erü nüma rü poraãcü nüxü̃́ tangechaü̃tümüxü̃. Erü tama chanaxwa̱xe nax tórü uanügüme̱xẽgu iyi̱xixü̃ —ñanagürü.
14 Rü yexguma ga nüma ga Cori ya Tupana rü Iraétanüxü̃ca̱x yéma nanamu ga da̱xaweane rü 70,000 ga Iraéanecüã̱xgü nayue.
15 Rü nüma ga Tupana rü yema da̱xaweanemaxã yéma nanamu ga wüxi ga daxũcüã̱x ga norü orearü ngeruxü̃ nax yemamaxã Yerucharéü̃cüã̱xü̃ nada̱i̱xü̃ca̱x. Natürü yexguma marü Yerucharéü̃wa nanguxchaü̃gu nax duü̃xü̃güxü̃ nada̱i̱xü̃ ga yema daxũcüã̱x, rü nüma ga Cori ya Tupana rü nüxü̃́ nangechaü̃tümüxü̃ ga duü̃xü̃gü, rü yemaca̱x nüxna nachogü ga yema daxũcüã̱x rü ñanagürü nüxü̃: —¡Rü marütama nax cunada̱i̱xü̃! —ñanagürü nüxü̃. Rü nüma ga yema daxũcüã̱x rü marü guma Yebútanüxü̃ ga Onáü̃ trigu ipuxü̃wa nayexma ga yexguma Tupana nüxna chogügu.
16 Rü nüma ga Dabí rü daxũgu nadawenü, rü nüxü̃ nadau ga yema daxũcüã̱x ga Cori ya Tupanaarü orearü ngeruxü̃. Rü daxũguxü̃ ga naane rü ñoma i naanearü ngãxü̃wa nayexma namaxã ga norü tara ga naxchixü̃wa natuxuchixü̃. Rü Yerucharéü̃guama namaxã nabuenüchacüxü. Rü yemaca̱x nüma ga Dabí rü guxü̃ma ga yema Iraétanüxü̃arü ãẽ̱xgacügü rü témüxü̃ ga naxchirugu icu̱xgüxü̃ rü ñaxtüanegu nanangücuchitanü rü yemaacü Tupanaxü̃ naca̱a̱xü̃gü.
17 Rü nüma ga Dabí rü Tupanaxü̃ naca̱a̱xü̃ rü ñanagürü: —Choma nixĩ ga chanamuxü̃ ga nax yaxugüxü̃ ga duü̃xü̃gü. Rü choma nixĩ i chixexü̃ chaxüxü̃ rü chanaxüxü̃ i pecadu. ¿Rü ta̱xacürü chixexü̃ naxüe i ñaa duü̃xü̃gü rü ngẽmaca̱x cunadai? Pa Corix, Pa Chorü Tupanax, cuxna chaca nax choxü̃ rü chauxacügüxü̃waxi nax cupoxcuxü̃, rü marütama nax cunada̱i̱xü̃ i duü̃xü̃gü —ñanagürü.
Dabí nanaxü ga wüxi ga ãmarearü guruxü̃
18 Rü yexguma ga nüma ga yema daxũcüã̱x ga Tupanaarü orearü ngeruxü̃ rü Gáxü̃ namu nax Dabímaxã nüxü̃ yanaxuxü̃ca̱x nax Tupanaca̱x wüxi ga ãmarearü guruxü̃ naxüxü̃ nagu ga yema nachica ga Onáü̃ ga Yebútanüxü̃ nawa trigu púxü̃.
19 Rü yexguma ga nüma ga Dabí rü nanaxü ga yema Cori ya Tupanaégagu Gáx namaxã nüxü̃ ixuxü̃.
20 Rü nüma ga Onáü̃ rü norü trigu ínapu̱x. Rü yexguma nügüweama nada̱u̱xgu rü nüxü̃ nadau ga yema daxũcüã̱x ga Tupanaarü orearü ngeruxü̃. Natürü guma ãgümücü ga nane ga namaxã yéma nayexmacü rü nibuxmü rü nicu̱xgü ga yexguma nüxü̃ nadaugügu.
21 Rü yexguma Dabí Onáü̃xü̃tawa nguxgu, rü nüma ga Onáü̃ rü Dabíxü̃ nadawenü. Rü yexguma Dabíxü̃ yacua̱xãchigu, rü nüma ga Onáü̃ rü ínaxũxũ ga trigu ínapúxü̃wa rü Dabípe̱xegu nanangücuchi.
22 Rü yexguma ga nüma ga Dabí rü ñanagürü nüxü̃: —¡Choxna naxã i ñaa nachica i trigu nawa cupúxü̃ nax ngẽxma Cori ya Tupanaca̱x chanaxüxü̃ca̱x i wüxi i ãmarearü guruxü̃! ¡Rü ngẽma cunaxwa̱xexü̃xe̱xpü̱x choxü̃ namaxã nataxe, rü tá cuxü̃́ chanaxütanü nax ngẽmaãcü yaxũgachixü̃ca̱x i ngẽma da̱xaweane i duü̃xü̃gü namaxã yuexü̃! —ñanagürü.
23 Rü nüma ga Onáü̃ rü Dabíxü̃ nangãxü̃ rü ñanagürü: —Pa Ãẽ̱xgacüx ¡ẽcü nayaxu i ñaa naane rü nagu naxü i ta̱xacü i cuma cunaxwa̱xexü̃! Rü choma tá cuxna chanamugü i ñaa woca iyatüxü̃gü nax ngẽma Tupanaca̱x ícuguxü̃ca̱x. Rü yimatama naixmena̱xãgü ya trigu namaxã chapoxü̃nemaatama naxüxüxü̃. Rü ñaatama trigu rü wüxigu ngẽma wocagümaxã rü cuxna chanaxãmare nax Tupanana cuxãmarexü̃ca̱x, Pa Ãẽ̱xgacüx —ñanagürü.
24 Natürü nüma ga ãẽ̱xgacü ga Dabí rü nanangãxü̃ rü ñanagürü: —Moxẽ cuxna chaxã, natürü chanaxwa̱xe nax naxca̱x cuxü̃ chataxexü̃ rü chomaxã cuxãtanüxü̃ i guxü̃ma i ngẽma. Rü tama chanaxwa̱xe i ngetanüãcüma cuxna chanayaxuxü̃ i ngẽma cuxrü ixĩxü̃, erü tama chanaxwa̱xe i ta̱xacü i choxü̃́ ngetanüxü̃ Cori ya Tupanaca̱x íchagu —ñanagürü.
25 Rü nüma ga Dabí rü Onáü̃axü̃́ nanaxütanüama. Rü 600 tachinü ga diẽru ga úiru ngĩxca̱x nüxna ngĩxü̃ naxã.
26 Rü yexma Tupanaaxü̃́ nanaxü ga ãmarearü guruxü̃ rü yéma ínanagu ga ãmaregü ga norü chixexü̃arü ütanüruxü̃ nax Tupanaxü̃ nangüxmüxẽẽxü̃ca̱x. Rü ñu̱xũchi Cori ya Tupanamaxã nidexa rü nüxü̃ naca̱a̱xü̃. Rü nüma ga Cori ya Tupana rü nanangãxü̃ rü daxũguxü̃ ga naanewa üxüema narünguxẽxẽ, rü yema ãmarearü guruxü̃étügu nangu.
27 Rü nüma ga Cori ya Tupana rü yema daxũcüã̱xü̃ namu nax naxchixü̃gu yaxǘcuchiãxü̃ca̱x ga norü tara.
Dabí rü nüxü̃ naxuneta ga Tupanapata ga taxü̃nechica
28 Rü yexguma nüxü̃ nada̱u̱xgu ga Dabí nax Cori ya Tupana nüxü̃ ngãxü̃xü̃ nawa ga yema nachica ga Onáü̃ ga Yebútanüxü̃ trigu nawa púxü̃, rü wena yéma Tupanaca̱x ínanagu ga ãmaregü.
29 Rü yema ngunexü̃gügu ga guma Tupanapata rü yema ãmarearü guruxü̃ ga naxnücüanexü̃gu Moiché üxü̃ne, rü marü Gabaóü̃arü ma̱xpǘnewa nayexma.
30 Natürü nüma ga Dabí rü taxucürüwa Gabaóü̃wa naxũ nax yéma Tupanaca̱x ãmare yanaguxü̃ca̱x rü Tupanana yaca̱xaxü̃ca̱x, yerü namuü̃ ga yexguma nüxü̃ nada̱u̱xgu ga norü tara ga yema Tupanaarü orearü ngeruxü̃.
