1 Crónicas 23:1-32
23 Rü nüma ga Dabí rü marü naya, rü yemaca̱x nane ga Charomóü̃xü̃ naxuneta nax nachicüxü Iraétanüxü̃maxã inacuáxü̃ca̱x.
2 Rü yexguma nanexü̃ yamucuchigu rü nanangutaque̱xexẽxẽ ga guxü̃ma ga Iraéanearü ãẽ̱xgacügü, rü chacherdótegü rü Lebítanüxü̃.
3 Rü nayaxugü ga yema Lebítanüxü̃ ga 30 ga taunecü rüe̱xna yexera nüxü̃́ yexmagüxü̃. Rü yexguma yaxugüã̱gu, rü guxü̃wama 38,000 wa nangu ga yema iyatüxü̃.
4 Rü yematanüwa rü nüxü̃ naxuneta ga 24,000 ga yatügü nax Tupanapata ga taxü̃nearü puracümaxã inacua̱xgüxü̃. Rü nüxü̃ naxuneta ga 6,000 nax duü̃xü̃güarü ãẽ̱xgacügü yixĩgüxü̃ca̱x rü guxchaxü̃arü mexẽẽruü̃gü yixĩgüxü̃ca̱x.
5 Rü nüxü̃ naxuneta ga to ga 4,000 nax ĩã̱xarü dauruü̃gü yixĩgüxü̃ca̱x, rü to ga 4,000 nax Cori ya Tupanaxü̃ yacua̱xüü̃güxü̃ca̱x namaxã ga yema paxetaruü̃gü ga Dabí woetama yemaca̱x duü̃xü̃güxü̃ íxüxü̃xẽẽxü̃.
6 Rü Dabí rü tomaepü̱xtücumügu inayanu ga yema Lebítanüxü̃. Rü wüxitücumü nixĩ ga Lebí nane ga Guerchóü̃tücumü, rü to nixĩ ga Lebí nane ga Queáxtücumü, rü to nixĩ ga Lebí nane ga Merarítücumü.
Guerchóü̃tücumü
7 Rü Guerchóü̃ nanegü rü taxre nixĩ: Ladáü̃ rü Chimí.
8 Rü Ladáü̃ nanegü rü tomaepü̱x nixĩ. Rü gumá yacü rü Yeié nixĩ, rü gumá naigü rü Chetáü̃, rü Yoé nixĩ.
9 Rü Chimí rü ta nüxü̃́ nayexma ga tomaepü̱x ga nanegü: Cheromíx, rü Achié rü Aráü̃. Rü gumágü nixĩ ga Ladáü̃taagümaxã icua̱xgücü.
10 Rü Chimí rü to ga ãgümücü ga nanegü nüxü̃́ nayexma: Yáax, rü Chichá, rü Yeú rü Beriá. Rü yema ãgümücü rü Chimí nanegü nixĩ.
11 Rü gumá yacü ga nane nixĩ ga Yáax rü gumáwe ücü ga nane nixĩ ga Chichá. Natürü ga Yeú rü Beriá rü tama namu ga nanegü, rü yemaca̱x yexguma yaxugüã̱gu rü yema taxre rü wüxitücümawatama naxügü.
Queáxtanüxü̃
12 Rü Queáx nanegü rü ta rü ãgümücü nixĩ: Amráü̃, rü Ichá, rü Ebróü̃ rü Uchié.
13 Rü Amráü̃ nanegü nixĩ ga Aróü̃ rü Moiché. Rü Cori ya Tupana nüxü̃ naxuneta ga Aróü̃ nax nape̱xewa ãmare i üünexü̃arü guruxü̃ yixĩxü̃ca̱x rü pumarate̱xearü guruxü̃ yixĩxü̃ca̱x. Rü yexgumarüxü̃ ta nüxü̃ naxuneta nax nüxü̃́ napuracüxü̃ca̱x rü duü̃xü̃gümaxã mexü̃ naxueguxü̃ca̱x. Rü yema nixĩ ga puracü ga Tupana Aróü̃na rü nanegüna rü nataagüna naxãxü̃ nax guxü̃gutáma naxügüãxü̃ca̱x.
14 Rü Moiché ga Cori ya Tupanaarü duü̃ rü ñu̱xũchi nataagü rü Lebítanüxü̃tanüwa nanaxǘgüxẽxẽ.
15 Rü Moiché nanegü nixĩ ga Guerchóü̃ rü Eriéche.
16 Rü Guerchóü̃ nane ga nüxíraü̃cü nixĩ ga Chebué.
17 Rü Eriéche nane ga nüxíraü̃cü nixĩ ga Reabía. Rü guxicatama nixĩ ga nane ga Eriéche. Natürü ga Reabía nanegü rü namu.
18 Rü Ichá nane ga nüxíraü̃cü nixĩ ga Cheromíx.
19 Rü Ebróü̃ nanegü nixĩ ga Yeraía ga nüxíraü̃cü. Rü Amaría nixĩ ga norü taxre. Rü Yaachié nixĩ ga norü tomaepü̱x. Rü Yecamáü̃ nixĩ ga norü ãgümücü.
20 Rü Uchié nanegü rü taxre nixĩ. Rü Micaía nixĩ ga nüxíraü̃cü, rü Ichía nixĩ ga norü taxre.
Merarítanüxü̃
21 Rü Merarí nanegü nixĩ ga Mári rü Muchí. Rü Mári nanegü nixĩ ga Ereachá rü Chíx.
22 Rü Ereachá rü nayu rü nangene. Rü ngexü̃güxica nixĩ ga naxacügü. Rü ngĩma ga naxacügü rü ngĩnepü ga Chíx nanegümaxãtama iyaxãte.
23 Rü Muchí nanegü rü tomaepü̱x nixĩ: Mári, rü Édex rü Yerimóx.
Lebítanüxü̃arü puracü
24 Rü yemagü nixĩ ga Lebítanüxü̃ ga natanüxü̃maxã icua̱xgüxü̃ rü poperagu ümatüégaxü̃ ga yexguma yaxugügüãgu ga yema Lebítanüxü̃ ga 20 ga taunecü rüe̱xna yexera nüxü̃́ yexmagüxü̃. Rü yemagü nixĩ ga Tupanapata ga taxü̃nearü puracüwa puracüexü̃.
25 Rü nüma ga Dabí rü ñanagürü: —Cori ya Tupana ya Iraétanüxü̃arü Tupana rü taãẽwa nanangexmagüxẽxẽ i norü duü̃xü̃gü. Rü nüma ya Tupana nanaxwa̱xe nax guxü̃gutáma Yerucharéü̃gu naxãpataxü̃.
26 Rü ngẽmaca̱x i ñu̱xma i Lebítanüxü̃ rü taxũtáma marü nuxica nanangegü ya Tupanapata ya naxchirunaxca̱x rü guxü̃ma i norü ngẽmaxü̃gü i Tupanaxü̃ namaxã yacua̱xüü̃güxü̃ —ñanagürü ga Dabí.
27 Rü yemaacü yema Dabí naxwa̱xexü̃ãcü nixugü ga Lebítanüxü̃ ga 20 ga taunecü rüe̱xna yexera nüxü̃́ yexmagüxü̃.
28 Rü yema Lebítanüxü̃ rü nanaxü ga yema Tupanapata ga taxü̃nearü puracügü ga Aróü̃tanüxü̃ ga chacherdótegü nagu namugüxü̃. Rü nüxna nadaugü ga naã̱xtügü ga Tupanapata ga taxü̃ne rü norü ucapugü. Rü nayayauxgü ga Tupanapata ga taxü̃nearü yemaxü̃gü ga ixüünexü̃. Rü yexgumarüxü̃ ta nanaxügü ga guxü̃ma ga toomachigü ga puracü ga Tupanapata ga taxü̃newa naxügüxü̃.
29 Rü nümagü ga Lebítanüxü̃ nixĩ ga naxügüãxü̃ rü namaxã inacua̱xgüxü̃ ga paũ ga ixüünexü̃ ga mea inumaxü̃. Rü namaxã inacua̱xgü ga trigute̱xe ga Tupanaarü ãmareca̱x ixĩxü̃, rü yema paũ ga ngearü pu̱xẽẽruü̃ã́xü̃. Rü yexgumarüxü̃ ta namaxã inacua̱xgü ga yema Tupanaarü ãmare ga paũ ga piripáü̃wa íguxü̃, rü yema paũchara ga Tupanaarü ãmareca̱x ixĩxü̃. Rü yexgumarüxü̃ ta namaxã inacua̱xgü ga guxü̃ma ga yáruü̃gü rü ngugüruü̃gü.
30 Rü nümagü ga Lebítanüxü̃ rü nanaxwa̱xe nax guxü̃ma ga pa̱xmama rü yáuanecü Tupanapata ga taxü̃newa nayexmagüxü̃ nax Cori ya Tupanana moxẽ naxãgüxü̃ca̱x rü nüxü̃ yacua̱xüü̃güxü̃ca̱x,
31 Rü yexgumarüxü̃ ta ga yema Lebítanüxü̃ rü nanaxwa̱xegü nax chacherdótegüxü̃ nangü̃xẽẽgüxü̃ ga yexguma Cori ya Tupanaca̱x naxü̃nagü ínagugügu ga ngü̃xchigaarü ngunexü̃gu, rü yexwaca̱xü̃cü ga tauemacü ngo̱xgu, rü to ga petagü ga Tupanaca̱x naxüchigagügu. Rü yemaacü guxü̃guma Tupanaca̱x napuracüe ga yema Lebítanüxü̃ yexguma nawa nanguxgu nax naxügüãxü̃ ga Tupanaarü puracü ga nüxna ügüxü̃.
32 Rü yexgumarüxü̃ ta naxme̱xwa nayexma nax nüxna nadaugüxü̃ ya Cori ya Tupanapata ga taxü̃ne, rü yema ucapu ga üünexü̃, rü yema baú ga Tupanaarü mugüchixü̃. Rü yemaacü ga yema Lebítanüxü̃ rü nanaxü ga yema Tupanapata ga taxü̃nearü puracügü wüxigu namaxã ga natanüxü̃ ga Aróü̃taagü ga chacherdótegü.
