1 Crónicas 27:1-34
27 Rü yema Iraétanüxü̃arü churaragü rü 12 tücumügu nitoye. Rü wüxitücumüwachigü rü 24,000 ga churaragü nayexma. Rü yema churaragümaxã icua̱xgüxü̃ nixĩ ga yema yatügü ga natanüxü̃arü ãẽ̱xgacügü ixĩgüxü̃. Rü yema churaraerugütanüwa nayexma ga yema 1,000 ga churaragümaxã icua̱xgüxü̃, rü yema 100 ga churaragümaxã icua̱xgüxü̃, rü yema churaragüerugü ga Dabíaxü̃́ puracüexü̃. Rü guxcüma ga taunecügu rü yema wüxitücumüchigü rü wüxitama ga tauemacü nixĩ ga nadauxü̃taegüxü̃.
2 27:2-3 Rü Fáretanüxü̃ ga Yachobeáü̃ ga Chadié nane nixĩ ga yema nüxíratücumü ga 24,000 ga churaragümaxã icuáxü̃. Rü Yachibeáü̃me̱xẽwa nayexmagü ga guxü̃ma ga yema churaragüarü ãẽ̱xgacügü ga gumá nüxíraü̃cü ga tauemacügu puracüexü̃.
3 Nüü̃ nadau 27:2
4 Rü Dodái ga Aótanüxü̃ nixĩ ga namaxã icuáxü̃ ga yema norü taxretücumü ga 24,000 ga churaragü ga gumá norü taxre ga tauemacügu puracüexü̃.
5 Rü Benaía rü chacherdóte ga Yoiadá nane nixĩ. Rü Benaía nixĩ ga namaxã icuáxü̃ ga yema norü tomaepü̱xtücumü ga 24,000 ga churaragü ga gumá norü tomaepü̱x ga tauemacügu puracüexü̃.
6 Rü nüma ga Benaía rü yema 30 ga yexera rüporamaexü̃tanüwa nayexma rü namaxã inacua̱x. Rü nane ga Amichabá rü yema norü tomaepü̱xtücumüwa nayexma.
7 Rü nüma ga Achaé ga Yoáenexẽ nixĩ ga namaxã icuáxü̃ ga yema norü ãgümücütücumü ga 24,000 ga churaragü ga gumá norü ãgümücü ga tauemacügu puracüexü̃. Rü nawena rü nane ga Chebadía nixĩ ga namaxã icuáxü̃.
8 Rü nüma ga Chamúx ga Ichátanüxü̃ nixĩ ga namaxã icuáxü̃ ga yema norü wüxime̱e̱xpü̱xtücumü ga 24,000 ga churaragü ga gumá norü wüxime̱e̱xpü̱x ga tauemacügu puracüexü̃.
9 Rü nüma ga Irá ga Iqué nane ga Tecóacüã̱x nixĩ ga namaxã icuáxü̃ ga yema norü 6 tücumü ga 24,000 ga churaragü ga gumá norü 6 ga tauemacügu puracüexü̃.
10 Rü nüma ga Efraíü̃tanüxü̃ ga Ére ga Peróü̃cüã̱x nixĩ ga namaxã icuáxü̃ ga yema norü 7 tücumü ga 24,000 ga churaragü ga gumá norü 7 ga tauemacügu
11 Rü nüma ga Chératanüxü̃ ga Chibecái ga Uchácüã̱x nixĩ ga namaxã icuáxü̃ ga yema norü 8 tücumü ga 24,000 ga churaragü ga gumá norü 8 ga tauemacügu puracüexü̃.
12 Rü nüma ga Bẽyamíü̃tanüxü̃ ga Abiéche ga Anatócüã̱x nixĩ ga namaxã icuáxü̃ ga yema norü 9 tücumü ga 24,000 ga churaragü ga gumá norü 9 ga tauemacügu puracüexü̃.
13 Rü nüma ga Chératanüxü̃ ga Maarái ga Netopácüã̱x nixĩ ga namaxã icuáxü̃ ga yema norü 10 tücumü ga 24,000 ga churaragü ga gumá norü 10 ga tauemacügu puracüexü̃
14 Rü nüma ga Efraíü̃tanüxü̃ ga Benaía ga Piratóü̃cüã̱x nixĩ ga namaxã icuáxü̃ ga yema norü 11 tücumü ga 24,000 ga churaragü ga gumá norü 11 ga tauemacügu puracüexü̃.
15 Rü nüma ga Otoniétanüxü̃ ga Yedái ga Netopácüã̱x nixĩ ga namaxã icuáxü̃ ga yema norü 12 tücumü ga 24,000 ga churaragü ga gumá norü 12 ga tauemacügu puracüexü̃.
Ãẽ̱xgacügü ga Iraétanüxü̃tücumügümaxã icua̱xgüxü̃
16 Rü ñaagü nixĩ ga yema ãẽ̱xgacügü ga wüxichigü ga Iraétanüxü̃tücumügümaxã icua̱xgüxü̃: Rü yema Rubéü̃tücumümaxã icuáxü̃ nixĩ ga Eriéche ga Chicrí nane. Rü yema Chimeóü̃tücumümaxã icuáxü̃ nixĩ ga Chepatía ga Maacá ngĩne.
17 Rü yema Lebítücumümaxã icuáxü̃ nixĩ ga Achabía ga Quemué nane. Rü yema Aróü̃tanüxü̃maxã icuáxü̃ nixĩ ga Chadóx.
18 Rü yema Yudátücumümaxã icuáxü̃ nixĩ ga Eriú ga Dabíenexẽ. Rü yema Ichacátücumümaxã icuáxü̃ nixĩ ga Omrí ga Micaé ngĩne.
19 Rü yema Chaburóü̃tücumümaxã icuáxü̃ nixĩ ga Imaía ga Adía nane. Rü yema Netarítücumümaxã icuáxü̃ nixĩ ga Yerimóx ga Arié nane.
20 Rü yema Efraíü̃tücumümaxã icuáxü̃ nixĩ ga Ochéa ga Achachía nane. Rü yema norü ngãxü̃tücumü ga Manachétanüxü̃maxã icuáxü̃ nixĩ ga Yoé ga Pedaía nane.
21 Rü yema to ga norü ngãxü̃tücumü ga Manachétanüxü̃ ga Garaáxanewa yexmagüxü̃maxã icuáxü̃ nixĩ ga Idó ga Chacaría nane. Rü yema Bẽyamíü̃tücumümaxã icuáxü̃ nixĩ ga Yaachié ga Abnéx nane.
22 Rü yema Dáü̃tücumümaxã icuáxü̃ nixĩ ga Acharé ga Yeruáü̃ nane. Rü yemagü nixĩ ga yema Iraétücumügüarü ãẽ̱xgacügü.
23 Rü nüma ga Dabí rü tama nayaxugü ga yema tauta 20 ga taunecü nüxü̃́ yexmagüxü̃, yerü Cori ya Tupana rü marü nanaxuegu nax yamuxẽẽãxü̃ ga yema Iraétanüxü̃, ñoma ẽtagü ya daxũguxü̃ i naanewa ngẽxmagücürüxü̃.
24 Rü nüma ga Yoá ga Cheruiá ngĩne rü inanaxügü nax yaxugüaxü̃ ga duü̃xü̃gü, natürü tama nüxü̃́ nagu̱x, yerü yemagagu ga Tupana rü wüxi ga taxü̃ ga guxchaxü̃ Iraétanüxü̃ca̱x ínangu̱xẽxẽ. Rü yemaca̱x nixĩ nax tama Dabíarü poperawa nangóxü̃ nax ñuxre yixĩxü̃ ga norü mu ga yema duü̃xü̃gü.
Ãẽ̱xgacügü ga Dabí nüxü̃ unetaxü̃
25 Rü yema ãẽ̱xgacüarü diẽrumaxã icuáxü̃ nixĩ ga Amábe ga Adié nane. Rü Yonatáü̃ ga Uchía nane nixĩ ga namaxã icuácü ga guma ĩpatagü ga ãẽ̱xgacüarü yemaxü̃gü nagu nuxü̃ne ga naanewa yexmagüne, rü ĩanegüwa yexmagüne, rü ĩanexacügüwa yexmagüne, rü yema dauxü̃taechicagü ga Iraéanearü üyeanegüwa yexmagüne.
26 Rü Echarí ga Querúx nane nixĩ ga namaxã icuácü ga yema Iraétanüxü̃ ga ãẽ̱xgacüarü naanewa puracüexü̃.
27 Rü Chimí ga Ramácüã̱x nixĩ ga yema úbanecügüwa puracüexü̃maxã icuácü. Rü Chadí ga Chepáü̃cüã̱x nixĩ ga namaxã icuácü ga guma ĩpatagü ga nagu namaxã nanguxü̃cü ga bínugü.
28 Rü Baá-anáü̃ ga Yédex nane nixĩ ga namaxã icuácü ga yema oribunecügü rü yema igunecügü ga doxonexü̃ ga Cheféraanewa yexmagüxü̃. Rü Yoá nixĩ ga namaxã icuácü ga guma ĩpatagü ga nagu namaxã nanguxü̃güxü̃ ga oribuarü chíxü̃.
29 Rü Chitrái ga Charóü̃cüã̱x nixĩ ga namaxã icuácü ga yema wocagü ga doxonexü̃ ga Charóü̃wa yexmagüxü̃. Rü Chapáx ga Adái nane nixĩ ga namaxã icuáxü̃ ga yema wocagü ga togü ga doxonexü̃güwa yexmagüxü̃.
30 Rü Óbi ga Ismaétanüxü̃ nixĩ ga namaxã icuácü ga yema caméyugü. Rü Yeedía ga Merunúcüã̱x nixĩ ga namaxã icuácü ga yema búrugü.
31 Rü Yachí ga Agátanüxü̃ nixĩ ga namaxã icuácü ga yema carnérugü. Rü guxü̃ma ga yemagü nixĩ ga ãẽ̱xgacü ga Dabíarü yemaxü̃gümaxã icua̱xgüxü̃.
32 Rü Yonatáü̃ ga Dabínepü nixĩ ga norü ucu̱xẽruxü̃. Rü nüma rü wüxi ga yatü ga mea naãẽxü̃ cuácü nixĩ. Rü Yeié ga Axmoní nane nixĩ ga ãẽ̱xgacü nanegüarü dauruxü̃.
33 Rü Aitópe nixĩ ga nai ga norü ucu̱xẽruxü̃ ga Dabí. Rü Uchái ga Arquítanüxü̃ nixĩ ga yatü ga Dabí nüxna rüyoecü.
34 Rü Aitópechicüxü nachocu ga Yoiadá ga Benaía nane, rü Abiatá. Rü Yoá nixĩ ga Dabíarü churaragümaxã icuácü.
